དགའ་ལྡན་ཁྲི་ཐོག་ ༡༠༥ པ་གསེར་ཁྲིར་མངའ་གསོལ་མཛད།

ཤར་རྩེ་ཆོས་རྗེ་རིན་པོ་ཆེ་རྗེ་བཙུན་བློ་བཟང་རྡོ་རྗེ་དཔལ་བཟང་པོ་མཆོག་དགའ་ལྡན་ཁྲི་ཐོག་ ༡༠༥ པར་གསེར་ཁྲིར་མངའ་གསོལ་གྱི་མཛད་སྒོ་ཟབ་རྒྱས་འཚོགས་ཡོད་འདུག

དེ་རིང་སྔ་དྲོར་དགའ་ལྡན་ཁྲི་ཐོག་ཁང་དུ་ཤར་རྩེ་ཆོས་རྗེ་རིན་པོ་ཆེ་རྗེ་བཙུན་བློ་བཟང་རྡོ་རྗེ་དཔལ་བཟང་པོ་མཆོག་དགའ་ལྡན་ཁྲི་ཐོག་ ༡༠༥ པར་གསེར་ཁྲི་མངའ་གསོལ་མཛད་ཡོད་པ་དང་། སྐབས་དེར་དགའ་ལྡན་བླ་སྤྱི་དང་། གདན་ས་གསུམ་གྱི་གྲྭ་ཚང་ ༦ དང་རྒྱུད་གྲྭ་སྟོད་སྨད་གཉིས།  བཀྲ་ཤིས་ལྷུན་པོ་དགོན་པ། ར་སྟོད་དགོན་སོགས་ཀྱི་མཁན་ལས་ཟུར་རྣམ་པ་དང་། བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གི་དབུས་ལྷོ་སྤྱི་འཇིགས་མེད་ཚུལ་ཁྲིམས་ལགས་དང་། མོན་གྷོ་འདོད་རྒུ་གླིང་གི་ས་གནས་མགོ་འཛིན་བསྟན་འཛིན་ཟླ་སྒྲོན་ལགས། དེ་བཞིན་གྲྭ་ཚང་ཁག་གི་ཕྱག་མཛོད་རྣམ་པ་དང་དད་ལྡན་དོན་གཉེར་ཅན་གྱི་མི་མང་བཅས་འཛོམས་ཡོད་འདུག

དེ་རིང་གསེར་ཁྲིར་མངའ་གསོལ་གྱི་མཛད་སྒོ་གྲུབ་མཚམས་དགའ་ལྡན་ཁྲི་ཐོག་ ༡༠༥ པ་ཤར་རྩེ་ཆོས་རྗེ་རིན་པོ་ཆེ་རྗེ་བཙུན་བློ་བཟང་རྡོ་རྗེ་དཔལ་བཟང་པོ་མཆོག་ནས་དད་ལྡན་སེར་སྐྱ་མི་མང་ལ་ལམ་རིམ་གྱི་གསུང་ཆོས་བསྩལ་གནང་ཡོད་འདུག

ཁ་སང་ཕྱི་ཚེས་ ༢༥ ཉིན་རྗེ་བཙུན་བློ་བཟང་རྡོ་རྗེ་དཔལ་བཟང་པོ་མཆོག་དགའ་ལྡན་ཤར་རྩེ་ཕུ་ཁང་ཁང་ཚན་དང་དགའ་ལྡན་བླ་སྤྱི་རུ་ཕེབས་བསུ་དང་། དགའ་ལྡན་རྣམ་པར་རྒྱལ་བའི་གླིང་གི་རྟེན་གཙོའི་མདུན་དུ་སྐུ་ཕྱག་དང་ཐུགས་སྨོན་གནང་གྲུབ་རྗེས་ཕུ་ཁང་ཁང་ཚན་དུ་ཕེབས་སྟོན་མཛད་སྒོ་བསྐྱངས། སང་ཉིན་ཕྱི་ཚེས་ ༢༧ ཉིན་གྱི་སྔ་དྲོར་དགའ་ལྡན་ཁྲི་ཐོག་ཁང་དུ་དགའ་ལྡན་ཁྲི་རིན་པོ་ཆེ་མཆོག་དང་ཁྲི་ཟུར་རིན་པོ་ཆེ་མཆོག་རྣམ་གཉིས་ལ་་མཎྜལ་རྟེན་གསུམ་འདེགས་འབུལ་ཞུས་ཏེ་བརྟན་བཞུགས་བསྟར་འབུལ་ཞུ་རྒྱུ་ཡིན་འདུག

ཟླ་འདིའི་ཕྱི་ཚེས་ ༢༥ ནས་ ༣༠ བར་ཉིན་གྲངས་དྲུག་རིང་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་རྒྱ་གར་ལྷོ་ཕྱོགས་ཀ་ན་ཌ་ཀ་མངའ་སྡེའི་མོན་གྷོ་འདོད་རྒུ་གླིང་བོད་མིའི་གཞིས་ཆགས་སུ་གཞུང་འབྲེལ་ཕྱོགས་ཕེབས་གནང་བཞིན་ཡོད་པ་ལྟར། དེ་རིང་གསེར་ཁྲིར་མངའ་གསོལ་གྱི་མཛད་སྒོའི་ཐོག་སྲིད་སྐྱོང་མཆོག་ནས་མཎྜལ་རྟེན་གསུམ་འདེགས་འབུལ་ཞུས་ཡོད་འདུག མཛད་སྒོ་གྲོལ་རྗེས་སྲིད་སྐྱོང་མཆོག་གིས་རྒྱ་གར་བོད་དོན་རྒྱབ་སྐྱོར་ཚོགས་པའི་ཚོགས་མི་ཁག་ཅིག་ལ་མཇལ་འཕྲད་དང་བློ་གསལ་གླིང་ཚན་རིག་ལྟེ་གནས་ཁང་དུ་འཚམས་གཟིགས་བཅས་གནང་ཡོད་འདུག དེ་བཞིན་སྤྲུལ་སྐུ་སྐལ་བཟང་ཐུབ་བསྟན་རིན་པོ་ཆེས་བཙུགས་པའི་སྤྱན་རས་གཟིགས་སློབ་གྲྭ་བཅས་སུ་འཚམས་གཟིགས་གནང་ཡོད་འདུག

སྲིད་སྐྱོང་མཆོག་གི་ཕྱོགས་ཕེབས་སྐོར་ལ་མོན་གྷོ་འདོད་རྒུ་གླིང་གི་ས་གནས་མགོ་འཛིན་བསྟན་འཛིན་ཟླ་སྒྲོན་ལགས་ཀྱིས་འདི་གའི་གསར་འགོད་པར་འགྲེལ་བརྗོད་གནང་བ་ལྟར་ན། སྲིད་སྐྱོང་མཆོག་སང་ཉིན་བརྟན་བཞུགས་མཛད་སྒོར་ཕེབས་རྒྱུ་ཡིན་པ་དང་། དེ་བཞིན་ཕྱི་ཚེས་ ༢༨ ཉིན་བློ་གསལ་གླིང་གྲྭ་ཚང་དུ་དགའ་ལྡན་གསེར་ཁྲི་མངའ་གསོལ་གྱི་མཛད་སྒོ་འཚོག་རྒྱུ་ཡིན་པས་སྲིད་སྐྱོང་མཆོག་ཕེབས་ཀྱི་ཡོད་འདུག

མོན་གྷོ་འདོད་རྒུ་གླིང་ས་གནས་མགོ་འཛིན་ལགས་ཀྱིས། བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ནས་སྔོན་མ་མོན་གྷོ་འདོད་རྒུ་གླིང་ས་གནས་སུ་ཐེངས་གཉིས་ཕེབས་རྒྱུ་ཡིན་གསུངས་པ་བཞིན། ཐེངས་འདིའི་ཕྱོགས་ཕེབས་འཚམས་གཟིགས་ནང་ས་གནས་ཀྱི་གྲོང་སྡེ་ཁག་ནང་སྐོར་སྐྱོད་ཀྱིས་མི་མང་རྣམས་ལ་ཐུག་འཕྲད་གནང་རྒྱུ་དང་། ས་གནས་ཁྱབ་ཁོངས་ཀྱི་སྨན་ཁང་དང་། སློབ་གྲྭ རྒན་གསོ་ཁང་། གཞུང་དང་གཞུང་ཁོངས་མིན་པའི་ཚོགས་སྡེ་ཁག་ཏུ་འཚམས་གཟིགས་དང་མི་མང་ལ་གསུང་བཤད་གནང་རྒྱུ་ཡིན་འདུག

 ཁ་སང་ཕྱི་ཚེས་ ༢༥ ཉིན་སྲིད་སྐྱོང་མཆོག་རྒྱ་གར་ལྷོ་ཕྱོགས་ཧུབ་ལིར་གནམ་ཐང་དུ་ཕེབས་འབྱོར་བྱུང་ཡོད་ཅིང་། སྐབས་དེར་ལྷོ་སྤྱི་འཇིགས་མེད་ཚུལ་ཁྲིམས་ལགས་དང་། མོན་གྷོ་འདོད་རྒུ་གླིང་གི་ས་གནས་མགོ་འཛིན་བསྟན་འཛིན་ཟླ་སྒྲོན་ལགས། དགའ་ལྡན་ཁྲི་ཐོག་ཁང་གི་བྱང་ཆུབ་རྒྱལ་མཚན་ལགས། དགའ་ལྡན་བླ་སྤྱིའི་ཕྱག་མཛོད་བྱམས་པ་རྒྱལ་མཚན་ལགས། ས་གནས་འཐུས་ཚོགས་ཀྱི་ཚོགས་གཙོ། ས་གནས་རང་བདེན་ཚོགས་ཆུང་གི་དྲུང་ཆེ། ས་གནས་མཉམ་འབྲེལ་འགན་འཛིན་བཅས་ནས་ཕེབས་བསུ་ཞུས་ཡོད་འདུག་ལ། མོན་གྷོ་འབྲས་སྤུངས་སྒོ་མང་བཀྲ་ཤིས་ཁང་གསར་མགྲོན་ཁང་དུ་ཕེབས་འབྱོར་སྐབས་དགོན་སྡེ་ཁག་གི་སྐུ་ཚབ་དང་། ས་གནས་ཀྱི་གཞུང་དང་གཞུང་ཁོངས་མིན་པའི་ཚོགས་སྡེ་ཁག་གི་སྐུ་ཚབ་སོགས་ཀྱིས་ཕེབས་བསུ་ཞུས་ཡོད་འདུག

གསར་འགོད་པ། བྱམས་པ་ཚེ་རིང་།

རྩོམ་སྒྲིག་བྱེད་མཁན། པདྨ་མཚོ།