ཨོ་གླིང་གི་བྱིས་པ་ལོ་ ༡༦ མན་གྱིས་སྤྱི་ཚོགས་བརྒྱུད་ལམ་བཀོལ་སྤྱོད་བྱ་རྒྱུ་བཀག་སྡོམ་བྱས།

ཨོ་གླིང་གཞུང་གིས་རྒྱལ་ཡོངས་སུ་ལོ་ ༡༦ མན་གྱི་བྱིས་པ་ཚོས་སྤྱི་ཚོགས་བརྒྱུད་ལམ་བཀོལ་སྤྱོད་བཀག་སྡོམ་བྱ་རྒྱུའི་ཁྲིམས་གཏན་འབེབ་བྱས་ཡོད་པ་དང་། དེ་ནི་འཛམ་གླིང་གི་ཆེས་དམ་དྲག་ཆེ་བའི་ཁྲིམས་ཤིག་ཡིན་འདུག

བྷི་བྷི་སི་གསར་ཁང་གིས་གནས་ཚུལ་སྤེལ་བ་ལྟར་ན།  ཟླ་འདིའི་ཕྱི་ཚེས་ ༢༩ ཉིན་ཨོ་གླིང་གྲོས་ཚོགས་ཀྱིས་ཨོ་གླིང་རྒྱལ་ཡོངས་སུ་ལོ་བཅུ་དྲུག་མན་གྱི་ལོ་ཆུང་བྱིས་པ་ཚོས་སྤྱི་ཚོགས་བརྒྱུད་ལམ་བེད་སྤྱོད་བྱེད་ཆོག་མིན་ཐད་འོས་བསྡུ་བྱེད་སྐབས། རྒྱབ་སྐྱོར་གྱི་འོས་གྲངས་ ༣༤ དང་ངོས་ལེན་མེད་པའི་འོས་ ༡༩ བཅས་ཆགས་ཏེ་མང་མོས་ཐོག་ནས་ཁྲིམས་གཏན་འབེབ་བྱུང་ཞིང་། འབྱུང་འགྱུར་ཟླ་བཅུ་གཉིས་ཀྱི་རྗེས་ནས་དངོས་སུ་ལག་བསྟར་བྱ་རྒྱུ་ཡིན་འདུག

གཏན་འབེབ་བྱས་པའི་ཁྲིམས་ལུགས་ལྟར་ན། ཨོ་གླིང་རྒྱལ་ཡོངས་སུ་ལོ་བཅུ་དྲུག་མན་གྱི་ལོ་ཆུང་བྱིས་པ་ཚོས་སྤྱི་ཚོགས་བརྒྱུད་ལམ་བེད་སྤྱོད་བྱེད་མི་ཆོག་ཅིང་། གལ་སྲིད་བྱིས་པ་ཞིག་གིས་ཐབས་ལམ་འདྲ་མིན་སྤྱད་ནས་བེད་སྤྱོད་བྱས་པ་ཡིན་ན་ད་ལྟའི་ཆར་ཉེས་ཆད་དམིགས་བསལ་གང་ཡང་མེད་པ་རེད། འོན་ཀྱང་། ཨོ་གླིང་གི་སྤྱི་ཚོགས་བརྒྱུད་ལམ་བཀག་སྡོམ་གྱི་ཁྲིམས་དེར་རྒྱལ་སྤྱིའི་སྤྱི་ཚོགས་བརྒྱུད་ལམ་ཁང་ཁག་ནས་མཉམ་ལས་གཞོལ་འདེགས་མ་བྱས་ཚེ། ཨོ་སྒོར་ས་ཡ་ ༥༠ བར་ཉེས་ཆད་གཅོད་རྒྱུའི་ཐག་གཅོད་བླངས་ཡོད་འདུག

སྤྱི་ཚོགས་བརྒྱུད་ལམ་བཀག་སྡོམ་གྱི་ཁྲོད་དུ། ད་སྔ་རྒྱལ་སྤྱིའི་སྤྱི་ཚོགས་བརྒྱུད་ལམ་ཁག་གང་དག་ཡོད་མེད་གཞུང་འབྲེལ་གཏན་འབེབ་མེད་ནའང་། ཨོ་གླིང་གི་འབྲེལ་གཏུག་བློན་ཆེན་རའོ་ལན་ཌི་  (Michelle Rowland) ལགས་ཀྱིས། བཀག་སྡོམ་བྱེད་ལ་ཉེ་བའི་སྤྱི་ཚོགས་བརྒྱུད་ལམ་ཁག་གི་ཁྲོད། ངོ་དེབ་དང་ཨིན་སི་ཊ་གྷི་རམ་ (Instagram)། ཨེག་སི (X)། ཊིག་ཊོག་དང་སི་ནབ་ཆ་ཊི་(Snapchat)། ད་དུང་རྩེད་རིགས་ཀྱི་བརྒྱུད་ལམ་ཁག་དང་བརྡ་འཕྲིན་འཇོག་སའི་བརྒྱུད་ལམ་སོགས་ཡོད་སྐོར་བརྗོད་འདུག་པ་མ་ཟད། ཨོ་གླིང་འབྲེལ་གཏུག་བློན་ཆེན་ལས་ཁུངས་དང་དྲ་རྒྱ་དོ་དམ་ཚན་པ་གཉིས་གྲོས་བསྡུར་ཐོག་གཏན་འཁེལ་བྱ་རྒྱུ་ཡིན་འདུག

ཨོ་གླིང་གི་སྲིད་བློན་ཨན་ཐོ་ནེ་ (Anthony Albanese) ལགས་ཀྱིས། ཨོ་གླིང་གཞུང་གིས་ཕ་མ་ཚོའི་སེམས་ཁུར་ལྟར་བྱིས་པ་ཚོ་དྲ་རྒྱའི་གནོད་སྐྱོན་ལས་ཐར་ཐབས་སུ་ཁྲིམས་བཟོས་ཡོད་ཅེས་བརྗོད་འདུག་ལ། ཁྲིམས་དེ་ནི་བྱིས་པ་ཚོའི་འཚར་ལོངས་ཁྲོད་སྤྱི་ཚོགས་བརྒྱུད་ལམ་ཁག་བརྒྱུད་ནས་གནོད་སྐྱོན་དང་ཤུགས་རྐྱེན་ངན་པའི་རིགས་བཀག་སྡོམ་བྱེད་ཐབས་སུ་བཟོས་པ་ཞིག་ཡིན་པ་རེད།

ཡང་སྤྱི་ཚོགས་བརྒྱུད་བཀག་སྡོམ་ལ་མོས་མཐུན་མེད་མཁན་ཚོས། སྤྱི་ཚོགས་བརྒྱུད་ལམ་ཁག་ཇི་ལྟར་བཀག་སྡོམ་བྱ་རྒྱུ་ཡིན་པ་དང་། དེས་མི་སྒེར་དང་སྤྱི་ཚོགས་བར་གྱི་འབྲེལ་ལམ་ལ་དོ་ཕོག་བཟོ་ཡི་ཡོད་པའི་གནད་དོན་སོགས་སྣང་མེད་དུ་བཞག་ཡོད་སྐོར་བརྗོད་འདུག་ལ། དབྱེ་ཞིབ་པ་ཚོས་སྤྱི་ཚོགས་བརྒྱུད་ལམ་བཀག་སྡོམ་གྱི་ཁྲིམས་དེ་ནི་འཛམ་གླིང་གི་ཆེས་དམ་དྲག་ཆེ་བའི་ཁྲིམས་ཤིག་ཡིན་སྐོར་ཡང་བརྗོད་འདུག

ད་རེས་ཀྱི་ཁྲིམས་དེར་རྒྱབ་སྐྱོར་བྱེད་མཁན་གཙོ་ཆེ་བ་ནི་ཕ་མ་ཚོ་དང་བྱིས་པར་ལྟ་སྐྱོང་བྱེད་མཁན་རྣམས་ཡིན་ཞིང་། ཕ་མ་མང་པོ་ཞིག་གིས་དུས་ཡུན་རིང་པོར་རང་ཉིད་ཀྱི་བྱིས་པ་ངན་ལོབ་ཤོར་སའི་འཕྲུལ་རིགས་ཀྱི་མདུན་ངོས་ནས་མར་ལེན་མ་ཐུབ་པ་འམ། ཡང་ན་སྣང་འུ་ཐག་ཐབས་ཟད་ཀྱིས་རང་སོར་འཇོག་དགོས་པའི་དཀའ་ངལ་ལས་གྲོལ་བ་རེད་ཅེས་ཁྲིམས་དེར་རྒྱབ་སྐྱོར་བྱེད་མཁན་ཞིག་གིས་བརྗོད་འདུག

སྤྱི་ཚོགས་བརྒྱུད་ལམ་ཁག་བཀག་སྡོམ་གྱི་ཁྲིམས་གཏན་འབེབ་བྱས་པ་དང་ངོ་དེབ་དང་ཨེག་སི། གྷོ་གྷལ་སོགས་ཀྱིས་ཨོ་གླིང་གཞུང་གི་ཐག་གཅོད་དེར་སྐྱོན་བརྗོད་བྱས་འདུག འདས་ལོར་ཧྥ་རན་སིས་ལོ་བཅོ་ལྔ་མན་གྱི་བྱིས་པ་ཚོས་སྤྱི་ཚོགས་བརྒྱུད་ལམ་བེད་སྤྱོད་བྱེད་མི་ཆོག་པའི་ཁྲིམས་བཟོས་ཡོད་ཀྱང་། བྱིས་པ་མང་པོ་ཞིག་གིས་(VPN) བེད་སྤྱད་ཀྱིས་སྤྱི་ཚོགས་བརྒྱུད་ལམ་ཁག་བཀོལ་སྤྱོད་བྱེད་བཞིན་ཡོད་པ་ཉམས་ཞིབ་པས་བརྗོད་འདུག

ཨོ་གླིང་ནང་བཞིན་ཨ་རིའི་མངའ་སྡེ་ཨོ་ཊྭ་ (Utah) ནང་སྤྱི་ཚོགས་བརྒྱུད་ལམ་བཀག་སྡོམ་གྱི་ཁྲིམས་ཤིག་བཅའ་ཁྲིམས་ལ་མི་མཐུན་པའི་ངོས་འཛིན་འོག་རྩིས་མེད་བཏང་ཡོད་ཅིང་། ཉེ་ལམ་ནས་ནོར་ཝེའི་ནང་སྤྱི་ཚོགས་བརྒྱུད་ལམ་ཁག་བཀག་སྡོམ་གྱི་ཁྲིམས་ཤིག་ངེས་པར་དགོས་འདུན་ཤུགས་ཆེ་བྱུང་ཡོད་ལ། ད་དུང་དབྱིན་ཇིའི་གཞུང་གིས་སྤྱི་ཚོགས་བརྒྱུད་ལམ་ཁག་བཀག་སྡོམ་གྱི་ཁྲིམས་ཤིག་གྲོས་ཚོགས་ནང་གླེང་སློང་བྱེད་བཞིན་པ་ཡིན་འདུག

གསར་འགོད་པ། སྐལ་བཟང་སྦྱིན་པ།