༧སྐྱབས་རྗེ་ཀུན་བདེ་གླིང་རྟ་ཚག་རྗེ་དྲུང་རིན་པོ་ཆེ་མཆོག་གིས་གཞོན་སྐྱེས་ཚོས་བོད་པའི་ཆོས་དང་རིག་གཞུང་སྲུང་སྐྱོབ་དགོས་རྒྱུ་ཧ་ཅང་གལ་ཆེན་ཡིན་པ་མ་ཟད་འཛམ་གླིང་སྤྱི་ལ་ལེགས་སྐྱེས་ཆེན་པོ་ཕུལ་ཐུབ་རྒྱུའི་ནུས་པ་ཡོད་ཅེས་གསུངས།
ཁ་སང་ཕྱི་ཚེས་ ༣ ནས་ ༧ བར་ཉིན་གྲངས་ལྔའི་རིང་སྦེལ་ཀོབ་མཉམ་འབྲེལ་གྱི་ཚོགས་ཁང་དུ་བོད་ཀྱི་གཞོན་ནུའི་མགོ་ཁྲིད་ཟབ་སྦྱོང་ཐེངས་ ༢༡ པ་འཚོག་མུས་ཡིན་པ་ལྟར། ཁ་སང་ཕྱི་ཚེས་ ༣ ཉིན་བོད་ཀྱི་གཞོན་ནུའི་མགོ་ཁྲིད་ཟབ་སྦྱོང་ཐེངས་ ༢༡ པའི་དབུ་འབྱེད་མཛད་སྒོའི་སྟེང་སྐུ་མགྲོན་གཙོ་བོ་༧སྐྱབས་རྗེ་ཀུན་བདེ་གླིང་རྟ་ཚག་རྗེ་དྲུང་རིན་པོ་ཆེ་མཆོག་དང་། དམིགས་བསལ་སྐུ་མགྲོན་གཞོན་ལྷན་དབུས་རྒྱུན་ཟུར་པ་དང་ཁྲིམས་ཞིབ་པ་ཟུར་པ་དྭགས་པོ་བསོད་ནམས་ནོར་བུ་ལགས་་དང་ཁྲིམས་དྲུང་ཟླ་བ་ཆོས་སྒྲོན་ལགས། དབུས་རྒྱུན་ཟུར་པ་དང་སྤྱི་འཐུས་ལས་ཐོག་ཆོས་འཕེལ་ཐུབ་བསྟན་ལགས་དང་དཀོན་མཆོག་ཡར་འཕེལ་ལགས། གཞིས་ཆགས་རྙིང་པའི་ས་གནས་མགོ་འཛིན་དགེ་ལེགས་འབྱུང་གནས་ལགས་དང་གཞིས་ཆགས་གསར་པའི་ས་གནས་མགོ་འཛིན་འཆི་མེད་ལགས། དེ་བཞིན་སློབ་ཕྲུག་ ༣༠ ཙམ་མཉམ་ཞུགས་གནང་ཡོད་འདུག
དེ་རིང་འདི་གའི་གསར་འགོད་པས་ཁ་པར་བརྒྱུད་སྦེལ་ཀོབ་གཞོན་ནུའི་ཚོགས་གཙོ་ཐུབ་བསྟན་རབ་བརྟན་ལགས་སུ་ཟབ་སྦྱོང་འདི་འཚོགས་པའི་དགོས་དམིགས་གཙོ་བོ་གང་ཡིན་སྐོར་དྲིས་པར། ཁོང་གིས། ང་ཚོ་བོད་ཀྱི་ཆབ་དཔལ་རིག་གསུམ་གང་ཅིའི་ཆ་ནས་མ་འོངས་པར་མགོ་ཁྲིད་མཁན་དེ་ད་ལྟའི་ཆར་མཐོ་སློབ་ཏུ་འགྲིམས་བཞིན་པའི་ན་གཞོན་དེ་ཚོ་ཆགས་ཀྱི་ཡོད་པར་བརྟེན། ན་གཞོན་དེ་ཚོ་ལ་མགོ་ཁྲིད་ཟབ་སྦྱོང་སྤྲད་དེ་མ་འོངས་པར་སྣེ་ཁྲིད་ལེགས་པོར་བྱེད་ཐུབ་རྒྱུར་དམིགས་པ་ཞིག་ཡིན་པ་མ་ཟད། ད་ལྟ་མཐོ་སློབ་ཏུ་འགྲིམས་བཞིན་པའི་ན་གཞོན་མང་པོ་ཞིག་རྒྱ་གར་གྱི་མཐོ་སློབ་ཁག་ཏུ་སློབ་སྦྱོང་བྱེད་མུས་ཡིན་པས། བོད་ཀྱི་ཆོས་དང་རིག་གཞུང་། སྐད་ཡིག་སོགས་བརྗོད་གཞི་འདྲ་མིན་ཐོག་ཟབ་སྦྱོང་སྤྲད་ནས་ཁོང་ཚོར་བློ་སྐྱེད་གསར་པ་དང་སློབ་སྦྱོང་གསར་པ་རག་ཐུབ་རྒྱུའི་ཆེད་དུའང་དམིགས་པ་ཞིག་རེད། ཅེས་བརྗོད་བྱུང་།
དབུ་འབྱེད་མཛད་སྒོའི་སྟེང་༧སྐྱབས་རྗེ་ཀུན་བདེ་གླིང་རྟ་ཚག་རྗེ་དྲུང་རིན་པོ་ཆེ་མཆོག་གིས། གཞོན་ནུ་ཚོགས་པའི་ངོས་ནས་བཙན་བྱོལ་གྱི་སྒྲིག་འཛུགས་ནང་དུ་མགོ་ཁྲིད་སྐྱེད་སྲིང་གནང་རྒྱུའི་ཐོག་ལ་རླབས་ཆེན་གྱི་ནུས་པ་འདོན་ཐུབ་ཡོད། རླབས་ཆེན་གྱི་ནུས་པ་དེ་མགོ་ཁྲིད་སྐྱེད་སྲིང་གི་ཟབ་སྦྱོང་འཚོགས་པ་ཙམ་མིན་པར། དངོས་ཡོད་རང་གི་ཐོག་ནས་བཙན་བྱོལ་དུ་ཞབས་འདེབས་རླབས་ཆེན་འབུལ་མཁན་གྱི་མགོ་ཁྲིད་མི་སྣ་མང་པོ་སྐྱེད་སྲིང་གནང་ཡོད། བཙན་བྱོལ་གྱི་སྒྲིག་འཛུགས། དགའ་ལྡན་ཕོ་བྲང་གི་ཞབས་ཕྱི་ཞུ་མཁན། དེ་བཞིན་གཞུང་འབྲེལ་མ་ཡིན་པའི་ཚོགས་པ་གལ་ཆེན་མང་པོའི་ནང་དུ་དབུ་ཁྲིད་མཁན་མང་པོ་ཞིག་གཞོན་ནུ་ལྷན་ཚོགས་འདིའི་ནང་ནས་འབུར་དུ་ཐོན་ནས་ཕེབས་པ་ཞིག་ཆགས་ཀྱི་ཡོད་པས། དངོས་ཡོད་གནས་ཚུལ་ལ་ཚོགས་པ་ཁག་གཞན་ལས་ལྷག་པའི་མགོ་ཁྲིད་མང་པོ་སྐྱེད་སྲིང་གནང་ཡོད་པས་རླབས་ཆེན་རེད་བསམ་གྱི་འདུག རྒྱབ་ལྗོངས་དེའི་ཐོག་ནས་གཞོན་ནུ་ལྷན་ཚོགས་ངོས་ནས་མགོ་ཁྲིད་ཟབ་སྦྱོང་འདི་འདྲ་ཞིག་གོ་སྒྲིག་གནང་བ་དེ་འོས་ཤིང་འཚམ་པ་ཞིག་རེད་བསམ་གྱི་འདུག ད་བར་མགོ་ཁྲིད་ཟབ་སྦྱོང་ཐེངས་ ༢༠ གནང་ཟིན་ནས་དེ་རིང་འདིར་ཐེངས་མ་ ༢༡ པ་དབུ་འཛུགས་ཀྱི་ཡོད། དེ་རིང་ནས་ཉིན་ལྔའི་རིང་ལ་མགོ་ཁྲིད་ཟབ་སྦྱོང་འདི་དངོས་གནས་ཀྱིས་ཐུགས་ཕན་གསོས་པ་དང་ཕན་ཐོགས་རླབས་ཆེན་ཡོང་རྒྱུའི་རེ་བ་ཞུ་ཡི་ཡོད། ཅེས་གསུངས།
རིན་པོ་ཆེ་མཆོག་གིས། ང་ཚོའི་སྤྱི་ཚོགས་དང་རྒྱལ་ཁབ་སོགས་བསམ་བློ་ག་རེ་བཏང་ཡང་མགོ་ཁྲིད་ཟེར་བ་དེ་གལ་ཆེན་པོ་ཆགས་ཡོད། ད་ལྟའི་ཆར་འཛམ་གླིང་ནང་འགྱུར་བ་མང་པོ་ཞེ་དྲགས་འགྲོ་ཡི་ཡོད། དཔེ་མཚོན་ཞུས་པ་ཡིན་ན། ད་ལྟའི་སྐབས་ལ་འཛམ་གླིང་གི་ཆབ་སྲིད་ཀྱི་འགྱུར་ཕྱོགས་དེ་དམངས་གཙོའི་འགྱུར་ཕྱོགས་གཅིག་ལ་ཁ་ཕྱོགས་ནས་འགྲོ་བཞིན་ཡོད། དེ་སྔོན་འཛམ་གླིང་ནང་དབང་ཆ་གཅིག་སྡུད་ཀྱི་ལམ་ལུགས་ཧ་ཅང་གི་དར་ཁྱབ་བྱུང་བ་དང་། ད་ལྟ་སྤྱིའི་ཆ་ནས་འཛམ་གླིང་ནང་དམངས་གཙོ་འཕེལ་རྒྱས་ཀྱིས་འགྱུར་བ་ཆེན་པོ་འགྲོ་བཞིན་པ་དེ་ཡང་མི་སྣ་འགའ་ཤས་ཀྱིས་སྤྱི་ཚོགས་ཀྱི་སྣེ་འཁྲིད་དེ། དཀའ་ལས་མང་པོ་བསྐྱོན་པའི་འབྲས་བུར་བཟང་ཕྱོགས་ཀྱི་འགྱུར་བ་མང་པོ་ཞིག་འགྲོ་ཐུབ་པ་ཞིག་བྱུང་བ་རེད། དེ་ཡང་མི་ཁ་ཤས་ཀྱིས་མགོ་འཁྲིད་པ་ལ་བརྟེན་ནས་སྤྱི་ཚོགས་ཀྱི་ནུས་པ་གཅིག་ཏུ་སྤུངས་པ་ལ་བརྟེན་ནས་བྱུང་བ་རེད། དེ་ནང་བཞིན་གྱི་འཛམ་གླིང་འདིའི་ནང་ལ་ཕུན་སུམ་ཚོགས་པའི་གྲུབ་འབྲས་མང་པོ་ཞིག་བླ་ན་མེད་པའི་མགོ་ཁྲིད་དེ་ཚོས་དབུ་འཁྲིད་པ་ལ་བརྟེན་ནས་བྱུང་བ་ཞིག་ཆགས་ཀྱི་རེད། ལྷག་པར་དུ་བོད་མི་རིགས་ལ་མཚོན་ན། བོད་ཀྱི་ཆོས་དང་རིག་གཞུང་གང་ཅིའི་ཐད་ནས་ཕྱོགས་གཅིག་ནས་བལྟས་པ་ཡིན་ན་ཧ་ཅང་གི་ཛ་དྲག་པོ། དཀའ་ངལ། གཉན་འཕྲང་ཅན། བོད་ཀྱི་ལོ་རྒྱུས་ཀྱི་ནང་ལོགས་ལ་བྱུང་མ་མྱོང་བའི་གནས་སྟངས་དཀའ་ལས་ཁག་པོ་དེ་འདྲ་ཞིག་ཡོད་རེད་དེ། ཕྱོགས་གཅིག་ནས་ང་ཚོ་བོད་ཀྱི་ཆོས་དང་རིག་གཞུང་དེ་དག་ད་ལྟའི་སྐབས་སུ་ཉམས་མེད་པ་མ་ཟད། འཛམ་གླིང་གི་སྡིངས་ཆ་ཚད་མཐོ་བོར་བསླེབས་ཐུབ་པ་བྱུང་བསྡད་པ་ནི་བོད་མི་རིགས་ལ་བླ་ན་མེད་པའི་དབུ་ཁྲིད་༧སྐྱབས་མགོན་རྒྱལ་བ་ཡིད་བཞིན་ནོར་བུའི་ཐུགས་རྗེ་བཀའ་དྲིན་ལ་བརྟེན་ནས་བྱུང་བ་རེད། དཀའ་ངལ་དེ་འདྲ་གཅིག་ལས་བསྐྱབས་ཐུབ་པ་ཞིག་བྱུང་བ་རེད། རེ་བ་རླབས་ཆེན་གཅིག་གི་ཐོག་ལ་གནས་ཐུབ་པ་དེའང་ང་རང་ཚོར་དབུ་ཁྲིད་བླ་ན་མེད་པ་ཞིག་ཡོད་པ་ལ་བརྟེན་ནས་བྱུང་བ་ཞིག་ཆགས་ཀྱི་ཡོད། འདི་ང་རང་ཚོ་བོད་པའི་དཔེ་མཚོན་གསལ་ཤོས་ཤིག་རེད་བསམ་གྱི་ཡོད། དེར་བརྟེན་མགོ་ཁྲིད་ཟེར་བ་དེ་དངོས་གནས་ཀྱིས་གལ་ཆེན་པོ་ཆགས་ཀྱི་ཡོད། ཅེས་གསུངས།
ཡང་རིན་པོ་ཆེ་མཆོག་གིས། བོད་པའི་ཆོས་དང་རིག་གཞུང་སྲུང་སྐྱོབ་དང་མི་ཉམས་རྒྱུན་གནས་ཡོང་བ་དེ་མི་རིགས་གཅིག་གི་གནད་དོན་ཡིན་སྐོར་དང་། སྤྱི་ཚོགས་ཀྱི་ཐོག་ནས་བོད་མི་ཡོངས་ལ་འགན་ཡོད་ལ། ལྷག་པར་དུ་བོད་རིགས་གཞོན་སྐྱེས་ཀྱི་ནང་ནས་བཙན་བྱོལ་རང་དབང་ལུང་པར་བཞུགས་པའི་གཞོན་སྐྱེས་ཚོར་འགན་ཆེན་པོ་ཡོད་པས་གཞོན་སྐྱེས་རྣམས་གལ་ཆེན་པོ་ཆགས་ཀྱི་ཡོད། སྤྱི་ཚོགས་ནང་དུ་ནུས་པ་གང་ལ་གང་འཚམ་སྟོན་པ་དང་མགོ་ཁྲིད་ཐུབ་པར་ཆ་རྐྱེན་མང་པོ་ཞིག་ངེས་པར་དུ་ཚང་དགོས། དེ་ཡང་། ལྷག་བསམ་རྣམ་དག་དགོས་ཤིང་། བོད་མི་རིགས་ཀྱི་འདུ་ཤེས་མ་ཉམས་པའི་ཐོག་ནས་ད་ལྟའི་བོད་མི་རིགས་ཀྱི་དཀའ་ངལ་དང་། བོད་ཀྱི་ཆོས་དང་རིག་གཞུང་སྲུང་སྐྱོབ་གནང་རྒྱུའི་དགོས་པ་གལ་ཆེའི་རང་བཞིན་དེ་ཚོ་ཤེས་རྒྱུ་དང་། དེའི་ཐོག་ལ་ཕྱག་ལས་གནང་བའི་སྐབས་དངོས་ཡོད་གནས་ཚུལ་དང་མཐུན་ཐུབ་པ། དེ་བཞིན་བོད་དོན་ཞུ་གཏུག་གནང་སྟངས་དང་བོད་དོན་དྲིལ་བསྒྲགས་གནང་སྟངས་མཁྱེན་པ་ཞིག་དང་ནུས་པ་དང་ལྡན་པ་དགོས་རྒྱུ་སོགས་ཆ་རྐྱེན་ཚང་དགོས། དེར་བརྟེན་མགོ་ཁྲིད་ཟབ་སྦྱོང་དེ་འདྲ་ཞིག་ངེས་པར་དུ་དགོས་གལ་ཆེ་བ་དང་། ཟབ་སྦྱོང་ནང་མཉམ་ཞུགས་བྱེད་མཁན་སློབ་ཕྲུག་རྣམས་ཀྱིས་ཟབ་སྦྱོང་དུ་མཉམ་ཞུགས་བྱས་པ་ཡིན་ཟེར་བ་གཙོ་བོ་མིན་པར་ཟབ་སྦྱོང་གི་དགོས་པ་ལྟར་ཕན་ཐོགས་དགོས་རྒྱུ་དང་བློ་བསྐྱེད་ལེན་རྒྱུ་གལ་ཆེན་པོ་ཡིན་སྐོར་སོགས་གསུངས་སོང་།
ཀུན་བདེ་གླིང་རྟ་ཚག་རྗེས་དྲུང་རིན་པོ་ཆེ་མཆོག་གིས། ད་ལྟའི་བོད་ཀྱི་གནས་སྟངས་ཛ་དྲག་པོར་བསྡད་ཡོད་པས། བོད་ཀྱི་འཐབ་རྩོད་དང་། བོད་ཀྱི་ཆོས་དང་རིག་གཞུང་སྲུང་སྐྱོང་བྱ་རྒྱུ་གལ་ཆེན་པོ་ཆགས་ཀྱི་ཡོད། དེ་ཡང་བོད་པའི་ཆོས་དང་རིག་གཞུང་སྲུང་སྐྱོབ་དགོས་རྒྱུ་དེ་ཧ་ཅང་གི་གལ་ཆེན་པོ་ཆགས་ཀྱི་ཡོད་ལ། འཛམ་གླིང་སྤྱི་ལ་ལེགས་སྐྱེས་ཆེན་པོ་ཕུལ་ཐུབ་རྒྱུའི་ནུས་པ་ཡོད་པ་ཞིག་ཆགས་ཀྱི་ཡོད། ད་བར་གྲུབ་འབྲས་དེ་འདྲ་ཐོན་པ་དེ་གཙོ་བོ་༧སྐྱབས་མགོན་རྒྱལ་བ་ཡིད་བཞིན་ནོར་བུ་དང་། འདས་པའི་སྐབས་ཀྱི་མི་རབས་གོང་མ་མང་པོ་ཞིག་གིས་སྐུ་ལས་བསྐྱོན་པའི་གྲུབ་འབྲས་ལ་བརྟེན་ནས་བྱུང་བ་རེད། མ་འོངས་པར་གང་འདྲ་ཆགས་མིན་དེ་ད་ལྟའི་མི་ཐོགས་དང་ལྷག་པར་དུ་གཞོན་སྐྱེས་ཚོའི་ཕྱག་ལ་ཡོད་པས། གཞོན་སྐྱེས་ཚོ་དམིགས་བསལ་གྱིས་འགན་ཆེན་པོ་ཞིག་རེད། དེར་བརྟེན་ཚང་མས་དེ་ཚོ་ཐུགས་ལ་འཇོག་རོགས་གནང་། ཞེས་དང་། བོད་དོན་ལ་རྒྱབ་སྐྱོར་ཤུགས་ཆེན་གནང་མཁན་གྱི་མི་སྣ་གལ་ཆེན་པོ་ཁག་ཅིག་གིས། ད་ལྟའི་སྐབས་སུ་བོད་པའི་གནད་དོན་དེ་ཚོ་བོད་པ་རང་གིས་སྔར་ལས་ལྷག་རིག་པ་བསྒྲིམ་དགོས་ཀྱི་འདུག ལྷག་པར་དུ་གཞོན་སྐྱེས་ཚོ་མདུན་ལ་འདོན་ནས་བོད་དོན་ལས་འགུལ་སྤེལ་བ་དང་། རྒྱལ་སྤྱིའི་སྡིངས་ཆའི་སྟེང་བོད་དོན་ཞུ་གཏུག་སོགས་ཤུགས་ཆེན་པོ་བྱེད་དགོས་ཀྱི་འདུག ཞེས་ཚོར་བ་ཆེན་པོའི་ཐོག་ནས་གསུངས་ཀྱི་འདུག དེར་བརྟེན། ཁྱེད་ཚོས་ཟབ་སྦྱོང་འདི་བརྒྱུད་ནས་བསླབ་བྱ་དང་བློ་བསྐྱེད་གསར་པ་ལེན་ཐུབ་པ་དེ་ཚོ་ངེས་པར་དུ་ཐུགས་ལ་འཇོག་རོགས་གནང་། ཞེས་ལམ་སྟོན་གནང་སོང་།
དེ་རིང་ཕྱི་ཚེས་ ༤ ཉིན་གཞོན་ལྷན་གྱི་ཚོགས་གཞོན་བཀྲ་ཤིས་རྟགས་རྒྱས་ལགས་ཀྱིས་བོད་ཀྱི་གཞོན་ནུ་ལྷན་ཚོགས་ཀྱི་སྒྲིག་འཛུགས་ངོ་སྤྲོད་དང་། ཉིན་རྒྱབ་ཏུ་བོད་མི་མང་སྤྱི་འཐུས་རྡོ་རྗེ་ཚེ་བརྟན་ལགས་ཀྱིས་གཞོན་སྐྱེས་ཀྱི་འགན་འཁུར་དང་བོད་དོནལས་འགུལ་སྤེལ་ཕྱོགས་སྐོར་གསུང་བཤད་དང་གྲོས་བསྡུར་གནང་ཡོད་འདུག སང་ཉིན་ཕྱི་ཚེས་ ༥ ཉིན་ཝར་ཎ་སློབ་དཔོན་བྱམས་པ་བསམ་གཏན་ལགས་ཀྱིས་བོད་རང་བཙན་ཡིན་པའི་ཁུངས་སྐྱེལ་བདེན་དཔང་སྐོར་དང་། ཉིན་རྒྱབ་ཏུ་གཞོན་ལྷན་ཚོགས་ཟུར་དྭགས་པོ་བསོད་ནམས་ནོར་བུ་ལགས་ཀྱིས་བོད་དང་རྒྱལ་སྤྱིའི་ཆབ་སྲིད་གནས་བབ་སྐོར་གསུང་བཤད་དང་གྲོས་བསྡུར་གནང་རྒྱུ་དང་། ཕྱི་ཚེས་ ༦ ཉིན་བསྟན་འཛིན་བརྩོན་འགྲུས་ལགས་ཀྱིས་རང་བཙན་འཐབ་རྩོད་ཀྱི་གལ་གནད་དང་ལས་འགུལ་སྐབས་གསར་འགོད་པར་འབྲེལ་ལམ་བྱ་ཕྱོགས་སྐོར་གསུང་བཤད་གནང་གཏན་ཁེལ་འདུག ཕྱི་ཚེས་ ༧ ཉིན་རྒྱ་གར་ལྷོ་ཕྱོགས་སྐུ་ཚབ་ངག་དབང་བཀྲ་ཤིས་ལགས་ཀྱིས་དེང་སྐབས་དྲྭ་རྒྱའི་བདེ་འཇགས་ཐབས་ལམ་སྐོར་དང་། ཉིན་རྒྱབ་ཏུ་སྦེལ་ཀོབ་ས་གནས་གཞོན་ནུའི་ཚོགས་གཙོ་ཐུབ་བསྟན་རབ་བརྟན་ལགས་ཀྱིས་བོད་ཀྱི་སྐད་ཡིག་གི་གལ་གནད་སྐོར་གསུང་བཤད་དང་གྲོས་བསྡུར་གནང་རྒྱུ་ཡིན་འདུག
གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
