ལྕམ་ནན་སི་པོ་ལོ་སི་མཆོག་ལ་བདེན་པའི་སྒྲོན་མེའི་གཟེངས་རྟགས་ཕུལ།

རྒྱལ་སྤྱིའི་བོད་དོན་ལས་འགུལ་ཁང་གི་བདེན་པའི་སྒྲོན་མེའི་གཟེངས་རྟགས་དེ་ཡུན་རིང་བོད་དོན་རྒྱབ་སྐྱོར་བ་དང་ཨ་རིའི་གྲོས་ཚོགས་འོག་མའི་ཚོགས་གཙོ་ཟུར་བ་ལྕམ་ནན་སི་པོ་ལོ་སི་མཆོག་ལ་ཕུལ།

དེ་རིང་ཨ་རིའི་རྒྱལ་ས་ཝང་ཤིན་ཊོན་དུ་བྱང་ཨ་རིའི་སྐུ་ཚབ་དོན་གཅོད་ལས་ཁུངས་ཀྱིས་གོ་སྒྲིག་གནང་བའི་བྱང་ཨ་རིའི་བོད་རིགས་སྤྱི་མཐུན་ཚོགས་པའི་ཚོགས་ཆེན་ཐེངས་ ༢༢ པའི་མཇུག་སྡོམ་མཛད་སྒོའི་སྟེང་། རྒྱལ་སྤྱིའི་བོད་དོན་ལས་འགུལ་ཁང་གི་བདེན་པའི་སྒྲོན་མེའི་གཟེངས་རྟགས་དེ་ཨ་རིའི་གྲོས་ཚོགས་འོག་མའི་ཚོགས་གཙོ་ཟུར་བ་དང་ཡུན་རིང་བོད་དོན་ལ་རྒྱབ་སྐྱོར་གནང་མཁན་ལྕམ་ནན་སི་པོ་ལོ་སི་མཆོག་ལ་ཕུལ་སོང་།

༧གོང་ས་མཆོག་གིས་ནམ་རྒྱུན་ལྕམ་ནན་སི་པེ་ལོ་སི་མཆོག་ནི་མཛའ་བརྩེ་ཟབ་པའི་གྲོགས་པོ་ཞིག་དང་འདས་པའི་ལོ་མང་རིང་ལྷག་སེམས་རྣམ་དག་དང་བློ་སེམས་འགྱུར་མེད་ཀྱིས་བོད་ཀྱི་འཐབ་རྩོད་ཐོག་རྒྱབ་སྐྱོར་ཤུགས་ཆེན་བསྐྱོན་མཁན་ཞིག་ཡིན་ཞེས་གསུངས་ཡོད་པ་ལྟར། ལྕམ་ནན་སི་པེ་ལོ་སི་མཆོག་ནི་ཨ་རིའི་གྲོས་ཚོགས་འཐུས་མིའི་ནང་ནས་བོད་དང་བོད་མིར་དམིགས་བསལ་གྱི་འབྲེལ་ལམ་ཟབ་ཅིང་བོད་དོན་ལ་རྒྱུས་མངའ་དང་རྒྱབ་སྐྱོར་ཤུགས་ཆེན་གནང་མཁན་ཞིག་ཡིན་པ་དང་། ཕྱི་ལོ་ ༢༠༠༨ དང་ ༢༠༡༧། དེ་བཞིན་ ༢༠༢༤ ཟླ་ ༦ པ་བཅས་ཀྱི་ནང་ཁོང་གིས་ཨ་རིའི་གྲོས་ཚོགས་ཀྱི་སྐུ་ཚབ་ཚོགས་ཆུང་གི་སྣེ་འཁྲིད་དེ། བཞུགས་སྒར་དྷ་ས་ནས་༧གོང་ས་མཆོག་ལ་མཇལ་འཕྲད་དང་བོད་མིའི་སྒྲིག་འཛུགས་ཀྱི་གཙོས་ཉེ་འཁྲིས་བཙན་བྱོལ་བོད་མིའི་སློབ་གྲྭ་དང་ཚོགས་སྡེ་ཁག་བཅས་མི་མང་གི་བདེ་སྡུག་ལ་གཟིགས་ཞིབ་གནང་ཡོད་པ་མ་ཟད། རྒྱ་ནག་གི་གནོད་ཤུགས་ལ་མ་ལྟོས་པར། འདི་ལོའི་ཕྱི་ཟླ་ ༦ ཚེས་ ༡༨ ཉིན་བཞུགས་སྒར་དྷ་སར་ཕེབས་ཏེ། ཨ་རིའི་གྲོས་ཚོགས་ཀྱི་བོད་དོན་རྒྱབ་སྐྱོར་ཁྲིམས་ཡིག་དངོས་སུ་༧གོང་ས་མཆོག་ལ་སྤྱན་འབུལ་ཞུས་ཡོད་ལ། ཕྱི་ལོ་ ༢༠༡༥ ལོར་ཁོ་མོས་ཨ་རིའི་གྲོས་ཚོགས་ཀྱི་སྐུ་ཚབ་ཚོགས་ཆུང་ཞིག་གི་སྣེ་འཁྲིད་ཀྱིས། བོད་ནང་བསྐྱོད་དེ་བོད་ནང་གི་བོད་མིའི་གནས་སྟངས་ལ་གཟིགས་ཞིབ་གནང་ཡོད་པ་རེད།

ཕྱི་ལོ་ ༢༠༠༧ ལོར་ལྕམ་ནན་སི་པེ་ལོ་སི་མཆོག་གྲོས་ཚོགས་འོག་མའི་ཚོགས་གཙོ་ཐོག་མར་བདམས་ཐོན་བྱུང་སྟེ་ལོ་རྒྱུས་ནང་གྲོས་ཚོགས་འོག་མའི་བུད་མེད་ཚོགས་གཙོ་ཐོག་མ་ཆགས་ཡོད་ཅིང་། ཕྱི་ལོ་ ༢༠༢༡ ལོར་ལྕམ་ནན་སི་པེ་ལོ་སི་མཆོག་ཨ་རིའི་གྲོས་ཚོགས་འོག་མའི་ཚོགས་གཙོར་བདམས་ཐོན་བྱུང་བ་ཐེངས་ ༤ པ་ཆགས། ཕྱི་ལོ་ ༡༩༨༧ ལོ་ནས་ཨ་རིའི་གྲོས་ཚོགས་འཐུས་མི་དང་། ཕྱི་ལོ་ ༢༠༠༣ ནས་དམངས་གཙོ་ཚོགས་པའི་མགོ་འཁྲིད་གནང་ཞིང་། ཨ་རིའི་ལོ་རྒྱུས་ནང་གི་སྲིད་དོན་ཚོགས་པ་ཞིག་དབུ་འཁྲིད་གནང་མཁན་གྱི་བུད་མེད་ཐོག་མའང་ཆགས་ཡོད།

ཨ་རིའི་གྲོས་ཚོགས་འོག་མའི་ཚོགས་གཙོའི་ལས་ཡུན་སྐབས་དང་པོའི་རིང་། ལྕམ་ནན་སི་པེ་ལོ་སི་མཆོག་ནི་སྲིད་འཛིན་ཟུར་བ་ཨོ་བྷ་མའི་གཞུང་གི་ཆབ་སྲིད་དང་དཔལ་འབྱོར། དེ་བཞིན། འཕྲོད་བསྟེན་སོགས་དང་འབྲེལ་བའི་སྲིད་བྱུས་མང་དག་ཅིག་གི་རྒྱབ་རྟེན་ཤུགས་ཆེ་ཤོས་ཤིག་ཡིན་པ་དང་། ཕྱི་ལོ་ ༢༠༡༩ ལོར་ཁོང་མོ་སྐབས་གསུམ་པའི་ཚོགས་གཙོ་ཡིན་སྐབས། ཨ་རིའི་སྲིད་འཛིན་ཊོམ་ཕུ་ལགས་ཀྱིས་དབང་ཆ་ལོག་སྤྱོད་དང་གྲོས་ཚོགས་ཀྱི་ལས་དོན་ལ་འགལ་རྐྱེན་བཟོས་པ་སོགས་ཀྱི་ཁ་གཏད་དུ་ལངས་ཡོད་པ་རེད་ལ། ཨ་རིའི་མང་གཙོ་ཚོགས་པའི་གྲོས་ཚོགས་འཐུས་མི་རྣམས་དང་སྲིད་དོན་པ་མང་པོས་དགའ་མོས་བྱེད་སའི་ཆབ་སྲིད་མི་སྣ་ཞིག་ལ་ངོས་འཛིན་བྱེད་ཀྱི་ཡོད་འདུག

ལྕམ་ནན་སི་པོལ་སི་མཆོག་ནི་ཕྱི་ལོ་ ༡༩༤༠ ཟླ་ ༣ ཚེས་ ༢༦ ཉིན་ཨ་རིའི་མངའ་སྡེ་མའེ་རེ་ལན་ཌའི་གྲོང་ཁྱེར་ (Baltimore) ནང་སྐྱེས་ཤིང་། ཁོང་མོའི་པ་ལགས་ཐའོ་མ་སི་(Thomas D’Alesandro Jr) ལགས་ནི་མའེ་རེ་ལན་ཌིའི་གྲོས་ཚོགས་འཐུས་མི་དང་ཨ་མ་ (Anunciata D’Alesandro) ལགས་ནི་སྲིད་དོན་ཐོག་དོ་དབྱིངས་ཆེན་པོ་གནང་མཁན་ཞིག་ཡིན་སྟབས། ལྕམ་ནན་སི་པེ་ལོ་སི་མཆོག་ཆུང་དུས་ནས་ཕ་མ་གཉིས་ཀྱི་ཤུགས་རྐྱེན་འོག་ཨ་རིའི་ཆབ་སྲིད་ནང་ཞུགས། ཁོང་མོ་དང་བཟའ་ཟླ་པོལ་པེ་ལོ་སི་ (Paul Pelosi) གཉིས་ལ་བྱིས་པ་ལྔ་ཡོད།

གསར་འགོད་པ། སྐལ་བཟང་སྦྱིན་པ།