བོད་མི་མང་པོས་ལྕམ་སྐུ་པེ་ལོ་སི་མཆོག་མྱུར་དུ་དྲག་སྐྱེད་ཡོང་བའི་སྨོན་འདུན་ཞུ་བཞིན་འདུག

ཨ་རིའི་གྲོས་ཚོགས་ཀྱི་ཚོགས་གཙོ་ཟུར་བ་དང་བོད་ཀྱི་གྲོགས་པོ་ལྕམ་སྐུ་ནན་སི་པེ་ལོ་སི་མཆོག་གཤག་བཅོས་ལེགས་གྲུབ་བྱུང་སྟེ་ངལ་གསོ་གནང་མུས་ཡིན་འདུག

ཟླ་འདིའི་ཕྱི་ཚེས་ ༡༤ ཉིན་ཨ་རིའི་གྲོས་ཚོགས་ཀྱི་ཚོགས་གཙོ་ཟུར་བ་དང་བོད་དོན་རྒྱབ་སྐྱོར་བ་ལྕམ་སྐུ་པེ་ལི་སི་མཆོག་ཡུ་རོབ་ཀྱི་ནུབ་རྒྱུད་ལེ་སིམ་བྷུག་(Luxembourg) རྒྱལ་ཁབ་ཏུ་དམག་ཆེན་གཉིས་པ་མཇུག་སྒྲིལ་ནས་མི་ལོ་ ༨༠ འཁོར་བའི་དུས་དྲན་སྲུང་གཙིའི་གཞུང་འབྲེལ་ཕྱོགས་སྐྱོད་དུ་ཕེབས་སྐབས། སྐས་འཛེགས་ནས་བརྡབ་སྐྱོན་བྱུང་སྟེ་དཔྱི་མགོར་རྨས་སྐྱོན་ཕོག་ཡོད་པས། འཇར་མན་དམག་དོན་སྨན་ཁང་ཞིག་ནས་གཤག་བཅོས་བྱས་ཏེ་ལེགས་གྲུབ་བྱུང་ཡོད་ཀྱང་། གཞུང་འབྲེལ་ཕྱོགས་ཕེབས་གནང་ཐུབ་མེད་པ་རེད།

དེའི་ཐད་ལྕམ་སྐུ་པེ་ལོ་སི་མཆོག་གི་མགྲིན་ཚབ་པ་ཨི་རན་ཀེ་གྷར་( Ian Kreger) ལགས་ཀྱིས་བསྒྲགས་གཏམ་ཞིག་སྤེལ་བའི་ཁྲོད། པེ་ལོ་སི་མཆོག་གིས་ཨ་རི་བ་རྣམས་ཀྱི་ཡིད་སེམས་འགུལ་བར་བྱེད་པའི་སྨོན་འདུན་ལ་ཡིད་སྨོན་སྐྱེས་ཡོད་པའི་ཁར། ད་ལྟ་སྨན་བཅོས་ལེགས་གྲུབ་བྱུང་ནས་ངལ་གསོ་བྱེད་མུས་སྐོར་སོགས་གསལ་འདུག་ལ། ཁོང་མོས་ད་ལན་གྱི་དོན་རྐྱེན་དེའི་སྐབས་ཀྱི་སྨན་བཅོས་ཞབས་ཞུ་བ་དང་། རྒྱབ་སྐྱོར་བ་སོགས་ལ་ཐུགས་རྗེ་ཆེ་ཞུས་ཡོད་པ་མ་ཟད། ལྷད་མེད་པའི་མི་མང་གི་རྒྱབ་སྐྱོར་དང་རེ་བཞག་གིས་ཡིད་སེམས་འགུལ་དུ་བཅུག་ཡོད་སྐོར་སོགས་གསུངས་འདུག

འཛམ་གླིང་ས་ཕྱོགས་གང་སར་ཡོད་པའི་བོད་མི་ཚོས་ལྕམ་སྐུ་མཆོག་གང་མགྱོགས་བརྡབ་སྐྱོན་གྱི་རྨས་སྐྱོན་ལས་དྲག་སྐྱེད་ཡོང་བའི་སྨོན་ལམ་འདེབས་མུས་ཡིན་པ་ལྟར། བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་སྒེར་གྱི་ཨེག་སི་(X) དྲ་ལམ་སྟེང་། དོན་དམ་གྱི་དབུ་ཁྲིད་དང་བོད་ཀྱི་གྲོགས་པོ་ལྕམ་སྐུ་པེ་ལི་སི་མཆོག་གང་མགྱོགས་དྲག་སྐྱེད་ཡོང་བའི་སྨོན་འདུན་ཞུ་ཡི་ཡོད། ང་ཚོས་ཁྱེད་ཀྱི་སྙིང་སྟོབས་དང་སྙིང་རུས་ལ་རྟག་ཏུ་ཡིད་སྨོན་བྱེད་ཀྱི་ཡོད། ང་ཚོས་ཁྱེད་རང་གང་མགྱོགས་དྲག་སྐྱེད་བྱུང་སྟེ་རྒྱུན་ལྡན་གྱི་ངང་ནས་འགྲེང་ཐུབ་པའི་རེ་བ་བཅིང་མུས་ཡིན། ཐུགས་ལྕགས་གྱིས། ཞེས་གསུངས་འདུག་ལ། སྲིད་ཟུར་བློ་བཟང་སེངྒེ་ལགས་ཀྱིས་སྒེར་གྱི་ངོ་དེབ་ཏུ། ང་ཚོའི་ངེས་པ་དོན་གྱི་གྲོགས་པོ་བཟང་པོ་དབུ་ཁྲིད་ལྕམ་སྐུ་ནན་སི་པེ་ལོ་སི་མཆོག་ད་ལྟ་སྨན་ཁང་དུ་བསྡད་དགོས་བྱུང་ཡོད་པས། ངས་ང་ཚོའི་བོད་རིགས་སྤུན་ཟླ་ཚོར་ལྕམ་སྐུ་མཆོག་མགྱོགས་ནས་མྱུར་དུ་དྲག་སྐྱེད་ཡོང་སླད་གསོལ་བ་སྨོན་འདུན་གནང་རོགས་ཞུ་རྒྱུ་ཡིན། ལྕམ་སྐུ་མཆོག ང་ཚོ་ཚང་མས་སྐུ་ཉིད་ཀྱི་གནས་སྟངས་ཐད་ལ་བློ་འཚབ་བྱེད་ཀྱི་ཡོད། ཅེས་གསུངས་ཡོད་འདུག

ཟླ་འདིའི་ཕྱི་ཚེས་ ༩ ཉིན་ཨ་རིའི་རྒྱལ་ས་ཝང་ཤིན་ཊོན་དུ་བྱང་ཨ་རིའི་སྐུ་ཚབ་དོན་གཅོད་ལས་ཁུངས་ཀྱིས་གོ་སྒྲིག་གནང་བའི་བྱང་ཨ་རིའི་བོད་རིགས་སྤྱི་མཐུན་ཚོགས་པའི་ཚོགས་ཆེན་ཐེངས་ ༢༢ པའི་མཇུག་སྡོམ་མཛད་སྒོའི་སྟེང་། རྒྱལ་སྤྱིའི་བོད་དོན་ལས་འགུལ་ཁང་གི་བདེན་པའི་སྒྲོན་མེའི་གཟེངས་རྟགས་དེ་ཨ་རིའི་གྲོས་ཚོགས་ཀྱི་ཚོགས་གཙོ་ཟུར་བ་དང་ཡུན་རིང་བོད་དོན་ལ་རྒྱབ་སྐྱོར་གནང་མཁན་ལྕམ་ནན་སི་པོ་ལོ་སི་མཆོག་ལ་ཕུལ་སོང་། དེ་བཞིན་འདས་ལོའི་བོད་མི་མང་སྤྱི་འཐུས་ལྷན་ཚོགས་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ལྔ་པའི་སྟེང་། ལྕམ་སྐུ་ནེན་སི་པེ་ལོ་སི་ ( Nancy Pelosi) མཆོག་ལ་གཞུང་འབྲེལ་ཐུགས་རྗེ་ཆེ་ཞུ་བའི་གྲོས་ཆོད་དོན་ཚན་གསུམ་སྤྱི་མོས་ཀྱི་ཐོག་ནས་གཏན་འབེབས་བྱུང་ཡོད།

ལྕམ་སྐུ་མཆོག་ནི་ཨ་རིའི་གྲོས་ཚོགས་འཐུས་མིའི་ནང་ནས་བོད་དང་བོད་མིར་དམིགས་བསལ་གྱིས་འབྲེལ་ལམ་ཟབ་ཅིང་རྒྱུས་མངའ་ཆེ་བ། ཨ་རིའི་གྲོས་ཚོགས་ནང་བོད་དོན་ལ་རྒྱབ་སྐྱོར་གནང་མཁན་གྱི་དབུ་འཁྲིད་ཤུགས་ཆེ་ཤོས་ཤིག་ཡིན་པ་མ་ཟད། ཕྱི་ལོ་ ༢༠༡༥ ལོར་ཁོང་མོས་ཨ་རིའི་གྲོས་ཚོགས་ཀྱི་སྐུ་ཚབ་ཚོགས་ཆུང་ཞིག་གི་དབུ་འཁྲིད་དེ་བོད་ནང་དངོས་སུ་ཕེབས་ཏེ་བོད་མིའི་གནས་སྟངས་ལ་གཟིགས་ཞིབ་གནང་།  དེ་བཞིན་ཕྱི་ལོ་ ༢༠༠༨ ལོའི་ས་བྱི་ཞི་རྒོལ་སྐབས་བོད་དུ་ཕེབས་ཡོད་པ་མ་ཟད།  ཕྱི་ལོ་ ༢༠༡༧ ལོའི་ཟླ་ ༤ པའི་ནང་ཁོང་མོས་ཨ་རིའི་གྲོས་ཚོགས་ཀྱི་སྐུ་ཚབ་ཚོགས་ཆུང་གི་དབུ་འཁྲིད་དེ་བཞུགས་སྒར་དྷ་རམ་ས་ལ་རུ་༧གོང་ས་མཆོག་ལ་མཇལ་བཅར་དང་།   འདི་ལོར་ཡང་ཆེད་དུ་བཞུགས་སྒར་དུ་ཕེབས་ནས་ཨ་རིའི་བོད་དོན་དམིགས་བསལ་ཁྲིམས་འཆར་༧གོང་ས་རྒྱལ་བ་རིན་པོ་ཆེ་མཆོག་ལ་སྤྱན་འབུལ་ཞུས།

ལྕམ་ནན་སི་པོལ་སི་མཆོག་ནི་ཕྱི་ལོ་ ༡༩༤༠ ཟླ་ ༣ ཚེས་ ༢༦ ཉིན་ཨ་རིའི་མངའ་སྡེ་མའེ་རེ་ལན་ཌའི་གྲོང་ཁྱེར་བྷེལ་ཊི་མེར་(Baltimore) ནང་སྐྱེས་ཤིང་། ཁོང་མོའི་པ་ལགས་ཐའོ་མ་སི་(Thomas D’Alesandro Jr) ལགས་ནི་མའེ་རེ་ལན་ཌིའི་གྲོས་ཚོགས་འཐུས་མི་དང་ཨ་མ་ཨ་ཐུ་ན་ཀཱ་ (Anunciata D’Alesandro) ལགས་ནི་སྲིད་དོན་ཐོག་དོ་དབྱིངས་ཆེན་པོ་གནང་མཁན་ཞིག་ཡིན་སྟབས། ལྕམ་ནན་སི་པེ་ལོ་སི་མཆོག་ཆུང་དུས་ནས་ཕ་མ་གཉིས་ཀྱི་ཤུགས་རྐྱེན་འོག་ཨ་རིའི་ཆབ་སྲིད་ནང་ཞུགས། ཁོང་མོ་དང་བཟའ་ཟླ་པོལ་པེ་ལོ་སི་ (Paul Pelosi) གཉིས་ལ་བྱིས་པ་ལྔ་ཡོད།

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།