ལམ་འབྲས་ཚིག་མཛོད་ཆེན་མོ་དབུ་འབྱེད་གནང་། 

དཔལ་ས་སྐྱའི་རྩོམ་སྒྲིག་ཁང་དང་སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་གཉིས་ཀྱིས་ལམ་འབྲས་ཀྱི་ཚིག་མཛོད་དང་མཉེན་ཆས་དབུ་འབྱེད་གནང་། 

ཟླ་འདིའི་ཕྱི་ཚེས་ ༡༣ ཉིན་སྟོན་པ་བཅོམ་ལྡན་འདས་ཀྱི་འཁྲུངས་གནས་ལུམྦུནིའི་ཚལ་དུ་དཔལ་ས་སྐྱའི་སྨོན་ལམ་ཆེན་མོ་སྐབས་སོ་གསུམ་པ་འཚོག་མུས་ཡིན་པ་དང་བསྟུན། ས་སྐྱ་རྩོམ་སྒྲིག་ཁང་དང་སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་གཉིས་མཉམ་འབྲེལ་ཐོག་ཞུ་བསྒྲིགས་དང་འགྲེམས་སྤེལ་བྱས་པའི་ལམ་འབྲས་ཚིག་མཛོད་ཆེན་མོ་དང་མཉེན་ཆས་དབུ་འབྱེད་ཀྱི་མཛད་སྒོ་ཞིག་འཚོགས་ཡོད་ཅིང་། མཛད་སྒོའི་ཐོག་༧སྐྱབས་མགོན་༧གོང་མ་ཁྲི་འཛིན་ཞེ་གཉིས་པ་རཏྣ་བཛྲ་རིན་པོ་ཆེ་མཆོག་དང་། ངོར་ཐར་རྩེ་མཁན་རིན་པོ་ཆེ། ཚར་པའི་ཁྲི་པ་རྣམ་གཉིས། སྡེ་གཞུང་རིན་པོ་ཆེ།  དམིགས་བསལ་གདན་ཞུའི་སྐུ་མགྲོན་སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་གི་སྤྱི་ཁྱབ་རྩོམ་སྒྲིག་འགན་འཛིན་མཁན་པོ་འཇུ་བསྟན་སྐྱོང་བཅས་མཉམ་ཞུགས་གནང་ཡོད།

མཛད་སྒོའི་ཐོག་མར་དབུས་དཔལ་ས་སྐྱའི་སྨོན་ལམ་རྒྱུན་ལས་སྐབས་བཞི་པའི་ཚོགས་གཞོན་མཁན་པོ་ཨ་འཕྲིན་ལགས་ཀྱིས་ངོ་སྤྲོད་དང་སྨོན་ལམ་ཐེབས་རྩ་ཁང་གི་ཤེས་ཡོན་ལས་འཆར་དང་འབྲེལ་བའི་སྐོར་གཏམ་བཤད་དང་། ས་སྐྱ་རྩོམ་སྒྲིག་ཁང་གི་རྩོམ་སྒྲིག་པ་རྒན་ཀུན་འདུས་ལགས་ཀྱིས་ལམ་འབྲས་ཚིག་མཛོད་ཆེན་མོ་ངོ་སྤྲོད་དང་། ཇི་ལྟར་རྩོམ་སྒྲིག་བྱས་པའི་གནས་སྟངས་སྐོར་ལ་གཏམ་བཤད་དང་། དམིགས་བསལ་གདན་ཞུའི་སྐུ་མགྲོན་སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་གི་སྤྱི་ཁྱབ་རྩོམ་སྒྲིག་འགན་འཛིན་མཁན་པོ་འཇུ་བསྟན་སྐྱོང་ལགས་ཀྱིས་འབུམ་རམས་པ་དགེ་བཤེས་བློ་བཟང་སྨོན་ལམ་ལགས་ཀྱིས་མཛད་སྒོ་གནང་བའི་གསུང་འཕྲིན་སྒྲོག་སྦྱངས་དང་འབྲེལ། སྨོན་ལམ་ཚིག་མཛོད་ཆེན་མོ་དང་ལམ་འབྲས་ཚིག་མཛོད་ཆེན་མོའི་འབྲེལ་བའི་སྐོར་ལ་གཏམ་བཤད་གནང་འདུག 

སྐུ་མགྲོན་གཙོ་བོ་༧སྐྱབས་མགོན་༧གོང་མ་ཁྲི་ཆེན་རྡོ་རྗེ་འཆང་ཆེན་པོ་མཆོག་གིས་ལམ་འབྲས་ཚིག་མཛོད་ཆེན་མོ་དང་མཉེན་ཆས་གཉིས་ཀ་ཞལ་འབྱེད་དང་འབྲེལ། ངོས་རང་གིས་ད་ལན་ས་སྐྱའི་སྨོན་ལམ་ཐེངས་སོ་གསུམ་པ་དེ་འཚོག་མུས་ཡིན་པའི་སྐབས་འདིར། ལམ་འབྲས་ཚིག་མཛོད་ཆེན་མོའི་དེབ་དང་མཉེན་ཆས་གཉིས་ཀ་དབུ་འབྱེད་བྱ་རྒྱུ་བྱུང་བར་ཞེ་དྲགས་དགའ་པོ་བྱུང་། ཚང་མར་སྙིང་ནས་མཛའ་ཞིང་བརྩེ་བའི་འཚམས་འདྲི་དང་འབྲེལ་བའི་ཐོག་ནས་བཀྲ་ཤིས་བདེ་ལེགས་ཞུ་རྒྱུ་ཡིན། ངོས་རང་གིས་དགེ་བཤེས་འབུམ་རམས་པ་བློ་བཟང་སྨོན་ལམ་ལགས་ཐོག་མར་མཇལ་སྐབས། ཚིག་མཛོད་རྒྱ་ཆེན་པོ་ཞིག་བཟོ་ཡི་ཡོད་གསུངས་སོང་བས། ངོས་རང་གིས་ཚིག་མཛོད་དེ་གལ་ཆེན་པོ་རེད་དེ། ད་གང་འདྲ་བཟོ་ཡི་ཡོད་དམ་བསམ་བསམ་ཞིག་བྱུང་ནའང་། ཁོང་གིས་ཐུགས་ཁུར་བཞེས་པ་དང་། སྐུ་སྒེར་ཡིག་ཚང་གིས་མཐུན་འགྱུར་རྒྱ་ཆེན་པོ་གནང་བ་སོགས་ལ་བརྟེན་ནས། དེ་སྔོན་རིས་སུ་མ་ཆད་པའི་ཆོས་བརྒྱུད་ཁག་གི་ཚིག་མཛོད་རྒྱ་ཆེན་པོ་ཞིག་གསར་བསྒྲིགས་ལེགས་པར་གྲུབ་ནས་དབུ་འབྱེད་ཀྱི་མཛད་སྒོ་དྷ་རམ་ས་ལར་གནང་དུས་ངོས་རང་ཡང་བཅར་རྒྱུའི་གོ་སྐབས་བྱུང་། ཞེས་དང་། སྤྱིར་ལམ་འབྲས་ཀྱི་ཚིག་མཛོད་ཆུང་ཆུང་རེ་བོད་ནང་དཔར་སྐྲུན་བྱས་པ་འགའ་འདུག་སྟེ། ལམ་འབྲས་དེ་ཟབ་ཅིང་རྒྱ་ཆེ་ལ་དམིགས་བསལ་གྱི་བརྡ་དང་ཐ་སྙད་མང་པོ་ཞེ་དྲགས་ཡོད་པས་དགེ་མཚན་ཆེན་པོ་ཡོང་གི་རེད་བསམས་ནས།  ངོས་རང་གིས་འབད་བརྩོན་བྱས་ཏེ་ང་ཚོའི་རྩོམ་སྒྲིག་པ་དག་ལའང་གོ་བསྡུར་ཞུས་པས། དགེ་བཤེས་སྨོན་ལམ་ལགས་ཀྱིས་རྒྱབ་སྐྱོར་དང་མཐུན་འགྱུར་ཚད་མེད་པ་གནང་ནས། དེ་རིང་ལམ་འབྲས་ཀྱི་ཚིག་མཛོད་རྒྱ་ཆེ་ཙམ་ཞིག་ང་རང་ཚོས་དབུ་འབྱེད་བྱ་རྒྱུ་བྱུང་བ་དེ་ཞེ་དྲགས་ཡག་པོ་བྱུང་བ་རེད། གོ་སྐབས་འདི་བརྒྱུད་ནས་ས་སྐྱ་རྩོམ་སྒྲིག་ཚོགས་ཆུང་དང་། སྨོན་ལམ་ཚོགས་པ་ཚང་མར་ཐུགས་རྗེ་ཆེ་ཞུ་ཡི་ཡོད། ཅེས་གསུངས་འདུག

ཡང་༧གོང་མ་ཁྲི་ཆེན་རྡོ་རྗེ་འཆང་ཆེན་པོ་མཆོག་གིས། ད་ལན་ལམ་འབྲས་ཀྱི་ཚིག་མཛོད་རྒྱ་ཆེན་པོ་འདི་ཡོངས་སུ་ལེགས་གྲུབ་བྱུང་རྗེས། གཙོ་ཆེ་ཤོས་ནི་ཚང་མས་ཉམས་ལེན་དང་དཔེ་ཀློག་ཡག་པོ་གནང་རྒྱུ་དེ་རེད་ལ། ཚང་མས་ལམ་འབྲས་ཀྱི་ཚིག་མཛོད་དང་དཔེ་ཆ་སོགས་ཡག་པོ་བཀླགས་ནས་ཉམས་ལེན་ཡག་པོ་གནང་རྒྱུ་དེ་ཧ་ཅང་གལ་ཆེན་པོ་ཡིན་པས། མུ་མཐུད་དུ་དབང་ལུང་སོགས་གང་མང་ཞུས་ནས་ཉམས་ལེན་གནང་ཐུབ་པ་གནང་རྒྱུ་གལ་ཆེན་ཡིན་སྐོར་དང་། བོད་མི་རྣམས་བཙན་བྱོལ་དུ་བདེ་ཞིང་སྐྱིད་པའི་ཐོག་ནས་བསྡད་རྒྱུ་བྱུང་བ་ནི་༧གོང་ས་རྒྱལ་བ་རིན་པོ་ཆེ་མཆོག་གི་ཐུགས་རྗེ་འོད་ཟེར་ཁོ་ན་ལ་བརྟེན་ནས་བྱུང་བ་ཡིན་ཞིང་། ལྷག་པར་ཚིག་མཛོད་འདི་དག་གི་ཐད་ལའང་སྔ་རྗེས་བར་གསུམ་དུ་༧གོང་ས་རྒྱལ་བ་རིན་པོ་ཆེ་མཆོག་གིས་བཀའ་སློབ་སྩལ་བའི་བཀའ་དྲིན་ལ་བརྟེན་ནས་བྱུང་བ་ཡིན་པས། དུས་དང་རྣམ་པ་ཀུན་དུ་༧རྒྱལ་དབང་མཆོག་གི་བཀའ་དྲིན་རྗེས་སུ་དྲན་པའི་ཐོག་ནས། སྐུ་ཚེ་ཞབས་པད་བརྟན་རྒྱུ་དང་། ཐུགས་ཀྱི་བཞེད་དོན་གྲུབ་སླད་ཚང་མས་བསོད་ནམས་གསག་རྒྱུ་དཔེ་གལ་ཆེན་ཡིན་སྐོར་གསུངས་པ་དང་སྦྲགས།  འབུམ་རམས་པ་དགེ་བཤེས་བློ་བཟང་སྨོན་ལམ་ལགས་ཀྱིས་དབུ་ཁྲིད་པའི་ << སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་། >> གིས་འཕྲུལ་ལས་ཀྱི་ལམ་ནས་བོད་ཀྱི་སྐད་ཡིག་དང་། ཆོས་རིག་ལ་སྲི་ཞུ་རླབས་ཆེན་གནང་བར་ལེགས་སོའི་གཟེངས་བསྟོད་ཀྱི་བཀའ་ཤོག་ཅིག་དང་། དབུས་དཔལ་ས་སྐྱའི་སྨོན་ལམ་ཆེན་མོའི་ཐེབས་རྩ་ཁང་གིས་ས་སྐྱའི་རྩོམ་སྒྲིག་ཁང་གི་ལས་བྱེད་པ་བློ་གསལ་དོན་གྲུབ་དང་། ཀུན་འདུས། ཨ་འདུས་སྐལ་བཟང་རྒྱ་མཚོ་བཅས་ལ་ཐུབ་སྐུ་རེ་གསོལ་རས་སྩལ། 

 ལམ་འབྲས་ཚིག་མཛོད་ཆེན་མོ་ནི། ༧སྐྱབས་མགོན་༧གོང་མ་ཁྲི་ཆེན་རྡོ་རྗེ་འཆང་ཆེན་པོ་མཆོག་གི་དགོངས་གཞི་བཞིན། དབུས་དཔལ་ས་སྐྱའི་སྨོན་ལམ་ཆེན་མོའི་ཐེབས་རྩ་ཁང་གི་ཤེས་ཡོན་ལས་འཆར་གྱི་ཆ་ཤས་སུ། ས་སྐྱ་རྩོམ་སྒྲིག་ཁང་དང་། སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་གཉིས་མཉམ་འབྲེལ་ཐོག་ཞུ་བསྒྲིགས་དང་འགྲེམས་སྤེལ་བྱས་པ་ཞིག་ཡིན་འདུག

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།