བོད་མི་ལྔ་འཛིན་བཟུང་བྱས་འདུག

རྒྱ་གཞུང་གིས་བོད་ཀྱི་དྲ་ལམ་ཚོང་གཉེར་བ་ཨ་དགའ་དགེ་ལེགས་ཀྱི་ཁྲིམས་འགལ་ཉེས་གསོག་མི་མང་ཁྲོད་དུ་བསྡུ་རུབ་བྱེད་བཞིན་འདུག

ཟླ་འདིའི་ཕྱི་ཚེས་ ༡༣ ཉིན་བོད་མཚོ་སྔོན་ཞིང་ཆེན་མཚོ་ལྷོ་ཁུལ་བྲག་དཀར་རྫོང་ཉེན་རྟོག་ཁང་ཟེར་བས་རྒྱ་གཞུང་གི་ནག་སེལ་ངན་འཇོམས་ཀྱི་སྲིད་ཇུས་འོག་ནས། དེང་སང་བོད་ནང་དྲ་ལམ་གྱི་ཚོང་གཉེར་བ་གྲགས་ཅན་ཨ་དགའ་དགེ་ལེགས་ཚང་ངམ་བསོད་ནམས་ཆོས་འགྲུབ་དང་། ཀུན་བཟང་རྡོ་རྗེ། བསྟན་པ། བཙན་ཐར་རྒྱལ། བཀྲ་ཤིས་བློ་ལྡན་བཅས་བོད་མི་ལྔ་ལ་ཁྲིམས་འགལ་ཉེས་གསོག་གི་ནག་ཉེས་བཙུགས་ཡོད་པ་མ་ཟད། སྤྱི་ཚོགས་ལས་རིགས་སོ་སོ་ནས་ཁྲིམས་འགལ་ཉེས་གསོག་གི་ཁུངས་སྣེ་བསྡུ་རུབ་བྱ་རྒྱུ་ཡིན་ལུགས་བསྒྲགས་འདུག

དེའི་སྐོར་ལ་འབྲེལ་ཡོད་བོད་མི་ཞིག་གིས། ཟླ་འདིའི་ཟླ་མགོར་མཚོ་སྔོན་ཞིང་ཆེན་ཟི་ལིང་གྲོང་ཁྱེར་གྱི་གནམ་ཐང་དུ་རྒྱ་གཞུང་གི་ཉེན་རྟོག་མི་སྣས་བོད་ཀྱི་དྲ་ལམ་ཚོང་གཉེར་བ་ཨ་དགའ་དགེ་ལེགས་འཛིན་བཟུང་བཙན་འཁྲིད་བྱས་ཡོད་ཅིང་།  རྒྱ་ནག་གཞུང་གིས་ཁོང་ལ་ལོ་འགའ་ཤས་ཀྱི་སྔོན་དུ་ཁྲིམས་འགལ་རྐུ་ཚོང་དང་འཕྲོག་བཅོམ་སོགས་ཀྱི་ནག་ཉེས་བཙུགས་ཡོད་པས་ལས།  ཁྲིམས་འགལ་དང་ནག་ཉེས་གང་བྱས་ཡོད་མེད་ཀྱི་ཞིབ་ཕྲའི་གནས་ཚུལ་གསལ་གྱི་མི་འདུག ཅེས་འགྲེལ་བརྗོད་གནང་བྱུང་།

མི་ཞིག་གིས་སྤྱི་ཚོགས་དྲ་ལམ་དུ། རྒྱ་ནག་གཞུང་གིས་དྲ་དཔོན་དགེ་ལེགས་ལ་ལོ་ཤས་སྔོན་གྱི་རྐུ་ཚོང་དང་འཕྲོག་བཅོམ་གྱི་ཉེས་མིང་བཙུགས་ཡོད་ཀྱང་། དེའི་ཞིབ་ཕྲའི་གནས་ཚུལ་གང་ཡང་གསལ་མེད། འདི་ནི་བློ་འཚབ་སྐྱེ་དགོས་པའི་གནས་ཚུལ་ཞིག་ཡིན་པ་དང་། ལྷག་པར་དུ་ཉེས་འཛུགས་ཀྱི་ཞིབ་ཕྲའི་གནས་ཚུལ་མེད་པ་འདིས། གནད་དོན་འདིའི་ཐོག་དྲང་བདེན་གྱི་ཁྲིམས་ཐོག་བརྒྱུད་རིམ་ཡོང་མིན་ཐད་དོགས་པ་སྐྱེ་གཞི་ཆགས་འདུག ཁོང་འཛིན་བཟུང་བྱས་རྗེས་ནག་ཉེས་དཔང་རྟགས་མང་ཚོགས་ནང་བརྡ་ཁྱབ་བཀྲམས་ཏེ་བསྡུ་བཞིན་པ་ནི་གཡོ་ཇུས་ཤིག་ཡིན་ནམ་སྙམ་ཞེས་བརྗོད་འདུག

རྒྱ་གཞུང་གིས་དྲ་ལམ་ཚོང་གཉེར་བ་ཨ་དགའ་དགེ་ལེགས་སོགས་བོད་མི་ལྔ་ཁྲིམས་འགལ་ཉེས་གསོག་ཆེད་དོན་ཚན་གསུམ་བསྒྲགས་ཡོད་པ་ནང་། གཅིག བསོད་ནམས་ཆོས་འགྲུབ་སོགས་ཀྱི་ཁྲིམས་འགལ་ཉེས་གསོག་བྱ་འགུལ་ཁྲོད་ཞུགས་མྱོང་བའི་གྱོད་འབྲེལ་མི་སྣ་ཞིག་ཡིན་ཕྱིན། གནས་བབ་དངོས་ངོས་ཟིན་ནས་ཐར་འདོད་ཀྱི་བསམ་བློ་དོར་ཏེ། གང་མགྱོགས་སྒོས་རང་རྟོགས་ངང་སྤྱི་བདེ་ལས་ཁུངས་སུ་ཡོང་ནས་ཉེས་སྐྱོན་ཁས་ལེན་དང་རང་ཉིད་ཀྱི་ཁྲིམས་འགལ་ཉེས་གསོག་གི་བྱ་སྤྱོད་དག་སྦ་གསང་མེད་པར་གསལ་བོར་ཞུས་ན་ཁྲིམས་ལྟར་ཉེས་ཆད་ཡང་མོ་གཅོད་པའམ་ཉེས་ཆད་ཇེ་ཡང་དུ་བཏང་ཆོག

གཉིས། གོང་གསལ་དོགས་ཡོད་ཉེས་ཅན་དག་གིས་ཁྲིམས་འགལ་གྱིས་གནོད་པ་བསྐྱལ་བའི་གནོད་འཚེ་ཕོག་མཁན་ཞིག་ཡིན་ཕྱིན། དོགས་པ་ཅི་ཡང་མེད་པའི་སྒོ་ནས་ཧུར་ཐག་གིས་སྤྱི་བདེ་ལས་ཁུངས་ལ་གོང་གཏུག་ཞུས་ཏེ། སྙིང་སྟོབས་ཆེན་པོས་སྒོ་ནས་རང་ཉིད་ཀྱི་ཁྲིམས་མཐུན་ཁེ་དབང་ལ་སྲུང་སྐྱོང་བྱ་དགོས།གསུམ། གོང་གསལ་དོགས་ཡོད་ཉེས་ཅན་དག་གི་ཁྲིམས་འགལ་ཉེས་གསོག་གི་བྱ་སྤྱོད་ཤེས་པའི་དཔང་མི་ཞིག་ཡིན་ཕྱིན་ཧུར་ཐག་གིས་སྤྱི་བདེ་ལས་ཁུངས་ལ་ཐེར་འདོན་བྱ་རྒྱུ་དང་། སྤྱི་བདེ་ལས་ཁུངས་ལ་གྱོད་གཞི་མྱུལ་ཞིབ་རྩད་གཅོད་བྱེད་པར་རོགས་འདེགས་བྱ་དགོས། སྤྱི་བདེ་ལས་ཁུངས་ཀྱིས་ཐེར་འདོན་གོང་གཏུག་མཁན་གྱི་གནས་ཚུལ་གཟབ་ནན་གྱིས་གསང་རྒྱ་བྱ་རྒྱུ་ཡིན་ཞིང་། ཐེར་འདོན་གོང་གཏུག་མཁན་དང་དེའི་ཁྱིམ་མིར་འཇིགས་སྐུལ་དང་འཁོན་ལན་སློག་པ་བཅས་ལ་སྤྱི་བདེ་ལས་ཁུངས་ཀྱིས་མཐའ་གཅིག་ཏུ་རྡུང་རྡེག་ནན་མོ་གཏོང་རྒྱུ་ཡིན་ཅེས་བསྒྲགས་འདུག

དྲ་ལམ་ཐོག་ཚོང་གཉེར་བ་གྲགས་ཅན་ཨ་དགའ་དགེ་ལེགས་ཚང་ངམ་བསོད་ནམས་ཆོས་འགྲུབ་ནི་བོད་མཚོ་སྔོན་ཞིང་ཆེན་མཚོ་ལྷོ་ཁུལ་བྲག་དཀར་རྫོང་གནམ་ཐང་ཡུལ་ཚོ་བོང་སྟག་སྡེ་བ་ནས་ཡིན་པ་དང་། ཉེ་བའི་ལོ་འདི་དག་གི་རིང་རྒྱ་ནག་གི་མགྱོགས་འཕྲིན་དྲ་ལམ་ཐོག་ཚོང་ལས་གཉེར་ནས་སྐད་གྲགས་ཆེན་པོ་ཆགས་ཡོད་པ་མ་ཟད། མགྱོགས་འཕྲིན་ཐོག་དོ་ཁུར་བྱེད་མཁན་གྱི་ཞེ་མི་མང་པོ་ཡོད་པའི་མི་སྣ་ཞིག་ཆགས་ཡོད་འདུག་ལ། བོད་ནང་རང་བྱུང་གོད་ཆག་གི་གནོད་ཐེབས་ས་ཁུལ་དང་ནང་མི་སྐྱོ་བོ་སོགས་ལ་རྒྱུ་དངོས་ཀྱི་རོགས་སྐྱོར་འབོར་ཆེན་བྱེད་མཁན་ཞིག་ཡིན་འདུག

གསར་འགོད་པ། བྱམས་པ་ཚེ་རིང་། རྩོམ་སྒྲིག་པ། སྐལ་བཟང་སྦྱིན་པ།