ཁེ་ན་ཌའི་སྲིད་བློན་རྗ་སི་ཊིན་ཊིར་ཌུའུ་མཆོག་གིས་སྲིད་བློན་གྱི་ལས་གནས་ནས་དགོངས་པ་ཞུ་གཏན་འཁེལ།

དེ་རིང་རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། ཁ་སང་རེས་གཟའ་ཟླ་བའི་ཉིན་ཁེ་ན་ཌའི་སྲིད་བློན་རྗ་སི་ཊིན་ཊིར་ཌུའུ་ (Justin Trudeau) མཆོག་གིས་སྲིད་བློན་གྱི་ལས་གནས་ནས་དགོངས་པ་ཞུ་རྒྱུའི་གསལ་བསྒྲགས་གནང་འདུག

Canadian Prime Minister Justin Trudeau speaks during a news conference at Rideau Cottage in Ottawa, Canada, on January 6, 2025. Trudeau announced his resignation, saying he will leave office as soon as the ruling Liberal party chooses a new leader. | Photo Credit: AFP

ཁ་སང་ཕྱི་ཚེས་ ༦ ཉིན་ཁེ་ན་ཌའི་རྒྱལ་ས་ཨོ་ཊ་ཝ་ (Ottawa) རུ་སྲིད་བློན་རྗ་སི་ཊིན་ཊིར་ཌུའུ་མཆོག་གིས་ཡོངས་ཁྱབ་གསལ་བསྒྲགས་ཤིག་གནང་བའི་ནང་། ངས་ཁེ་ན་ཌའི་སྲིད་བློན་དང་གུ་ཡངས་སྲིད་དོན་ཚོགས་པའི་མགོ་ཁྲིད་ཀྱི་ལས་གནས་ནས་དགོངས་པ་ཞུ་རྒྱུ་ཡིན། དེ་བཞིན་སྲིད་བློན་ཀྱི་ལས་གནས་ནས་ཀྱང་དགོངས་པ་ཞུ་རྒྱུ་ཡིན་ཡང་སྲིད་བློན་གསར་པ་ཞིག་འོས་འདེམས་མ་བྱུང་གི་བར་དུ་ལས་མཚམས་འཇོག་རྒྱུ་ཡིན་སྐོར་དང་། དེ་བཞིན། ཕྱི་ཟླ་ ༣ ཚེས་ ༢༤ བར་དུ་གྲོས་ཚོགས་ཀྱི་ལས་རིམ་མཚམས་འཇོག་བྱ་རྒྱུ་ཡིན་ཞེས་དང་། རྒྱལ་ཁབ་འདིའི་འོས་བསྡུ་རྗེས་མའི་ནང་འོས་མི་ཚད་ལྡན་ཞིག་ཐོབ་དགོས། གལ་ཏེ་ང་རང་སྲིད་དོན་ཚོགས་པའི་ནང་ཁུལ་གྱི་རྩོད་རྙོག་ཅིག་ཆགས་དུས། ང་རང་འོས་མི་ཚད་ལྡན་ཞིག་མིན་པ་གསལ་པོ་ཤེས་བྱུང་། ཞེས་གསུངས་འདུག ཁོང་གིས་སྲིད་བློན་གྱི་ལས་གནས་ནས་དགོངས་པ་ཞུ་རྒྱུའི་གསལ་བསྒྲགས་གནང་རྗེས། བློ་ཕམ་བྱེད་མཁན་མང་པོ་ཡོང་གི་ཡོད་འདུག་ལ། དགའ་བསུ་བྱེད་མཁན་ཡང་ཡོང་གི་ཡོད་འདུག

དེ་འབྲེལ་བྷི་བྷི་སི་གསར་ཁང་གིས་གནས་ཚུལ་སྤེལ་བའི་ནང་། རྙིང་ཞེན་སྲིད་དོན་ཚོགས་པའི་མགོ་ཁྲིད་ (Pierre Poilievre) ལགས་ཀྱིས། ཁེ་ན་ཌའི་སྲིད་བློན་རྗ་སི་ཊིན་མཆོག་གིས་སྲིད་བློན་གྱི་ལས་གནས་ནས་དགོངས་པ་ཞུས་པ་དེས་གནས་སྟངས་ལ་འགྱུར་བ་གང་ཡང་ཕྱིན་མེད། ཅེས་དང་། གུ་ཡངས་ཚོགས་པའི་གྲོས་ཚོགས་འཐུས་མི་རྣམས་དང་མགོ་ཁྲིད་འདོད་ཡོད་མཁན་རྣམས་ཀྱིས་ལོ་ངོ་དགུའི་རིང་རྗ་སི་ཊིན་མཆོག་གིས་ལས་དོན་གང་གནང་ཚང་མར་རྒྱབ་སྐྱོར་བྱས་ཡོད། ད་ལྟའི་ཆར་ཚོགས་པ་དེས་ཁེ་ན་ཌའི་མི་མང་རྣམས་ལ་ལོ་ངོ་ ༤ རིང་མུ་མཐུད་དུ་མགོ་སྐོར་གཏོང་ཐབས་བྱེད་ཀྱི་ཡོད་ཚུལ་དང་། གུ་ཡངས་ཚོགས་པའི་ངོས་ནས་སྲིད་བློན་རྗ་སི་ཊིན་དང་འདྲ་བའི་མགོ་ཁྲིད་གསར་པ་ཞིག་བདམས་ནས་མི་མང་ལ་མུ་མཐུད་མགོ་སྐོར་གཏོང་ཐབས་བྱེད་ཀྱི་ཡོད་ཚུལ་སོགས་བརྗོད་འདུག

འདས་ལོའི་ཕྱི་ཟླ་ ༡༢ ཚེས་ ༡༦ ཉིན་ཁེ་ན་ཌའི་སྲིད་བློན་གཞོན་པ་དང་དཔལ་འབྱོར་བློན་ཆེན་ཧྥི་རི་ལན་ཌི་ (Chrystia Freeland) ལགས་ཀྱིས་གསར་འགོད་གསལ་བསྒྲགས་ཤིག་གི་སྟེང་། ཨ་རིའི་སྲིད་འཛིན་གསར་པ་ཌོ་ནལ་ཊོམ་ཕུ་མཆོག་གིས་ཁེ་ན་ཌའི་ནང་འདྲེན་དངོས་ཟོག་ཡོངས་ལ་བརྒྱ་ཆ་ ༢༥ ཡི་དཔྱ་ཁྲལ་རྒྱག་རྒྱུར་ཁས་ལེན་བྱས་པའི་གནད་དོན་དང་འབྲེལ་ནས་སྲིད་བློན་རྗ་སི་ཊིན་དང་འགལ་ཟླ་བྱུང་བར་བརྟེན། དཔལ་འབྱོར་བློན་ཆེན་གྱི་ལས་གནས་ནས་དགོངས་པ་ཞུས། དེ་བཞིན་འདས་ལོའི་ཕྱི་ཟླ་ ༡༠ པའི་ཟླ་མཇུག་ཏུ་གུ་ཡངས་ཚོགས་པའི་གྲོས་ཚོགས་འཐུས་མི་ ༢༠ ཙམ་གྱིས་མཚན་རྟགས་བཀོད་པའི་སྙན་ཞུ་ཞིག་གི་ནང་། སྲིད་དོན་ཚོགས་པའི་ངོས་ནས་ལོ་རྗེས་མའི་རྒྱལ་ཡོངས་འོས་བསྡུའི་ནང་འོས་བསྡུའི་ཕམ་ཉེས་ཡོང་ཉེན་ཆེ་བས། སྲིད་བློན་རྗ་སི་ཊིན་མཆོག་ཚོགས་པའི་མགོ་ཁྲིད་ཀྱི་ལས་གནས་ནས་དགོངས་པ་ཞུ་དགོས་པའི་འབོད་སྐུལ་ཞུས་འདུག དཔལ་འབྱོར་གྱི་སྲིད་བློན་ཧྥི་རི་ལན་ཌི་ལགས་ཀྱིས་ལས་གནས་ནས་དགོངས་པ་ཞུས་རྗེས། གུ་ཡངས་ཚོགས་པའི་འཐུས་མི་ཁག་ཅིག་གིས་སླར་ཡང་སྲིད་བློན་རྗ་སི་ཊིན་མཆོག་གིས་ལས་གནས་ནས་དགོངས་པ་ཞུ་དགོས་པའི་འབོད་སྐུལ་ཞུས་ཡོད་འདུག

བརྒྱུད་ལམ་གྱི་གནས་ཚུལ་ལྟར་ན། སྲིད་བློན་རྗ་སི་ཊིན་མཆོག་གིས་དབྱིན་ཡུལ་དངུལ་ཁང་དང་ཁེ་ན་ཌའི་དངུལ་ཁང་གི་འགན་འཛིན་ཟུར་པ་མར་ཁི་ཁར་ནི་ (Mark Carney) ལགས་དཔལ་འབྱོར་བློན་ཆེན་དུ་བསྐོ་བཞག་གནང་འདོད་ཡོད་པའི་གནས་ཚུལ་ཐོན་པར་བརྟེན་ཁོང་གཉིས་ཀྱི་འབྲེལ་བ་ཇེ་སྡུག་ཏུ་ཕྱིན་ཡོད་སྐོར་དང་། ཨ་རིས་ཁེ་ན་ཌའི་དངོས་ཟོག་ལ་དཔྱ་ཁྲལ་བརྒྱ་ཆ་ ༢༥ རྒྱག་འཆར་ཡོད་པ་དང་། རྒྱལ་ཁབ་ཀྱི་དཔལ་འབྱོར་གནས་སྟངས་ཉེན་ཚབས་ཅན་དུ་འགྱུར་ཉེན་ཡོད་པའི་གནད་དོན་སོགས་དང་འབྲེལ་ནས་འགལ་ཟླ་མང་པོ་བྱུང་བར་བརྟེན། འདི་ལོའི་ཕྱི་ཟླ་ ༡༢ ཚེས་ ༡༦ ཉིན་རྩ་དགོངས་ཞུ་ཡོད་འདུག

རྗ་སི་ཊིན་ཊུ་རུ་ཌོ་མཆོག་ཕྱི་ལོ་ ༢༠༡༣ ལོར་གུ་ཡངས་སྲིད་དོན་ཚོགས་པའི་མགོ་ཁྲིད་དུ་བདམས་ཐོན་བྱུང་ཡོད་པ་དང་། ཕྱི་ལོ་ ༢༠༡༥ ལོར་རྒྱལ་ཡོངས་འོས་བསྡུའི་ཁྲོད་སྲིད་བློན་སྐབས་ ༢༣ པའི་རྒྱལ་ཁ་ཐོབ། ཁོང་ནི་ཁེ་ན་ཌའི་ལོ་རྒྱུས་ནང་སྲིད་བློན་ལོ་ན་ཆུང་ཤོས་གཉིས་པ་དེ་ཆགས་ཡོད་པ་མ་ཟད། སྲིད་བློན་གྱི་ལས་འགན་མི་ལོ་ ༩ རིང་འཁུར་ནས་དུས་ཡུན་རིང་ཤོས་ཤིག་ཆགས་ཀྱི་ཡོད་འདུག

གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། པདྨ་མཚོ།