ཨ་རིའི་ལྷོ་རྒྱུད་དུ་མེ་སྐྱོན་བྱུང་སྟེ་གནོད་སྐྱོན་ཆེན་པོ་ཐེབས་ཀྱི་འདུག

ཨ་རིའི་ཁ་ལེ་ཧྥོར་ནེ་ཡའི་ལྷོ་རྒྱུད་དུ་མེ་སྐྱོན་བྱུང་སྟེ་ད་བར་དུ་ཉུང་མཐར་ཨ་སྒོར་ཐེར་འབུམ་ ༥༧ ལྷག་གི་གྱོང་གུད་ཐེབས་ནས་ཨ་རིའི་ལོ་རྒྱུས་ཁྲོད་ཀྱི་རང་བྱུང་གོད་ཆག་ཆེ་ཤོས་ཤིག་ཏུ་ངོས་འཛིན་བྱེད་ཀྱིན་འདུག

Rescue teams evacuating neighborhood from wildfire

ཟླ་འདིའི་ཕྱི་ཚེས་ ༧ ཙམ་ནས་བཟུང་ཨ་རིའི་ཁ་ལེ་ཧྥོར་ནེ་ཡའི་ལྷོ་རྒྱུད་དུ་ཆགས་པའི་གློག་བརྙན་གྱི་ལྟེ་བ་ལོ་སི་ཨེན་ཇི་ལེ་སི་(Los Angeles) མངའ་ཁུལ་གྱི་པེ་ལི་སི་ཌེ་(Palisades) ཁུལ་དུ་ཉུང་མཐར་ས་ཁྱོན་ཨེ་ཀར་ཁྲི་གཉིས་ལྷག་དང་། ཨེ་ཝོན་ཁུལ་དུ་ ༡༤༠༠༠ ལྷག ཀེ་ནཱ་ཐི་(Kenneth) ཁུལ་དུ་ ༩༦༠། ཧར་སི་(Hurst ) ཁུལ་དུ་ ༧༠༠། ལི་དྷེ་ཡ་(Lidia) ཁུལ་དུ་ས་ཁྱོན་ཨེ་ཀར་ ༤༠༠ ལ་འཚིག་སྐྱོན་བྱུང་དང་འབྱུང་མུས་ཡིན་པའི་ཁར། ད་བར་ཉུང་མཐར་མི་གྲངས་ ༢༠ རྐྱེན་འདས་དང་། ཉུང་མཐར་དུད་ཁྱིམ་ ༡༠༠༠༠ ལྷག་གི་ཁང་པ་དང་རྒྱུ་ནོར་ལ་འཚིག་སྐྱོན་བྱུང་སྟེ། ས་ཁྱོན་ཨེ་ཀར་(acre) ༢༩༧༩༥ ཙམ་ལ་འཚིག་འདུག་པས། ཁུལ་དེའི་སློབ་གྲྭ་སོགས་སྒོ་བརྒྱབ་ཡོད་པ་དང་། དུས་སྟོན་གལ་ཆེན་ཁག་ཅིག་ཀྱང་མེད་པ་དང་ཕྱིར་འགྱངས་བྱས་ཡོད་འདུག

དེ་བཞིན་ཁུལ་དེར་ཨ་རིའི་དབུས་གཞུང་ནས་མྱུར་སྐྱོབ་ཚད་ལྡན་གནང་གི་མེད་པའི་སྐྱོན་བརྗོད་མང་པོ་བྱེད་བཞིན་ཡོད་སྟབས། དེའི་ཐད་ཨ་རིའི་ལས་ཐོག་སྲིད་འཛིན་སྐུ་ཞབས་བྷའེ་ཌིན་མཆོག་གིས། ངས་ཐད་ཀར་གནོད་འཚེ་ཐེབས་ཡུལ་གྱི་གཞུང་ལ་མི་མང་གི་བདེ་འཇགས་དང་བདེ་སྲུང་གི་སླད་གཞུང་ཕྱོགས་ནས་མཐུན་རྐྱེན་འཕར་མ་ག་རེ་སྦྱོར་དགོས་མིན་འབྲེལ་བ་བྱས་ཡོད། ང་ཚོས་མུ་མཐུད་ནས་གོད་ཆག་འབྱུང་ཡུལ་དུ་རོགས་འདེགས་དང་མཐུན་རྐྱེན་སྦྱོར་སྤྲོད་བྱ་རྒྱུར་ཆོད་སེམས་བརྟན་པོ་ཡོད། ཅེས་དང་། ཨ་རིའི་བདེ་སྲུང་ལས་ཁུངས་ནས་མེ་གསོད་མདུན་རྒོལ་བ་ ༥༠༠ ལྷག་ཆེད་གཏོང་གིས་མྱུར་སྐྱོབ་སྔར་ལས་ཚད་མཐོ་རུ་གཏོང་གི་ཡོད་སྐོར་གསུངས་འདུག

ལོ་སི་ཨེན་ཇིལ་སིའི་རྫོང་དཔོན་ཀཱ་རན་(Karen Bass) ལགས་ཀྱིས། ད་ལྟ་མེ་ལྕེ་མཆེད་མུས་ཡིན་པས། ང་ཚོས་ཚེ་སྲོག་དང་། སྡོད་ཁང་། རྒྱུ་ནོར་སོགས་མེས་འཇིགས་པ་ལས་བསྐྱབ་རྒྱུ་ནི་ལས་འགན་གཙོ་བོ་དེ་རེད། ཅེས་བརྗོད་འདུག་ལ། མེ་གསོད་རུ་མིས་འདས་པའི་ཆུ་ཚོད་ ༤༠ ནས་ ༤༨ བར་ཛ་དྲག་མྱུར་སྐྱོབ་བྱས་ཏེ་མཁའ་དབུགས་འབག་བཙོག་གིས་དཀའ་ངལ་འཕྲད་བཞིན་ཡོད་འདུག དེ་རིང་ཨ་རིའི་རྒྱལ་ཡོངས་གནམ་གཤིས་སྔོན་བརྡ་ཁང་གིས། ལོ་སི་ཨེན་ཇི་ལེ་སི་ཁུལ་གྱི་གནམ་གཤིས་ཚ་ཤུགས་ཆེ་བས་མེ་སྐྱོན་འབྱུང་བའི་ཉེན་བརྡ་དམར་པོ་བཏང་འདུག

A home burns in the Pacific Palisades neighbourhood of Los Angeles on Tuesday. (Ethan Swope/The Associated Press)

ལོ་སི་ཨེན་ཇི་ལེ་སིར་མེ་སྐྱོན་ཆེན་པོ་ཐེབས་བཞིན་པའི་སྐབས་འདིར་འཛམ་གླིང་གློག་བརྙན་དང་ཨ་རིའི་རིག་གཞུང་གི་མཚོན་རྟགས་ལྟ་བུར་གྱུར་བའི་(Hollywood Sign)ཡོད་སའི་རི་རྒྱུད་དུའང་མེ་སྐྱོན་འབྱུང་གི་ཡོད་པ་དང་། བརྒྱུད་ལམ་ཁག་ཅིག་ཏུ་ཧོ་ལི་ཝུའུ་ཌིའི་མཚོན་རྟགས་གྲགས་ཅན་དེར་གནོད་སྐྱོན་ཐེབས་ཡོད་པའི་པར་རིས་བཀྲམ་ཡོད་ཀྱང་། རོའུ་ཊིར་གསར་ཁང་གིས་བརྟག་དཔྱད་བྱས་པ་བརྒྱུད་པར་རིས་དེ་དག་རྫུན་བཟོ་བྱས་པ་ཡིན་ལུགས་བརྗོད་འདུག་ལ། ཁ་སང་ཧོ་ལི་ཝུའུ་ཌིའི་མཚོན་རྟགས་ཐེབས་རྩའི་ཚོགས་གཙོ་ཇེ་ཧྥི་ཛ་རེན་ནམ་(Jeff Zarrinnam)ལགས་ཀྱིས། མཚོན་རྟགས་གྲགས་ཅན་དེར་གནོད་སྐྱོན་བྱུང་མེད་ལ། གནས་སྐབས་བདེ་འཇགས་ཀྱི་ས་ཁོངས་སུ་ཡོད་སྐོར་བརྗོད་འདུག

མེ་སྐྱོན་གྱི་དུ་ཞགས་ཀྱིས་ཁེ་ལི་ཧྥོར་ནི་ཡའི་ལྷོ་ཕྱོགས་ཀྱི་མཁའ་རླུང་འབག་བཙོག་ཏུ་གྱུར་ནས། མི་གྲངས་ས་ཡ་ ༡༧ ལྷག་ལ་མཁའ་དབུགས་ཀྱི་དཀའ་ངལ་འཕྲད་ཉེན་ཡོད་པའི་ཉེན་བརྡ་བཏང་ཡོད་འདུག་ལ། ལོ་སི་ཨན་རྗི་ལེ་སི་རྫོང་གི་མེ་གསོད་ལས་ཁུངས་ཀྱི་སྨན་པའི་འགན་འཛིན་གཞོན་པ་སྨན་པ་པུ་ནི་ཏི་གྷུཔ་ཏ་(Puneet Gupta) ཡིས། མེ་སྐྱོན་ལས་བྱུང་བའི་དུ་བས་སྙིང་རྩ་འགག་པའི་ནད་དང་དབུགས་བསགས་ཀྱི་ནད་ལྟ་བུའི་དབུགས་འབྱིན་རྔུབ་ཀྱི་ན་ཚ་ཇེ་སྡུག་ཏུ་གཏོང་ཉེན་ཡོད་སྐོར་བརྗོད་འདུག་ལ། ཤར་ཕྱོགས་ས་ཁུལ་ཁ་ཤས་ཀྱི་མཁའ་དབུགས་ཀྱི་སྤུས་ཚད་ཉམས་ཏེ་འཕྲོད་བསྟེན་ལ་གནོད་འཚེ་ཡོང་གི་ཡོད་པས་ཡིད་གཟབ་དགོས་པའི་འབོད་སྐུལ་བྱས་ཡོད་འདུག

སྤྱིར་བཏང་ཁ་ལེ་ཧྥོར་ནེ་ཡ་མངའ་སྡེ་ཁྱོན་ཡོངས་ཀྱི་ནམ་དུས་བཞི་ཡི་འགྱུར་བ་དེ་ཙམ་མི་གསལ་ལ། ཚ་དྲོད་ཆེ་བའི་ནམ་དུས་རྒྱུན་རིང་བ་རེད། འཛམ་གླིང་ཐོག་ཚ་དྲོད་ཆེ་ཤོས་ཀྱི་ཟིན་ཐོ་བསྐྲུན་མཁན་གཤིན་ལུང་(Death Valley)ཞེས་པ་དེའང་ཁ་ལེ་ཧྥོར་ནེ་ཡའི་ཤར་རྒྱུད་(Greenland Ranch)ཞེས་པ་དེར་ཡོད་ཅིང་། བྱེ་མའི་ལུང་གཤོང་དེ་ས་བབ་དམའ་ཞིང་ཆུ་དཀོན་པ། བྱེ་ཐང་གིས་ས་ཁྱོན་ཆེན་པོ་བཟུང་ཡོད་འདུག་ལ། ཕྱི་ལོ་ ༡༩༡༣ ཟླ་ ༧ ཚེས་ ༡༠ ཉིན་ཚ་ཚད་ ༥༦.༧°C ལས་བརྒལ་བར་བརྟེན། འཛམ་གླིང་ལོ་རྒྱུས་ཐོག་ཚ་ཚད་མཐོ་ཤོས་ཀྱི་ཟིན་ཐོ་བསྐྲུན་པར་གྲགས།

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།