ལྷོ་ཀོ་རི་ཡའི་སྲིད་འཛིན་ཡུན་སུག་ཡོལ་འཛིན་བཟུང་བྱས་འདུག

ཁ་སང་ཕྱི་ཚེས་ ༡༥ ཉིན་ལྷོ་ཀོ་རི་ཡའི་སྲིད་འཛིན་ཡུན་སུག་ཡོལ་གྱིས་དབང་ཆ་ལོག་སྤྱོད་བྱས་པའི་ཉེས་མིང་འོག་འཛིན་བཟུང་བྱས་ཏེ་འདྲི་བརྩད་བྱེད་བཞིན་ཡོད་འདུག་ལ་ཡུལ་དེའི་ནང་ཆབ་སྲིད་རྩོད་རྙོག་ཆེན་པོ་འབྱུང་བཞིན་འདུག

རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། ལྷོ་ཀོ་རི་ཡའི་སྲིད་འཛིན་ཡུན་སུག་ཡོལ་ (Yoon Suk Yeol) གྱིས་དབང་ཆ་ལོག་སྤྱོད་དང་ཁྲིམས་འགལ་བྱ་སྤྱོད་སྤེལ་བའི་དོགས་གཞིའི་འོག ཁ་སང་ཕྱི་ཚེས་ ༡༥ ཉིན་འཛིན་བཟུང་བྱས་ཏེ་འདྲི་བརྩད་བྱེད་མུས་ཡིན་པ་མ་ཟད། རྒྱལ་ཁབ་དེའི་ལོ་རྒྱུས་ནང་སྲིད་འཛིན་ལས་ཐོག་ཞིག་འཛིན་བཟུང་བྱས་པ་ཐེངས་དང་པོ་ཆགས་ཀྱི་ཡོད་འདུག

ལྷོ་ཀོ་རི་ཡའི་ལྐོག་ཟ་རུལ་སུངས་ཞིབ་བཤེར་ལས་ཁུངས་ཀྱིས་སྲིད་འཛིན་ཡུན་འཛིན་བཟུང་བྱས་ཏེ་ཨུའུ་ཝང་གྲོང་ཁྱེར་ (Uiwang) དུ་ཡོད་པའི་སོལ་བཀག་ཉར་ཁང་ (Seoul Detention Centre) དུ་བཀག་ཉར་བྱས་ཏེ་འདྲི་བརྩད་བྱེད་བཞིན་ཡོད་འདུག་ལ། ཟླ་འདིའི་ཕྱི་ཚེས་ ༣ ཉིན་རྒྱལ་ཁབ་དེའི་ཞིབ་དཔྱོད་ལས་ཁུངས་ཀྱིས་སྲིད་འཛིན་ཡུན་སུག་ཡོལ་ལ་འཛིན་བཟུང་གི་བཀའ་རྒྱ་ཐེངས་དང་པོ་བཏང་ཡོད་ཀྱང་། ཉིན་དེར་སྲིད་འཛིན་ཡུན་གྱི་སྲུང་དམག་དང་ཁོང་གི་རྒྱབ་སྐྱོར་བ་མི་མང་གིས་བཀག་འགོག་བྱས་ཏེ་འཛིན་བཟུང་བྱེད་ཐུབ་མེད་པ་རེད།

ཉེས་མིང་སྐོར་ལ་སྐུ་ཞབས་ཡུན་གྱིས། ངའི་ངོས་ནས་ལྐོག་ཟ་རུལ་སུངས་ཞིབ་བཤེར་ལས་ཁུངས་ཀྱིས་རྟོག་ཞིབ་བྱེད་བཞིན་པ་དེ་ཁྲིམས་མཐུན་ཞིག་ལ་ངོས་འཛིན་བྱེད་ཀྱི་མེད་ཀྱང་། འབྱུང་འགྱུར་མི་གསོད་ཁྲག་སྦྱོར་གྱི་རྐྱེན་ངན་མི་ཡོང་བའི་ཆེད་དུ་མདུན་དུ་ཐོན་རྒྱུའི་ཐག་གཅོད་བྱས་པ་ཡིན། ཞེས་བརྗོད་འདུག་ལ། ཁོང་གི་ཁྲིམས་རྩོད་པས། སྲིད་འཛིན་ཡུན་འཛིན་བཟུང་བྱས་པ་དེ་ཁྲིམས་འགལ་ཞིག་ཡིན་པ་དང་། ལྐོག་ཟ་རུལ་སུངས་ཞིབ་བཤེར་ལས་ཁུངས་ལ་ལྐོག་ཟ་རུལ་སུངས་མེད་པ་བཟོ་མཁན་ཞིག་ཡིན་པ་ལས། སྲིད་འཛིན་ཡུན་གྱི་ཉེས་མིང་ཐད་ཞིབ་འཇུག་བྱེད་པའི་དབང་ཆ་མེད་སྐོར་བརྗོད་འདུག་ལ། ཁོང་གི་རྒྱབ་སྐྱོར་བ་ཚོས་ཞིབ་བཤེར་ལས་ཁུངས་ཀྱི་སྒོ་འགྲམ་དུ་ངོ་རྒོལ་ལས་འགུལ་སྤེལ་བཞིན་ཡོད་འདུག

ཐེངས་འདིའི་བཀའ་རྒྱའི་འོག་ནས་ཆུ་ཚོད་ ༤༨ རིང་ཁོང་ལ་བཀག་ཉར་འདྲི་རྩད་བྱེད་ཆོག་གི་ཡོད་འདུག འོན་ཀྱང་། ཉིན་གྲངས་གཉིས་ཀྱི་རྗེས་སུ་སྲིད་འཛིན་ཡུན་ལ་མུ་མཐུད་བཀག་ཉར་དང་འདྲི་བརྩད་བྱེད་པར་བཀའ་རྒྱ་གསར་པ་ཞིག་དགོས་ཀྱི་ཡོད་འདུག གལ་ཏེ་བཀའ་རྒྱ་གསར་པ་གཏང་ཚེ་ཉིན་གྲངས་ ༢༠ རིང་བཀག་ཉར་འདྲི་བརྩད་བྱེད་ཆོག་གི་ཡོད་འདུག  བཀའ་རྒྱ་གསར་པ་མ་གཏང་ཚེ་ཁོང་ཀློད་གྲོལ་གཏོང་དགོས་ཀྱི་ཡོད་འདུག

ཕྱི་ལོ་ ༢༠༢༤ ཟླ་ ༡༢ ཚེས་ ༣ ཉིན་གྱི་མཚན་གུང་ཡུལ་དེའི་བརྙན་འཕྲིན་བརྒྱུད་ཡུན་སུག་ཡོལ་ལགས་ཀྱིས་དྲག་པོའི་ཁྲིམས་གཞི་ཞིག་ཡོངས་བསྒྲགས་བྱས་ཏེ། ཡུལ་དེའི་གྲོས་ཚོགས་ནང་དམངས་གཙོ་ཚོགས་པས་ཞབས་བཀྱག་མང་བ་བཟུང་ཡོད་པས་ཁོང་ཚོས་དམངས་གཙོའི་རང་དབང་བརྩི་མེད་རྡོག་རོལ་དུ་བཏང་ནས་སྲིད་གཞུང་གི་ལས་དོན་དང་སྔོན་རྩིས་སོགས་ལ་འགོག་རྐྱེན་བཟོ་ཡི་ཡོད་སྐོར་དང་། རྒྱ་ཆེའི་མང་ཚོགས་ཀྱིས་ཁོང་ལ་ཡིད་ཆེས་དང་བཟོད་སྒོམ་དགོས་སྐོར་བརྗོད་ཡོད་པ་དང་འབྲེལ། བྱང་ཀོ་རི་ཡའི་ལྷོ་ཀོ་རི་ཡ་གཞུང་ལ་རྒོལ་རྡུང་གི་ཇུས་ངན་ཡང་དེའི་ནང་དུ་ཡོད་སྐོར་བསྒྲགས་ཡོད་པ་རེད།

ཟླ་དེའི་ཕྱི་ཚེས་ ༤ ཉིན་ཡུལ་དེའི་གྲོས་ཚོགས་ཀྱི་ཕྱོགས་འགལ་ཚོགས་པས་སྣེ་འཁྲིད་དེ་སྲིད་འཛིན་གྱི་དྲག་པོའི་ཁྲིམས་གཞི་ངོས་ལེན་བྱས་མེད་པའི་ཁར། དེ་ནི་དབང་ཆ་ལོག་སྤྱོད་དང་རྒྱལ་ཁྲིམས་དང་འགལ་བའི་བྱ་སྤྱོད་ཅིག་ཡིན་པའི་ཉེས་མིང་བཙུགས་ཏེ། ཟླ་དེའི་ཕྱི་ཚེས་ ༡༡ ཉིན་ཡུལ་དེའི་རྒྱལ་སྲུང་བློན་ཆེན་ཀེམ་ཡོང་ཧོན་ (Kim Yong Hyun) དང་། རྒྱལ་ཡོངས་སྤྱི་ཁྱབ་ཉེན་རྟོག་དཔོན་ཆོ་ཇི་ཧོ་ (Cho Ji Ho)། རྒྱལ་ས་སོལ་གྱི་ཉེན་རྟོག་ཁང་གི་སྤྱི་ཁྱབ་པ་སོགས་འཛིན་བཟུང་བྱས་ཤིང་། ཕྱི་ཚེས་ ༡༤ ཉིན་ཡུན་སུག་ཡོལ་སྲིད་འཛིན་གྱི་ལས་གནས་ནས་གནས་སྐབས་གནས་དབྱུང་བཏང་བ་མ་ཟད། ཕྱི་ཚེས་ ༣༡ ཉིན་རྒྱལ་ས་སོལ་གྱི་ཁྲིམས་ཁང་ཞིག་གིས་ཡུན་སུག་ཡོལ་འཛིན་བཟུང་གིས་ཞིབ་བཤེར་བྱེད་ཆོག་པ་དང་ལྷོ་ཀོ་རི་ཡ་ནས་ཕྱིར་ཐོན་མི་ཆོག་པའི་བཀའ་རྒྱ་བསྒྲགས་འདུག་ལ། ཟླ་དེའི་ཕྱི་ཚེས་ ༡༤ ཉིན་ལྷོ་ཀོ་རི་ཡའི་སྲིད་བློན་ཧན་ཌོག་སུའུ་ (Han Duck-soo) ཡིས་བར་བརྒལ་སྲིད་འཛིན་གྱི་ལས་གནས་འཁུར་ཡོད་ཀྱང་། ཕྱི་ཚེས་ ༢༧ ཉིན་ཡུལ་དེའི་གྲོས་ཚོགས་ཀྱིས་ཧན་ཌོག་སུའུ་ཡིས་སྲིད་འཛིན་ཟུར་པར་རྒྱབ་སྐྱོར་བྱས་པའི་ཉེས་མིང་འོག་གནས་དབྱུང་བཏང་། ད་ལྟའི་ཆར་ལྷོ་ཀོ་རི་ཡའི་དཔལ་འབྱོར་བློན་ཆེན་ཆོའེ་སང་མོཀ་ (Choi Sang-mok) ཡིས་སྲིད་འཛིན་ལས་ཚབ་ཀྱི་འགན་འཁུར་ཡོད་འདུག

ལྷོ་ཀོ་རི་ཡའི་ནང་ཆབ་སྲིད་རྩོད་རྙོག་ཆེན་པོ་ཡོང་གི་ཡོད་པའི་ཁར། ཕྱིའི་རྒྱལ་ཁབ་ཁག་ལ་འབྲེལ་ལམ་འགག་པ་དང་། རྒྱལ་ཁབ་ཀྱི་དཔལ་འབྱོར་ཐད་ཕྱོགས་མང་པོ་ནས་དཀའ་ངལ་འཕྲད་ཀྱི་ཡོད་འདུག ཕྱོགས་འགལ་དམངས་གཙོ་ཚོགས་པས། རྒྱལ་ཁབ་ཚད་ལྡན་དུ་གནས་ཐུབ་པའི་ཐབས་ལམ་ཉག་གཅིག་ནི་གྱེན་ལོག་པའི་སྟོབས་ཤུགས་ཡོངས་རྫོགས་རྩ་མེད་བཟོ་རྒྱུ་དང་ལྷོ་ཀོ་རི་ཡའི་དཔལ་འབྱོར་གྱི་གནས་བབ་ཉམས་དམས་སུ་གཏོང་བར་ཉེན་ཁ་བཟོ་མཁན་གྱི་ཆབ་སྲིད་པ་རྣམས་རྩ་མེད་གཏོང་དགོས་པའི་སྐུལ་མ་བྱས་ཡོད་འདུག་ལ། མུ་མཐུད་ཕྱོགས་འགལ་དམངས་གཙོ་ཚོགས་པ་དང་གཞུང་འཛིན་མི་དམངས་སྟོབས་ཤུགས་ཚོགས་པ་གཉིས་བར་ནང་འཁྲུག་ཆེན་པོ་ཡོང་མུས་ཡིན་འདུག

ཕྱི་ལོ་ ༢༠༡༧ ཟླ་ ༣ ཚེས་ ༡༠ ཉིན་ལྷོ་ཀོ་རི་ཡའི་ཆེས་མཐོའི་ཁྲིམས་ཁང་གིས་སྲིད་འཛིན་ལྕམ་ཕར་ཁཱི་གྷིན་ཧི་ (Park Geun-hye) ལ་ལྐོག་རྔན་སྤྲོད་ལེན་གྱི་ནག་ཉེས་གཡོགས་ཏེ་སྲིད་འཛིན་ནས་གནས་དབྱུང་བཏང་ཡོད་པ་དང་། ཕྱི་ལོ་ ༢༠༡༨ ཟླ་ ༤ ཚེས་ ༦ ཉིན་ལྕམ་ཕར་ཁཱི་གྷིན་ཧི་ལ་རྒྱུ་ནོར་ལྐོག་ཟ་དང་ཆབ་སྲིད་མི་སྣའི་བར་ལ་ལྐོག་རྔན་སྤྲོད་རེས། དེ་བཞིན་རྒྱལ་ཁབ་ཀྱི་གསང་བའི་ཡིག་ཆ་ཕྱིར་གྱར་བ་དང་དབང་ཆ་ལོག་སྤྱོད་ཀྱིས་གཞན་ལ་ལས་དོན་བཙན་སྐུལ་བྱས་པ་བཅས་ཀྱི་ནག་ཉེས་གཡོགས་ཏེ། མི་ལོ་ ༢༤ ཡི་བཙོན་འཇུག་ཁྲིམས་ཐག་བཅད་ཡོད་པ་རེད།

གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། པདྨ་མཚོ།