རྒྱ་ནག་དམར་གཞུང་གི་བཙན་གནོན་མྱོང་བཞིན་པའི་འགྲོ་བ་མིའི་ཐོབ་ཐང་རྩོད་ལེན་པ་ཁག་ཅིག་གིས་ཨ་རིའི་སྲིད་འཛིན་ཊོམ་ཕུ་མཆོག་གི་དམ་འབུལ་མཛད་སྒོའི་ཐོག་རྒྱ་ནག་གི་སྲིད་འཛིན་གཞོན་པ་ཧན་ཀྲང་མཉམ་ཞུགས་བྱས་པར་ངོ་རྒོལ་བསྒྲགས་གཏམ་སྤེལ་འདུག
ཨ་རིའི་སྲིད་འཛིན་སྐབས་ ༤༧ པ་ཊོམ་ཕུ་མཆོག་གིས་ལས་འཁུར་དམ་བཅའ་ཕུལ། ༢༠༢༥།༠༡།༢༠
ཁ་སང་ཕྱི་ཚེས་ ༢༠ ཉིན་ཨ་རིའི་སྲིད་འཛིན་གསར་པ་སྐུ་ཞབས་ཊོམ་ཕུ་མཆོག་གིས་ཨ་རིའི་སྲིད་འཛིན་ཞེ་བདུན་པའི་དམ་བཅའ་ཕུལ་བའི་མཛད་སྒོ་འཚོགས་ཡོད་ཅིང་། མཛད་སྒོའི་ཐོག་རྒྱ་གར་གྱི་ཕྱི་སྲིད་བློན་ཆེན་རྗེ་ཤང་གྷར་མཆོག་དང་། ཨི་ཊ་ལིའི་སྲིད་བློན་ཇོ་ཇེ་ཡ་མི་ལོ་ནི་མཆོག ཨར་ཇིན་ཊི་ནའི་སྲིད་འཛིན་ཇ་ཝིར་མེ་ལེཡ་མཆོག ཧྥ་རན་སིའི་སྲིད་འཛིན་མེག་ཁོན་མཆོག རྒྱ་ནག་གི་སྲིད་འཛིན་གཞོན་པ་ཧན་ཀྲང་སོགས་དང་། འཛམ་གླིང་གི་ཕྱུག་བདག་དང་ཚོང་གཉེར་ཁང་ཆེན་པོ་ཁག་ཅིག་གི་སྤྱིའི་བཀོད་འདོམས་པ་སོགས་ཀྱང་འཛོམས་ཡོད་འདུག
བོད་ཀྱི་གཞོན་ནུ་ལྷན་ཚོགས་དང་བོད་རང་བཙན་སློབ་ཕྲུག་ཚོགས་པ། དེ་བཞིན་ཡུ་གུར་དང་། ཧོང་ཀོང་སོགས་ཀྱི་ལས་འགུལ་བ་ཁག་ཅིག་གིས་དམངས་གཙོ་དང་འགྲོ་བ་མིའི་ཐོབ་ཐང་ལ་བརྩི་མེད་གཏོར་བཤིག་གཏོང་མཁན་གྱི་རྒྱ་ནག་དམར་ཤོག་གཞུང་གི་འཐུས་ཚབ་ཧན་ཀྲང་མཛད་སྒོ་དེར་མཉམ་ཞུགས་བྱེད་པའི་འོས་བབ་གཏན་ནས་མེད་པའི་བསྒྲགས་གཏམ་ཞིག་སྤེལ་ཏེ། ཨ་རིའི་གཞུང་གསར་པས་རྒྱ་ནག་གཞུང་གིས་བོད་དང་། ཤར་ཏུར་ཀི་སི་ཐན། ཧོང་ཀོང་སོགས་ཀྱི་འགྲོ་བ་མིའི་ཐོབ་ཐང་ལ་རྡོག་རོལ་གཏོང་མུས་ཡིན་པའི་གནད་དོན་ཐད་ལ་ལངས་ཕྱོགས་བརྟན་པོར་འཛིན་དགོས། རྒྱ་ནག་གཞུང་གིས་འདས་པའི་མི་ལོ་དྲུག་ཅུ་ལྷག་གི་རིང་མི་རིགས་རྩ་མེད་དང་། བོད་ཀྱི་སྐད་ཡིག་དང་རིག་གཞུང་སྦྱང་སྤྱོད་བཀམ་སྡོམ་གྱིས། བོད་ཕྲུག་རྣམས་ཀྱི་འཚོ་བ་ལ་སྔར་མེད་ཀྱི་གནོན་ཤུགས་སྤྲོད་མུས་ཡིན་པ་སོགས་གསལ་འདུག
དེ་བཞིན་ཊོམ་ཕུ་སྲིད་གཞུང་གསར་པར་འབོད་སྐུལ་དོན་ཚན་བཞི་ཞུས་པའི་ནང་། རྒྱ་ནག་གཞུང་གིས་༧གོང་ས་རྒྱལ་བ་རིན་པོ་ཆེ་མཆོག་དང་། བཙན་བྱོལ་བོད་གཞུང་གི་སྐུ་ཚབ་དབར་མུ་མཐུད་གྲོས་མོལ་བྱ་དགོས་པ་དང་། བོད་ནང་གི་འགྲོ་བ་མིའི་ཐོབ་ཐང་རྡོག་རོལ་གཏོང་མཁན་རྒྱ་ནག་གི་དཔོན་རིགས་ཚོར་ཉེས་ཆད་དྲག་པོ་གཅད་དགོས་པ། རྒྱལ་སྤྱིའི་རྟོག་ཞིབ་པ་དང་གསར་འགོད་པ་རྣམས་རང་དབང་ཐོག་བོད་ནང་འགྲོ་སྐྱོད་ཆོག་པ་དགོས། དེ་བཞིན་ཨ་རིའི་བོད་དོན་རྒྱབ་སྐྱོར་གྱི་ཁྲིམས་ཡིག་ཕྱག་བསྟར་གྱིས་ནུས་པ་ལྡན་པ་ཞིག་ཏུ་བཟོ་གནང་དགོས་སྐོར་ཞུས་འདུག
བོད་མི་དང་ཡུ་གུར་བ་སོགས་ཀྱི་ལས་འགུལ་བ་ཁག་ཅིག་གིས་ཝ་ཤིང་ཊོན་དུ་ཡོད་པའི་རྒྱ་ནག་གཞུང་ཚབ་ཁང་གི་མདུན་དུ་ངོ་རྒོལ་ལས་འགུལ་སྤེལ།
སྐུ་ཞབས་ཊོམ་ཕུ་མཆོག་གིས་དབུ་འབྱེད་མཛད་སྒོའི་སྟེང་། ཨ་རི་རྒྱལ་ཁབ་ཀྱི་མཐའ་སྲུང་དང་ལྷག་པར་ལྷོ་རྒྱུད་ཀྱི་མཐའ་མཚམས་སྲུང་སླད། ངས་ཨ་རིའི་ལྷོ་རྒྱུད་དུ་དམག་མི་མངགས་ནས་འགོག་སྲུང་གི་ལས་ཀ་གཉེར་རྒྱུ་ཡིན། ང་ཚོའི་གྲོང་ཁྱེར་དང་གྲོང་ཁྱེར་ནང་ཁུལ་དུ་གཏོར་བཤིག་གཏོང་མཁན་དང་ཁྲིམས་འགལ་ངང་ཨ་རིའི་ཡོང་མཁན་རྣམས་ཀྱི་དྲག་སྤྱོད་པ་སོགས་བཀག་སྡོམ་བྱ་རྒྱུ་ཡིན། ཉེས་མེད་བཙོན་པ་དག་ཀློད་གྲོལ་གཏང་རྒྱུ་ཡིན། ཞེས་དང་། ཡང་ཁོང་གིས། ངས་འཕྲལ་དུ་ང་ཚོའི་ཚོང་འབྲེལ་ལམ་ལུགས་བསྐྱར་བཅོས་བྱས་ནས་ཨ་རིའི་ལས་མི་དང་ཁྱིམ་ཚང་སྲུང་སྐྱོབ་བྱེད་ཀྱི་ཡིན་ལ། ང་ཚོས་ཕྱི་རྒྱལ་གྱི་རྒྱལ་ཁབ་ལ་ཁྲལ་དང་སྒོ་ཁྲལ་བརྒྱབ་ནས་ང་ཚོའི་མི་སེར་ཕྱུག་པོར་འགྱུར་གྱི་ཡིན། དམིགས་ཡུལ་འདིའི་ཆེད་དུ་ང་ཚོས་སྒོ་ཁྲལ་དང་། ཁྲལ། ཡོང་འབབ་བཅས་ཚང་མ་སྡུད་ལེན་བྱེད་པའི་ཕྱི་ཕྱོགས་ཡོང་འབབ་ལས་ཁུངས་བཙུགས་ཡོད། ཅེས་གསུངས་ཡོད་འདུག
ཨ་རིའི་སྲིད་འཛིན་སྐུ་ཞབས་ཊོམ་ཕུ་མཆོག་གིས་འདི་ལོའི་འོས་བསྡུ་དྲིལ་བསྒྲགས་སྐབས་དོན་ཚན་ཉེར་བཞི་ཁས་ལེན་བྱས་པའི་ཁྲོད། ནག་ཉེས་ཅན་དང་ཁྲིམས་འགལ་གྱི་ཐོག་ནས་ཨ་རིར་གནས་སྡོད་བྱེད་མཁན་རྣམས་འཛིན་བཟུང་དང་ཕྱོགས་ཡོངས་ནས་ས་གནས་རེ་རེའི་ཐོན་ཁུངས་དང་ཡོང་བབ་ཐོག་ལ་ཤུགས་སྣོན། ཨ་རིའི་རྒྱལ་སྲུང་དང་བདེ་འཇགས་ཀྱི་སྲིད་ཇུས། དེ་བཞིན་དྲག་སྤྱོད་པ་འགོག་སྲུང་སླད་མཐའ་མཚམས་བརྟན་སྲུང་བགྱིས་ཏེ་རྒྱལ་ཁབ་གཞན་གྱི་གནས་སྤོར་བ་རྣམས་འགོག་ཐབས། ཁྲལ་བསྡུ་ཇེ་ཉུང་དང་ལས་ཀའི་དུས་ཡུན་རྒྱ་སྐྱེད་དེ་ཨ་རིའི་སྤྱི་དམངས་ཀྱི་འཚོ་བ་ཡར་སྐྱེད་གཏོང་ཐབས། རྒྱ་ནག་གཙོས་ཕྱིའི་རྒྱལ་ཁབ་ཁག་ལ་ཚོང་འབྲེལ་གྱི་མ་འཇོག་ཕྱིར་འཐེན། དེ་བཞིན་ཨུ་ཡུ་གཉིས་ཀྱི་གནད་དོན་ལ་ཚོད་འཛིན་བྱེད་ཐབས། ཨེ་ཛི་རལ་དང་གྷ་ཛིའི་དམག་འཁྲུག་མཚམས་འཇོག་ཏུ་འཇུག་རྒྱུ་ཡིན་པ་སོགས་བསྒྲགས་ཡོད་པ་རེད།
རྒྱལ་སྤྱིའི་གནད་དོན་དབྱེ་ཞིབ་པ་མང་པོ་ཞིག་གིས། ཨ་རིའི་ལས་ཐོག་སྲིད་འཛིན་ཊོམ་ཕུ་མཆོག་གིས་སྲིད་འཛིན་ལས་ཡུན་དང་པོའི་སྐབས་གནད་དོན་མང་པོ་ཞིག་ཐད་ནས་རྒྱུས་ལོན་གནང་ཡོད་པས། ད་ལན་ཨ་རིའི་སྲིད་འབྱོར་གཉིས་ཀྱི་ཐད་ལ་ཤུགས་སྣོན་འཕར་མ་ཞིག་རྒྱག་སྲིད་སྐོར་དང་། འོས་བསྡུའི་དྲིལ་བསྒྲགས་སྐབས། ཁོང་གིས་ལས་ཁུར་ཞུས་རྗེས་ཀྱི་ཆུ་ཚོད་ཉེར་བཞིའི་ནང་ཨུ་ཡུ་གཉིས་ཀྱི་དམག་འཁྲུག་མཚམས་འཇོག་བྱ་རྒྱུ་ཡིན་པའི་ཁས་ལེན་དམ་བཅའ་བཞག་ཡོད་པ་བཞིན། ཨུ་རུ་སུའི་མགོ་ཁྲིད་ཕུ་ཌིན་དང་མཉམ་འབྲེལ་གྱིས་ཨ་ཨུ་གཉིས་ཀྱི་ཁེ་ཕན་གཙོ་བོར་དམིགས་ནས། དམག་འཁྲུག་ཞི་ཐབས་ལ་ཕྱག་ལས་གནང་སྲིད་པའི་ཚོད་དཔག་བྱེད་ཀྱིན་ཡོད་འདུག་ལ། དམ་འབུལ་མཛད་སྒོའི་ཉིན་ནས་རྒྱལ་སྲུང་གི་ནུས་པ་སྐྱེད་ནས་ཨ་རིའི་ཐོན་ཁུངས་སྐྱེད་ཐབས་དང་། ཁྲིམས་འགལ་གྱི་གནས་སྤོར་བ་འགོག་ཐབས་ཀྱི་སྲིད་ཇུས་སོགས་ལ་མཚན་རྟགས་བསྐྱོན་ཚར་ཡོད་འདུག
ཨ་རིའི་སྲིད་འཛིན་ཊོམ་ཕུ་མཆོག་ཕྱི་ལོ་ ༢༠༠༠ དང་ ༢༠༡༡ ལོར་ཨ་རིའི་སྲིད་འཛིན་གྱི་འོས་མིར་ལངས་ཡོད་ཀྱང་ཕྱིས་སུ་ཕྱིར་འཐེན་བྱས་ཡོད་འདུག་ལ། ཕྱི་ལོ་ ༢༠༡༦ ལོར་ཨ་རིའི་སྲིད་འཛིན་གྱི་འོས་མིར་ལངས་ཏེ་འོས་བསྡུའི་རྒྱལ་ཁ་ཐོབ་ནས་ཨ་རིའི་སྲིད་འཛིན་དུ་འདེམས་ཐོན་བྱུང་། ༢༠༢༠ ལོར་བསྐྱར་དུ་སྲིད་འཛིན་འོས་མིར་ལངས་ཡོད་ཀྱང་འོས་བསྡུར་ཕམ། ཕྱི་ལོ་ ༢༠༢༤ ལོའི་ཨ་རིའི་སྲིད་འཛིན་གྱི་རྒྱལ་ཡོངས་འོས་བསྡུའི་ཁྲོད། དམངས་གཙོ་ཚོགས་པའི་འོས་མི་ཀ་མ་ལ་ཧན་རེ་སིར་འོས་གྲངས་ ༢༢༦ དང་། སྤྱི་མཐུན་ཚོགས་པའི་འོས་མི་སྲིད་འཛིན་ཟུར་པ་ཊོམ་ཕུ་ལ་འོས་གྲངས་ ༢༩༥ ཐོབ་སྟེ། ཊོམ་ཕུ་མཆོག་ཨ་རིའི་སྲིད་འཛིན་སྐབས་ ༤༧ པར་འོས་འདེམས་བྱུང་ཡོད་པ་རེད།
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།
