རྒྱ་གར་གྱི་དམངས་གཙོའི་ཉིན་མོ་ཐེངས་ ༧༦ པ་སྲུང་གཙི་གནང་།

དེ་རིང་གངས་ཅན་སྐྱིད་གཤོངས་ཀྱི་སྲི་བཟློག་མཆོད་རྟེན་གྱི་མདུན་ཐང་དུ་བོད་མིའི་སྒྲིག་འཛུགས་ཀྱི་དམངས་གཙོའི་ཀ་བ་གསུམ་གྱི་མཛད་གཙོ་རྣམ་པ་ལྷན་འཛོམས་ཐོག་རྒྱ་གར་གྱི་དམངས་གཙོའི་དུས་དྲན་ ༧༦ པ་གཞུང་འབྲེལ་སྲུང་གཙི་གནང་སོང་།

ལོ་ལྟར་ཕྱི་ཟླ་ ༡ ཚེས་ ༢༦ ཉིན་ནི་རྒྱ་གར་དམངས་གཙོ་ཉིན་མོར་སྲུང་གཙི་བྱེད་བཞིན་ཡོད་པ་ལྟར། དེ་རིང་ཕྱི་ཚེས་ ༢༦ ཉིན་གྱི་ཞོགས་པའི་ཆུ་ཚོད་ ༩ །༣༠ སྟེང་གངས་སྐྱིད་སྲི་བཟློག་མཆོད་རྟེན་གྱི་མདུན་ཐང་དུ། བོད་མིའི་སྒྲིག་འཛུགས་ཀྱི་སྲིད་ཚབ་ཤེས་རིག་བཀའ་བློན་ཐར་ལམ་སྒྲོལ་མ་མཆོག་གི་དབུས་བོད་མི་མང་སྤྱི་འཐུས་ཚོགས་གཞོན་སྒྲོལ་མ་ཚེ་རིང་མཆོག་དང་། ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག བདེ་སྲུང་བཀའ་བློན་རྒྱ་རི་སྒྲོལ་མ་མཆོག བོད་མིའི་སྒྲིག་འཛུགས་ཀྱི་ལྷན་ཁང་ཁག་གི་དྲུང་ཆེ་དང་དྲུང་འཕར་རྣམ་པ། བཀའ་དྲུང་ཡིག་ཚང་གི་སྲི་ཞུ་ལས་བྱེད་བཅས་ལྷན་འཛོམས་ཀྱིས། རྒྱ་གར་གྱི་རྒྱལ་གླུ་གྱེར་འདོན་དང་སྲིད་ཚབ་མཆོག་གིས་རྒྱ་གར་གྱི་རྒྱལ་དར་བསྒྲེངས་འཛུགས་གནང་སྟེ། རྒྱ་གར་གྱི་དམངས་གཙོ་དབུ་བརྙེས་ཏེ་མི་ལོ་ ༧༦ འཁོར་བའི་དུས་དྲན་ཉིན་མོ་སྲུང་གཙི་གནང་སོང་།

སྐབས་དེར་སྲིད་ཚབ་ཤེས་རིག་བཀའ་བློན་ཐར་ལམ་སྒྲོལ་མ་མཆོག་གིས། དེ་རིང་རྒྱ་གར་གྱི་དམངས་གཙོའི་དུས་དྲན་སྐབས་ ༧༦ སྲུང་གཙིའི་ཉིན་མོ་འདིར། བོད་མིའི་སྒྲིག་འཛུགས་དང་བོད་མི་ཡོངས་ཀྱི་ཚབ་ཞུས་ཏེ་རྒྱ་གར་གཞུང་ལ་འཚམས་འདྲི་བཀྲ་ཤིས་བདེ་ལེགས་ཞུ་རྒྱུ་ཡིན། ད་ལན་གྱི་དམངས་གཙོའི་དུས་དྲན་དང་འབྲེལ། རྒྱ་གར་གྱི་རིག་གཞུང་ཕྱུག་པོ་ཡིན་པ་མ་ཟད། རྒྱ་གར་ནི་འཛམ་གླིང་ནང་དཔལ་འབྱོར་གྱི་ཐོག་ནས་ཡར་རྒྱས་ཆེ་ཤོས་ཀྱི་གྲས་སུ་ཚུད་ཀྱི་ཡོད་པ་བསྟན་རྒྱུ་རེད་འདུག ཕྱི་ལོ་ ༡༩༥༠ ཟླ་ ༡ ཚེས་ ༢༦ ཉིན་ནས་བཟུང་རྒྱ་གར་དམངས་གཙོའི་ཉིན་མོ་སྲུང་གཙི་མགོ་ཚུགས་པ་རེད། རྒྱ་གར་གཞུང་མང་གཉིས་ནི་བཙན་བྱོལ་བོད་མི་རྣམས་ལ་ཧ་ཅང་བཀའ་དྲིན་ཆེན་པོ་ཡིན་ལ། བཀའ་དྲིན་ཆེན་པོ་ཡིན་པ་བོད་མིའི་སེམས་སུ་ཚོར་བ་ཤུགས་ཆེན་ཡོད། ༧གོང་ས་རྒྱལ་བ་རིན་པོ་ཆེ་མཆོག་གིས་དུས་རྟག་ཏུ་རྒྱ་གར་ནི་བོད་མི་རྣམས་ལ་བཀའ་དྲིན་ཆེན་པོ་ཡིན་པའི་བཀའ་སློབ་སྩལ་གྱི་ཡོད་པ་རེད། ཅེས་གསུངས་བྱུང་།

བཀའ་བློན་ཐར་ལམ་སྒྲོལ་མ་མཆོག་གིས། རྒྱ་གར་གྱི་བཅའ་ཁྲིམས་ནང་བལྟས་པ་ཡིན་ན། དེའི་ནང་དུ་སྡེ་ཚན་བཞི་ཡོད་པའི་ཁྲོད། གཅིག ཁྲིམས་ཀྱི་ཐོག་ནས་ཆོ་ག་ཆོས་ལུགས་དང་ཕོ་མོ། རིགས་སོགས་ཀྱི་ཁྱད་པར་མེད་པར་ཚང་མ་གཅིག་མཚུངས་ཡིན་པ་དང་། གཉིས་པ། རང་དབང་། གསུམ་པ། ཚང་མ་གཅིག་པ་ཡིན་པ། བཞི་པ། མཛའ་མཐུན་བཅས་རེད། རྒྱ་གར་ནང་སྐད་ཡིག་དང་། ལུགས་སྲོལ། རིག་གཞུང་སོགས་མི་འདྲ་བ་ཡོད་རུང་། རྒྱ་གར་ནང་དམངས་གཙོའི་ལམ་ལུགས་དེ་ལོ་ངོ་མང་པོའི་རིང་གནས་ཐུབ་པ་ནི་གཟི་བརྗིད་རེད་བསམ་གྱི་འདུག ཁྱིམ་མཚེས་རྒྱལ་ཁབ་མང་པོ་ཞིག་གིས་དམངས་གཙོའི་ལམ་ལུགས་ལག་བསྟར་བྱེད་ཀྱིན་ཡོད་ཀྱང་། བར་སྐབས་སུ་དཀའ་ངལ་འཕྲད་དེ་ཁ་འཐོར་བ་དང་བསྐྱར་གསོ་བྱས་པ་སོགས་མང་པོ་བྱུང་འདུག འོན་ཀྱང་། རྒྱ་གར་གྱིས་འོས་ཐོབ་རྗེས་གཅིག་གིས་གཅིག་ལ་བརྩི་བཀུར་ཞུས་པ་དེར་བོད་མི་རྣམས་ཀྱིས་དཔེ་བལྟ་དགོས་ཀྱི་རེད་བསམ་གྱི་འདུག ཅེས་གསུངས་བྱུང་།

ཕྱི་ལོ་ ༡༩༤༧ ལོར་རྒྱ་གར་ལ་རང་བཙན་ཐོབ་སྟེ། ཕྱི་ལོ་ ༡༩༤༩ ལོའི་ཟླ་ ༡ ཚེས་ ༢༦ ཉིན་དམངས་གཙོའི་ལམ་ལུགས་ཀྱི་རྩ་ཁྲིམས་གཏན་འབེབ་དང་། ཕྱི་ལོ་ ༡༩༥༠ ལོའི་ཟླ་ ༡ ཚེས་ ༢༦ ཉིན་དངོས་སུ་ལག་བསྟར་བྱས་པ་ནས་བཟུང་། ལོ་ལྟར་ཕྱི་ཟླ་ ༡ ཚེས་ ༢༦ ཉིན་རྒྱ་གར་གྱིས་གཞུང་འབྲེལ་ཐོག་དམངས་གཙོ་དབུ་བརྙེས་པའི་ཉིན་མོར་སྲུང་གཙི་གནང་གི་ཡོད་པ་རེད།

གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། སྐལ་བཟང་སྦྱིན་པ།