རྒྱ་དཀར་ནག་གཉིས་ཀྱི་ཕྱི་སྲིད་བློན་ཆེན་ལས་ཁུངས་ཀྱི་ཆེས་མཐོ་མི་སྣ་ཐུག་འཕྲད་བྱས་པ་བརྒྱུད་ཕྱོགས་གཉིས་ཀྱིས་སྔར་ལས་ལྷག་པའི་མཉམ་འབྲེལ་གྱི་ལས་དོན་སྤེལ་རྒྱུར་གྲོས་མཐུན་བྱུང་འདུག
India’s Foreign Secretary Vikram Misri (left) meets Chinese Foreign Minister Wang Yi in Beijing on Monday.(AP)
ཁ་སང་ཕྱི་ཚེས་ ༢༧ ཉིན་རྒྱ་གར་ཕྱི་སྲིད་བློན་ཆེན་ལས་ཁུངས་ཀྱི་སྤྱི་ཁྱབ་དྲུང་ཆེ་སྐུ་ཞབས་ཝི་ཀི་རམ་ (Vikram Misri) མཆོག་གིས་རྒྱ་ནག་གི་རྒྱལ་ས་པེ་ཅིན་དུ་རྒྱ་ནག་གི་ཕྱི་སྲིད་བློན་ཆེན་ཝང་ཡི་ཟེར་བ་དང་ཐུག་འཕྲད་བྱས་ཏེ། རྒྱ་དཀར་ནག་གཉིས་ཀྱི་མཉམ་ལས་ཀྱི་ནུས་པ་སྐྱེད་ཐབས་དང་འབྲེལ་ལམ་སྲ་བརྟན་ཡོང་ཐབས་ཟེར་བ་ཞིག་གི་འོག་ནས། འདི་ལོའི་དབྱར་དུས་ནས་རྒྱ་ནག་གིས་རྒྱ་གར་གྱི་གནས་མཇལ་བ་རྣམས་བོད་ཀྱི་གངས་རིན་པོ་ཆེར་གནས་མཇལ་གཏང་རྒྱུ་དང་། རྒྱ་དཀར་ནག་གཉིས་ཀྱི་མཁའ་ལམ་སྒོ་ཕྱེ་ནས་གནམ་གྲུ་ཤར་གཏོང་བྱ་རྒྱུ་སོགས་ཚུད་པའི་མཉམ་ལས་ཀྱི་ཐད་ལ་གྲོས་མཐུན་བྱུང་ཡོད་འདུག
གནད་དོན་དེའི་ཐད་ཕྱོགས་གཉིས་ཀྱིས་མཉམ་འབྲེལ་བསྒྲགས་གཏམ་ཞིག་སྤེལ་བའི་ཁྲོད། ཕྱོགས་གཉིས་བར་གྲོས་མཐུན་བྱུང་བ་བཞིན། འདི་ལོའི་དབྱར་དུས་ནས་རྒྱ་ནག་གཞུང་གིས་རྒྱ་གར་གྱི་གནས་མཇལ་བ་རྣམས་བོད་ཀྱི་གངས་རིན་པོ་ཆེར་གནས་མཇལ་དུ་གཏང་རྒྱུ་དང་། ཕྱོགས་གཉིས་ཀྱི་འཕྲུལ་རིག་གི་ནུས་པ་གོང་མཐོར་གཏང་རྒྱུ། དེ་བཞིན་འཕྲུལ་རིག་དང་། ཆུ། བོད་ནས་རྒྱ་གར་དུ་བཞུར་གྱིན་པའི་ཆུ་བོ་དག་དང་འབྲེལ་བའི་མཉམ་འབྲེལ་ལས་དོན་ཐད་ལ་གོ་བསྡུར་གྱི་ལྷན་ཚོགས་འཚོག་རྒྱུ། ཕྱོགས་གཉིས་ཀྱི་ཤེས་རིག་བརྗེ་ལེན་གྱི་ངོ་བོའི་ཐོག་ནས་ཤེས་ཡོན་པ་དང་། བསམ་བློ་བ། གནད་དོན་དཔྱད་ཞིབ་པ་སོགས་ཀྱི་ལྷན་ཚོགས་རིགས་མང་ཙམ་བསྡུ་སྐོང་དང་མཁའ་ལམ་སྒོ་འབྱེད། དེ་བཞིན་ཕྱི་ལོ་ ༢༠༢༥ ལོར་རྒྱ་དཀར་ནག་གཉིས་ཀྱི་བར་མཉམ་ལས་མགོ་བཙུགས་ནས་མི་ལོ་ ༧༥ འཁོར་བའི་དུས་དྲན་གཙི་སྲུང་དང་སྦྲགས། ཕྱོགས་གཉིས་ཀྱི་མཉམ་ལས་དང་ཡིད་ཆེས་སླར་གསོ་བྱ་རྒྱུ་སོགས་གསལ་འདུག
གནད་དོན་དེའི་ཐད་རྒྱ་གར་ཕྱི་སྲིད་བློན་ཆེན་ལས་ཁུངས་ཀྱི་དྲུང་ཆེ་སྐུ་ཞབས་ཝི་ཀི་རམ་མཆོག་གིས། འཛམ་གླིང་གི་ལྷོ་རྒྱུད་རྒྱལ་ཁབ་དག་གི་བདེ་འཇགས་དང་ཁྲིམས་མཐུན་གྱི་རང་དབང་སྲུང་སྐྱོབ་དང་། རྒྱ་དཀར་ནག་གི་མི་དམངས་ཀྱི་ཁེ་ཕན་དང་ཕྱོགས་གཉིས་ཀྱི་གཞི་རྩའི་ཁེ་ཕན་ཡར་སྐྱེད་སླད། རྒྱ་དཀར་ནག་གཉིས་ཀྱི་འབྲེལ་ལམ་ཡར་རྒྱས་དང་འཕེལ་རྒྱས་སུ་གཏོང་བར་འབད་འབུངས་བྱེད་མུས་ཡིན་སྐོར་སོགས་གསུངས་འདུག
ད་ལན་ཡང་། འདས་ལོའི་ཕྱི་ཟླ་ ༡༠ ནང་རྒྱ་གར་གྱི་སྲིད་བློན་མུ་དྷི་མཆོག་དང་ཞི་ཅིན་ཕིན་གཉིས་ཀྱི་ཐུག་འཕྲད་སྐབས་བྱུང་བའི་གྲོས་མོལ་གཞི་བཞག་གི་ཐོག་ནས། ཨེ་ཤ་ཡའི་སྟོབས་ཆེན་རྒྱལ་ཁབ་གཉིས་ཀྱི་ཧིན་བོད་མཐའ་མཚམས་སོགས་དང་འབྲེལ་བའི་དཀའ་རྙོག་ཞི་ཐབས་སྐོར་ལའང་གླེང་སློང་བྱས་ཡོད་ཀྱང་། ཉེ་ལམ་རྒྱ་ནག་གཞུང་གིས་ཨ་སྒོར་ཐེར་འབུམ་ ༡༣༧ ལྷག་བཏང་ནས་བོད་ཀྱི་ཡར་ཀླུང་གཙང་པོའི་བཞུར་རྒྱུན་དུ་འཛམ་གླིང་གི་ཆེས་ཆེ་བའི་གློག་འདོན་ས་ཚིགས་གསར་འཛུགས་བྱ་རྒྱུ་ཡིན་ལུགས་བསྒྲགས་ཡོད་སྟབས། གནད་དོན་དབྱེ་ཞིབ་པ་མང་པོ་ཞིག་གིས། རྒྱ་ནག་གཞུང་གིས་བོད་ཀྱི་ཡར་ཀླུང་གཙང་པོར་འཛམ་གླིང་གི་ཆེས་ཆེ་བའི་གློག་འདོན་ཆུ་རགས་གསར་རྒྱག་བྱ་རྒྱུ་ཡིན་པ་དེས། རྒྱ་དཀར་ནག་གཉིས་ཀྱི་འབྲེལ་ལམ་ལ་དོ་ཕོག་ཤུགས་ཆེན་བཟོས་པ་མ་ཟད། གནད་དོན་དེ་ནི་འབྱུང་འགྱུར་རྒྱ་དཀར་ནག་གཉིས་ཀྱི་ཆེས་རྩོད་གླེང་ཆེ་བའི་ཁ་མཆུ་ཞིག་ཏུ་འགྱུར་ཉེན་ཡོད་པའི་ཚོད་དཔག་བྱེད་ཀྱིན་འདུག་ལ། ཆུ་རགས་དེའི་དབང་གིས། རྒྱ་གར་གཙོས་ཨེ་ཤ་ཡའི་ལྷོ་རྒྱུད་རྒྱལ་ཁབ་མང་དག་ཅིག་གི་རང་བྱུང་ཁོར་ཡུག་དང་འཚོ་གནས་ལ་དཀའ་ངལ་འཕྲད་ཉེན་ཡང་ཡོད་པ་རེད།
གཞན་ཡང་། འདས་ལོའི་ཕྱི་ཟླ་ ༡༢ ཚེས་ ༡༨ ཉིན་རྒྱ་གར་གྱི་བདེ་སྲུང་སློབ་སྟོན་པ་སྐུ་ཞབས་ཨ་ཇི་ཐི་དྷོ་ཝལ་(Ajit Doval ) དང་རྒྱ་ནག་ཕྱི་སྲིད་བློན་ཆེན་ཝང་ཡི་གཉིས་ཀྱི་སྣེ་འཁྲིད་པའི་ཚོགས་ཆུང་གཉིས་རྒྱ་ནག་གི་རྒྱལ་ས་པེ་ཅིན་དུ་ཐུག་འཕྲད་བྱས་ཏེ། རྒྱ་དཀར་ནག་གཉིས་ཀྱི་ཧིན་བོད་མཐའ་མཚམས་ཀྱི་རྩོད་གླེང་ཞི་འཇགས་ཡོང་ཐབས་དང་། ཕྱོགས་གཉིས་ཀྱི་མཉམ་ལས་ཡར་རྒྱས་གཏོང་ཐབས་ཚུད་པའི་དོན་ཚན་དྲུག་ལ་མོས་མཐུན་བྱུང་ཡོད།
ཕྱི་ལོ་ ༢༠༢༠ ཟླ་ ༦ ཚེས་ ༡༥ ཉིན་བོད་དང་རྒྱ་གར་གྱི་ས་མཚམས་སུ་ཁེལ་བའི་གྷལ་ཝན་ལུང་གཞོངས་སུ་རྒྱ་དཀར་ནག་གཉིས་ཀྱི་དམག་མིའི་བར་དྲག་པོའི་འཁྲུག་འཛིང་ཤོར་ཏེ། རྒྱ་གར་གྱི་མཐའ་སྲུང་དམག་མི་ ༢༠ དང་རྒྱ་ནག་གི་མཐའ་སྲུང་དམག་མི་ ༤ ཡི་ཚེ་སྲོག་ཤོར་ཡོད་པའི་གནས་ཚུལ་ཐོན། ཕྱོགས་གཉིས་བར་ཐེངས་མང་པོར་གྲོས་མོལ་བྱས་ཡོད་ཀྱང་འདས་པའི་ལོ་ཤས་རིང་རྒྱ་དཀར་ནག་གཉིས་བར་ཧིན་བོད་མཐའ་མཚམས་ཁུལ་དུ་གདོང་ཐུག་ཡང་ཡང་བྱུང་ནས་གནས་སྟངས་ཛ་དྲག་ཅན་དུ་གྱུར་ཡོད་པ་མ་ཟད། ཕྱོགས་གཉིས་ཀྱིས་མཐའ་མཚམས་བརྟན་སྲུང་ཆེད་གཞུང་ལམ་དང་དམག་དོན་ལྟེ་གནས་སྔར་ལས་མང་པོ་འཛུགས་སྐྲུན་བྱས་ཏེ་དམག་དོན་ནུས་པ་གོང་སྤེལ་དུ་གཏོང་བཞིན་ཡོད།
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
