ཆོས་སྡེ་གཉིས་ཀྱི་དགེ་འདུན་པ་ཞལ་གྲངས་ ༤༡ ལ་དགེ་སློང་གི་སྡོམ་པ་འབོག་འཇོག་མཛད།

༧གོང་ས་རྒྱལ་བ་རིན་པོ་ཆེ་མཆོག་ནས་བདག་ཅག་གི་སྟོན་པའི་སྐུ་བརྙན་གྱིས་༧མགོན་པོ་གང་ཉིད་ལ་ཞལ་འཛུམ་འཛུམ་གནང་གིན་ཡོད་པའི་སྣང་བ་ཞིག་བྱུང་ཡོད་སྐོར་སོགས་གསུངས་འདུག

དེ་རིང་༧གོང་ས་རྒྱལ་བ་རིན་པོ་ཆེ་མཆོག་ནས་ཆོས་སྡེ་བཀྲ་ཤིས་ལྷུན་པོའི་གཙུག་ལག་ཁང་དུ། སེར་བྱེས་མཁས་སྙན་གྲྭ་ཚང་དང་། རྫོང་དཀར་ཆོས་སྡེ་གཉིས་ཀྱི་དགེ་འདུན་པ་ཞལ་གྲངས་ ༤༡ ལ་དགེ་སློང་གི་སྡོམ་པ་འབོག་འཇོག་མཛད་ཡོད་ཅིང་། སྐབས་དེར་༧མགོན་པོ་གང་ཉིད་ཀྱིས། བདག་ཅག་གི་སྟོན་པ་ལ་བསྟོད་པའི་ཚིགས་བཅད་འདོན་སྐབས། སྟོན་པའི་སྐུ་བརྙན་གྱིས་ཞལ་འཛུམ་པའི་སྣང་བརྙན་ཞིག་འཆར་གྱི་ཡོད་སྐོར་སོགས་གསུངས་འདུག

༧གོང་ས་རྒྱལ་བ་རིན་པོ་ཆེ་མཆོག་ནས། ངོས་རང་གིས་དུས་ཚོད་དཀའ་ལས་ཁག་པོ་ཞིག་གི་འོག་ཏུ་བསྙེན་རྫོགས་ཀྱི་སྡོམ་པ་སྤྲད་རྒྱུའི་གོ་སྐབས་བྱུང་བར་ངོས་རང་བསོད་ནམས་ཆེན་པོ་ཡིན་དྲན་གྱི་འདུག ང་རང་ཚོ་བཙན་བྱོལ་བ་དང་རང་དབང་ལྡན་པ། གཙོ་ཆེ་ཤོས་ཆོས་དད་རང་མོས་ཡོད་པ་ཞིག་ཆགས་ཀྱི་ཡོད་རེད།  ངོས་རང་ལ་ཆགས་བཞག་ནའང་རྒྱ་གར་ལ་བཙན་བྱོལ་དུ་འབྱོར།   རྒྱ་གར་དེ་ཕྱོགས་གཅིག་ནས་རང་དབང་ལྡན་པའི་ལུང་པ་རེད་ལ། ཧ་ལམ་འཛམ་བུ་གླིང་གི་ཆོས་ལུགས་ཚང་མ་འདིར་ཡོད་པ་ཞིག་རེད་འདུག གནས་སྟངས་དེ་འདྲ་ཞིག་གི་འོག་ནས་ངོས་རང་རྒྱ་གར་དུ་བཙན་བྱོལ་བ་བྱས་ནས་བསྡད་ཡོད་རེད། ངོས་རང་གིས་ཆོས་འཆད་ཉན་དང་། བསླབ་བྱ་བརྒྱག་རྒྱུ་སོགས་ངོས་རང་གི་སེམས་ནང་གང་ཡོད་པ་དེ་རྒྱ་གར་ནང་རང་དབང་ལྡན་པའི་ཐོག་ནས་འཆད་སྐབས་དགའ་པོ་ཡང་ཞེ་དྲགས་བྱེད་ཀྱི་འདུག ཅེས་གསུངས་འདུག

ཡང་༧མགོན་པོ་གང་ཉིད་ཀྱིས། དུས་ཚོད་གཉན་ཕྲང་ཅན་གྱི་དུས་སྐབས་འདི་འདྲ་ཞིག་ལ་ང་རང་ཚོ་ཁྱིམ་ནས་ཁྱིམ་མེད་པར་རབ་ཏུ་བྱུང་བའི་ཐོག་ཏུ། དེ་རིང་འདིར་དགེ་སློང་བསྒྲུབ་རྒྱུའི་གོ་སྐབས་བྱུང་བ་ཧ་ཅང་སྐལ་བ་བཟང་པོ་རེད། ངོས་རང་ལ་ཆགས་བཞག་ནའང་དགེ་སློང་གི་སྡོམ་པ་འབོག་འཇོག་བྱ་རྒྱུའི་གོ་སྐབས་བྱུང་བར་ཞེ་དྲགས་སྐལ་བཟང་པོ་ཡིན། སྟོན་པ་ལ་བསྟོད་པའི་ཚིགས་བཅད་འདོན་དུས། སྟོན་པའི་ཞལ་འཛུམ་པ་ལྡན་པའི་སྣང་བརྙན་ཞིག་གཏན་གཏན་ཡོང་གི་འདུག བྱས་ཙང་དེ་འདྲ་སྐུ་འདྲ་སྟོང་པ་ཞིག་རེད་མི་འདུག དངོས་གནས་དྲང་གནས་ཐུབ་པའི་དབང་པོ་གསོན་པོ་ཡོད་པའི་སྣང་བ་ཞིག་འཆར་ཡོང་གི་འདུག ཅེས་གསུངས་འདུག

ད་ལྟ་དགའ་ལྡན་ཕོ་བྲང་ཡིག་ཚང་གི་དྲ་རྒྱར་གསལ་བའི་༧གོང་ས་རྒྱལ་བ་རིན་པོ་ཆེ་མཆོག་གི་མཛད་འཆར་ལྟར་ན། ཟླ་འདིའི་ཕྱི་ཚེས་ ༥ ཉིན་སེ་ར་བླ་སྤྱི་དང་། སེ་ར་བྱེས་སྨད་གྲྭ་ཚང་ཕྱག་མཛོད་ལྷན་རྒྱས་ཀྱིས་བླ་སྤྱིའི་ཚོགས་ཆེན་འདུ་ཁང་དུ་༧གོང་ས་རྒྱལ་བ་རིན་པོ་ཆེ་མཆོག་ལ་བརྟན་བཞུགས་བསྟར་འབུལ་དང་། ཕྱི་ཟླ་ ༡༢ ཉིན་གདན་ས་བཀྲ་ཤིས་ལྷུན་པོ་དགོན་པས་བརྟན་བཞུགས་བསྟར་འབུལ། ཕྱི་ཚེས་ ༡༧ ཉིན་སྨད་གྲྭ་ཚང་གིས་རྒྱུད་སྨད་ཚོགས་ཆེན་འདུ་ཁང་དུ་བརྟན་བཞུགས་བསྟར་འབུལ་ཞུ་རྒྱུ་ཡིན་འདུག

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།