ཆབ་སྲིད་བཙོན་ཟུར་རྣམ་སྐྱིད་ལགས་ཀྱིས་བོད་དོན་ཞུ་གཏུག་གི་ལས་འགུལ་སྤེལ་བཞིན་འདུག

བོད་ཀྱི་ཆབ་སྲིད་བཙོན་ཟུར་རྣམ་སྐྱིད་ལགས་ཀྱིས་ཉིན་གྲངས་ལྔའི་རིང་སུད་སི་ཇི་ནི་ཝ་རུ་བོད་དོན་ཞུ་གཏུག་གི་ལས་འགུལ་སྤེལ་བཞིན་འདུག

ཟླ་འདིའི་ཕྱི་ཚེས་ ༡༥ ཉིན་ནས་འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་གི་ཚོགས་ཐེངས་ ༥༨ (UNHRC 58^th Session) མ་འཚོགས་གཏན་ཁེལ་ཡོད་པ་ལྟར། ཟླ་འདིའི་ཕྱི་ཚེས་ ༡༠ ནས་ ༡༤ བར་ཉིན་གྲངས་ལྔའི་རིང་སུད་སི་ཇི་ནི་ཝ་གྲོང་ཁྱེར་དུ་བོད་ཀྱི་ཆབ་སྲིད་བཙོན་ཟུར་རྣམ་སྐྱིད་ལགས་ཀྱིས་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་དང་། རང་ཉིད་ལ་རྒྱའི་བཙོན་ཁང་དུ་སྡུག་སྦྱོང་མནར་གཅོད་བཏང་བའི་བརྒྱུད་རིམ་སོགས་ངོ་སྤྲོད་དང་འབྲེལ་བའི་ཞུ་གཏུག་གི་ལས་འགུལ་སྤེལ་མགོ་བཙུགས་ཡོད་འདུག

ཆབ་སྲིད་བཙོན་ཟུར་རྣམ་སྐྱིད་ལགས་ཀྱིས་འདི་གའི་གསར་འགོད་པར། རྒྱལ་ཁབ་རེ་ཡི་དཔོན་པོ་རེ་རེར་ཐུག་སྐབས། སོ་སོས་མྱངས་པའི་དཀའ་སྡུག་དག་ཡང་བསྐྱར་བཤད་ན་སེམས་ཧ་ཅང་སྐྱོ་བོ་འདུག དེ་བཞིན་དཀའ་སྡུག་མྱོང་མཁན་དེ་ང་གཅིག་པུ་མིན་པར་བོད་ནང་དུ་བོད་མི་བརྒྱ་ཕྲག་སྟོང་ཕྲག་མང་པོས་དཀའ་སྡུག་མྱོང་བཞིན་ཡོད་པ་བསམས་ན། ཡིད་སེམས་ཧ་ཅང་སྡུག་གི་འདུག ཡིན་ནའང་། མུ་མཐུད་བཤད་ས་དང་སྡིངས་ཆ་རག་ན་བོད་ནང་གི་བོད་མི་ཚོས་མྱངས་པའི་དཀའ་སྡུག་བཤད་འདོད་ཡོད། ངས་ག་ཚོད་བཤད་ནའང་མུ་མཐུད་དུ་མང་ཙམ་བཤད་འདོད་ཡོད་པ་ལས། ཡིད་ཚིམས་རྒྱུ་ཞིག་གཏན་ནས་མེད་པས། མུ་མཐུད་རང་གིས་མྱངས་པ་དང་བོད་ནང་གི་བོད་མིའི་སྐོར་བཤད་འདོད་ཡོད། ངས་ད་ལན་བོད་ནང་གི་བོད་མི་རྣམས་ཀྱི་ཚབ་བྱས་ཏེ་རྒྱལ་ཚོགས་ཀྱི་དཔོན་རིགས་རྣམས་ལ་བོད་ནང་གི་བོད་མི་རྣམས་ལ་རྒྱ་ནག་གཞུང་གིས་གཅར་རྡུང་བྱེད་ཆོག་ཆོག་དང་། གསོད་ཆོག་ཆོག ཁྲིམས་ལ་བཅུག་ཆོག་ཆོག་གི་གནས་སྟངས་དང་། རྒྱ་ནག་གཞུང་གིས་བོད་ནང་གི་བོད་མི་རྣམས་ལ་གཉའ་གནོན་དང་ཁྱད་གསོད་བྱེད་མུས་ཡིན་པ་དག་ཤོད་ཀྱི་ཡོད། ཞེས་བརྗོད་བྱུང་།

ལས་འགུལ་སྐབས་རྣམ་སྐྱིད་ལགས་ཀྱིས་འགྲོ་བ་མིའི་ཐོབ་ཐང་གི་ཆེས་མཐོའི་ལྷན་ཁང་གི་རྒྱ་ནག་སྡེ་ཚན་གྱི་ལས་བྱེད་དང་ལྷན་དུ་མཇལ་འཕྲད་དང་། ཇི་ནི་ཝར་མཉམ་འབྲེལ་རྒྱལ་ཚོགས་ཀྱི་གཞུང་ཚབ་རྣམས་དང་ལྷན་དུ་མཇལ་འཕྲད་གནང་བ་མ་ཟད། ཁོང་ཉིད་རྒྱ་ནག་གི་བཙོན་ཁང་དུ་སྡུག་སྦྱོང་དང་མནར་གཅོད་ཇི་ལྟར་མྱངས་པའི་དངོས་མྱོང་གི་གནས་ཚུལ་ངོ་སྤྲོད་དང་། བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཇེ་སྡུག་ཏུ་འགྲོ་བཞིན་ཡོད་པའི་སྐོར། དེ་བཞིན་རྒྱ་ནག་གཞུང་གིས་བོད་ཀྱི་སྐད་ཡིག་དང་། རིག་གཞུང་སོགས་རྩ་མེད་གཏོང་ཐབས་ཀྱི་སྲིད་ཇུས་འདྲ་མིན་ལག་བསྟར་བྱས་དང་བྱེད་མུས་ཡིན་པ་རྣམས་ངོ་སྤྲོད་གནང་ཡོད་འདུག

ད་ལྟའི་ཆར་རྣམ་སྐྱིད་ལགས་ཀྱིས་མཉམ་འབྲེལ་རྒྱལ་ཚོགས་སུ་བོད་དོན་ཞུ་གཏུག་གི་ལས་འགུལ་སྤེལ་མུས་ཡིན་པ་མ་ཟད། ད་ལན་གྱི་ཞུ་གཏུག་ལས་འགུལ་སྐབས་མཉམ་འབྲེལ་རྒྱལ་ཚོགས་ཀྱི་ཚོགས་ཞུགས་རྒྱལ་ཁབ་ཆེ་ཁག་དང་ཆུང་ཁག་གིས་བོད་དོན་ཐད་གདུང་སེམས་མཉམ་སྐྱེད་ཀྱི་རྣམ་པ་ཤུགས་ཆེན་བསྟན་པ་དང་། སྤྱིར་རྒྱལ་ཁབ་ཆེ་ཁག་ནས་དཔལ་འབྱོར་དང་། དམག་དོན། ཐབས་ཇུས་ཀྱི་གནད་དོན་ལ་བརྟེན་དགོས་པའི་རྐྱེན་གྱིས་བོད་དོན་ཐོག་རྒྱབ་སྐྱོར་ཐད་ཀར་བྱ་རྒྱུ་ཁག་པོ་ཡོད་ཀྱང་། མ་འོངས་པར་གལ་ཏེ་བོད་དོན་དང་འབྲེལ་བའི་གནད་དོན་ཁག་ལ་དུས་དང་འཚམ་པ་ཞིག་ལ་གླེང་སློང་བྱ་རྒྱུ་འབྱུང་ཚེ། དངོས་སུ་རྒྱབ་སྐྱོར་གནང་རྒྱུའི་ཁས་ལེན་གནང་ཡོད་འདུག

ད་ལན་གྱི་བོད་དོན་ཞུ་གཏུག་སྐབས་མཉམ་འབྲེལ་རྒྱལ་ཚོགས་ཀྱི་ནང་དུ་དངོས་སུ་རྒྱབ་སྐྱོར་གནང་མ་ཐུབ་ཀྱང་། རྣམ་སྐྱིད་ལགས་ཀྱིས་རང་ཉིད་ཀྱི་མྱོང་བ་དང་། རྒྱ་ནག་གིས་བོད་ནང་དུ་སྡུག་རྩུབ་ཇི་ལྟར་བྱེད་བཞིན་ཡོད་པའི་ལོ་རྒྱུས་ཐོག་འགྲེལ་བརྗོད་ཁ་གསལ་ཞུས་ཐུབ་ཡོད་འདུག་ལ། ཚོགས་མི་རྒྱལ་ཁབ་རྣམས་ཀྱིས་རྒྱ་ནག་ཐོག་འཛིན་པའི་སྲིད་ཇུས་དང་། མ་འོངས་འབྲེལ་ལམ་གནང་ཕྱོགས་ཐད་བསམ་བློ་གཏོང་དགོས་པའི་གནས་སྟངས་སུ་གྱུར་ཡོད་འདུག

ཉིན་ལྔའི་བོད་དོན་ཞུ་གཏུག་གི་ལས་འགུལ་དེའི་ནང་ཆབ་སྲིད་བཙོན་ཟུར་རྣམ་སྐྱིད་ལགས་དང་། སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས། བོད་མིའི་སྒྲིག་འཛུགས་ཀྱི་ཕྱི་དྲིལ་ལས་ཁུངས་ཀྱི་བོད་དོན་ཞུ་གཏུག་ཚན་པའི་འགན་འཛིན་འབྲུག་བསྟན་སྐྱིད་ལགས། སུད་སི་མཉམ་འབྲེལ་རྒྱལ་ཚོགས་ཀྱི་ཞུ་གཏུག་པ་ཕུན་ཚོགས་སྟོབས་རྒྱལ་ལགས་བཅས་མཉམ་ཞུགས་གནང་ཡོད་འདུག ད་བར་རྒྱལ་ཁབ་མི་འདྲ་བའི་གཞུང་ཚབ་པ་དྲུག་ལ་ཞུ་གཏུག་བྱས་ཟིན་པ་དང་། གཞུང་ཚབ་མི་འདྲ་བ་བདུན་ལྷག་དང་། མཉམ་འབྲེལ་རྒྱལ་ཚོགས་ཀྱི་དམིགས་བསལ་ཆེད་ལས་པ་རྣམས་ལ་ཞུ་གཏུག་བྱ་རྒྱུ་ཡིན་ཞིང་། ད་ལྟའི་ཆར་ཞུ་གཏུག་གི་ལས་འགུལ་མུ་མཐུད་འགྲོ་མུས་ཡིན་འདུག

གསར་འགོད་པ་བསྟན་འཛིན་ཕུར་བུ། རྩོམ་སྒྲིག་བྱེད་མཁན། སྐལ་བཟང་སྦྱིན་པ།