༧གོང་ས་རྒྱལ་བ་རིན་པོ་ཆེ་མཆོག་ལ་རྒྱ་གར་གྱི་སྲུང་བྱ་རིམ་པ་མཐོ་ཤོས་གསུམ་པ་དེ་ཕུལ། 

རྒྱ་གར་དབུས་ནང་སྲིད་ལས་ཁུངས་ཀྱིས་༧གོང་ས་རྒྱལ་བ་རིན་པོ་ཆེ་མཆོག་ལ་རྒྱ་གར་ནང་གི་སྲུང་བྱའི་རིམ་པ་མཐོ་ཤོས་གསུམ་པ་དེ་ཕུལ་འདུག                                                                       

རྒྱ་གར་གྱི་གསར་འགྱུར་བརྒྱུད་ལམ་ཁག་གིས་གནས་ཚུལ་སྤེལ་བ་ལྟར་ན། འདས་པའི་ལོ་ཤས་རིང་རྒྱ་ནག་གཞུང་གིས་ཆེད་དུ་སོ་མྱུལ་བ་མངག་གཏོང་དང་དངོས་ཤུགས་བརྒྱུད་གསུམ་ནས་༧གོང་ས་རྒྱལ་བ་རིན་པོ་ཆེ་མཆོག་གི་སྐུ་ཕྱྭ་དང་དགའ་ལྡན་ཕོ་བྲང་ཡིག་ཚང་ལ་སུན་གཙེར་བཟོ་ཡི་ཡོད་པའི་གནས་ཚུལ་ཡང་ཡང་འཐོན་མུས་ཡིན་པ་ལྟར། ཁ་སང་རྒྱ་གར་དབུས་ནང་སྲིད་ལས་ཁུངས་ཀྱིས་༧གོང་ས་རྒྱལ་བ་རིན་པོ་ཆེ་མཆོག་ལ་རྒྱ་གར་ནང་གི་སྲུང་བྱ་རིམ་པ་གསུམ་པ་(Z)ཅན་དེ་ཕུལ་ནས། རྒྱ་གར་དབུས་གཞུང་གིས་ཆེད་དུ་༧མགོན་པོ་གང་ཉིད་ཀྱི་སྐུ་ཕྱྭ་དང་འགོག་སྲུང་གི་ལས་དོན་ཚད་མཐོ་གཉེར་རྒྱུ་ཡིན་འདུག 

དེའི་ཐད་རྒྱ་གར་དབུས་བདེ་སྲུང་ཉེན་རྟོག་ཆེས་མཐོ་མི་སྣས། རྒྱ་གར་དབུས་བདེ་སྲུང་ཉེན་རྟོག་རུ་ཁག་གི་ཐད་ཀར་ལྟ་ཞིབ་འོག ༧གོང་ས་རྒྱལ་བ་རིན་པོ་ཆེ་མཆོག་གི་སྐུ་སྲུང་དམག་མི་དག་གིས། བཞུགས་སྒར་༧རྒྱལ་བའི་ཕོ་བྲང་དང་ཧི་མ་ཅལ་གྱི་ཕྱི་རོལ་གྱི་ཆིབས་བསྒྱུར་ཁག་གི་སྐབས། ༧མགོན་པོ་གང་ཉིད་ཀྱི་སྐུ་སྲུང་གི་ལས་དོན་གཉེར་རྒྱུ་ཡིན་སྐོར་སོགས་བརྗོད་འདུག 

རྒྱ་གར་གཞུང་གི་ཚད་མཐོའི་སྐུ་སྲུང་(SPG) སྟེ། སྐོར་སྲུང་བ་ ༥༠༠༠ ཅན་གྱི་ཚད་མཐོའི་དམིགས་བསལ་སྲུང་སྐྱོབ་རུ་ཁག་ཅན་ཞིག་དང་། Z+ཅན་གྱི་དམག་སྦྱོང་རང་བཞིན་གྱི་སྐོར་སྲུང་བ་ ༥༥ ཅན་ཞིག དེ་བཞིན་ད་ལན་རྒྱ་གར་དབུས་ནང་སྲིད་ལས་ཁུངས་ཀྱིས་༧གོང་ས་རྒྱལ་བ་རིན་པོ་ཆེ་མཆོག་ལ་ཕུལ་བའི་ Z ཅན་སོགས་ཡོད་ཅིང་། རྒྱ་གར་ནང་སྲུང་བྱའི་ཚད་རིམ་གསུམ་པ་ཡིན་པའི་ Z ཅན་ལ་དམག་སྦྱོང་རང་བཞིན་ལྡན་པའི་སྐོར་སྲུང་བ་ ༣༠ ཡིས་སྐོར་སྲུང་དང་འགེབས་རྒོལ་སོགས་བྱེད་ཀྱི་ཡོད་འདུག དེ་སྔ་རྒྱ་གར་གཞུང་གིས་བཀོད་མངགས་བཞིན། ཧི་མ་ཅལ་མངའ་སྡེའི་དམག་དོན་ཉེན་སྲུང་དམག་མིས་སྐུ་ཕྱྭ་དང་ཕོ་བྲང་གི་བདེ་འཇགས་སོགས་ཀྱི་ཐད་ལ་ཉེན་སྲུང་དང་། དེ་བཞིན་རྒྱ་གར་དབུས་གཞུང་གི་བཀོད་འདོམས་བཞིན། རྒྱ་གར་གྱི་མངའ་སྡེ་གཞན་དུ་ཕེབས་སྐབས། མངའ་སྡེ་ཁག་གི་ཉེན་སྲུང་དམག་མིས་ཉེན་སྲུང་གི་ལས་དོན་གཉེར་གྱིན་ཡོད་འདུག 

དེ་བཞིན་དབུས་བོད་མིའི་སྒྲིག་འཛུགས་བདེ་སྲུང་ལས་ཁུངས་ཀྱིས་ཀྱང་། ༧གོང་ས་རྒྱལ་བ་རིན་པོ་ཆེ་མཆོག་གི་སྐུ་ཕྱྭའི་ཉེན་སྲུང་གི་ཐད་ལ་ཚད་མཐོའི་ལས་དོན་གཉེར་གྱིན་ཡོད་པའི་ཁར། ༧མགོན་པོ་གང་ཉིད་ཀྱི་གསུང་ཆོས་དང་ཆིབས་བསྒྱུར་སོགས་ཀྱི་སྐབས། ཆེད་དུ་ཉེན་སྲུང་དམ་པོ་དང་རྒྱ་གར་ནང་གི་མངའ་སྡེ་ཁག་ཏུ་ཆིབས་བསྒྱུར་སྐབས་སུའང་ས་བགོས་ཀྱིས་ཉེན་སྲུང་གི་ཐད་ལ་ལས་དོན་གཉེར་མུས་ཡིན་ལ། འདས་ལོའི་ཕྱི་ཟླ་ ༩ ཚེས་ ༡༩ ཉིན་ཏེ་གྲོས་ཚོགས་ཚོགས་དུས་བརྒྱད་པའི་ལས་ཉིན་དྲུག་པའི་ཉིན། དབུས་བོད་མིའི་སྒྲིག་འཛུགས་བདེ་སྲུང་ལས་ཁུངས་ཀྱི་ལས་ཁུངས་མ་ལག་དང་བཅས་པའི་རྩིས་ལོ་ ༢༠༢༣ དང་ ༢༠༢༤ ལོའི་ལོ་འཁོར་ལས་སྡོམ་སྙན་སྒྲོན་དང་། འཛིན་སྐྱོང་བཀའ་ཤག་གི་ལན་འདེབས་གསལ་བཤད་སྐབས་བོད་མི་མང་སྤྱི་འཐུས་ཁག་ཅིག་གིས། དབུས་བོད་མིའི་སྒྲིག་འཛུགས་བདེ་སྲུང་ལས་ཁུངས་དང་རྒྱ་གར་དབུས་ས་གཉིས་ཀྱིས་སྐུ་ཕྱྭའི་ཐད་ལ་ལས་དོན་ཚད་མཐོ་གཉེར་བར་བསྔགས་བརྗོད་དང་སྦྲགས། མུ་མཐུད་དུ་བདེ་སྲུང་ལས་ཁུངས་ཀྱིས་༧མགོན་པོ་གང་ཉིད་ཀྱི་སྐུ་ཕྱྭའི་ཐད་ལ་ཞབས་འདེགས་དང་སྲི་ཞུ་བསྒྲུབ་དགོས་པའི་སྐོར་ལ་ནན་བརྗོད་གནང་ཡོད། 

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།