དཔལ་ལྡན་རྒྱུད་སྨད་གྲྭ་ཚང་གིས་༧གོང་ས་རྒྱལ་བ་རིན་པོ་ཆེ་མཆོག་ལ་བརྟན་བཞུགས་བསྟར་འབུལ་ཞུས།

༧གོང་ས་རྒྱལ་བ་རིན་པོ་ཆེ་མཆོག་གིས་སྒོ་གསུམ་གྱི་སྡིག་སྒྲིབ་བསགས་པ་དེ་དག་སྙིང་ཁོངས་རུས་པའི་གཏིང་ནས་བཤགས་པར་བྱ་དགོས་བསམ་པའི་ཀུན་སློང་དགོས་པ་སོགས་ཀྱི་ལམ་སྟོན་མཛད།

དེ་རིང་རྒྱ་གར་ལྷོ་ཕྱོགས་ཧོན་སུར་དུ་རྟེན་གཞི་བྱས་པའི་དཔལ་ལྡན་རྒྱུད་སྨད་གྲྭ་ཚང་གིས་༧གོང་ས་རྒྱལ་བ་རིན་པོ་ཆེ་མཆོག་ལ་བརྟན་བཞུགས་བསྟར་འབུལ་ཞུས་ཡོད་ཅིང་། སྐབས་དེར་༧མགོན་པོ་གང་ཉིད་མཆོག་གིས། དེ་རིང་རྒྱུད་སྨད་ཀྱིས་བརྟན་བཞུགས་ཕུལ་བ་རེད། བོད་གངས་ཅན་གྱི་ལྗོངས་སུ་འཕགས་པའི་ཡུལ་ནས་བསྒྱུར་བའི་ཆོས་མང་པོ་ཞིག་ཡོད་པའི་ནང་ནས། འཆད་ཉན་སྒོམ་སྒྲུབ་རྒྱུན་མི་ཆད་པ་བྱེད་བཞིན་པ་དེ་གསང་བ་འདུས་པའི་སྐྱེས་རྫོགས་ཆགས་ཀྱི་ཡོད། སྤྱི་ཡོངས་ཀྱི་ཆ་ནས་བོད་ཡོངས་རྫོགས་ལ་གསང་བ་འདུས་པའི་ཆོས་འཆད་ཉན་བྱ་རྒྱུ་ཡོད་རེད་དེ། གྲྭ་ཚང་སྡེ་ཚན་དམིགས་བསལ་ཞིག་གིས་གསང་བ་འདུས་པའི་འཆད་ཉན་བྱ་རྒྱུའི་འགན་བསྐུར་བ་དེ་རྗེ་རིན་པོ་ཆེའི་ཕྱག་བཞེས་རེད། རྒྱུད་གྲྭ་སྟོད་སྨད་གཉིས་ཀྱིས་གསང་བ་འདུས་པའི་རྩ་རྒྱུན་འཆད་ཉན་དང་། དེ་དང་འདྲ་བའི་འགྲེལ་བ་བྱེ་བྲག་འཆད་ཉན་གནང་རྒྱུ་དེ་དག་ཁྲལ་ལྟ་བུ་ཆགས་ཀྱི་ཡོད། གསང་བ་འདུས་པའི་ལམ་དང་འགྲེལ་བའི་རྣམ་གཞག་གང་འདྲ་ཡིན་མིན་དམིགས་བསལ་དོ་སྣང་བྱས་ནས་འཁྲིད་རྒྱུ་མེད་ནའང་། གསང་བ་འདུས་པ་བཀའ་དྲིན་ཆེན་པོ་ཡོད་བསམས་ནས་འགྲོ་ཡི་ཡོད་པ་རེད། ངོས་རང་ལ་ཆ་བཞག་ནའང་། མགོ་སྟོད་དུ་དེ་འདྲ་ཕྱིན་པ་རེད། ཕྱིས་སུ་གསང་བ་འདུས་པའི་ལམ་གྱི་འགྲོ་སྟངས་དེ་དག་ཤེས། རྗེ་རིན་པོ་ཆེས་གསུངས་པའི་ནང་ལོགས་ལ་གསང་བ་འདུས་པའི་སྐོར་གསུངས་པ་དེ་དག་ལ་བསམ་བློ་གཏོང་དུས། དངོས་གནས་དྲང་གནས་ཀྱིས་གསང་སྔགས་རྡོ་རྗེ་ཐེག་པའི་སྙིང་པོ་གཙོ་བོ་ཞིག་རེད་འདུག་བསམས་ནས་ངེས་པ་རྙེད་ཐུབ་པ་ཞིག་ཡོང་གི་འདུག ང་ཚོའི་རྒྱུད་གྲྭ་སྨད་སྟོད་གཉིས་ལ་ཆ་བཞག་ན། གསང་བ་འདུས་པའི་རྒྱུད་འཆད་ཉན་དེ་དགོན་པའི་སྒྲིག་འཛུགས་ཀྱི་ཁྲལ་ལྟ་བུ་འདོན་རྒྱུ་ཆགས་ཀྱི་ཡོད་པ་རེད། ཅེས་གསུངས།

༧མགོན་པོ་གང་ཉིད་མཆོག་གིས། གསང་སྔགས་ཀྱི་ཆོས་ཉམས་ལེན་བྱེད་མཁན་ཚོས་སྔོན་ལ་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་དེ་དག་དངོས་གནས་དྲང་གནས་ཀྱིས་སེམས་ཀྱི་གཏིང་ནས་འགུལ་སྐྱོད་ཐེབས་རྒྱུ་ཞིག་དགོས་པ་རེད། བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་མེད་ན་སྔགས་ཉམས་ལེན་བྱ་རྒྱུ་མེད་པ་རེད། འཛམ་གླིང་འདིའི་སྒང་གི་ཉམ་ཐག་པའི་སེམས་ཅན་སྤྱི་དང་། ད་ལྟ་ང་ཚོའི་མཐོང་ཆོས་ལ་ཡོད་པའི་འཛམ་གླིང་གི་མི་གཙོ་བོར་གྱུར་བའི་སྲོག་ཆགས་དེ་དག་སྡུག་བསྔལ་མི་འདོད་པ་དང་བདེ་བ་འདོད་པ་རང་དང་མཚུངས་པ་རེད་དེ། སྡུག་བསྔལ་གྱིས་མནར་བ་དང་བདེ་བས་ཕོངས་ནས་ཡོད་པ་ང་ཚོ་ཚང་མས་མཐོང་བསྡད་པ་དེ་རེད། འཛམ་གླིང་འདིའི་སྒང་གི་མི་དུང་ཕྱུར་ཁ་ཤས་ཡོད་པ་ཚང་མས་བདེ་བ་འདོད་པ་དང་སྡུག་བསྔལ་མི་འདོད་པ་རེད་དེ། སེམས་མ་རུང་བ་དང་རྨོངས་པའི་དབང་གིས་སྡུག་བསྔལ་གྱི་རྒྱུ་ཡིན་པ་མ་ཤེས་པ་དང་སྣང་མེད་དུ་བཞག་སྟེ་འགྲོ་ཡི་ཡོད་པ་རེད། ཅེས་གསུངས།

སྡུག་བསྔལ་གྱི་རྒྱུ་སྒོ་གསུམ་གྱི་མི་དགེ་བའི་ཐོག་ནས་ཡོང་གི་ཡོད་པ་དང་། སྔགས་བྱང་སེམས་ཀྱི་དབང་དང་བྱིན་རླབས་དེ་འདྲ་ཐོབ་ཡོད་ན། དེ་དང་འབྲེལ་བའི་ངེས་པ་དེ་འདྲ་མང་པོ་ཡོང་གི་ཡོད་པ་རེད། རང་ཉིད་བཅོམ་ལྡན་འདས་ཀྱི་རྗེས་སུ་འབྲངས། རྡོ་རྗེ་ཐེགས་པའི་ལམ་ལ་བསླབ། སྐབས་སུ་བབས་པ་རྡོ་རྗེ་སེམས་པ་བསྐྱེད་ནས་སྡིག་སྒྲིབ་དག་རྒྱུའི་དམིགས་པ་དང་མོས་པ་བྱེད་དུས། ༧རྒྱལ་བའི་དགོངས་པ་དང་མཐུན་པ་ཞིག་རང་གིས་མི་ཤེས་པ་དང་བསམ་བཞིན་དུ་སྡུག་བསྔལ་གྱི་རྒྱུ་དང་དུ་བླངས་པ་དང་སྣང་མེད་དུ་བཏང་བ་ཡིན་ན། སངས་རྒྱས་བཅོམ་ལྡན་འདས་ཀྱི་ཐུགས་ཕྱོགས་དོག་མེད་པར་ཐམས་ཅད་མཁྱེན་མཁན་ཞིག་ཡིན་པར་བརྟེན། སངས་རྒྱས་བཅོམ་ལྡན་འདས་ལ་ངས་སྒོ་གསུམ་གྱི་སྡིག་སྒྲིབ་བསགས་པ་དེ་དག་སྙིང་ཁོངས་རུས་པའི་གཏིང་ནས་བཤགས་པར་བྱ་དགོས་བསམ་པའི་དགོས་པ་དང་བཅས་པའི་སེམས་ཤུགས་ཡག་པོ་ཞིག་སྐྱེས་ནས་མ་ཎི་སོགས་བསགས་པ་ཡིན་ན་ཡག་པོ་ཡོད་པ་རེད། ཅེས་སོགས་བཀའ་སློབ་སྩལ།

གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། སྐལ་བཟང་སྦྱིན་པ།