དབྱིན་ཡུལ་ནང་ཡོད་པའི་རྒྱ་ནག་གཞུང་ཚབ་ཁང་གིས་ཨའེ་ཊི་ཝི་བརྙན་འཕྲིན་ཁང་གིས་ཆེད་སྒྲིག་བྱས་པའི་བོད་དོན་འཐབ་རྩོད་ཅེས་པའི་དངོས་བྱུང་གློག་བརྙན་དེ་སྟོན་མི་ཆོག་པའི་གནོན་ཤུགས་སྤྲད་འདུག་ལ་ད་ལྟའི་ཆར་གློག་བརྙན་དེར་དྲ་ལམ་ནས་ལྟ་ཉན་བྱེད་མི་ཐུབ་པ་བཟོས་འདུག
ཟླ་འདིའི་ཕྱི་ཚེས་ ༡༦ ཉིན་གྱི་མཚན་མོར་དབྱིན་ཡུལ་དུ་ཡོད་པའི་ཨའེ་ཊི་ཝི་ (ITV) བརྙན་འཕྲིན་ཁང་གིས་བོད་དོན་འཐབ་རྩོད་ (Battle for Tibet) ཅེས་པའི་དངོས་བྱུང་གློག་བརྙན་ཞིག་བཟོས་ཏེ་འགྲེམས་སྤེལ་བྱེད་གཏན་ཁེལ་ཡོད་ཀྱང་། ཉིན་དེར་དབྱིན་ཡུལ་རྒྱ་ནག་གཞུང་ཚབ་ཁང་གིས། གློག་བརྙན་དེའི་ནང་ཕྱོགས་ལྷུང་དང་རྫུན་གཏམ་གྱིས་ཁེངས་ཡོད། ཅེས་བརྗོད་དེ་གློག་བརྙན་དེ་སྟོན་མཚམས་འཇོག་དགོས་པའི་གནོན་ཤུགས་སྤྲད་ཡོད་འདུག ད་ལྟ་འདི་གའི་གསར་འགོད་པས་ལྟ་ཞིབ་བྱེད་སྐབས་རྒྱལ་སྤྱིའི་དངོས་བྱུང་གློག་བརྙན་ལྟ་ཡུལ་ (PBS’s FROTLINE) དང་ཨའེ་ཊི་ཝི་སོགས་ཀྱི་དྲ་ལམ་ནས་གློག་བརྙན་དེར་ལྟ་མི་ཐུབ་པ་བཟོས་འདུག
དངོས་བྱུང་གློག་བརྙན་དེའི་ནང་དུ་རྒྱ་ནག་གཞུང་གིས་ཚད་མཐོའི་འཕྲུལ་རིག་བརྒྱུད་བོད་ནང་གི་བོད་མི་ཚོའི་འགྲོ་འདུག་སྤྱོད་གསུམ་ལ་ལྟ་སྲུང་ནན་པོ་བྱེད་བཞིན་པ་དང། དམིགས་བསལ་གྱིས་དགོན་སྡེ་ཁག་དང་སྤྱི་པའི་ས་ཁུལ་དུ་ལྟ་སྐོར་བ་རྣམས་ལ་གནམ་ཐང་ལྟར་ཞིབ་བཤེར་ནན་པོ་བྱེད་བཞིན་པ་གསལ་སྟོན་བྱས་ཏེ། རྒྱ་ནག་གིས་བོད་ནང་དུ་ཆོས་དད་རང་མོས་དང་སྨྲ་བརྗོད་རང་དབང་། འགྲོ་བ་མིའི་ཐོབ་ཐང་སོགས་རྡོག་རོལ་ཚབས་ཆེན་གཏོང་བཞིན་པའི་གནད་དོན་གསལ་པོ་བསྟན་ཡོད་འདུག
དེ་བཞིན་གློག་བརྙན་དེའི་ནང་རྒྱ་ནག་གི་བོད་ཕྲུག་ཚོ་དམིགས་འབེན་དུ་བཟུང་སྟེ་མི་རིགས་རྩ་མེད་གཏོང་རྒྱུའི་སྲིད་ཇུས་ལག་བསྟར་བྱེད་ཀྱི་ཡོད་པ་དཔེར་ན། བོད་ཕྲུག་ས་ཡ་གཅིག་ཙམ་བཅའ་སྡོད་སློབ་གྲྭར་བཅུག་སྟེ་བོད་ཀྱི་རིག་གཞུང་དང་ངོ་བོ་རྩ་མེད་བཟོ་ཐབས་བྱས་དང་བྱེད་མུས་ཡིན་པའི་སྐོར་དང་། རྒྱ་རིགས་དགེ་རྒན་ཚོས་བོད་ཕྲུག་རྣམས་ལ་རྡུང་རྡེག་ཚད་མེད་གཏོང་གི་ཡོད་པ་སོགས་མི་རིགས་དབྱེ་འབྱེད་བྱེད་ཀྱིན་ཡོད་པ་བསྟན་ཡོད་འདུག
དངོས་བྱུང་གློག་བརྙན་དེ་ནི་དབྱིན་ཇིའི་ཨའེ་ཊི་ཝི་ (ITV) བརྙན་འཕྲིན་ཁང་གི་གསར་འགོད་པ་ལྕམ་གྷི་སི་བྷིན་མོ་ཧཱ་མ་ཌི་ (Gesbeen Mohammad) ལགས་བོད་ནང་དངོས་སུ་ཕྱིན་ཏེ་གསང་བའི་ཐོག་ནས་ལོ་ངོ་གཅིག་གི་རིང་གནས་ཚུལ་མཁོ་སྒྲུབ་དང་བརྙན་པར་སོགས་བླངས་ནས་བཟོ་སྐྲུན་བྱས་པ་ཞིག་ཡིན་འདུག
གློག་བརྙན་དེའི་ནང་རྒྱ་ནག་གཞུང་གིས་འདས་པའི་ལོ་ངོ་ ༧༥ རིང་བོད་ནང་དབང་སྒྱུར་བྱས་ཏེ་བོད་ཀྱི་སྐད་ཡིག་དང་། རིག་གཞུང་། ཆོས་ལུགས་སོགས་ལ་དམ་དྲག་ཤུགས་ཆེན་བྱེད་བཞིན་ཡོད་པ་རྣམས་གསལ་སྟོན་དང་། ཨ་རིའི་གསར་འགོད་པ་གྲགས་ཅན་བྷ་བྷི་ར་སྒྲེ་མེག་ལགས་དང་། འབུམ་རམས་པ་རྒྱལ་ལོ་ལགས། ཆབ་སྲིད་བཙོན་ཟུར་རྣམ་སྐྱིད་ལགས་སོགས་ལ་བཅར་འདྲི་བྱས་ཏེ་ད་ལྟའི་བོད་ནང་གི་ཛ་དྲག་གི་གནས་སྟངས་སོགས་གསལ་སྟོན་བྱས་འདུག
གྷི་སི་བྷིན་མོ་ཧཱ་མ་ཌི་ལགས་ནི་འཛམ་གླིང་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཐོག་ཆེད་ལས་ཞིབ་འཇུག་གནང་མཁན་གྱི་གསར་འགོད་པ་ཞིག་ཡིན་པ་མ་ཟད། དབྱིན་ཡུལ་དང་ཨ་རིའི་བརྙན་འཕྲིན་ཁང་ཆེ་ཁག་གི་ནང་དུ་དངོས་བྱུང་གློག་བརྙན་བཟོ་སྐྲུན་གནང་མཁན་ཞིག་ཀྱང་ཡིན་པ་རེད། ཕྱི་ལོ་ ༢༠༡༥ ལོ་ནས་ཞིབ་འཇུག་གསར་འགྱུར་ལས་རིགས་ཐོག་ཕྱག་ལས་གནང་བ་ནས། དབྱིན་ཇིའི་ཨའེ་ཊི་ཝི་དང་། བྷི་བྷི་སི་གསར་ཁང་སོགས་ལ་ཕྱག་ལས་གནང་མྱོང་འདུག་ལ། ཕྱི་ལོ་ ༢༠༢༢ ལོར་ཁོང་མོས་གཙོ་སྒྲུབ་བྱས་པའི་ཨུ་རུ་སུའི་དམག་འཁྲུག་སྐོར་གྱི་དངོས་བྱུང་གློག་བརྙན་དང་། ཕྱི་ལོ་ ༢༠༢༠ ལོའི་ཧོང་ཀོང་གི་འཐབ་འཁྲུག་སོགས་ཀྱི་དངོས་བྱུང་གློག་བརྙན་ལ་རྒྱལ་སྤྱིའི་སྟེང་གྲགས་ཆེ་བའི་ (Bafta and Emmy) ཆེ་བསྟོད་དང་གཟེངས་རྟགས་ཐོབ་མྱོང་འདུག ཁོང་མོས་རྒྱ་ནག་དང་། ཨུ་རུ་སུ། ཨི་རན་སོགས་གནས་ཚུལ་མཁོ་སྤྲོད་དཀའ་བ་དང་། འགྲོ་བ་མིའི་ཐོབ་ཐང་གི་གནས་སྟངས་ཞན་པོ་ཡོད་པའི་རྒྱལ་ཁབ་ཁག་ཏུ་དངོས་སུ་བསྐྱོད་དེ་གསང་བའི་ལམ་ནས་གནས་ཚུལ་མཁོ་སྒྲུབ་དང་བརྙན་པར་སོགས་བཀོད་སྒྲིག་གནང་གི་ཡོད་འདུག
གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
