སྲིད་སྐྱོང་སྤེན་པ་ཚེ་རིང་མཆོག་གིས་ཞིང་པ་རྣམས་ལ་དཔལ་འབྱོར་དང་འཕྲུལ་རིག་གི་མཐུན་འགྱུར་གནང་རྒྱུའི་དམ་བཅའ་བརྟན་པོ་ཡོད་སྐོར་གསུངས།
ཁ་སང་ཕྱི་ཚེས་ ༢༠ ནས་ ༢༢ བར་ཉིན་གྲངས་གསུམ་རིང་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་གོ་སྒྲིག་འོག སྦེལ་ཀོབ་གཞིས་ཆགས་ཀྱི་སྐྱེ་ལྡན་ཉམས་ཞིབ་དང་སྦྱོང་བརྡར་ཁང་དུ་བོད་མིའི་སོ་ནམ་གཞིས་ཆགས་ཁག་གི་སོ་ནམ་ལས་གཞི་ཡར་རྒྱས་གཏོང་ཕྱོགས་ཀྱི་ཚོགས་ཆེན་འཚོག་མགོ་བཙུགས་ཡོད་ཅིང་། ཚོགས་ཆེན་དེའི་དབུ་འབྱེད་མཛོད་སྒོར་དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་། ནང་སྲིད་དྲུང་ཆེ་དཔལ་ལྡན་དོན་གྲུབ་ལགས། ལྷོ་སྤྱི་འཇིགས་མེད་ཚུལ་ཁྲིམས་ལགས། ནང་སྲིད་དྲུང་འཕར་ཚེ་རིང་གཡུ་སྒྲོན་ལགས། སྐྱེ་ལྡན་ཉམས་ཞིབ་དང་སྦྱོང་བརྡར་ཁང་གི་འགན་འཛིན་ཚེ་རིང་རྡོ་རྗེ་ལགས་སོགས་ཀྱིས་མཉམ་ཞུགས་གནང་འདུག
དབུ་འབྱེད་མཛད་སྒོའི་ཐོག་ནང་སྲིད་དྲུང་ཆེ་དཔལ་ལྡན་དོན་གྲུབ་ལགས་ཀྱིས། བཙན་བྱོལ་བོད་མིའི་ཞིང་ལས་འཕེལ་རིམ་སྐོར་དང་། དེ་སྔ་བོད་མི་རྣམས་ལ་ཞིང་ལས་སྐོར་གོ་རྟོགས་མང་པོ་མེད་ཀྱང་ཞིང་ལས་འདེབས་འཛུགས་བྱས་པ་ནས་བཟུང་། ཞིང་ལས་ཐོག་ཡར་རྒྱས་ཆེན་པོ་འགྲོ་བཞིན་ཡོད་པའི་ཁར། ཉེ་ལམ་དེང་དུས་ཀྱི་འཕྲུལ་རིག་བེད་སྤྱོད་བྱེད་དེ་ཞིང་ལས་འདེབས་འཛུགས་བྱེད་ཀྱི་ཡོད་སྐོར། ཁོར་ཡུག་ལ་དོ་ཕོག་མེད་པའི་ཐབས་ལམ་བརྒྱུད་ཞིང་ལས་གཉེར་དགོས་སྐོར་སོགས་གསུངས་རྗེས། སྲིད་སྐྱོང་སྤེན་པ་ཚེ་རིང་མཆོག་གིས། བོད་མིའི་སྒྲིག་འཛུགས་ཀྱི་ངོས་ནས་བཙན་བྱོལ་བོད་མིའི་གཞིས་ཆགས་ཁག་ཏུ་ཞིང་ལས་ཡར་རྒྱས་གཏོང་ཐབས་སུ་ལས་དོན་གཉེར་རྒྱུ་གལ་ཆེན་ཡིན་པའི་སྐོར་དང་འབྲེལ། ཕྱི་ལོ་ ༡༩༦༠ དང་ ༡༩༧༠ ལོར་བོད་མི་རྣམས་མ་རྨོས་ལོ་ཏོག་དང་། ཞོག་ཁོག སྲན་མ་སོགས་ཞིང་ལས་ཀྱི་འཚོ་བ་སྐྱེལ་གྱི་ཡོད། འོན་ཀྱང་། ༧གོང་ས་རྒྱལ་བ་རིན་པོ་ཆེ་མཆོག་གི་རང་ཁ་རང་གསོའི་དགོངས་གཞི་དང་། བོད་མིའི་སྒྲིག་འཛུགས་ལ་བརྟེན་ནས་བོད་ཀྱི་ཞིང་ལས་ཡར་རྒྱས་ཕྱིན་ཡོད། དེ་བཞིན་སྐྱེ་ལྡན་ཉམས་ཞིབ་དང་སྦྱོང་བརྡར་ཁང་གསར་འཛུགས་དང་། དེང་དུས་འཕྲུལ་རིག་བེད་སྤྱོད་བྱས་ཏེ་ཞིང་པ་ཚོས་ལོ་ཏོག་སྣ་མང་འདེབས་འཛུགས་དང་། ས་ཞིང་གི་སྤུས་ཚད་ཇེ་ལེགས་སུ་གཏོང་ཐུབ་པ། སྐྱེ་ལྡན་ཞིང་ལས་ལ་དམིགས་ཏེ་ཞིང་ལས་ཀྱི་ནུས་པ་ཡར་རྒྱས་འགྲོ་བཞིན་ཡོད། ཅེས་དང་། ཚོགས་ཆེན་དེ་ནི་བོད་པའི་གཞིས་ཆགས་ཁག་གི་ཞིང་ལས་ཐོག་འཕྲད་བཞིན་པའི་དཀའ་ངལ་སེལ་ཐབས་དང་། ཡུན་གནས་ཐུབ་པའི་ཞིང་ལས་ཀྱི་ཐབས་ལམ་འཚོལ་ཞིབ་བྱ་རྒྱུ་སོགས་ཀྱི་ཐད་ལ་ལས་དོན་གཉེར་རྒྱུ་གལ་ཆེན་ཡིན་སྐོར་སོགས་གསུངས་འདུག
ཡང་སྲིད་སྐྱོང་མཆོག་གིས། དེང་རབས་ཀྱི་འཕྲུལ་རིག་དང་སྲོལ་རྒྱུན་གྱི་ཡོན་ཏན་གཉིས་བེད་སྤྱོད་ཚད་ལྡན་གཏོང་དགོས་པ་དང་། རང་བྱུང་ཁོར་ཡུག་སྲུང་སྐྱོབ་དང་ལུད་སོགས་བེད་སྤྱོད་བྱས་ནས། སྐྱེ་ལྡན་རང་བཞིན་གྱི་ཞིང་ལས་ཡུན་གནས་ཐུབ་པ་བྱ་དགོས། ཞེས་དང་། གཞོན་སྐྱེས་ཚོས་ཞིང་ལས་ནང་མཉམ་ཞུགས་བྱས་ཏེ། ཞིང་ལས་ནི་འཚོ་ཐབས་བཟང་པོ་ཞིག་དང་། གཟི་བརྗིད་དང་ལྡན་པའི་ལས་རིགས་ཤིག་ཏུ་ངོས་འཛིན་བྱ་དགོས་པའི་སྐུལ་མ་དང་། གཞོན་སྐྱེས་ཚོས་བོད་ཀྱི་ཞིང་ལས་དེང་རབས་ཅན་དུ་བསྒྱུར་ཏེ། སོ་སོའི་སྤྱི་ཚོགས་ནང་ཟས་རིགས་ཀྱི་བདེ་འཇགས་ཚད་ལྡན་ཞིག་ཡོང་རྒྱུ་སོགས་ནུས་པ་གལ་ཆེན་བསྟན་ཐུབ་པས། བོད་མིའི་སྒྲིག་འཛུགས་ཀྱིས་ཞིང་པ་རྣམས་ལ་མུ་མཐུད་དུ་དཔལ་འབྱོར་དང་འཕྲུལ་རིག་གི་མཐུན་འགྱུར་རོགས་རམ་གནང་རྒྱུའི་དམ་བཅའ་བརྟན་པོ་ཡོད་ལ། རྒྱ་གར་གཞུང་དང་ཀར་ན་ཊ་ཀ་མངའ་སྡེ་ནས་བོད་མིའི་གཞིས་ཆགས་ཁག་དང་། ཞིང་ལས་ཐོག་མུ་མཐུད་དུ་རྒྱབ་སྐྱོར་གནང་བར་ཐུགས་རྗེ་ཆེ་ཞུ་རྒྱུ་ཡིན། ཞེས་གསུངས་ཡོད་འདུག
ཚོགས་འདུའི་ཐོག་གཞིས་ཆགས་ཁག་གི་ས་གནས་མགོ་འཛིན་དང་། ཞིང་ལས་ཆེད་མཁས་པ། ཞིང་པ་སོགས་མཉམ་འཛོམས་ཀྱིས་ད་ལྟའི་ཆར་བོད་མིའི་སོ་ནམ་གཞིས་ཆགས་ཁག་ལ་དཀའ་ངལ་འཕྲད་བཞིན་པའི་སྐོར་གླེང་སློང་དང་། ཤེས་ཡོན་བརྗེ་ལེན། ཞིང་ལས་ཐོན་སྐྱེད་ཡར་རྒྱས་གཏོང་ཐབས་ཀྱི་འཆར་འགོད་བྱེད་པ་སོགས་ཕན་ཐོགས་བྱུང་ཡོད། མཉམ་ཞུགས་པ་རྣམས་ཀྱིས་ཞིང་ལས་གནད་དོན་གཙོ་བོ་གྲོས་བསྡུར་དང་། ཉམས་མྱོང་བརྗེ་རེས། བོད་པའི་གཞིས་ཆགས་ཁག་ཏུ་ཡུན་གནས་ཐུབ་པའི་ཞིང་ལས་ཐོན་སྐྱེད་ཀྱི་འཆར་འགོད་བྱས་ཡོད་འདུག
གསར་འགོད་པ། བསྟན་འཛིན་ཕུར་བུ།
