ཕྱི་ལོ་ ༢༠༢༤ ཟླ་ ༦ ཚེས་ ༣ ཉིན་དགའ་ལྡན་ཕོ་བྲང་ཡིག་ཚང་ནས། ༧གོང་ས་རྒྱལ་བ་རིན་པོ་ཆེ་མཆོག་ཨ་རིར་ཞབས་པུས་སྨན་བཅོས་ཆེད་ཆིབས་བསྒྱུར་བསྐྱང་གཏན་འཁེལ་བའི་གསལ་བསྒྲགས་སྤེལ་བ་ལྟར།
ཕྱི་ཟླ་ ༦ ཚེས་ ༢༡ ཉིན་༸གོང་ས་རྒྱལ་བ་རིན་པོ་ཆེ་མཆོག་བཞུགས་སྒར་རྒྱལ་བའི་ཕོ་བྲང་ནས་ལྡི་ལིར་ཆིབས་ཐོན་མཛད་ཡོད་ཅིང་། ཕྱི་ཚེས་ ༢༢ ཉིན་རྒྱལ་ས་ལྡི་ལི་ནས་ཡུ་རོབ་རྒྱལ་ཁབ་སུད་སིའི་ཛུ་རིག་ཏུ་ཕེབས། ཕྱི་ཚེས་ ༢༣ ཉིན་ཨ་རིའི་ནེའུ་འཇར་སི་ཡི་ཊེ་ཊར་བྷོ་རོ་ (Teterboro) གནམ་ཐང་དུ་ཞབས་སོར་བདེ་བར་འཁོད། སྐབས་དེར་ཨ་རིར་གནས་སྡོད་བོད་མི་རྣམས་གཙོ་བྱས་པའི་ནང་པའི་དད་ལྡན་དོན་གཉེར་བ་ཁྲི་ཚོ་བརྒལ་བས་དགའ་དད་སྤྲོ་གསུམ་གྱི་ངང་ནས་༧གོང་ས་རྒྱལ་བ་རིན་པོ་ཆེ་མཆོག་ལ་ཕེབས་བསུ་ཞུས་ཏེ། ནེའུ་ཡོག་གི་པཱར་ཀི་ཧ་ཡེ་ཊ་ (Park Hyatt) གསོལ་མགྲོན་ཁང་དུ་ཆིབས་འཁོར་ནང་ཆིབས་བསྒྱུར་མཛད་ཡོད།
ཕྱི་ལོ་ ༢༠༢༤ ཟླ་ ༦ ཚེས་ ༢༨ ཉིན་ཨ་རིའི་གྲོང་ཁྱེར་ནེའུ་ཡོག་གི་དམིགས་བསལ་གཤགས་བཅོས་སྨན་ཁང་ (Hospital for Special Surgery) སྨན་ཁང་དུ་༧གོང་ས་མཆོག་གི་ཞབས་པུས་སྨན་བཅོས་གནང་ཞིང་། དམིགས་བསལ་གཤགས་བཅོས་སྨན་ཁང་ (Hospital for Special Surgery) གི་དར་མའི་ལུས་པོ་བསྐྱར་བཟོ་དང་རུས་ཚིགས་གཤགས་བཅོས་ཚན་པའི་འགན་འཛིན་སྨན་པ་ཌེ་ཝིཌ་མེ་མེན་(Dr. David Mayman) ལགས་ཀྱིས། ༧མགོན་པོ་གང་ཉིད་མཆོག་གི་ཞབས་པུས་ཀྱི་པུས་ཚིགས་བརྗེ་པོ་བརྒྱབ་པའི་གཤག་བཅོས་ལམ་ལྷོངས་ལྡན་པ་བྱུང་སོང་། ཞེས་དང་། སྨན་བཅོས་གནང་རྗེས་ཀྱི་བདུན་ཕྲག་གཅིག་གི་རིང་ཞབས་པུས་ཀྱི་རྨ་ཁ་དྲག་སྐྱེད་ཡོང་བའི་སྨན་བཅོས་ཀྱི་ཐབས་ལ་བརྟེན་གནང་དགོས་ཤིང་། བདུན་ཕྲག་གཉིས་པར་ལུས་རྩལ་ལ་བརྟེན་ནས་ཞབས་པུས་འགུལ་སྐྱོད་ཀྱི་སྨན་བཅོས་གནང་དགོས་ཁར། ༧གོང་ས་མཆོག་གི་ཞབས་པུས་ཀྱི་གནས་སྟངས་ཇེ་ལེགས་སུ་འགྲོ་རྒྱུ་ཡིན་སྐོར་སོགས་བསྒྲགས་ཡོད།
ཕྱི་ལོ་ ༢༠༢༤ ཟླ་ ༦ ཚེས་ ༢༩ ཉིན་གྱི་ཞོགས་པར་ནེའུ་ཡོག་གི་སྨན་ཁང་ནས་ཆིབས་ཐོན་མཛད་དེ་ཕྱིར་བཞུགས་གནས་གསོལ་མགྲོན་ཁང་དུ་ཕེབས། ཕྱི་ཟླ་ ༧ ཚེས་ ༣ ཉིན་༧སྐུའི་བླ་སྨན་པ་ས་འདུ་ཚང་ཚེ་བརྟན་རྡོ་རྗེ་ལགས་དང་། བོད་ལུགས་སྐུ་བཅར་སྨན་པ་རྟ་མགྲིན་ལགས་ཀྱིས་བརྙན་ལམ་ནས། ༧གོང་ས་མཆོག་གི་ཞབས་པུས་སྨན་བཅོས་གཞན་དང་མ་འདྲ་བའི་དྲག་སྐྱེད་མྱུར་པོ་བཞེས་ཀྱི་ཡོད་སྟབས། སྐུ་ངལ་ཡག་པོ་གསོ་ཆེད་མཁའ་དབུགས་གཙང་ཞིང་ཁོར་ཡུག་སྐྱིད་པོ་ཞིག་ལ་གནས་སྤོ་རྒྱུ་ཡིན་པའི་ཡོངས་ཁྱབ་གསལ་བསྒྲགས་ཤིག་སྤེལ། ཕྱི་ཟླ་ ༧ ཚེས་ ༩ ཉིན་༧གོང་ས་མཆོག་ནེའུ་ཡོག་གྲོང་ཁྱེར་གྱི་བཞུགས་གནས་ (Park Hyatt) མགྲོན་ཁང་ནས། ནེའུ་ཡོག་གི་བྱང་ཕྱོགས་གྲོང་ཁྱེར་ (Syracuse) ནང་གི་ (Pompey) གྲོང་ཚོ་རུ་ཕེབས་ཏེ། ༧མགོན་པོ་གང་ཉིད་ཀྱི་ཡུན་རིང་གི་ངོ་ཤེས་རྙིང་པ་སམ་དང་ནཱ་པི་ (Sam and Carol Nappi) ལགས་གཉིས་ཀྱི་གཞིས་ཀ་ (Nappi Farmhouse) རུ་བདུན་ཕྲག་དྲུག་རིང་སྐུ་ངལ་གསོ་ཞོར་དུ་ཞབས་པུས་སྨན་བཅོས་དྲག་སྐྱེད་ཀྱི་སྦྱོང་བརྡར་གནང་། ཕྱི་ཟླ་ ༧ ཚེས་ ༢༤ དང་ཕྱི་ཟླ་ ༨ ཚེས་ ༤ ཉིན་སོ་སོར་དགའ་ལྡན་ཕོ་བྲང་གིས་༧གོང་ས་མཆོག་གི་ཞབས་པུས་གཤགས་བཅོས་ཀྱི་རྨ་ཁར་སྐུ་ངལ་གང་ཡང་མེད་པར་དྭངས་སྐྱེད་བྱུང་ཡོད། ཞབས་འགུལ་སྐྱོད་སླར་གསོའི་ཆེད་ལས་པ་རྣམས་ནས་ཀྱང་། ༸གོང་ས་རྒྱལ་བ་རིན་པོ་ཆེ་མཆོག་ཉིན་རེ་ནས་ཉིན་རེ་ཇེ་ལེགས་སུ་ཕེབས་ཀྱི་འདུག་པས། ཞབས་པུས་དྭངས་སྐྱེད་ཀྱི་མྱུར་ཚད་བློ་ཁ་ཚིམ་པ་ཞིག་འོང་གི་འདུག་ཅེས་གསལ་བཤད་གནང་ཡོད་པ་ཡོངས་བསྒྲགས་གནང་།
ཕྱི་ལོ་ ༢༠༢༤ ཟླ་ ༨ ཚེས་ ༡༦ ཉིན་༧གོང་ས་རྒྱལ་བ་རིན་པོ་ཆེ་མཆོག་ཨ་རིའི་ནེའུ་ཡོག་མངའ་སྡེའི་ནང་ཡོད་པའི་ཨི་ཐ་ཁའི་(Ithaca)རྣམ་རྒྱལ་གྲྭ་ཚང་གི་ནང་ཆོས་སློབ་གཉེར་ཁང་ཞེས་པར་ཆིབས་སྒྱུར་བསྐྱངས་ཏེ་ཆོས་འབྲེལ་དང་བཀའ་སློབ་བཀའ་དྲིན་སྩལ་ཡོད་ཅིང་། དེ་ནི་༧གོང་ས་མཆོག་གི་ཞབས་པུས་སྨན་བཅོས་ལེགས་གྲུབ་བྱང་རྗེས་ཀྱི་མཛད་འཕྲིན་བསྐྱངས་པ་ཐོག་མ་དེ་ཆགས་ཡོད་ལ། སྐབས་དེར་༧གོང་ས་མཆོག་གིས། དེ་རིང་སྐབས་སུ་བབས་པ་ཁྱོད་རང་ཚོར་ཐུག་པ་རེད། བཙན་བྱོལ་བ་ཆགས་མེད་ན་ངོས་རང་ལྷ་སའི་གཙུག་ལག་ཁང་དང་ནོར་བུ་གླིང་ཁར་བཞུགས་ཁྲི་མཐོ་པོ་ཞིག་གི་སྒང་དུ་བསྡད་ཡོད་པ་རེད། ང་ཚོ་བཙན་བྱོལ་བ་ཆགས་ནས་ཆེ་འདྲིས་ཆུང་འདྲིས་བྱས་ཏེ་ང་ཚོ་ཐུག་ཐུབ་པ་ཞིག་རེད། མ་གཞི་ངོས་རང་ཟི་ལིང་ས་ཁུལ་དུ་སྐྱེས་ནས་ཆུང་ཆུང་སྐབས་ནས་མི་དང་འབྲེལ་བ་ཧ་ཅང་ཡག་པོ་ཡོད། ད་ལྟ་ངོས་རང་ལོ་རྒས་ཡོང་དུས་ས་ཁུལ་གང་ས་གང་དུ་ཡོད་པའི་ང་ཚོའི་བོད་མི་ཆོས་དང་རིག་གཞུང་གི་ཐོག་ལ་དོ་སྣང་ཡོད་མཁན་མང་པོ་ཞིག་གིས་དམིགས་བསལ་གྱིས་ཐུགས་སྣང་བྱས་ཏེ་ཧ་ཅང་དགའ་བོ་བྱེད་བཞིན་འདུག དེ་རིང་ས་ཆ་འདིར་ཆ་བཞག་ནའང་། ང་ཚོ་བོད་རིགས་གཅིག་གྱུར་གྱི་འདུ་ཤེས་ཀྱི་འོག་ནས་ཏཱ་ལའི་བླ་མ་ཟེར་དུས་སེམས་ཐག་ཉེ་བོ་དང་། སེམས་གཏིང་ནས་དགའ་པོ་བྱེད་པ་ཞིག་ཆགས་ཡོད་པ་རེད། ངོས་ལ་ཆ་བཞག་ནའང་བོད་ཆོལ་ཁ་གསུམ་གྱི་ས་ཁུལ་གང་ནས་སླེབས་པ་ཡིན་ནའང་བོད་རིགས་གཅིག་གྱུར་གྱི་བསམ་ཚུལ་ཤུགས་ཆེན་པོ་བྱས་ཏེ་སྡོད་ཀྱི་ཡོད། ངོས་རང་བཙན་བྱོལ་བ་ཆགས་ནས་བསྡད་པ་རེད་དེ། གང་ལྟར་བོད་ཀྱི་ཆོས་དང་རིག་གཞུང་གི་ཐོག་ལ་ཞབས་འདེགས་གང་འཚམ་སྒྲུབ་ཡོད། ད་དུང་ཡིན་ནའང་ཞབས་འདེགས་སྒྲུབ་ཀྱི་རེད། ཁྱོད་ཚོ་ཚང་མས་ཧུར་ཐག་འབད་ཐག་བྱོས། ཞེས་གསུངས།
ཕྱི་ལོ་ ༢༠༢༤ ཟླ་ ༨ ཚེས་ ༢༠ ཉིན་༧གོང་ས་རྒྱལ་བ་རིན་པོ་ཆེ་མཆོག་སླར་ཡང་ནེའུ་ཡོག་གྲོང་ཁྱེར་དུ་ཆིབས་བསྒྱུར་བསྐྱངས་ཡོད་ཅིང་། ཕྱི་ཟླ་ ༨ ཚེས་ ༢༡ ཉིན་ཨ་རིའི་ནེའུ་ཡོག་གྲོང་ཁྱེར་དུ་༸གོང་ས་རྒྱལ་བ་རིན་པོ་ཆེ་མཆོག་ལ་ཨ་རིའི་གཞུང་གི་བོད་དོན་དམིགས་བསལ་འབྲེལ་མཐུད་པ་ལྕམ་སྐུ་ཨ་ཛི་རཱ་ཛེ་ཡ་ (Uzra Zeya) མཆོག་དང་། ཨ་རིའི་སྲིད་འཛིན་གྱི་དམིགས་བསལ་ཕྱག་རོགས་དང་། མང་གཙོ་དང་འགྲོ་བ་མིའི་ཐོབ་ཐང་ཚན་པའི་འགན་འཛིན་ལྕམ་སྐུ་ཀེ་ལི་ (Kelly Razzouk) མཆོག་བཅས་ནས་མཇལ་བཅར་ཞུས་ཡོད། མཇལ་མོལ་གྱི་རིང་ལ་དམིགས་བསལ་བོད་དོན་འབྲེལ་མཐུད་པས་སྲིད་འཛིན་བྷའེ་ཌན་གྱི་ཚབ་ཞུས་ནས་༸གོང་ས་མཆོག་གི་སྐུ་གཟུགས་བདེ་ཐང་ཡོང་བའི་སྨོན་འདུན་ཞུས་པ་དང་། ཨ་རིའི་གཞུང་གི་ངོས་ནས་བོད་ཀྱི་འགྲོ་བ་མིའི་ཐོབ་ཐང་གོང་མཐོར་གཏོང་རྒྱུ་དང་། དེ་བཞིན་བོད་ཀྱི་ཐུན་མོང་མིན་པའི་ལོ་རྒྱུས་ཀྱི་གནས་བབ་དང་། སྐད་ཡིག རིག་གཞུང་། ཆོས་ལུགས་བཅས་འཛིན་སྐྱོང་སྲུང་སྐྱོབ་ཀྱི་འབད་བརྩོན་གནང་བའི་ཐད་རྒྱབ་སྐྱོར་སྔར་བཞིན་ཡོད་པ་ཞུས་ཡོད། གཞན་ཡང་། མཇལ་ཁའི་སྐལ་བཟང་འདི་བཟུང་སྟེ་༸གོང་ས་མཆོག་དང་ལྷན་དུ་བོད་པས་རང་གི་རིག་གཞུང་རྒྱུན་སྐྱོང་བྱེད་སྟངས་དང་། ཨ་རིའི་ངོས་ནས་བོད་ནང་གི་འགྲོ་བ་མིའི་ཐོབ་ཐང་ཐོག་ལས་འགུལ་མུ་མཐུད་འབད་བརྩོན་རྒྱུན་སྐྱོང་ཞུ་རྒྱུ། དེ་བཞིན་༸གོང་ས་མཆོག་དང་སྐུ་ཚབ་རྣམ་པ་དང་རྒྱ་ནག་དབར་གྲོས་མོལ་སྔར་ལམ་སྐྱར་གསོ་ཞུ་རྒྱུར་རྒྱབ་སྐྱོར་ཡོད་སྐོར་བཅས་༸སྙན་སེང་ཞུས་ཡོད་པ་ཨ་རིའི་ཕྱི་སྲིད་ལས་ཁུངས་ཀྱིས་གནས་ཚུལ་སྤེལ།
ཕྱི་ལོ་ ༢༠༢༤ ཟླ་ ༨ ཚེས་ ༢༢ ཉིན་༧གོང་ས་རྒྱལ་བ་རིན་པོ་ཆེ་མཆོག་ལ་བྱང་ཨ་རིར་གནས་སྡོད་བོད་མི་སྤྱི་དང་། ཨ་རིའི་ཆོ་འཕྲུལ་སྨོན་ལམ་ཚོགས་པས་གཙོས་དགེ་ལུགས་པའི་ཆོས་ཚོགས་ཁག སོག་རིགས། ཧི་མ་ལ་ཡའི་རི་རྒྱུད་ཀྱི་མི་མང་བཅས་ཐུན་མོང་གིས་ཇི་ལྟར་གསོལ་བ་བཏབ་པ་ལྟར་ཨ་རིའི་ནེའུ་ཡོག་གྲོང་ཁྱེར་གྱི་ UBS Arena ཞེས་པའི་ཚོགས་ར་ཆེན་མོ་རུ་སེམས་བསྐྱེད་དང་། ཐུབ་པའི་མཚན་སྔགས། མ་ཎི་ཡིག་དྲུག་སོགས་གཟུངས་སྔགས་འགའ་ཞིག་གི་བཟླས་ལུང་བཀའ་དྲིན་སྩལ་བ་དང་། མགོན་པོ་གང་ཉིད་མཆོག་ལ་བརྟན་བཞུགས་བསྟར་འབུལ་ཞུས་ཡོད། སྐབས་དེར་༧མགོན་པོ་གང་ཉིད་མཆོག་གིས། དེ་རིང་འདིར་བོད་ཀྱི་མདོ་སྟོད་སྨད་དབུས་གཙང་སོགས་བོད་ཀྱི་ས་ཁུལ་ཡོངས་རྫོགས་ཀྱི་མི་སྣ་འཛོམས་ཡོད། འདིར་མི་སྣ་འཛོམས་པ་དེ་རྒྱུ་དངོས་པོའི་ཐོག་ནས་འཛོམས་པ་མ་རེད། ཚང་མས་སེམས་ནང་བོད་རིགས་ཞེས་པའི་བསམ་ཚུལ་གྱི་ཐོག་ནས་ང་ཚོ་ཚང་མ་རྡོག་སྒྲིལ་ནས་ཡོང་གི་ཡོད། ང་ཚོ་བོད་པ་ཙམ་མིན་པར་བོད་ཀྱི་ཆོས་དང་རིག་གཞུང་ལ་ཤེས་ནས་དད་པ་ཐོབ་པའི་གྲོགས་པོ་མང་པོ་ཞིག་འདིར་འདུས་ཡོད། ཚང་མས་བོད་ཀྱི་རིག་གཞུང་འདི་འཛམ་གླིང་སྤྱི་ལ་མཁོ་བའི་རིག་གཞུང་ཞིག་ཆགས་ཡོད། བཅོམ་ལྡན་འདས་མངོན་པར་རྫོགས་པའི་སངས་རྒྱས་པའི་རྗེས་སུ། ཆོས་ཀྱི་འཁོར་ལོ་རིམ་པ་གསུམ་གསུངས་པ་རེད། གང་ལྟར་སངས་རྒྱས་བཅོམ་ལྡན་མྱ་ངན་ལས་འདས་རྗེས་སངས་རྒྱས་བཅོམ་ལྡན་འདས་ཀྱི་ཆོས་ལ་སྤུས་དག་པོའི་ཐོག་ཆ་ཚང་བདག་པོ་རྒྱག་མཁན་གཙོ་བོ་ཧི་མ་ལ་ཡའི་རི་རྒྱུད་ཀྱི་བོད་རིགས་ཚོ་གཙོ་བོ་རེད་འདུག དེང་སྐབས་ང་ཚོས་དངོས་སུ་མཐོང་ཆོས་སུ་ཡོད་པ་དེ་རེད། དངོས་གནས་དྲང་གནས་བོད་གངས་ཅན་ལྗོངས་ཀྱི་སློབ་གཉེར་གཙོ་བོ་ཚིག་གི་འགྲེལ་བཤད་རྒྱག་རྒྱུ་ཡོད་པ་དང་། དོན་དག་ལ་བསམ་བློ་གཏོང་རྒྱུ་ཡོད་པ། སོ་སོ་རང་གི་ཉམས་ལེན་གྱི་ཐོག་ནས་བསམ་བློ་གཏང་ན་བསླབ་པ་གསུམ་གྱི་ཐོག་ལ་ཉམས་ལེན་བྱ་རྒྱུ་ནི་ང་ཚོ་བོད་པར་ལོ་ངོ་སྟོང་ཕྲག་རིང་གོམས་ཏེ་སྤུས་དག་པོ་ཆགས་ཡོད། ཅེས་གསུངས།
ཕྱི་ལོ་ ༢༠༢༤ ཟླ་ ༨ ཚེས་ ༢༣ ཉིན་༧གོང་ས་རྒྱལ་བ་རིན་པོ་ཆེ་མཆོག་ཨ་རི་ནས་ཡུ་རོབ་རྒྱལ་ཁབ་སུད་སི་རུ་ཆིབས་བསྒྱུར་བསྐྱངས་ཏེ་ཉིན་གཅིག་རིང་སྐུ་ངལ་གསོས་རྗེས། ཕྱི་ཚེས་ ༢༥ ཉིན་༧གོང་ས་རྒྱལ་བ་རིན་པོ་ཆེ་མཆོག་ལ་སུད་སིའི་ཛུ་རིག་གྲོང་ཁྱེར་གྱི་ (Hallenstadion) ཚོགས་ཁང་དུ་དད་ལྡན་སེར་སྐྱ་ཆིག་ཁྲི་ལྔ་སྟོང་བརྒལ་བར་འཇམ་པའི་དབྱངས་ཀྱི་གཟུངས་སྔགས་དང་། སྤྱན་རས་གཟིགས་ཀྱི་གཟུངས་སྔགས། ཐུབ་པའི་མཚན་སྔགས་བཅས་ཀྱི་བཟླས་ལུང་བཀའ་དྲིན་སྩལ་རྗེས། སུད་སི་དང་ལེག་ཏེན་སིཊཡན་བོད་རིགས་མི་མང་གིས་བརྟན་བཞུགས་བསྟར་འབུལ་ཞུས་ཡོད་ཅིང་། སྐབས་དེར་༧མགོན་པོ་གང་ཉིད་མཆོག་གིས། དེང་སང་འཛམ་གླིང་འདིར་ཆོས་ཞེས་ཟུར་དུ་དད་པ་བྱེད་པ་ཞིག་ཡོད་རུང་མེད་རུང་། རྒྱལ་ཁབ་སོ་སོ་་ནས་དད་པ་བྱེད་པ་དང་། སེམས་པ་བཟང་པོ་བྱེད་རྒྱུའི་སྐོར་ལ་ང་ཚོ་བོད་རིགས་ཚང་མར་དོ་སྣང་བྱེད་སྡོད་པ་ཞིག་རེད། དེ་ནས་བོད་མི་ཚོར་བར་སྐབས་དཀའ་ངལ་ཆེན་པོ་བྱུང་བ་རེད། དེ་རིང་ཁ་སང་ཡིན་ནའང་། གུང་ཁྲན་རིང་ལུགས་ཀྱི་སྒྲིག་འཛུགས་ཀྱིས་དམ་དྲག་ཆེན་པོ་བྱེད་ཀྱི་ཡོད་ཀྱང་། བོད་མིའི་ཆོས་དད་ཀྱི་སེམས་ཤུགས་བརླག་འགྲོ་རྒྱུ་ཁྱོན་ནས་མི་འདུག ང་ཚོ་བཙན་བྱོལ་བ་ཆགས་ནས་བསྡད་ཡོད་ཀྱང་བོད་པ་བཙན་བྱོལ་བ་སྐྱེས་ཕོ་མོ་སུ་ཡིན་རུང་གང་དུ་ཡོད་པའི་གནས་སུ་ཆོས་ལ་དད་པ་འགྱུར་བ་མེད་པ་ཞིག་རེད། ང་ཚོའི་ཆོས་ཀྱི་དད་པ་དེ་ཡ་རབས་སྤྱོད་བཟང་དང་འདྲེས་ནས་ཡོད་པས་གལ་ཏེ་ཆོས་ལ་དད་པ་མེད་ནའང་། ཡ་རབས་སྤྱོད་བཟང་གི་ཉམས་ལེན་ཡག་པོ་བྱེད་དགོས་ཀྱི་འདུག་ཅེས་ང་ཚོས་བཤད་བཞིན་ཡོད། ཆོས་ཀྱི་སྙིང་པོ་ནི་ཡ་རབས་སྤྱོད་བཟང་རེད། དེ་ནས་ཆོས་ཁས་མ་བླངས་ཀྱང་སོ་སོའི་མི་ཚེ་འདི་ཡ་རབས་སྤྱོད་བཟང་གིས་བསྐྱལ་རྒྱུ་བྱུང་ན་ཆོས་ཀྱི་དགོས་པ་ཚང་ཡོད། ཁ་ནས་ཆོས་མང་པོ་བཤད་ཅིང་། ཆོས་ཕྱོགས་ཀྱི་ཐོག་ནས་གྲུབ་འཐའི་འཐེན་འཁྱེར་བྱེད་བསྡད་ལྟ་བུ་དང་། སེམས་ཞི་ཞིང་དུལ་བ་ཡག་པོ་ཞིག་མེད་ཚེ་དེ་ནི་ཆོས་འབག་ལ་གྱོན་པ་ལྟ་བུ་ཞིག་རེད། ཕན་ཐོགས་གང་ཡང་མེད། ཅེས་གསུངས།
ཕྱི་ལོ་ ༢༠༢༤ ཟླ་ ༨ ཚེས་ ༢༦ ཉིན་༧གོང་ས་རྒྱལ་བ་རིན་པོ་ཆེ་མཆོག་སུད་སི་ནས་ཕྱིར་རྒྱ་གར་དུ་ཆིབས་བསྒྱུར་བསྐྱངས་ཏེ་ཉིན་གཅིག་རིང་རྒྱལ་ས་ལྡི་ལི་རུ་སྐུ་ངལ་གསོས་རྗེས། ཕྱི་ཚེས་ ༢༨ ཉིན་རྒྱ་གར་གྱི་རྒྱལ་ས་ལྡི་ལི་ནས་མཁའ་ལམ་བརྒྱུད་ཀང་ར་གནམ་ཐང་དུ་༸ཞབས་སོར་བདེ་བར་འཁོད་པ་དང་། སྐབས་དེར་གནམ་ཐང་དུ་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་། བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག བདེ་སྲུང་བཀའ་བློན་རྒྱ་རི་སྒྲོལ་མ་མཆོག་སོགས་ཀྱིས་གཙོས་དགོན་སྡེ་ཁག་གི་དགེ་འདུན་པ་དང་བཙུན་མ། ཧིན་དྷུ་དང་ཡི་ཤུ། ཁ་ཆེ། ནང་པ། སིག་བཅས་ཀྱི་ཆོས་ལུགས་ཁག་གི་སྐུ་ཚབ་དང་། བོད་ཀྱི་གཞུང་འབྲེལ་མ་ཡིན་པའི་ཚོགས་པ་ཁག་གི་སྐུ་ཚབ། རྒྱ་གར་བྱང་ཤར་ཨ་རུ་ན་ཅལ་མངའ་སྡེའི་སྤྱི་ཁྱབ་བློན་ཆེན་པདྨ་མཁའ་འགྲོ་གཙོས་པའི་མོན་ཡུལ་གྱི་དགོན་སྡེ་ཁག་དང་མི་མང་ཡོངས་ཀྱི་སྐུ་ཚབ་སོགས་མི་མང་བརྒྱ་ཕྲག་བརྒལ་བས་ཕེབས་བསུ་ཞུས་ཡོད།
གསར་འགོད་པ་སྐལ་བཟང་སྦྱིན་པས་ཕྱོགས་སྒྲིག་བྱས།
