བོད་མིའི་སྒྲིག་འཛུགས་ཀྱི་ཤེས་རིག་བཀའ་བློན་ལྕང་ར་ཐར་ལམ་སྒྲོལ་མ་མཆོག་གིས་ཕ་མའི་ཉིན་མོར་འཚམས་འདྲི་གནང་བ་དང་སྦྲགས་ཕ་མ་རྣམས་ཀྱིས་ཕྲུ་གུའི་མདུན་སར་སྒོ་གསུམ་གྱི་ཀུན་སྤྱོད་བཟང་པོའི་ཐོག་ནས་ཉིན་རེའི་བྱ་གཞག་འཐུས་ཚང་བསྒྲུབ་གལ་ཆེ་སྐོར་གསུངས་འདུག
བཀའ་ཤག་སྐབས་བཅུ་དྲུག་པའི་ཤེས་རིག་བཀའ་བློན་ལྕང་ར་ཐར་ལམ་སྒྲོལ་མ་མཆོག བོད་མིའི་སྒྲིག་འཛུགས་ཀྱི་པར།
ལོ་ལྟར་ཕྱི་ཟླ་ ༣ ཚེས་ ༥ ཉིན་ཏེ་རྒྱལ་ཡུམ་བདེ་སྐྱིད་ཚེ་རིང་ལགས་ཀྱི་འཁྲུངས་སྐར་ཉིན་ཕ་མའི་དུས་ཆེན་དུ་སྲུང་གཙི་ཞུ་ཡི་ཡོད་པ་དང་བསྟུན། དབུས་བོད་མིའི་སྒྲིག་འཛུགས་ཀྱི་ཤེས་རིག་བཀའ་བློན་ལྕང་ར་ཐར་ལམ་སྒྲོལ་མ་མཆོག་གིས་འཚམས་འདྲི་གནང་བའི་ནང་། བོད་རིགས་ཕ་མ་རྣམས་ཀྱིས་སོ་སོའི་བུ་ཕྲུག་ལ་བོད་ཀྱི་ཐུན་མོང་མ་ཡིན་པའི་སྐད་ཡིག་དང་རིག་གཞུང་སྦྱོང་སྤྱོད་སྤེལ་གསུམ་བྱེད་པར་འགན་འཁུར་ལེན་རྒྱུ་དང་ཁ་མིག་ཡར་ལྟ་ཡི་ཚད་ལྡན་སློབ་གསོ་སྤྲོད་དགོས་པའི་འབོད་སྐུལ་གནང་འདུག
དེ་ཡང་འཚམས་འདྲི་དེའི་ནང་། བོད་མི་རྣམས་བཙན་བྱོལ་དུ་གྱེས་ནས་སྐྱབས་མེད་མགོན་མེད་ཀྱི་གནས་སུ་གྱུར་སྐབས། ༧གོང་ས་རྒྱལ་བ་རིན་པོ་ཆེ་མཆོག་ནས་བོད་ཀྱི་ཆོས་རིག་སྲུང་སྐྱོབ་དང་། བོད་མིའི་ཡུལ་སྲོལ་གོམས་གཤིས་སོགས་རྒྱུན་འཛིན་སླད། བོད་མི་འདུས་སྡོད་གཞིས་ཆགས་དང་། དགོན་སྡེ་གྲྭ་ཚང་། སློབ་གྲྭ། རིག་གཞུང་ལྟེ་གནས་ཁང་སོགས་གསར་རྒྱག་མཛད་དེ། བྱེས་སུ་གྱར་བའི་བོད་མི་རྣམས་ནི་བཙན་བྱོལ་བ་དམིགས་བསལ་ཅན་ཞིག་ཏུ་གྱུར་བས། བོད་མི་ཚོས་དུས་དང་རྣམ་པ་ཀུན་ཏུ་༧མགོན་པོ་གང་གི་བཀའ་དྲིན་རྗེས་དྲན་གནང་གལ་ཆེ་བའི་སྐོར་དང་། སློབ་མ་རྣམས་སློབ་གྲྭ་མཐར་ཕྱིན་ནས་མཐོ་སློབ་སོགས་སུ་སྐྱོད་སྐབས། རང་ཚུགས་མི་བརྟན་པ་དང་། གྲོགས་ངན་པའི་ཤུགས་རྐྱེན་མི་ཐེབས་སླད། སྔོན་ཚོད་ནས་སློབ་མ་རྣམས་ཀྱི་བསམ་སྤྱོད་ལ་ཞིབ་འཇུག་ལེགས་པོ་བགྱིས་ནས། ཁ་མིག་ཡར་ལྟ་ཡི་ཚད་ལྡན་གྱི་སློབ་གསོ་སྤྲད་རྒྱུ་ཧ་ཅང་གལ་ཆེན་ཡིན་སྐོར་སོགས་གསུངས་འདུག
ཡང་བཀའ་བློན་མཆོག་གིས། ཕ་མ་དང་དགེ་རྒན་གཉིས་ལ་ཕྲུ་གུའི་འཚར་ལོངས་གོང་འཕེལ་གཏང་རྒྱུར་འགན་འཁྲི་ཡོད་སྟབས། ཕ་མ་དང་དགེ་རྒན་མཉམ་འབྲེལ་གྱི་ཐོག་ནས་སློབ་མའི་ཤེས་ཡོན་དང་། ཀུན་སྤྱོད། དེ་བཞིན་འཕྲོད་བསྟེན་སོགས་ཀྱི་དཀའ་ངལ་སེལ་ཐབས་ལ་གདོང་ལེན་གནང་དགོས་པའི་ཁར། སློབ་མའི་འཚར་ལོངས་ཀྱི་གོ་རིམ་ཁྲོད་ཚད་ལྡན་གྱི་རོ་བཅུད་ལྡན་པའི་ཟས་རིགས་ལ་བསྟེན་བཅུག་དགོས་པ་ལས། དངུལ་མང་པོ་སྤྲད་པ་དང་། ལག་ཐོགས་ཁ་པར། ཚོང་རྟགས་ཅན་གྱི་ལྷམ་སོགས་ཉོས་པ་དེས། བྱིས་པ་དག་ལ་ཚད་ལྡན་གྱི་སློབ་གསོ་སྤྲོད་སྟངས་ཤིག་མིན་སྐོར་དང་། དེ་བཞིན་ཕ་མ་རྣམས་ཀྱིས་བོད་ཕྲུག་རྣམས་ལ་བོད་ཀྱི་ཐུན་མོང་མ་ཡིན་པའི་སྐད་ཡིག་དང་རིག་གཞུང་སྦྱོང་སྤྱོད་དང་རྒྱུན་ལྡན་ཁྱིམ་ཚང་སོ་སོའི་ཕ་མ་རྣམས་ཀྱིས་འགན་ཁུར་ཏེ། ཕ་སྐད་གཙང་མའི་ལམ་ནས་སྐད་ཆ་མོལ་རྒྱུ་ཧ་ཅང་གལ་ཆེན་ཡིན་སྐོར་སོགས་གསུངས་འདུག
མཇུག་ཏུ། ཕྲུ་གུ་རྣམས་ཀྱིས་ཕ་མ་རྣམས་ལ་ཁ་མིག་ཡར་ལྟ་དང་བག་ཆགས་ཟབ་མོ་འཇོག་གིན་ཡོད་པས། ཕ་མ་ཚོས་སྒོ་གསུམ་གྱི་ཀུན་སྤྱོད་བཟང་པོའི་ཐོག་ནས་ཉིན་རེའི་བྱ་གཞག་དག་འཐུས་ཚང་བསྒྲུབ་ཐབས་དང་། ཕྲུ་གུ་སོ་སོའི་རིག་སྟོབས་དང༌། འཇོན་ཐང་། བཟོ་རིག་ལག་རྩལ་སོགས་ཀྱི་ཤེས་རྒྱ་ལ་གཞིགས་ཏེ་མཐུན་རྐྱེན་སྦྱོར་སྤྲོད་གནང་དགོས་པའི་འབོད་སྐུལ་གནང་འདུག
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།
