རྒྱ་ནག་གཞུང་གིས་བཀོད་ཇུས་བྱས་པའི་བོད་རྒོལ་སྤྱི་ཚོགས་དྲ་བྱང་མང་པོ་ནག་གསུབ་བཏང་འདུག

མེ་ཊ་སྤྱི་ཚོགས་དྲ་ལམ་ཚོང་གཉེར་ཁང་གིས་རྒྱ་ནག་གཞུང་གིས་དྲ་ལམ་ནས་ཆེད་དུ་༧གོང་ས་རྒྱལ་བ་རིན་པོ་ཆེ་མཆོག་དང་བཙན་བྱོལ་བོད་མིའི་ཆབ་སྲིད་ཀྱི་གནད་དོན་སོགས་ཀྱི་ཐད་ལ་རྫུན་གཏམ་དང་འཁྱོག་བརྗོད་བྱེད་མཁན་གྱི་ངོ་དེབ་ཁ་བྱང་བཅོ་བརྒྱད་ལྷག་ནག་གསུབ་བཏང་འདུག

ཉེ་སྔོན་མེ་ཊ་སྤྱི་ཚོགས་དྲ་ལམ་ཚོང་གཉེར་ཁང་གིས་ཕྱི་ལོ་ ༢༠༢༤ ལོའི་དྲ་ལམ་འཇབ་རྒོལ་དང་དང་འབྲེལ་བའི་ཤོག་ངོས་བཅུ་བཞི་ཅན་གྱི་སྙན་ཐོ་ཞིག་བཏོན་པའི་ཁྲོད། རྒྱ་ནག་གཞུང་དང་རྒྱ་ནག་གཞུང་གིས་ཆེད་དུ་དྲ་ལམ་དུ་མངགས་པའི་སྐར་ལྔའི་དྲ་དམག་སོགས་ཀྱིས་ངོ་དེབ་ཁ་བྱང་རྫུན་བཟོས་བྱས་ཏེ། ༧གོང་ས་རྒྱལ་བ་རིན་པོ་ཆེ་མཆོག་དང་འབྲེལ་བའི་གནས་ཚུལ་རྫུན་བཟོ་དང་འཁྱོག་བརྗོད། དེ་བཞིན་བཙན་བྱོལ་བོད་མིའི་སྤྱི་ཚོགས་སོགས་དམིགས་འབེན་གཙོ་བོར་བཟུང་ནས་དཀྲོག་གཏམ་དང་རྫུན་གཏམ་ཡང་ཡང་སྤེལ་གྱིན་ཡོད་པའི་གནད་དོན་ཐེར་འདོན་གནང་འདུག

དེ་ཡང་སྙན་ཐོ་དེའི་ནང་། འདས་ལོར་མེ་ཊ་ཚོང་གཉེར་ཁང་གིས་བོད་དོན་དང་འབྲེལ་ནས་གནས་ཚུལ་རྫུན་མ་དང་འཁྱོག་བཤད་རང་བཞིན་གྱི་གཏམ་བརྗོད་སྤེལ་མཁན་གྱི་ངོ་དེབ་ཁ་བྱང་བཅོ་བརྒྱད་དང་། ངོ་དེབ་འཕྲིན་སྟེགས་གཉིས། ཚོགས་པ་བཞི་དང་། ཨིན་སི་ཊ་ར་གྷ་རམ་(Instagram) གྱི་ཁ་བྱང་ལྔ་བཅས་ནག་གསུབ་བཏང་ཡོད་ཅིང་། རྒྱ་ནག་ནས་བཀོལ་སྤྱོད་བྱས་པའི་ཁ་བྱང་དེ་དག་གིས་རྒྱ་བལ་འབྲུག་གསུམ་དུ་གཞིས་བཅས་པའི་བཙན་བྱོལ་བོད་མི་གཙོས་འཛམ་གླིང་ས་ཕྱོགས་གང་སར་ཡོད་པའི་བོད་མི་རྣམས་དམིགས་འབེན་དུ་བཟུང་ནས་གནས་ཚུལ་འཁྱོག་བརྗོད་དང་རྫུན་གཏམ་སྤེལ་གྱིན་ཡོད་པ་མ་ཟད། རྒྱུན་དུ་བོད་ཡིག་དང་དབྱིན་ཡིག་འབྲི་མཁན་ཁག་ཅིག་གིས་ཆེད་དུ་༧གོང་ས་རྒྱལ་བ་རིན་པོ་ཆེ་མཆོག་ལ་མཚན་དམོདདང་། ༧མགོན་པོ་གང་གི་སྐུ་གཟུགས་ཀྱི་གནས་བབ་དང་གཞུང་འབྲེལ་ཆིབས་བསྒྱུར་སོགས་དང་འབྲེལ་བའི་ཐད་ལ་དྲང་བདེན་དང་ཁུངས་ལུང་མེད་པའི་གནས་ཚུལ་རྫུན་མ་སྤེལ་གྱིན་ཡོད་པ་ཤེས་རྟོགས་བྱུང་། ཞེས་གསལ་འདུག

དེ་བཞིན་མེ་ཊ་ཚོང་གཉེར་ཁང་གིས་ངོ་རྟགས་མི་ཆོད་པའི་ངོ་དེབ་ཁ་བྱང་རྫུན་མ་འགས་ཆེད་དུ་༧གོང་ས་རྒྱལ་བ་རིན་པོ་ཆེ་མཆོག་ལ་མཚན་དམོད་དང་། ཁག་ཅིག་གིས་དད་པ་དང་དམ་ཚིག་གཙང་མདོག་གིས་རྒྱབ་སྐྱོར་དང་ཡིད་ཆེས་ཡོད་ཁུལ་བྱེད་ཀྱིན་ཡོད་པའི་གནས་ཚུལ་ཤེས་རྟོགས་བྱུང་ཡོད་སྐོར་དང་།  རྒྱ་ནག་གཞུང་གི་སྐར་ལྔའི་དྲ་དམག་དེ་དག་གིས། ངོ་དེབ་གཙོས་སྤྱི་ཚོགས་དྲ་ལམ་ཁག་ཏུ་རྒྱ་གར་དང་། བལ་ཡུལ། འབྲུག་ཡུལ་སོགས་གཙོས། ཨེ་ཤ་ཡའི་རྒྱལ་ཁབ་ཁག་ཅིག་གི་མིར་བརྫུས་ནས་བཙན་བྱོལ་བོད་མིའི་སྤྱི་ཚོགས་ནང་གི་གནད་དོན་ཁག་ཅིག་གི་ཐད་ལ་སེམས་ཤུགས་ཆེ་མདོག་གིས་གླེང་སློང་དང་། བགྲོ་གླེང་བྱས་ཏེ་སྤྱི་ཚོགས་དཀྲུག་གང་ཐུབ་དང་། སྤྱི་ཚོགས་ཀྱི་སྲིད་འབྱོར་གཉིས་གཙོས་བོད་དོན་དང་འབྲེལ་བའི་གནད་དོན་ཐད་རྫུན་གཏམ་དང་འཁྱོག་བརྗོད་ཡང་ཡང་སྤེལ་གྱིན་ཡོད་སྐོར་སོགས་གསལ་འདུག

ཡང་སྙན་ཐོ་དེའི་ནང་། ཨ་རི་དང་ཧྥ་རན་སིའི་གནད་དོན་ཐད་ལ་རྫུན་གཏམ་དང་འཁྱོག་བརྗོད་བྱེད་མཁན་གྱི་ཨ་ཧྥི་རི་ཁ་གླིང་ཕྲན་གྱི་ནུབ་རྒྱུད་དུ་ཆགས་པའི་བྷི་ནན་(Benin) རྒྱལ་ཁབ་ཀྱི་ངོ་དེབ་དང་ཁ་བྱང་རྫུན་མ་བཅུ་དྲུག་ཚུད་པའི་འཕྲིན་སྟེགས་དང་། གྷ་ན་ནས་ངོ་དེབ་རྫུན་མ་གྲངས་ ༤༢། ཨིན་སི་ཊ་ར་གྷ་རམ་གྱི་ཁ་བྱང་གྲངས་ ༣༣ །  དེ་བཞིན་ཨུ་རུ་སུས་ཨ་རི་དང་ཡུ་ཁེ་རིན་གྱི་ཐད་ལ་རྫུན་གཏམ་དང་འཁྱོག་བརྗོད་སླད་ཁ་བྱང་རྫུན་བཟོ་ཡང་ཡང་བྱེད་ཀྱིན་ཡོད་སྐོར་སོགས་གསལ་འདུག

རྒྱ་ནག་དམར་ཤོག་ཚོགས་པའི་མངོན་འདོད་སྒྲུབ་མཁན་གྱི་དྲ་ལམ་འཇབ་རྒོལ་བ་ཚོས། བཙན་བྱོལ་བོད་མིའི་སྒྲིག་འཛུགས་ཀྱི་ལྷན་ཁང་ཁག་སོགས་ཀྱི་དྲ་གནས་འཚོལ་ཞིབ་མ་ལག་མཱོ་ཛེ་ལ་ (Mozilla Firefox) སོགས་བརྒྱུད། གློག་ཀླད་སྟེང་མཉེན་ཆས་སམ་དྲ་རྒྱའི་འཚོལ་ཞིབ་མ་ལག་བེད་སྤྱོད་གཏོང་ཕྱོགས་ཀྱི་ཐོན་རིམ་གསར་པ་ཕབ་ལེན་བྱེད་དུ་བཅུག་སྟེ། ཚོགས་སྡེ་ཁག་དང་མི་སྒེར་གྱི་ཡིག་ཟམ་ (Gmail) ལ་སྟངས་འཛིན་དང་གསང་མྱུལ་གྱི་ཐོག་ནས་དྲ་ལམ་ནས་ཡིག་ཆ་རྐུ་ཁྱེར་དང་རྗེས་འདེད་ཡང་ཡང་གཏོང་གིན་ཡོད་པ་རེད།

རྒྱ་ནག་གཞུང་གིས་བཙན་བྱོལ་ནང་གི་བོད་མིའི་རང་དབང་གསར་ཁང་ཁག་ལའང་དྲ་ལམ་འཇབ་རྒོལ་དང་གནོན་ཤུགས་སྤྲོད་ཐབས། སྤྱི་མང་གི་ཡིད་ཆེས་བརླག་ཐབས་གང་ཡོང་བྱེད་ཀྱི་ཡོད་པ་རེད། དཔེར་ན། འདི་ག་བོད་ཀྱི་དུས་བབ་གསར་ཁང་གིས་སྤེལ་བའི་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་དང་། བོད་ཀྱི་ཁོར་ཡུག་གཏོར་སྐྱོན། དེ་བཞིན་རྒྱ་ནག་གཞུང་གིས་བོད་ནང་དུ་ལག་བསྟར་བྱེད་བཞིན་པའི་བཙན་གནོན་སྲིད་ཇུས་དང་འབྲེལ་བའི་གནས་ཚུལ་རིགས་སྤེལ་སྐབས། རྒྱ་ནག་སྐར་ལྔའི་དྲ་དམག་སོགས་ཀྱིས་ཡང་ཡང་འཇབ་རྒོལ་དང་དངོས་བདེན་མིན་ཚུལ་གྱི་སྐྱོན་འཛུགས་བྱས་པ་མ་ཟད། ངོ་དེབ་ཀྱི་འཛིན་སྐྱོང་ཚན་པར་ཞུ་གཏུགས་བྱས་ཏེ་གནས་ཚུལ་དེ་རིགས་སྤེལ་མི་ཐུབ་པ་དང་ངོ་དེབ་སྤྱི་ཚོགས་དྲ་ལམ་སྟེང་འདི་ག་གསར་ཁང་གིས་སྤེལ་བའི་གསར་འགྱུར་དག་མཐོང་མི་ཐུབ་པ་བཟོས་པའི་གནས་ཚུལ་ཡང་ཡང་བྱུང་དང་འབྱུང་མུས་ཡིན།

དེ་བཞིན་ཕྱི་ལོ་ ༢༠༢༣ ལོའི་ལོ་མཇུག་ཏུ་པར་དང་མིང་སོགས་ཁ་གསལ་མེད་པའི་ངོ་དེབ་ཁ་བྱང་  ༤༧༠༠ ལྷག་གིས་ཨ་རིའི་མི་སེར་ཡིན་ཁུལ་གྱིས། ཨ་རིའི་ཆབ་སྲིད་ཀྱི་གནད་དོན་དང་། ཕྱི་ལོ་ ༢༠༢༤ ལོའི་ཨ་རིའི་སྲིད་འཛིན་གྱི་འོས་བསྡུ། ཨ་རྒྱའི་འབྲེལ་ལམ་སོགས་ཀྱི་སྐོར་ལ་འཁྱོག་བརྗོད་དང་ལོག་འགྲེལ་བྱེད་བཞིན་ཡོད་སྟབས། ངོ་དེབ་ལས་ཁུངས་ཀྱིས་རྒྱ་ནག་གི་ངོ་དེབ་ཁ་བྱང་དེ་དག་སྒོ་བརྒྱབ་པ་དང་། ཕྱི་ལོ་ ༢༠༡༦ ཙམ་ནས་ངོ་དེབ་ལས་ཁུངས་ཀྱིས་རྒྱ་ནག་གཞུང་གི་དྲ་ལམ་འཇབ་རྒོལ་བའམ་སྐར་ལྔའི་དྲ་དམག་གི་ཁ་བྱང་རྣམས་སྒོ་བརྒྱབ་ཡོད་ཀྱང་། ཉེ་བའི་ལོ་ཤས་ནང་རྒྱ་ནག་གིས་ངོ་དེབ་དང་། ཨིན་སི་ཊི་ར་གྷི་རམ་ཚུད་པའི་རྒྱ་ནག་ནང་བཀག་སྡོམ་བྱས་པའི་སྤྱི་ཚོགས་དྲ་ལམ་ཁག་བཀོལ་མཁན་ཇེ་མང་དུ་ཕྱིན་པ་དང་། དེ་དག་གིས་རྒྱ་ནག་དམར་ཤོག་སྲིད་གཞུང་གི་ལྟ་བ་དང་ལངས་ཕྱོགས་སོགས་དྲ་ལམ་དུ་སྤེལ་གྱིན་ཡོད་པའི་གནས་ཚུལ་འཐོན་མུས་ཡིན་པ་རེད།

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།