༧གོང་ས་མཆོག་ནས་རྒྱ་ནག་གུང་ཁྲན་གྱིས་བོད་ནག་གསུབ་གཏོང་བའི་རེ་བ་བརྒྱབ་ཡོད་ཀྱང་ཁོ་ཚོས་ཐུབ་ཡོད་པ་མ་རེད་ཅེས་གསུངས་འདུག
ཁ་སང་ཕྱི་ཚེས་ ༡༠ ཉིན་གྱི་སྔ་དྲོར་བཞུགས་སྒར་རྒྱལ་བའི་ཕོ་བྲང་དུ། ༧གོང་ས་རྒྱལ་བ་རིན་པོ་ཆེ་མཆོག་ནས་བོད་མིའི་རང་དབང་སྒེར་ལངས་ཐེངས་ ༦༦ པའི་དུས་དྲན་གྱི་གཞུང་འབྲེལ་མཛད་སྒོའི་ཐོག་ཕེབས་པའི་སི་ལོ་ཝ་ཀི་ཡའི་སྲིད་འཛིན་ཟུར་པ་ཨན་ཌི་རེ་ཇི་ཀི་སི་ཀ་ (Andrej Kiska ) མཆོག་དང་།ཨེ་སི་ཊོ་ནི་ཡའི་གྲོས་ཚོགས་འཐུས་མི་སྐུ་ཞབས་ཇུ་ཀུ་ཀེ་ལེ་ད་རཱི་ཌི་ (Juku-Kalle Raid)མཆོག་གིས་སྣེ་འཁྲིད་པའི་ཡུལ་དེའི་གྲོས་ཚོགས་འཐུས་མི་སྐུ་ཚབ་ཚོགས་ཆུང་ལ་མཇལ་ཁ་སྩལ་ཡོད་འདུག
སྐབས་དེར་༧གོང་ས་རྒྱལ་བ་རིན་པོ་ཆེ་མཆོག་ནས་གསུམ་བཅུའི་དུས་དྲན་དང་འབྲེལ་ནས། སྐབས་དེར་ང་ཚོ་བོད་པ་རྣམས་དངོས་གནས་དྲང་གནས་འུ་ཐུག་སྟེ་སྐད་འབོད་བྱས་པ་རེད། ངོས་ཀྱིས་ཀྱང་སྐབས་དེར་བྱེད་ཁག་པོ་བྱུང་། ཐབས་ཤེས་གང་ཡང་མ་བྱུང་བར་བརྟེན་ནོར་བུ་གླིང་ཁ་ནས་འཐོན་རྒྱུ་ཐག་བཅད་པ་རེད། ནོར་བུ་གླིང་ཁ་ནས་ཚུར་ཅུང་ཙམ་འབྱོར་རྗེས་སེམས་ཏོག་ཙམ་སྐྱོ་བྱུང་། ལྷ་སའི་གཙང་བོ་ནས་ཆུའི་ཕར་ཕྱོགས་སུ་བརྒལ་དུས། ངོས་ཀྱི་རྟ་ཁྲིད་མཁན་ས་གནས་གྲོང་གསེབ་པ་དེས་ས་འདི་ནས་མ་གཏོགས་ལྷ་ས་གཟིགས་ཐུབ་ཀྱི་མེད་པས། ས་འདི་ནས་ལྷ་སར་ཞལ་གཟིགས་གནང་རོགས་ཟེར། དེ་ནས་ངོས་ཀྱིས་རྟ་ཁ་ལྷ་སའི་ཕྱོགས་སུ་བསྒྱུར་ཏེ་སྨོན་ལམ་བརྒྱབ་པ་ཡིན། ལྷ་སའི་གཙང་བོ་བརྒལ་སྟེ་ལྷོ་རྒྱུད་ཀྱི་རི་སྒང་དུ་སླེབས་སྐབས། རྒྱ་ནག་གཞུང་གི་བཙན་དབང་འོག་ནས་ཐར་སོང་བསམ་པའི་དགའ་སྣང་ཞིག་ཀྱང་བྱུང་། རྒྱ་ནག་གུང་ཁྲན་གྱིས་བོད་ནག་གསུབ་གཏོང་བའི་རེ་བ་བརྒྱབ་ཡོད་ཀྱང་ཁོ་ཚོས་ཐུབ་ཡོད་པ་མ་རེད། ཅེས་གསུངས་འདུག
དེ་བཞིན་དྷ་ས་ཐེག་ཆེན་ཆོས་གླིང་གཙུག་ལག་ཁང་གི་བོད་མིའི་རང་དབང་སྒེར་ལངས་གསུམ་བཅུའི་དུས་དྲན་ཐེངས་ ༦༦ པའི་གཞུང་འབྲེལ་མཛད་སྒོ་གྲུབ་རྗེས། གངས་སྐྱིད་ཕྱི་དྲིལ་ལྷག་པ་ཚེ་རིང་ཚོགས་ཁང་དུ། སི་ལོ་ཝ་ཀི་ཡའི་སྲིད་འཛིན་ཟུར་པ་ཨན་ཌི་རེ་ཇི་ཀི་སི་ཀ་མཆོག་དང་།ཨེ་སི་ཊོ་ནི་ཡའི་གྲོས་ཚོགས་འཐུས་མི་སྐུ་ཞབས་ཇུ་ཀུ་ཀེ་ལེ་ད་རཱི་ཌི་མཆོག་གཉིས་ཀྱིས་གསར་འགོད་ལྷན་ཚོགས་ཤིག་བསྐོངས་ཡོད་ཅིང་། སྐབས་དེར་སྐུ་ཞབས་ཇུ་ཀུ་ཀེ་ལེ་རེཌ་མཆོག་གིས། ཨེ་སི་ཊོ་ནི་ཡས་བོད་དོན་ཐོག་ལངས་ཕྱོགས་བརྟན་པོ་ཡོད་པ་ནན་བརྗོད་དང་། རྒྱལ་སྤྱིའི་སྤྱི་ཚོགས་ནས་རྒྱ་ནག་གཞུང་གི་འཁྱོག་བརྗོད་ལ་ཁ་གཏད་གཅོག་དགོས་པའི་འབོད་སྐུལ་ཞུས་པ་མ་ཟད། འཛམ་གླིང་རྒྱལ་ཁབ་ཁག་གིས་གྲོས་ཚོགས་ཀྱི་བོད་དོན་རྒྱབ་སྐྱོར་ཞུ་དགོས་པའི་སྐོར་དང། དེ་བཞིན་རྒྱ་གཞུང་གིས་རྒྱ་ནག་གཅིག་གི་སྲིད་ཇུས་ཀྱིས་འཛམ་གླིང་གི་མགོ་ཁྲིད་རྣམས་ལ་འཇིགས་སྐུལ་བྱེད་བཞིན་ཡོད་སྐོར་གསུངས་འདུག
སྐུ་ཞབས་ཨན་ཌི་རེ་ཇི་ཀི་སི་ཀ་མཆོག་གིས། ༸གོང་ས་རྒྱལ་བ་རིན་པོ་ཆེ་མཆོག་དང་ཁོང་སྒེར་གྱི་འབྲེལ་ལམ་སྐོར་དང་། ཁོང་གིས་བོད་དོན་ཐོག་ཡུན་རིང་རྒྱབ་སྐྱོར་གནང་བའི་སྐོར་འགྲེལ་བརྗོད་གནང་ཡོད་པ་མ་ཟད། ༸གོང་ས་རྒྱལ་བ་རིན་པོ་ཆེ་མཆོག་གི་བཀའ་སློབ་ཀྱིས་མགོན་པོ་གང་ཉིད་ཀྱི་མི་ཚེ་དང་། བོད་ཀྱི་ལོ་རྒྱུས། བོད་མིའི་ཡུན་རིང་འཐབ་རྩོད་ཐོག་གོ་རྟོགས་དང་ཤུགས་རྐྱེན་ཆེན་པོ་ཐེབས་ཡོད་པའི་སྐོར་གསུངས་འདུག
ཡང་ཁོང་གིས། ལོ་ངོ་ ༣༠ གོང་དུ་དཔེ་མཛོད་ཁང་ནས་༧གོང་ས་རྒྱལ་བ་རིན་པོ་མཆོག་གི་མཛད་པའི་ཕྱག་དེབ་ཅིག་བཀླགས་ཏེ་སེམས་འགུལ་ཧ་ཅང་ཐེབས་པ་དང་། རྗེས་སུ་སི་ལོ་ཝ་ཀི་ཡའི་སྲིད་འཛིན་གྱི་ལས་ཡུན་སྐབས་སུ་མི་མང་ལ་ཕན་ཐོགས་བྱུང་ཡོད། དེ་བཞིན་༧གོང་ས་མཆོག་སི་ལོ་ཝ་ཀི་ཡའི་རྒྱལ་ཁབ་ཏུ་གདན་འདྲེན་ཞུ་ཐུབ་པར་དགའ་ཚོར་བྱུང་བ་མ་ཟད། སྐབས་དེར་མགོན་པོ་གང་ཉིད་མཆོག་ནས་རང་ཉིད་ཀྱིས་ཡུལ་དེར་བཙུགས་པའི་བྱིས་པའི་དགེ་རྩ་ཚོགས་པར་ཞལ་འདེབས་གནང་བ་དེས་ཕྲུ་གུ་རྣམས་ལ་བཀའ་དྲིན་ཆེན་པོ་བྱུང་སྐོར་གསུངས་འདུག
དེ་བཞིན་ཁོང་གིས། རྒྱ་གཞུང་གིས་བོད་ནང་དྲག་གནོན་བྱེད་བཞིན་པའི་གནས་སྟངས་ལ་ངོ་རྒོལ་བྱེད་དགོས་པ་དང་། བོད་ནང་གི་བོད་མིའི་དཀའ་ངལ་འཛམ་གླིང་ཡོངས་སུ་དྲིལ་བསྒྲགས་ཤུགས་ཆེན་བྱེད་དགོས་པ་མ་ཟད། བོད་ཀྱི་བདེན་པའི་འཐབ་རྩོད་ལ་ངོས་འཛིན་གྱིས་རྒྱབ་སྐྱོར་ཤུགས་ཆེན་ཡོང་བའི་འབོད་སྐུལ་དང་། བོད་ཀྱི་རིག་གཞུང་སྲུང་སྐྱོབ་ཀྱི་ལས་དོན་ཐོག་དམིགས་བསལ་འབད་བརྩོན་བྱེད་དགོས་སྐོར་གསུངས་ཡོད་འདུག
གསར་འགོད་པ། བྱམས་པ་ཚེ་རིང་། རྩོམ་སྒྲིག་པ། པདྨ་མཚོ།
![China's Vice Minister of Foreign Affairs Sun Weidong in Tokyo, Japan in 2023 [File: Issei Kato/Pool via Reuters]](https://tibettimes.net/wp-content/uploads/2026/04/Screen-Shot-2026-04-15-at-2.32.14-PM-360x180.png)
