རྩོམ་ཁུངས། བོད་ཀྱི་དུས་བབ།
རྩོམ་པ་པོ། འཇམ་དབྱངས་སྦྱིན་པ།
ཨ་རིའི་རླུང་འཕྲིན་ཁང་དང་ཨེ་ཤེ་ཡ་རང་དབང་རླུང་འཕྲིན་ཁང་གི་བོད་སྐད་སྡེ་ཚན་གཉིས་ལ་ཕུལ་བ།
དེ་རིང་ཁ་སང་ཨ་རིའི་རོགས་སྐྱོར་མ་དངུལ་མཚམས་འཇོག་བྱས་པར་བརྟེན་ནས། ཨ་རིའི་རླུང་འཕྲིན་ཁང་(Voice of Americe) དང་ཨེ་ཤེ་ཡ་རང་དབང་རླུང་འཕྲིན་ཁང་(Radio Free Asia) གཉིས་ཀྱིས་ལས་དོན་གཉེར་མཚམས་མི་འཇོག་ཀ་མེད་འབྱུང་བཞིན་པའི་སྐོར་གྱི་གནས་ཚུལ་ཧ་ཅང་མི་སྙན་པ་ཞིག་ཁྱབ་ཀྱིན་འདུག ཨ་རི་གཞུང་གིས་འགྲོ་གྲོན་གཏོང་བཞིན་པའི་གསར་ཁང་དྲུག་ཡོད་པ་ཚང་མ་དཀའ་ངལ་ནང་ལྷུང་ཡོད་ཅིང་། གསར་ཁང་འདི་དག་ལ་འཛམ་གླིང་སྤྱི་དང་ལྷག་དོན་དམ་དྲག་ཆེ་བའི་ས་ཁུལ་དུ་ལྟ་ཉན་བྱེད་མཁན་ཧ་ཅང་མང་། དཔེར་ན། ཨ་རིའི་རླུང་འཕྲིན་ཁང་ལ་མི་གྲངས་ས་ཡ་ ༣༢༦ ཙམ་དང་། ཨེ་ཤེ་ཡ་རང་དབང་རླུང་འཕྲིན་ཁང་ལ་ས་ཡ་ ༦༠ ཙམ་ཡོད་པར་ཚོད་དཔག་བྱེད་ཀྱི་ཡོད། རང་རེ་བོད་མི་ཚོར་ཐད་ཀར་འབྲེལ་བ་ཡོད་པ་ནི་གསར་ཁང་འདི་གཉིས་རེད།
སྤྱིར་ན་འདུས་བྱས་སོ་ན་མི་གནས་པས་རྟག་པ་བརྟན་པ་མེད་མོད། གནས་ཚུལ་མི་སྙན་པ་དེ་རིགས་ཐོས་ཡོང་དུས་སེམས་ཁམས་མི་སྐྱིད་པའི་ཁར་རེ་དོགས་དང་འཆར་སྣང་མོད་པོ་ཞིག་ཀྱང་བྲང་གཞུང་ལ་འཚང་ཡོང་གི་འདུག ད་ནི་ངོ་མ་འཛམ་གླིང་འདིའི་སྟེང་གི་རང་དབང་དང་མང་གཙོའི་མགོན་སྐྱབས་གཅིག་པུ་ཨ་རི་སྟོབས་ཆེན་གཞུང་ཡང་རྒྱ་ནག་སོགས་སྒེར་གཅོད་གཞུང་རྣམས་དང་བྱ་སྤྱོད་ཀྱི་ཐོག་ནས་ལག་རྡང་སྦྲེལ་རྒྱུ་ཡིན་ནམ། ཡང་ན་ད་བར་ཨ་རི་གཞུང་གིས་རང་དབང་དང་མང་གཙོའི་སླད་གང་གནང་བ་ཐམས་ཅད་ནོར་འཁྲུལ་ཞིག་ཏུ་ངོས་འཛིན་བྱས་པ་ཡིན་ནམ།
སྒེར་གཅོད་གཞུང་རྣམས་ལ་མངའ་བའི་ཐུན་མོང་གི་ཁྱད་ཆོས་ནི་མི་རྣམས་རང་གིས་ས་ཐིག་བརྒྱབ་པའི་ཁོར་ཡུག་གང་དེའི་ནང་ཀླད་པ་བཀྲུས་ཏེ་མགོ་ཡོངས་སུ་འཐོམས་ནས་བཅུན་འདོད་པ་ལས། ཕྱི་ཡི་གཏམ་གསར་བ་དང་། ལྷག་དོན་དྲང་བདེན་གྱི་སྨྲ་ལྕེ་དང་རང་དབང་མང་གཙོའི་སྐོར་ནི་ནམ་ཡང་མཐོང་ཐོས་ཀྱི་ཡུལ་དུ་མི་འགྱུར་བར་འབད་བརྩོན་འཕར་མ་བསྟེན་གྱི་ཡོད། རྒྱུ་མཚན་དེའི་ཕྱིར་ན། ཁོང་ཚོས་རྟག་ཏུ་འཁོན་འཛིན་གྱི་མདུང་རྩེ་གསར་ཁང་འདི་རིགས་ལ་གཏད་ཡོད།
ལོ་སྔོན་མར་རྒྱ་གཞུང་གིས་བོད་མི་རིགས་རྩ་མེད་གཏོང་ཆེད་བོད་སྐད་ཡིག་ཆེད་སྦྱོང་གནང་སའི་སློབ་གླིང་ཡག་ཤོས་གངས་ལྗོངས་རྭ་རྒྱ་ཤེས་རིག་ནོར་བུའི་སློབ་གླིང་བཙན་གྱིས་སྒོ་བརྒྱབ་པ་དང་། ད་ལོར་ཨ་རི་གཞུང་གིས་བོད་ཀྱི་གསར་ཁང་གྲགས་ཅན་གཉིས་འདི་ལྟར་འཆི་ལམ་དུ་བརྫངས་པ་ནི་ཅི་འདྲའི་བློ་ཕམ་པ་ཞིག་རེད་ཨང་། གསར་ཁང་འདི་དག་གི་སྨྲ་བ་ཆད་ཚེ་སྒེར་གཅོད་པའི་མནར་གཅོད་འོག་ན་རང་དབང་མང་གཙོ་དང་བདེན་པའི་གཏམ་ལ་གཅིག་ཏུ་རྣ་བ་བླགས་པའི་སྐྱེ་བོ་ས་ཡ་མང་པོའི་ཡིད་ལ་མུན་པ་བབས་ཤིང་རེ་འདོད་ཆུ་ལ་སྐྱུགས་པ་རེད། རྒྱ་ནག་སོགས་སྒེར་གཅོད་པའི་གཞུང་དག་གིས་དུས་ད་ལྟ་ལ་ཐུག་གི་བར་དུ་རྒྱུ་སྟོབས་དང་དཔུང་སྟོབས་གང་གིས་ཀྱང་ཚར་གཅོད་མ་ནུས་པའི་རང་དབང་གི་མགྲིན་པ་དེ་དག་ཨ་རི་རང་ཉིད་ཀྱིས་དུམ་བུར་བཅད་པའང་རེད།
རང་དབང་དང་དྲང་བདེན་གྱི་སྨྲ་བརྗོད་ལ་རེ་ཞིང་དུང་བའི་བོད་མི་རྣམས་ལ་མཚོན་ན། གོང་གི་གསར་ཁང་འདི་གཉིས་ནི་རང་དབང་གི་ཟླ་བའི་ལྷ་མོའི་འཛུམ་ཞལ་མཐོང་སའི་མུན་ཁྲོད་ཀྱི་སྒེའུ་ཁུང་དེ་ཡིན། འདས་པའི་མི་ལོ་ཉི་ཤུ་སུམ་ཅུའི་རིང་གསར་ཁང་འདི་གཉིས་ཀྱིས་བོད་སྤྱི་པའི་རྩ་དོན་ཐད་བསུབ་ཏུ་མེད་པའི་མཛད་རྗེས་དང་ནུས་པ་གལ་ཆེན་ཐོན་ཡོད་པ་སུས་ཀྱང་བསྙོན་དུ་མེད། དེ་ནི་དུས་ཚོད་ཀྱིས་ཀྱང་ཁ་གྲག་ཡོང་བ་ཞིག་རེད། གསར་ཁང་འདི་གཉིས་ཀྱིས་བོད་ཕྱི་ནང་བར་ཟམ་པ་ལྟ་བུའི་གོ་གནས་གལ་ཆེན་བཟུང་སྟེ། ༸རྒྱལ་བའི་མཛད་འཕྲིན་དང་བོད་གཞུང་གི་ལས་དོན། བོད་དོན་འཐབ་རྩོད་དང་རང་དབང་མང་གཙོའི་གོ་རྟོགས་སོགས་བོད་ནང་དུ་གོ་ཐོས་མེད་པའི་གནས་ཚུལ་ཧ་ཅང་མང་པོ་མང་པོ་ཞིག་འབྲེལ་ལམ་གྱི་ཟམ་པ་འདི་བརྒྱུད་ནས་བོད་ནང་དུ་བསྐྱལ་ཡོད་ལ། རྒྱ་གཞུང་གི་བཙན་གནོན་དང་གདུག་རྩུབ་ཆེ་བའི་སྲིད་ཇུས། གཞིས་བཞུགས་སྤུན་ཟླའི་སྙིང་སྟོབས་དང་མཛད་རྗེས། ལྷག་དོན་མི་རིགས་འདི་དང་བདེན་དོན་འདིའི་ཆེད་དུ་ཡོད་ཚད་བློས་བཏང་གནང་སྟེ་དམར་པོ་མེ་ལ་ཞུགས་པའི་དཔའ་བོ་དཔའ་མོ་རྣམས་ཀྱི་རུས་རྐང་གི་འབོད་པ་སོགས་ནི་དུས་ནས་དུས་སུ་ཟམ་སྟེགས་འདི་བརྒྱུད་དེ་བཙན་བྱོལ་དུ་འབྱོར་ཡོད། རྐྱེན་དེ་དག་གི་ཕྱིར་ན། ངེད་ཅག་གསར་དུ་བཙན་བྱོལ་ལ་འབྱོར་སྐབས་དེ་དུས་ཀྱི་བཀའ་ཁྲི་མཁས་དབང་་ཟམ་གདོང་རིན་པོ་ཆེ་མཆོག་ལའང་། རང་གི་ཉམས་མྱོང་དང་དངོས་ཡོད་གནས་ཚུལ་གཞི་ལ་བཞག་སྟེ་གསར་ཁང་འདི་གཉིས་ནི་བོད་ཕྱི་ནང་བར་གྱི་ཟམ་པ་ལྟ་བུ་ཡིན་པས་ཧ་ཅང་ཕན་ཐོགས་ཆེ་ཚུལ་དང་། སླད་ཕྱིན་གཟིགས་སྐྱོང་དང་རྒྱབ་སྐྱོར་གང་ལེགས་གནང་གལ་ཆེ་བའི་རེ་སྐུལ་ཡང་ཞུས་པ་ཡིན།
བར་སྐབས་ཤིག་ལ་བོད་ནང་དུ་རང་ཉིད་ཀྱི་ཁོར་ཡུག་དང་དེའི་ཉེ་འཁོར་དག་ཏུ་ཧ་ལམ་ཉིན་རེའི་ཁ་འདོན་ཞིག་གི་ཚུལ་དུ་ཆད་མེད་ཆག་མེད་ཀྱིས་ཉན་ས་ནི་ཨེ་ཤེ་ཡ་རང་དབང་རླུང་འཕྲིན་ཁང་ཡིན་ལ། བདུན་ཕྲག་རེ་རེ་བཞིན་རེ་སྒུག་དང་དགའ་སྣང་གིས་འཁྲེང་ས་ནི་ཨ་རིའི་རླུང་འཕྲིན་ཁང་ཡིན། དུས་ཚོད་ཀྱིས་དྲིལ་བརྡ་བཏང་བ་ན་འཁོར་སྐར་གྱི་བརྡ་རྟགས་འཚོལ་བྱེད་ཀྱི་ལྕགས་ལེབ་སྒོར་མོ་དེ་ཁུ་སིམ་མེར་ཁ་བསྒྱུར་བྱེད་དགོས། ཉམས་མྱོང་གིས་དབེན་པ་ཞིག་ཡིན་ན་དེ་ནི་དགུན་གྱི་གྲང་ངར་ཁྲོད་རང་གི་ལག་པ་འཁོབ་བྱེད་ཀྱི་ལས་ཀ་དཀའ་མོ་ཞིག་ཀྱང་ཡིན། དེ་དུས་བརྙན་འཕྲིན་ལ་ཅེར་བའི་མི་ཚོས་གསར་འགྱུར་གྱི་བརྗོད་ཚིག་དང་ནང་དོན་ཇི་བཞིན་གོ་མིན་ལ་མ་ལྟོས་པར། གངས་ཅན་ཞིང་གི་མགོན་པོ་༸རྒྱལ་བ་བསྟན་འཛིན་རྒྱ་མཚོ་ཁོང་ཅི་ཙམ་མཇལ་ཡང་ཚིམ་སྣང་མེད་པར། ད་དུང་ནམ་འཆར་ལ་རེ་སྒུག་བྱེད་པ་ནི་ཐུན་མོང་གི་དགའ་ཕྱོགས་དང་མངོན་འདོད་གཙོ་བོ་དེ་ཡིན་ཞེས་བཤད་ཆོག
བརྒྱུད་ལམ་འདི་གཉིས་ནི་རང་ཉིད་སྒེར་ལ་མཚོན་ན་ནར་སོན་གྱི་ལོ་ཟླ་རིང་མོའི་ཁྲོད་བག་ཆགས་ཟབ་ཤོས་དང་ཤུགས་རྐྱེན་ཆེ་ཤོས་ཀྱི་གསར་ཁང་གཉིས་ཀྱང་ཡིན། ཕྱིའི་གསར་འགྱུར་ལ་ལྐོག་ནས་ལྟ་ཉན་བྱེད་པ་ནི་རྒྱ་གཞུང་ཆེས་མི་དགའ་ས་ཞིག་ཡིན་སྟབས། འཁོར་སྐར་ལས་བརྡ་རྟགས་འཚོལ་བྱེད་ཀྱི་ཡོ་ཆས་རིགས་ཉོ་ཚོང་བྱེད་པར་དམ་དྲག་བྱེད་ཀྱི་ཡོད། འཕྲུལ་ཆས་དེ་རིགས་མ་དར་བའི་ཡར་སྔོན་དུ་ང་ཚོས་རླུང་འཕྲིན་འཕྲུལ་ཆས་རྐྱང་བ་ལ་བརྟེན་ནས་ཉན་དགོས་ཀྱང་། རེ་འདོད་བཞིན་ཉན་ཐུབ་རྒྱུ་ནི་ཧ་ཅང་ཁག་པོ་ཡིན། རྒྱུ་མཚན་རྒྱ་གཞུང་གིས་དེ་ལ་གནོད་པ་གཏོང་ཆེད་རྐང་བཙུགས་ནས་རྒྱའི་གཉེན་སྟོན་སྐབས་ཀྱི་སྒྲ་ཟིང་ཆེ་བ་དེ་འདྲ་མཉམ་སྦྱར་གྱིས་གཏོང་ཞིང་། དེ་ནི་མི་ཚང་མ་སྙིང་ལངས་ས་ཞིག་ཆགས་ཡོད།
དེ་ལྟར་གསལ་ལ་མི་གསལ་བའི་གསར་འགྱུར་དེ་རིགས་ལ་གསང་བའི་སྒོ་ནས་ཡུན་རིང་ཉན་པས་༸རྒྱལ་བའི་རླབས་ཆེན་གྱི་མཛད་འཕྲིན་དང་། བོད་མིའི་རང་དབང་འཐབ་རྩོད་ཀྱིས་མཚོན་པའི་གནས་ཚུལ་ངོ་མཚར་བ་དག་གིས་མི་སེམས་ཀྱི་སྒོ་གླེགས་བརྡུངས་ཡོད་པ་ནི་བརྗོད་ག་ལ་དགོས། གསར་ཁང་གི་མི་རྣམས་ནི་རང་དང་འགྲོགས་འདྲིས་ཟབ་པའི་གྲོགས་པོ་ཞིག་དང་འདྲ་བར་སྐད་མགོ་ཐོས་པ་ཙམ་གྱིས་སུ་ཡིན་ངོ་ཐག་ཆོད་ཅིང་། སེམས་སུ་དགའ་དུང་གི་ཚོར་བ་ཞིག་ཀྱང་མངོན་ཡོང་གི་ཡོད།
རང་ཉིད་ཀྱིས་བོད་སྤྱི་པའི་རྩ་དོན་སླད་ལས་ཀ་ཞིག་བྱ་རྒྱུ་བྱུང་བའང་གསར་ཁང་འདི་གཉིས་དང་ཁ་འབྲལ་ཐབས་གཏན་ནས་མེད། ཕྱི་ལོ་ ༢༠༠༧ ལོའི་ཟླ་ ༡༠ ཚེས་ ༡༧ ཉིན་གྱི་དགོང་མོ་དེར་གསེར་གྱི་རྟགས་མའི་མཛད་སྒོར་ཆེད་དུ་དགའ་སྟོན་ཞུ་སླད། རྒྱ་མིས་དམ་དྲག་ཡོད་མེད་ལ་མ་ལྟོས་པར་ང་ཚོས་ཤོག་སྦག་འདོད་པ་ཁེངས་པ་ཞིག་བགད་ཅིང་། འཛིན་གྲོགས་ཚང་མ་ལྷན་འཛོམས་ཀྱིས་གསེར་གྱི་རྟགས་མའི་ཐད་གཏོང་མཛད་སྒོར་མཉམ་དུ་མཇལ། གསེར་གྱི་རྟགས་མའི་མཛད་སྒོ་དམིགས་བསལ་བ་དེ་ནི་ལེ་དབར་ཁྲི་སྟོང་གི་ཕ་རོལ་ནས་རང་སྐད་ཐོག་ཐད་གཏོང་བྱེད་བཞིན་པ་མཇལ་རྒྱུ་བྱུང་བར་ང་ཚོར་སྤོབས་པ་དང་དགའ་སྤྲོ་ཆེན་པོ་སྐྱེས། དབུས་སྐད་མི་གོ་བའི་ང་ཚོར་མཚོན་ན་སྐབས་དེར་གསར་འགྱུར་བཤད་མཁན་རྡོ་རྗེ་ཚེ་བརྟན་ལགས་ཡིན་པ་ཤེས་པས་ལྷག་ཏུ་སྤྲོ་བ་འཕེལ། དེ་དུས་བརྙན་འཕྲིན་ལམ་གྱི་༸རྒྱལ་བའི་འཛུམ་ཞལ་དྭངས་མོ་དང་གསར་འགྱུར་གྱི་ཚིག་འབྲི་རེ་རེས་མི་སེམས་ལ་འགོག་ཏུ་མེད་པའི་སྤྲོ་སྣང་སྦྱིན་པ་ནི་བརྗོད་ཡུལ་ལས་འདས་པ་ཞིག་གོ།།
ཕྱི་ལོ་ ༢༠༠༨ ཟླ་ ༤ ཚེས་ ༨ ཉིན་དངོས་སུ་ཨེ་ཤེ་ཡ་རང་དབང་རླུང་འཕྲིན་ཁང་བརྒྱུད་རྒྱལ་སྤྱིའི་གསར་འགོད་སྡེ་ཚན་ཞིག་རྒྱ་གཞུང་གི་སྟངས་འཛིན་འོག་ང་ཚོའི་ཕ་ཡུལ་ཕྱོགས་ལ་ཡོང་གི་ཡོད་པ་དངོས་སུ་གོ་ཐོས་བྱུང་། དེར་བརྟེན། དེའི་ཕྱི་ཉིན་རང་ལ་རྒྱལ་སྤྱིའི་གསར་འགོད་པའི་མདུན་ནས་ངེད་ཅག་ལ་སྐད་འབོད་སྣེ་ཁྲིད་བྱེད་པའི་གོ་སྐབས་དམིགས་བསལ་བ་དེ་ལྡན་པར་གྱུར། མ་ཟད་ཆུ་ཚོད་རེ་ཟུང་གི་རྗེས་ནས་“དེ་རིང་རྒྱལ་སྤྱིའི་གསར་འགོད་པའི་མདུན་ནས་བོད་ཀྱི་རྒྱལ་དར་ཆེན་པོ་ཞིག་འཕྱར་ཏེ་རྒྱ་གཞུང་ལ་ངོ་རྒོལ་བྱས་”ཞེས་སོགས་བོད་སྐད་གཙང་མའི་གསར་འགྱུར་དེ་ཕྱི་ཕྱོགས་ནས་བསྒྲགས་པ་དངོས་སུ་གོ་ཐོས་བྱུང་བས་སེམས་ལ་དགའ་བ་དང་སྤོབས་པ་འགྲན་པ་ལྟར་སྐྱེས་པའང་དྲན་གྱི་འདུག ས་བྱིའི་ཞི་རྒོལ་ལོར་གསར་འགོད་པ་རྣམ་པས་རང་གི་ནུས་ཤུགས་ཡོད་ཚད་གཅིག་ཏུ་བསྒྲིལ་ཏེ། ཞོགས་དགོང་གཉིས་ཀར་འབད་བརྩོན་ལྷོད་མེད་ཀྱིས་ལས་ཀར་འཐམ་ཞིང་གསར་འགྱུར་བཤད་རྒྱུ་མང་དྲགས་པས་སྐད་ཀྱང་འགག་ནས་ཡོད།
ཤེས་འཇོན་གཉིས་ལྡན་གྱི་རང་རེའི་གསར་འགོད་པ་རྣམས་ཀྱིས་བྱ་བ་གཞན་ཡང་གཉེར་ཆོག་མོད། མི་ཁའི་རླུང་འཚུབ་ནང་ཀྲོག་ངེར་འགྲེང་སྟེ་བློ་སྟོབས་ཆེན་པོས་ལས་རིགས་འདིར་ཕྱག་གིས་འཇུས་པ་ནི། ཉམ་ང་བའི་མི་རིགས་ཤིག་གི་ལས་དབང་ལ་སེམས་པ་བརླན་སྟངས་དང་ལ་རྒྱ་འཛིན་སྟངས་ཞིག་ཡིན་ཙ་ན། ཡི་གེ་དག་སྡེབ་ཙམ་ཡང་མི་འཁྱོངས་པའི་ཤེས་མེད་ཅོལ་ཆུང་དྲ་འཁྱམས་པ་ཚོར་རོ་ཐོག་རྟ་རྒྱུགས་ལྟ་བུའི་སྐད་ཆ་འདྲ་མིན་བཤད་པའི་ཐོབ་ཐང་གང་ཡང་མེད། ང་རང་གྲོགས་པོ་དང་ལྷན་དུ་ཐོག་མར་རྡ་ས་ནས་ས་རཱ་མཐོ་སློབ་ཏུ་འབྱོར་སྐབས་གསར་འགྱུར་ལ་ལྟ་ཉན་བྱེད་པའི་ཁོར་ཡུག་མེད་པས་ཅི་ཞིག་མ་ཚང་བའི་ཚོར་སྣང་སྐྱེས་མྱོང་། ཕྱིས་སུ་ང་རང་སློབ་མའི་ཤེས་ཡོན་ཚོགས་ཆུང་གི་ཚོགས་གཙོ་ཡིན་པའི་སྐབས་སུ། ངེད་ཚོགས་པས་སློབ་མ་ཚོར་ངེད་ཅག་འཛམ་གླིང་སྤྱི་དང་བྱེ་བྲག་བོད་ཀྱི་ལོ་རྒྱུས་གནས་བབ་ལ་སློབ་སྦྱོང་བྱེད་མཁན་ཞིག་དང་། ལྷག་དོན་བོད་དོན་འཐབ་རྩོད་པ་ཞིག་ཡིན་པའི་ངོས་ནས་ཨ་རིའི་རླུང་འཕྲིན་ཁང་གི་བདུན་རེའི་གསར་འགྱུར་དེ་ངེས་པར་མཁོ་གལ་ཆེ་བའི་སྐོར་གླེང་སློང་མང་ཙམ་བྱས་པ་བརྒྱུད། མཐར་ཡིག་ཚང་གིས་ཀྱང་བརྙན་འཕྲིན་དང་ཁང་བ་ཟུར་དུ་གོ་སྒྲིག་གིས་མཐུན་རྐྱེན་ཆ་ཚང་སྦྱོར་གནང་མཛད་ཅིང་། དེ་ནས་བཟུང་གཟའ་ལྷག་པ་ནམ་ཡིན་ལ་ང་ཚོར་གླེང་མི་ཚར་བའི་གཞིས་བཞུགས་སྤུན་ཟླའི་སྙིང་སྟོབས་དང་གསར་ལམ་གྱི་གཏམ་རྒྱུད་མང་དུ་ཡོད།
གསར་འགྱུར་ལས་རིགས་ལ་མང་གཙོའི་ཀ་བ་བཞི་བར་འབོད་ཅིང་མང་གཙོའི་སྤྱི་ཚོགས་ཁྲོད་ཧ་ཅང་གཙིགས་ཆེན་པོ་བྱེད། རང་རེའི་བོད་ལ་མཚོན་ནའང་གསར་ཁང་གྲགས་ཅན་འདི་གཉིས་མེད་བརླགས་སོང་ཚེ་དེའི་གྱོང་གུད་ནི་བོད་གཞིས་བྱེས་གཉིས་ཀར་བསུབ་ཏུ་མེད་པ་ཞིག་རེད། ད་ལན་གྱི་དཀའ་ངལ་འདི་ནི་གསར་ཁང་དེ་དག་གི་ལས་མི་ཚོའི་ལས་ཀའི་ཐོབ་ཤོར་གྱི་གནད་དོན་ཞིག་མ་ཡིན་པར། དེ་ནི་སྒེར་གཅོད་ཀྱི་བྲན་འོག་ན་རང་དབང་ལ་རེ་ཞིང་སྙེག་པའི་མི་རྣམས་ལ་རང་དབང་གི་གོ་རྟོགས་དང་བདེན་པའི་གནས་ལུགས། ད་དུང་མང་གཙོའི་ཁྱད་ཆོས་དང་སྒེར་གཅོད་པའི་སྐྱོན་འཚང་སྒྲོག་པའི་སྨྲ་བའི་འབབ་སྟེགས་ཆེན་པོ་ཞིག་འགག་པ་དང་། སྒེར་གཅོད་པའི་མངོན་འདོད་དང་དུ་བླངས་ཏེ་མང་གཙོ་ལ་མཐོང་ཆུང་ཁྱད་གསོད་བྱས་པའི་རྣམ་པ་མངོན་གསལ་ཞིག་ཀྱང་ཆགས་ཀྱི་ཡོད་པ་རེད།།
མཐར་དོན། བོད་གཞིས་བྱེས་དབར་གྱི་ཟམ་པ་ལྟ་བུའི་གསར་ཁང་གྲགས་ཅན་འདི་གཉིས་གང་མགྱོགས་སླར་གསོ་ཡོང་བའི་རེ་བ་དང་སྨོན་ལམ་འདེབས། ཉེ་སྔོན་ཨ་རིས་རོགས་དངུལ་བཅད་པ་དང་གསར་ཁང་སྒོ་བརྒྱབ་པ་སོགས་མདུན་རྒྱབ་ཀྱི་དཀའ་ངལ་མི་ཉུང་བ་ཞིག་རུ་འཛིངས་ཡོད་ཀྱང་། ང་ཚོ་ནི་གྱེལ་ས་ནས་ལངས་ཐུབ་པའི་དཔའ་བོའི་མི་རིགས་དེ་ཡིན་ཕྱིར། ད་ནི་ཅིས་ཀྱང་མཐུན་སྒྲིལ་གྱི་ལག་རྡང་གཅིག་ཏུ་སྦྲེལ་ཏེ་སྤྱི་དོན་ཆེད་རང་ནུས་གང་ཡོད་འདོན་པའི་དུས་ལ་བབ་འདུག་ཅེས་ཀྱང་སྨྲ་བར་ཐལ་ལོ།། །།
རྩོམ་ཡིག་འདི་ནི་བོད་ཀྱི་གསར་ཁང་གྲགས་ཅན་ཨ་རིའི་རླུང་འཕྲིན་ཁང་དང་ཨེ་ཤེ་ཡ་རང་དབང་རླུང་འཕྲིན་ཁང་གི་བོད་སྐད་སྡེ་ཚན་གཉིས་ཀྱི་ལས་མི་ཡོངས་ལ་བཀའ་དྲིན་རྗེས་དྲན་ཙམ་མཚོན་སླད། བཙན་བྱོལ་བ་འཇམ་དབྱངས་སྦྱིན་པས་རྒྱ་གར་ལྷོ་ཕྱོགས་ནས་ཕུལ།
ཕྱི་ལོ་༢༠༢༥ ཟླ་ ༣ ཚེས་ ༡༩ ཉིན་སྤེལ།
