དེ་རིང་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དགུ་བའི་ལས་ཉིན་དྲུག་པའི་ཐོག་ཏུ་བཅའ་ཁྲིམས་བསྐྱར་བཅོས་ཀྱི་ཁྲིམས་འཆར་གྲངས་ ༡༤ འདུག
དེ་རིང་སྐབས་ ༡༧ པའི་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དགུ་པའི་ལས་ཉིན་དྲུག་པའི་སྟེང་བཀའ་སྤྱི་གཉིས་ནས་བསྐྱར་བཅོས་ཁྲིམས་འཆར་ཐོག ལས་བྱེད་འདེམས་བསྐོ་ལྷན་ཁང་གི་སྒྲིག་གཞི། ཡིག་ཆ་ཨང་ ༢༡ པ། བཙན་བྱོལ་བོད་མིའི་གཞུང་དངུལ་འདུ་འགོད་དང་། ལོ་འཁོར་སྔོན་རྩིས། དངུལ་རྩིས་སྟངས་འཛིན་བཅས་ཀྱི་སྒྲིག་གཞི། ཡིག་ཆ་ཨང་ ༢༢ པ། བཙན་བྱོལ་བོད་མིའི་གཞིས་ཆགས་ཁག་གི་ས་ཁང་བདག་འཛིན་དང་བེད་སྤྱོད་བྱེད་ཕྱོགས་ཀྱི་སྒྲིག་གཞི། ཡིག་ཆ་ཨང་ ༢༣ པ། བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ་འཕོ་འགྱུར་དང་འབྲེལ་བའི་སྒྲིག་གཞི་བསྐྱར་བཅོས་ཁྲིམས་འཆར་ཐོག་བསྐྱར་ཞིབ་ཆེད་འཛུགས་ཚོགས་ཆུང་གི་ལས་བསྡོམས་དང་ཁྲིམས་སྒྲིག་བསྐྱར་བཅོས། ཡིག་ཆ་ཨང་ ༢༤ ཀ་པ། བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་འདུའི་འགྲོ་ལུགས་དང་། ལས་དོན་བྱེད་ཕྱོགས་ཀྱི་སྒྲིག་གཞི་བསྐྱར་བཅོས་ཁྲིམས་འཆར། ཡིག་ཆ་ཨང་ ༢༤ ཁ་པ། བཙན་བྱོལ་བོད་མིའི་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བ་དང་། ཁྲིམས་ཞིབ་པ་གཞན་གཉིས་བཅས་ཀྱི་ཕོགས་ཐོབ་དང་། ཟུར་ཕོགས། ལས་ཐོན་ཕོགས། ཐོབ་ཐང་གཞན་དག་བཅས་ཀྱི་སྒྲིག་གཞི། ཡིག་ཆ་ཨང་ ༢༥ པ། བོད་མི་མང་སྦྱི་འཐུས་རྒྱུན་ལས་ཚོགས་ཆུང་གི་སྒྲིག་གཞི། ཡིག་ཆ་ཨང་ ༢༦ པ། བོད་མི་མང་སྤྱི་འཐུས་རྣམས་ཀྱི་མཚན་མཐོང་དོད། ཉིན་རེའི་ལས་དོད། ཐོབ་ཐང་གཞན་དག་བཅས་ཀྱི་སྒྲིག་གཞི། ཡིག་ཆ་ཨང་ ༢༧ པ། བོད་མིའི་སྒྲིག་འཛུགས་ཀྱི་སྲིད་སྐྱོང་དང་བཀའ་བློན་རྣམ་བའི་ཕོགས་ཐོབ་དང་། ཟུར་ཕོགས། ཐོབ་ཐང་གཞན་དག་བཅས་ཀྱི་སྒྲིག་གཞི། ཡིག་ཆ་ཨང་ ༢༨ བ། དབུས་འོས་བསྡུ་ལས་ཁང་གི་སྦྱི་ཁྱབ་འགན་འཛིན་གྱི་ཕོགས་དང་། ཟུར་ཕོགས། ལས་ཐོན་ཕོགས་ཐོབ། ཐོབ་ཐང་གཞན་དག་བཅས་ཀྱི་སྒྲིག་གཞི། ཡིག་ཆ་ཨང་ ༢༩ པ། འདེམས་བསྐོ་ལྷན་ཁང་གི་ཚོགས་གཙོའི་ཕོགས་དང་། ཟུར་ཕོགས། ལས་ཐོན་ཕོགས་ ཐོབ། ཐོབ་ཐང་གཞན་དག་བཅས་ཀྱི་སྒྲིག་གཞི། ཡིག་ཆ་ཨང་ ༣༠ པ། བཙན་བྱོལ་བོད་མིའི་སྤྱི་ཁྱབ་རྩིས་ཞིབ་ལས་ཁང་གི་རྩིས་ཞིབ་སྤྱི་ཁྱབ་པའི་ཕོགས་དང་། ཟུར་ཕོགས། ལས་ཐོན་ཕོགས་ཐོབ། ཐོབ་ཐང་གཞན་དག་བཅས་ཀྱི་སྒྲིག་གཞི། ཡིག་ཆ་ཨང་ ༣༡ པ། བཙན་བྱོལ་བོད་མིའི་ཁྲིམས་ཞིབ་ཁང་གི་སྦྱི་མང་གཏུག་བཤེར་འགྲོ་ལུགས་རྩ་འཛིན་ཁྲིམས་ཡིག་གི་ཁྲིམས་འཆར། ཡིག་ཆ་ཨང་ ༣༢ པ། བཙན་བྱོལ་བོད་མིའི་ཁྲིམས་ཞིབ་ཁང་གི་དབང་རྟགས་རྩ་འཛིན་ཁྲིམས་ཡིག་གི་ཁྲིམས། ཡིག་ཆ་ཨང་ ༣༣ པ། བཙན་བྱོལ་བོད་མིའི་ཁྲིམས་ཞིབ་ཁང་གི་ཁྲིམས་ལུགས་དབང་འཛིན་གྱི་རྩ་འཛིན་ཁྲིམས་ཡིག་གི་ཁྲིམས་འཆར། ཡིག་ཆ་ཨང་ ༣༤ བཅས་བཅའ་ཁྲིམས་བསྐྱར་བཅོས་ཀྱི་ཁྲིམས་འཆར་ ༡༤ འདུག་ལ། དེ་རིང་གི་ལས་ཉིན་ཧྲིལ་པོར་ཁྲིམས་འཆར་ ༡༡ ཐོག་བརྗོད་པ་དང་པོའི་ངོས་ནས་གླེང་མོལ་གྲུབ་ཟིན་སོང་།
ཡིག་ཆ་ཨང་ ༢༢ པའི་སྐོར་ལ་དཔལ་འབྱོར་བཀའ་བློན་གཅིག་ལྕོགས་སྲིད་སྐྱོང་སྤེན་པ་ཚེ་རིང་མཆོག་གིས། བོད་མིའི་སྒྲིག་འཛུགས་ཀྱི་ནང་དུ་བར་ཆད་སོགས་འདྲ་མིན་ཡོང་མི་སྲིད་པ་མ་རེད། མ་འོངས་བའི་ཆེད་ད་ལྟ་ནས་སྔོན་འགོག་བྱ་དགོས་པ་གལ་ཆེན་པོ་རེད། ད་ལྟའི་བོད་མིའི་སྒྲིག་འཛུགས་ཀྱི་སྔོན་རྩིས་ནང་དུ་སྔོན་རྩིས་གང་ཡིན་ཡང་གྲོས་ཚོགས་ནས་བཀའ་འཁྲོལ་ཞུ་དགོས་པ་དང་། གྲོས་ཚོགས་ནས་བཀའ་འཁྲོལ་མ་ཐོབ་ཚེ་འགྲོ་སོང་གཏོང་མི་ཆོག་པ་གསལ་བོ་འཁོད་ཡོད། དེ་བཞིན་འཛིན་སྐྱོང་གི་སྒྲིག་གཞི་འགྲོ་དགོས་པ་རེད། ང་ཚོའི་དུས་ཡུན་རིང་དེ་འདྲའི་ཡོང་མདོག་མེད་ཀྱང་། མ་འོངས་བར་དུས་ཚོད་ངེས་མེད་དུ་ཡོང་མི་སྲིད་པ་མིན་པ་སོང་ཙང་། ད་ལྟ་ནས་འཛིན་སྐྱོང་གི་ངོས་ནས་དཀའ་ངལ་གང་དག་འཕྲད་སྲིད་པ་དང་། བོད་མིའི་སྒྲིག་འཛུགས་མུ་མཐུད་གནས་ཐུབ་པར་ཤུགས་རྒྱག་དགོས། གྲོས་ཚོགས་ནི་ཆབ་སྲིད་ཀྱི་སྡིངས་ཆ་ཡིན་པས་བློ་མི་མཐུན་པ་ཡོང་སྲིད་ཀྱང་། དེས་ཁྱད་པར་གང་ཡང་བཟོ་ཡི་མ་རེད། ང་ཚོ་འཐབ་རྩོད་བྱེད་མཁན་གྱི་མི་རིགས་ཤིག་ཡིན་པའི་ཆ་ནས། འཛིན་སྐྱོང་གི་སྡེ་ཚན་དེ་དག་རྒྱ་གར་གཞུང་ལ་དེབ་བསྐྱལ་བྱས་ཡོད་པ་བཞིན། ལག་བསྟར་མུ་མཐུད་དུ་འགྲོ་མ་ཐུབ་ཚེ། རང་བཙན་ཡོད་པའི་རྒྱལ་ཁབ་ནང་གྲོས་ཚོགས་ནས་དངུལ་གྱི་བཀའ་འཁྲོལ་མེད་ན་གཞུང་སྒོ་རྒྱག་དགོས་པ་ཡོང་གི་ཡོད། རང་བཙན་ཡོད་པའི་རྒྱལ་ཁབ་ནང་ཡང་བསྐྱར་སྒོ་ཕྱེ་བའི་ལམ་ཁ་ཆ་ཚང་ཡོད། གཞུང་སྒོ་བརྒྱབ་པ་བརྒྱ་ཆ་བརྒྱ་རྒྱག་གི་མེད། ཚན་པ་ཁག་ཅིག་ལ་དངུལ་གྱི་འགྲོ་སོང་མུ་མཐུད་དུ་གཏོང་རྒྱུ་ཡོད། གལ་སྲིད་ང་ཚོའི་བཙན་བྱོལ་གྱི་གནས་བབ་ལ་འཛིན་སྐྱོང་གི་དཀའ་ངལ་ཞིག་འཕྲད་དེ། འཛིན་སྐྱོང་གི་ལས་ཀ་བྱ་མི་ཐུབ་པ་དང་། ད་ལྟའི་སྒྲིག་གཞི་གཞིར་བཟུང་གྲོས་ཚོགས་ནས་དཀའ་ངལ་འཕྲད་དེ་འགྲོ་མ་ཐུབ་ཚེ། དེ་དུས་གཞུང་སྒོ་རྒྱག་དགོས་པའི་གནས་སྟངས་བྱུང་བར་ང་ཚོའི་སྒྲིག་འཛུགས་བསྐྱར་གསོ་བྱ་ཐུབ་མཁན་གཅིག་ཀྱང་མེད། སྒྲིག་འཛུགས་གཞན་པར་དམངས་གཙོ་ཀ་བ་གསུམ་དང་། དེའི་སྒང་ལ་སྲིད་འཛིན་སོགས་ཀྱི་ཐེ་ཇུས་བྱེད་མཁན་ཡོད། ང་ཚོ་རྒྱལ་ཁབ་ཀྱི་དབུ་ཁྲིད་མེད་པའི་དམངས་གཙོའི་སྒྲིག་འཛུགས་ཤིག་ཆགས་ཡོད། དམངས་གཙོ་ཀ་བ་གསུམ་གྱི་དབང་ཆ་ཆ་བགོས་བྱས་ཏེ་སྤྱི་སྙོམས་སྟངས་འཛིན་བྱེད་པའི་འགྲོ་སྟངས་རེད། གང་ལྟར་བོད་མིའི་སྒྲིག་འཛུགས་ཀྱི་བཀའ་འཁྲོལ་ཐད་འཛིན་སྐྱོང་ཐོག་དཀའ་ངལ་འཕྲད་པ་དང་། གྲོས་ཚོགས་ཐོག་དཀའ་ངལ་འཕྲད་དེ་སྒོ་བརྒྱབ་ཚེ་ཚང་མ་སྒོ་རྒྱག་དགོས་ཁེལ་རྒྱུ་རེད། རྒྱ་གར་གཞུང་ལ་དེབ་བསྐྱལ་བྱས་པའི་སྒྲིག་འཛུགས་ཚང་མ་སྒོ་རྒྱག་ཁེལ་རྒྱུ་རེད། སྒྲིག་འཛུགས་ཀྱིས་དེབ་བསྐྱལ་བྱས་པའི་ཡིག་ཆ་ཐམས་ཅད་ཤོར་བ་ཡིན་ན། ཡང་བསྐྱར་བསྐྱར་གསོ་བྱ་དགོས་ན་ཧ་ཅང་ཁག་པོ་ཆགས་པ་རེད། སྒོ་བརྒྱབ་ནས་ནང་ཁུལ་དུ་འོས་བསྡུ་བྱ་དགོས་ན་དངུལ་སྤྲོད་མཁན་གང་ཡང་མེད། སྒོ་བརྒྱབ་ཟེར་བའང་སློབ་གྲྭ་སོགས་འཛིན་སྐྱོང་འོག་གི་ལས་ཀ་ཡོངས་རྫོགས་སྒོ་རྒྱག་དགོས་པ་རེད། དེ་ནི་ང་ཚོར་མི་དགོས་པ་ཞིག་ཡིན་པས། ད་ལྟ་ནས་སྔོན་འགོག་གི་ཐབས་ལམ་བཀའ་ཤག་གི་དུས་ཡུན་རིང་པོར་བསམ་བློ་གཏང་ནས་ད་ལན་བསྐྱར་བཅོས་འཁྱེར་ཡོད། འདི་འདྲའི་ལམ་ཁར་འགྲོ་ཆེད་འཆར་འགོད་བྱ་དགོས་རེད། བཀའ་ཤག་ལ་བར་བརྒལ་བཀའ་ཤག་མེད་ཚེ་དཀའ་ངལ་འཕྲད་རྒྱུ་རེད། བཀའ་ཤག་གིས་རྒྱབ་གཉེར་བྱས་ཏེ་གྲོས་ཚོགས་སུ་འགྲོོ་དགོས། བར་བརྒལ་བཀའ་ཤག་གནད་དོན་གང་གི་ཐད་ནས་ཀྱང་ཡོང་སྲིད་པ་རེད། འཛིན་སྐྱོང་གི་ངོས་ནས་གྲོས་ཚོགས་ཡོད་ཀྱང་དངུལ་འཛིན་བཀའ་འཁྲོལ་གནང་མི་ཐུབ་པ་དང། གྲོས་ཚོགས་མེད་པའི་རྒྱུ་རྐྱེན་ཅི་རིགས་ཀྱི་གནས་སྟངས་བྱུང་བ། སྲིད་སྐྱོང་དུས་ཐོག་ཏུ་ཡོང་མ་ཐུབ་པའི་གནས་སྟངས་འོག་ལམ་ཁའི་ཐོག་བསྐྱར་བཅོས་འཆར་འབུལ་བྱེད་བཞིན་ཡོད། སྤྱི་འཐུས་རྣམས་ཀྱིས་བཀའ་ཤག་གི་བསམ་ཚུལ་སྒྲིག་གཞི་ལ་ཚོགས་ཆུང་གི་ཐོག་ནས་གཟིགས་ཞིབ་གནང་དགོས་ཀྱང་། མ་འོངས་བོད་པའི་འཐབ་རྩོད་མུ་མཐུད་དུ་གནས་ཆེད་གལ་ཆེན་པོ་ཡིན། ཞེས་གསུངས་སོང་།
གསར་འགོད་པ། བསྟན་འཛིན་ཕུར་བུ། བྱམས་པ་ཚེ་རིང་། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
