མ་འོངས་སྔོན་འགོག་གི་ཁྲིམས་འཆར་དེ་ཞིབ་འཇུག་ཚོགས་ཆུང་ལ་གཏོང་གཏན་ཁེལ་སོང་།

བཀའ་ཤག་གིས་བསྣམས་པའི་བསྐྱར་བཅོས་ཁྲིམས་འཆར་ཨང་ ༢༢ པ་སྟེ། མ་འོངས་པར་བཀའ་ཤག་གམ་སྤྱི་འཐུས་རྒྱུན་ལས། ཡང་ན་བཀའ་སྤྱི་གཉིས་ཀ་མེད་སྐབས། བོད་མིའི་སྒྲིག་འཛུགས་ཀྱི་སྔོན་རྩིས་བཀའ་འཁྲོལ་རྒྱུན་མཐུད་དེ་སྒྲིག་འཛུགས་ཀྱི་ལས་དོན་ལ་འགག་རྐྱེན་མི་འཕྲད་ཐབས་ཀྱི་ཁྲིམས་འཆར་དེ། མང་མོས་འོས་བསྡུའི་ལམ་ནས་བཀའ་སྤྱི་གཉིས་ཀྱི་ཞིབ་འཇུག་ཚོགས་ཆུང་ཞིག་ལ་གཏོང་དགོས་པའི་ཐག་གཅོད་བྱུང་སོང་།

དེ་རིང་སྐབས་ ༡༧ པའི་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དགུ་པའི་ལས་ཉིན་བཅུ་གཅིག་པའི་སྟེང་། གཞུང་འབྲེལ་སྒྲིག་གཞི་བསྐྱར་བཅོས་ཁྲིམས་འཆར་གྱི་ཡིག་ཆ་ཨང་ ༢༢ པ་བཙན་བྱོལ་བོད་མིའི་གཞུང་དངུལ་འདུ་འགོད་དང་། ལོ་འཁོར་སྔོན་རྩིས། དངུལ་རྩིས་སྟངས་འཛིན་བཅས་ཀྱི་སྒྲིག་གཞི་བསྐྱར་བཅོས་ཐོག་བགྲོ་གླེང་གནང་སྐབས། སྤྱི་འཐུས་ཁག་ཅིག་གིས་བཀའ་ཤག་མེད་པ་དང་། བཀའ་སྤྱི་གཉིས་ཀ་མེད་པའི་གནས་སྟངས་མེད་པ་དང་ཚོགས་དྲུང་ག་དུས་ཡིན་ཡང་ཡོད་པ་གཞིར་བཞག་སོགས་ཀྱི་གནས་སྟངས་ལ་དོགས་འདྲི་དང་འབྲེལ་ནས་རྣམ་རྟོག་སློང་བྱེད་ཅིག་ཡིན་སྐོར་གསུངས་ཤིང་། ཡང་སྲིད་སྐྱོང་གཙོས་སྤྱི་འཐུས་གཞན་ཁག་ཅིག་གིས་དམངས་གཙོའི་ལམ་ལུགས་ནང་ཕུགས་རྒྱང་རིང་བའི་ཁྲིམས་དང་སྒྲིག་གཞི་ཡག་པོ་བཟོ་གལ་ཆེ་ཞིང་། ད་ལྟ་ནས་མ་འོངས་པར་འཕྲད་སྲིད་པའི་དཀའ་ངལ་གྱི་རིགས་ལ་སྔོན་འགོག་གི་ཚུལ་དུ་གཏན་འབེབས་མ་བྱུང་ན། བཀའ་སྤྱི་གཉིས་ཀྱི་འཐུས་མི་ལྡན་པའི་ཚོགས་ཆུང་ཞིག་བསྐོ་འཛུགས་བྱས་ཏེ་ཞིབ་འཇུག་ཚགས་ཚུད་ཡོང་ཐབས་གནང་དགོས་པའི་དགོངས་འཆར་བཏོན་པ་ལྟར། གྲོས་ཚོགས་ནང་མང་མོས་འོས་བསྡུ་བྱེད་སྐབས་སྤྱི་འཐུས་ ༡༧ གྱིས་དགག་པ་གནང་ཞིང་། སྤྱི་འཐུས་ ༢༢ ཀྱིས་རྒྱབ་སྐྱོར་གནང་བས། ཡིག་ཆ་ཨང་ ༢༢ པ་དེ་ཚོགས་ཆུང་ལ་གཏོང་དགོས་པའི་ཁྲིམས་འཆར་ལ་མང་མོས་རྒྱབ་སྐྱོར་ཐོབ་སོང་།

དེ་བཞིན། ལས་བྱེད་འདེམས་བསྐོ་ལྷན་ཁང་གི་སྒྲིག་གཞི་བསྐྱར་བཅོས་ཀྱི་ཁྲིམས་འཆར་བརྒྱད་ལ་བརྗོད་པ་གཉིས་པའི་ཐོག་ནས་གཏན་འབེབས་གནང་བའི་ཁྲོད། ལས་བྱེད་འདེམས་ལྷན་གྱི་སྒྲིག་གཞི་བཅོ་ལྔ་པའི་ནང་གསེས་བཞི་པ། ལས་བྱེད་སུའང་གནས་རིམ་གོང་མར་རྒྱུགས་འཕྲོད་བཀོད་སྒྲིག་བྱུང་བསྟུན་སྔོན་གྱི་ཞབས་ཡུན་ཇི་ཡོད་ཞབས་ལོའི་ཁོངས་སུ་བརྩི་རྒྱུ་ཡང་། ཞབས་ཡུན་སྔ་མའི་སྡེབ་གསོག་གུང་གསེང་རྩིས་ཁུར་མི་ཆོག་ཅིང༌། ཟླ་དྲུག་ཚོད་ལྟ་ངེས་པར་བརྒྱུད་དགོས། གནས་རིམ་གོང་མའི་ཟླ་དྲུག་ཚོད་ལྟའམ་ཕར་འགྱངས་ནས་གནས་རིམ་སྔ་མར་ཕྱིར་ལོག་བྱུང་ཚེ། གནས་རིམ་སྔ་མའི་གྲལ་མཚམས་དེ་སྔ་གང་ཡིན་དེར་འཇོག་དགོས། ཞེས་པའི་བསྐྱར་བཅོས་ཁྲིམས་འཆར་ལ་གསུམ་ཆ་གཉིས་ཀྱི་རྒྱབ་སྐྱོར་མ་ཐོབ་སྟབས་ཟགས་སོང་།

ཡིག་ཆ་ཨང་ ༢༢ པའི་བསྐྱར་བཅོས་ཚིག་བརྗོད་ནང་། དོན་ཚན་ལྔ་པ། ཕྱོགས་བསྡོམས་མ་དངུལ། ༣ ཕྱོགས་བསྡོམས་མ་དངུལ་ནས་གཏོང་དགོས་ཀྱི་འགྲོ་གྲོན་གང་ཡང་འཕྲལ་སེལ་སྔོན་རྩིས་ (Interim Budget) དམིགས་བསལ་ཕུད། སྤྱི་འཐུས་ལྷན་ཚོགས་ཀྱིས་གཏན་འབེབས་ལོ་རེའི་གཏོང་ལེན་ཁྲིམས་ཡིག་ (Appropriation Act) གམ། ཚོད་དཔག་འཆར་རྩིས་ལ་འོས་ཤོག་བསྡུས་པའི་ (Vote on Account) ཐོག་ནས་བཀའ་འཁྲོལ་མ་ཐོབ་པ་ཞིག་འགྲོ་སོང་སྔོན་བཏང་བཀའ་འཁྲོལ་རྗེས་ཞུའི་རྩིས་འགྲོ་ནམ་ཡང་གཏོང་མི་ཆོག

དོན་ཚན་དྲུག་པ། ངེས་མེད་དགོས་དངུལ། ༡ གློ་བུར་ངེས་མེད་གཞུང་གྲོན་གཏོང་དགོས་རིགས་ཀྱི་ཆེད་སྤོམ་ཚོད་དངུལ་འབབ་མང་མཐའ་ལོ་འཁོར་སྔོན་རྩིས་ཀྱི་ཚོད་དཔག་འགྲོ་གྲོན་སྤྱི་བསྡོམས་ཀྱི་བརྒྱ་ཆ་བཅུ་བཞི་ལས་མ་བརྒལ་བ་ཞིག་ངེས་མེད་དགོས་དངུལ་ཞེས་པའི་རྩིས་འགོའི་འོག་ལོ་འཁོར་སྔོན་རྩིས་སུ་བཀའ་ཤག་གི་རྩིས་ཁོངས་སུ་འཇོག་རྒྱུ་དང་། དགོས་གལ་ནམ་བྱུང་ལ་བཀའ་ཤག་ལྷན་རྒྱས་རྩ་འབོར་གསུམ་ཆ་གཉིས་ཡན་གྱིས་མོས་མཐུན་ཆོག་མཆན་དང་། དགོས་དངུལ་སྤྲོད་འཐུས། (གློ་བུར་ངེས་མེད་ཅེས་པ་ལོ་འཁོར་སྔོན་རྩིས་འགོད་སྐབས་གཏོང་དགོས་ཚོད་དཔག་མེད་པར་གློ་བུར་དགོས་ངེས་ཀྱི་གཏོང་དགོས་གསར་བྱུང་གྲས་ལ་གོ་དགོས།) བཀའ་ཤག་མེད་སྐབས། སྤྱི་འཐུས་རྒྱུན་ལས་ལྷན་ཚོགས་ནས་བཀའ་འཁྲོལ་དང༌། བཀའ་སྤྱི་གཉིས་ཀ་མེད་སྐབས། བཀའ་དྲུང་གི་གཙོ་སྐྱོང་འོག དམིགས་བསལ་སྡེ་ཚན་ཁག་གི་ལས་ཁུངས་དང་། བཀའ་བློན་ལས་ཁུངས་ཁག་གི་དྲུང་ཆེ་ལྷན་ཚོགས་ཀྱི་རྩ་འབོར་གསུམ་ཆ་གཉིས་ཡན་ནས་གྲོས་ཆོད་བཞག་སྟེ་དགོས་དངུལ་བཀའ་འཁྲོལ་སྤྲོད་ཆོག

༣ ལས་བྱེད་གསར་བསྐོ་དང་། གནས་སྤར། གནས་སྤོ། ཆོད་གན། བར་བརྒལ་བཀོད་སྒྲིག་བཅས་བར་མའི་དུས་ཡུན་གྱི་གླ་ཕོགས་ཆེད་བཀའ་དྲུང་ཡིག་ཚང་གི་རྩིས་ཁོངས་སུ་སྤོམ་དངུལ་གྱི་རྩིས་འགོའི་འོག་དངུལ་འབོར་རན་འཚམས་ཤིག་འཇོག་འཐུས་དང་། དགོས་གལ་ནམ་བྱུང་སྐབས་བཀའ་ཤག་ནས་འདོན་སྤྲོད་བཀའ་འཁྲོལ་ཞུ་དགོས། བཀའ་ཤག་མེད་སྐབས། སྤྱི་འཐུས་ཚོགས་གཙོ་སྦྲེལ་པོར་བཀའ་འཁྲོལ་དང༌། བཀའ་སྤྱི་གཉིས་ཀ་མེད་སྐབས། བཀའ་དྲུང་གི་གཙོ་སྐྱོང་འོག །དམིགས་བསལ་སྡེ་ཚན་ཁག་གི་ལས་ཁུངས་དང༌། བཀའ་བློན་ལས་ཁུངས་ཁག་གི་དྲུང་ཆེ་ལྷན་ཚོགས་ཀྱི་རྩ་འབོར་གསུམ་ཆ་གཉིས་ཡན་ནས་གྲོས་ཆོད་བཞག་སྟེ་དགོས་དངུལ་འདོན་སྤྲོད་བྱེད་ཆོག

དོན་ཚན་བདུན་པ། ལོ་འཁོར་སྔོན་རྩིས། ༡ ལས་ཁུངས་སོ་སོའི་ཁྱབ་ཁོངས་སུ་ཡོད་པའི་གཤམ་འོག་ལས་ཁུངས་དང་། སྨན་ཁང་། སློབ་གྲྭ། འཛིན་སྐྱོང་དབང་བྱུས་འོག་ཡོད་པའི་རང་སྐྱོང་སྡེ་ཚན། འགྲོ་གྲོན་ཆ་ཚང་གཞུང་ནས་གཏོང་དགོས་ཀྱི་རང་སྐྱོང་སྒྲིག་འཛུགས་ཁག་བཅས་ནས་འཆར་ལོའི་ལོ་འཁོར་སྔོན་རྩིས་གཏན་འབེབས་རེའུ་མིག་ཏུ་བཀོད་པ་ལས་ཁུངས་སོ་སོའི་གཏོང་ལེན་འགན་འཛིན་གྱི་མིང་རྟགས་བཀོད་པ་དང་རང་སྐྱོང་སྒྲིག་འཛུགས་ཡིན་ན་སྒྲིག་འཛུགས་སོ་སོའི་འཛིན་སྐྱོང་ལྷན་ཚོགས་ཀྱིས་གཏན་འབེབས་བྱས་པ་བཅས། ལོ་ལྟར་ཕྱི་ཟླ་ ༡༡ ཚེས་ ༣༠ འགྱངས་མེད་དབུས་ལས་ཁུངས་སམ། སྡེ་ཚན་སོ་སོར་ཕུལ་ཟིན་པ་དགོས། གོང་གསལ་དུས་བཀག་ནང་ཕུལ་མ་ཐུབ་པའི་གནས་ཚུལ་བྱུང་ཚེ་རྒྱུ་མཚན་དང་སྦྲགས་འབྲེལ་ཡོད་ལས་ཁུངས་སམ་སྡེ་ཚན་ནས་དུས་འགྱངས་ཞུ་དགོས། དགོས་དངུལ་དབུས་ནས་གཏོང་མ་དགོས་པ་ཡིན་ཚེ་ལོ་རེའི་སྔོན་རྩིས་ས་གནས་འཐུས་མིའི་ཚོགས་འདུ་སོ་སོ་ནས་དུས་ཚོད་རྒྱས་བཅད་ནང་ཞུ་དགོས། ས་འཐུས་མེད་རིགས་དབུས་ནས་ཞུ་དགོས།

༡༠ ཟུར་བཀོལ་རྩིས་གྲོན་གྱི་རྩིས་འགོ་བཀའ་འཁྲོལ་ཐོབ་པ་གང་ཞིག་རོགས་དངུལ་བཀག་བསྐྱིལ་ལམ་ཆད་པ་བྱུང་ཚེ། སྤྱི་འཐུས་རྒྱུན་ལས་ལྷན་ཚོགས་སུ་ལས་ཁུངས་སོ་སོའི་རང་བདག་མ་དངུལ་ལམ་སྔོན་རྩིས་མ་དངུལ་ནས་གཏོང་འཐུས་ ཆོག་པའི་བར་བརྒལ་བཀའ་འཁྲོལ་ཞུ་ཆོག

 ༡༡ བཀའ་ཤག་མེད་སྐབས། གསང་བའི་འགྲོ་གྲོན་ཁག་ལ་རང་དབང་ལྡན་པའི་སྡེ་ཚན་ཁག་གི་ངོ་ཡོད་འགན་འཛིན་ཚོགས་གཙོ་རྣམ་པས་ཡིག་ཐོག་ཆོག་མཆན་འགོད་དགོས་པ་ཕུད། འཕྲོས་བཀའ་དྲུང་གིས་གཙོ་སྐྱོང་བྱས་པའི་དྲུང་ཆེ་ ལྷན་ཚོགས་ཀྱི་རྩ་འབོར་གསུམ་ཆ་གཉིས་ཡན་ནས་རྒྱབ་གཉེར་བྱེད་ཆོག་པ་དང་། བཀའ་འཁྲོལ་ཞུ་ཡུལ་སྤྱི་འཐུས་རྒྱུན་ལས་མེད་སྐབས། རང་དབང་ལྡན་པའི་སྡེ་ཚན་ཁག་གི་ངོ་ཡོད་འགན་འཛིན་ཚོགས་གཙོ་རྣམ་པས་མང་མོས་སམ་སྤྱི་མོས་ཐོག་བར་བརྒལ་གྱིས་མཚོན་པའི་བཀའ་འཁྲོལ་ཞུ་སྒོ་ཁག་ཆོག་མཆན་སྤྲོད་འཐུས།

 བརྒྱད་པ་ཀ འཕྲལ་སེལ་སྔོན་རྩིས། (Interim Budget)

 ༡ འཕྲལ་སེལ་སྔོན་རྩིས་ནི་ལོ་འཁོར་སྔོན་རྩིས་རྒྱབ་གཉེར་བྱེད་མཁན་བཀའ་ཤག་དང༌། བཀའ་འཁྲོལ་སྤྲོད་མཁན་གྲོས་ཚོགས་མེད་པའམ། ཡང་ན་གཏོང་ལེན་ཁྲིམས་ཡིག་གཏན་འབེབས་མ་ཐུབ་པའི་གནས་སྐབས་སུ། ཆབ་སྲིད་དང་འཛིན་སྐྱོང་། སྤྱི་ཚོགས་བདེ་དོན་བཅས་པའི་སྒྲིག་འཛུགས་ཀྱི་ལས་ཁུངས་དང༌། ལས་འཆར་གྱི་འབབ་གྲོན་རྣམས་འཁོར་རྒྱུགས་ཐུབ་པར་དམིགས་པ་ཞིག་ཡིན་ཞིང་། འཕྲལ་སེལ་སྔོན་རྩིས་ཀྱི་དུས་ཡུན་ནི་གྲོས་ཚོགས་སུ་བསྐྱར་བཅོས་གཏོང་ལེན་ཁྲིམས་ཡིག་ གཏན་འབེབས་བྱེད་ཐུབ་པའི་བར་ཡིན།

༢ སྔོན་རྩིས་རྒྱབ་གཉེར་བྱེད་མཁན་བཀའ་ཤག་མེད་པའི་སྐབས་སུ། ལས་ཁུངས་སོ་སོའི་ལོ་འཁོར་སྔོན་རྩིས་འཆར་འབུལ་ལ་དཔལ་འབྱོར་ལས་ཁུངས་ནས་དཔྱད་ཞིབ་ཀྱིས་དམིགས་བསལ་སྡེ་ཚན་ཁག་གི་ལས་ཁུངས་དང༌། བཀའ་བློན་ལས་ཁུངས་ཁག་གི་དྲུང་ཆེ་ལྷན་ཚོགས་ནས་རྒྱབ་གཉེར་དང་སྦྲགས་བཀའ་དྲུང་ཡིག་ཚང་བརྒྱུད་ཚོགས་དྲུང་ལས་ཁུངས་སུ་འཕྲལ་སེལ་སྔོན་རྩིས་འཆར་འབུལ་ཞུས་པར། སྤྱི་འཐུས་ཚོགས་གཙོ་སྦྲེལ་པོས་སྔོན་རྩིས་ཚོད་དཔག་འཆར་རྩིས་ཚོགས་ཆུང་ལ་འགན་བསྐུར་གནང་སྟེ། དེས་སྤྱི་འཐུས་ལྷན་ཚོགས་སུ་འཕྲལ་སེལ་སྔོན་རྩིས་ངོ་སྤྲོད་གཏམ་བཤད་དང་། ལན་འདེབས་གསལ་བཤད་ཀྱི་འགན་ཁུར་ལེན་རྒྱུ།

༣ གནས་སྟངས་ཅི་རིགས་དབང་གིས་གྲོས་ཚོགས་ཚོགས་མ་ཐུབ་པའམ། འཆར་ལོའི་ལོ་འཁོར་སྔོན་རྩིས་གཏོང་ལེན་ཁྲིམས་ཡིག་གཏན་འབེབས་མ་ཐུབ་པའི་གནས་ཚུལ་བྱུང་སྐབས། སྤྱི་འཐུས་རྒྱུན་ལས་ལྷན་ཚོགས་ནས་འཕྲལ་སེལ་སྔོན་རྩིས་བཀའ་འཁྲོལ་ཞུ་ཆོག དེའང་མེད་ཚེ། བཀའ་ཤག་གིས་འཕྲལ་སེལ་སྔོན་རྩིས་བཀའ་འཁྲོལ་སྤྲོད་ཆོག

 ༤ སྤྱི་འཐུས་ལྷན་ཚོགས་དང་། བཀའ་ཤག་གཉིས་ཀ་ལས་ཁུར་འཛིན་མ་ཐུབ་པའི་གནས་སྟངས་བྱུང་སྐབས། དོན་ཚན་འདིའི་ནང་གསེས་ ༢ ལྟར་དྲུང་ཆེ་ལྷན་ཚོགས་ནས་རྒྱབ་གཉེར་དང་སྦྲགས་བཀའ་དྲུང་ཡིག་ཚང་བརྒྱུད་ཚོགས་དྲུང་ལས་ཁུངས་སུ་འཕྲལ་སེལ་སྔོན་རྩིས་འཆར་འབུལ་ཞུས་པར། རང་དབང་ལྡན་པའི་སྡེ་ཚན་ཁག་གི་ངོ་ཡོད་འགན་འཛིན་ཚོགས་གཙོ་རྣམ་པས་མང་མོས་སམ་སྤྱི་མོས་ཐོག་འཕྲལ་སེལ་སྔོན་རྩིས་བཀའ་འཁྲོལ་སྤྲོད་ཆོག་པ་དང་། བཀའ་དྲུང་ཡིག་ཚང་བརྒྱུད་བཀའ་འཁྲོལ་བཀོད་ཁྱབ་ཁུངས་གཏོང་བྱ་རྒྱུ།

 ༥ སྲིད་སྐྱོང་མེད་པའི་གནས་སྐབས་སུ། གཏོང་ལེན་ཁྲིམས་ཡིག་ལ་སྤྱི་འཐུས་ཚོགས་གཙོས་ཆོག་མཆན་བསྩལ་ཏེ། བཀའ་དྲུང་ཡིག་ཚང་བརྒྱུད་བཀའ་འཁྲོལ་བཀོད་ཁྱབ་ཁུངས་གཏོང་བྱ་རྒྱུ།

 དོན་ཚན་དགུ་པ། ཁ་བསྒྱུར།  ༣ སྤྱི་འཐུས་རྒྱུན་ལས་སུ་ཞུ་ཡུལ་མེད་སྐབས་བཀའ་ཤག་ནས་བཀའ་འཁྲོལ་སྤྲོད་ཆོག་པ་དང༌། བཀའ་ཤག་མེད་སྐབས། སྤྱི་འཐུས་ཚོགས་གཙོར་རྒྱབ་གཉེར་ཞུས་ཏེ་སྤྱི་འཐུས་རྒྱུན་ལས་ནས་བཀའ་འཁྲོལ་ཞུ་དགོས་ལ། བཀའ་སྤྱི་གཉིས་ཀ་མེད་སྐབས། དྲུང་ཆེ་ལྷན་ཚོགས་ཀྱི་རྒྱབ་གཉེར་ལ་རང་དབང་ལྡན་པའི་སྡེ་ཚན་ཁག་གི་ངོ་ཡོད་འགན་འཛིན་ཚོགས་གཙོ་རྣམ་པས་མང་མོས་སམ་སྤྱི་མོས་ཐོག་ཁ་བསྒྱུར་བཀའ་འཁྲོལ་སྤྲོད་ཆོག

 དོན་ཚན་བཅུ་པ། དངུལ་རྩིས་ལོ་མཚམས། ༢ རྩིས་ཞིབ་སྒྲིག་གཞི་གཞིར་བཟུང་རྩིས་སྒོ་བརྒྱབས་པ་ནས་དུས་ཡུན་ངེས་ཅན་ནང་ལས་ཁུངས་སོ་སོའི་རྩིས་ཁྲ་རྩིས་ཞིབ་ལས་ཁང་ལ་འབུལ་དགོས་པ་དང་། རྩིས་ཞིབ་ལས་ཁང་ནས་རྩིས་ཞིབ་གནང་སྟེ་སྙན་ཤོག་རྩིས་སྒོ་བརྒྱབས་པ་ནས་ཟླ་དགུའི་ནང་ཚུན་ཚོགས་དྲུང་ལས་ཁུངས་སུ་ཕུལ་ཟིན་པ་དགོས། རྩིས་ཞིབ་ལས་ཁང་གི་རྩིས་ཁྲར་རྩིས་ཞིབ་བྱེད་པོ་རྩིས་ཞིབ་ཚོགས་ཆུང་རེ་ལོ་ལྟར་སྤྱི་འཐུས་རྒྱུན་ལས་ཀྱིས་བསྐོ་གཞག་གནང་རྒྱུ་དང་། དེས་རྩིས་ཞིབ་ཀྱི་གཏོང་ཡོང་ཡོངས་རྫོགས་ཀྱི་རྩིས་ཁྲར་རྩིས་ཞིབ་བགྱིས་ཏེ་དག་མཆན་འཁོད་པའི་སྙན་ཤོག་གོང་བཞིན་ཟླ་དགུའི་ནང་ཚུན་ཚོགས་དྲུང་ལས་ཁུངས་སུ་ཕུལ་ཟིན་པ་དགོས། སྤྱི་འཐུས་རྒྱུན་ལས་མེད་སྐབས། བཀའ་ཤག་གིས་རྩིས་ཞིབ་ཚོགས་ཆུང་བསྐོ་གཞག་བྱ་རྒྱུ།

 དོན་ཚན་བཅུ་གཅིག་པ། གཏོང་ལེན་དང་། རྩིས་ཀྱི་འགན་དབང་། ༢ ལས་ཁུངས་སོ་སོའི་དྲུང་ཆེ་དང་། འགན་འཛིན། དེ་དག་གི་ལས་རོགས། ཡང་ན་ལས་བྱེད་གཞན་དག་བཅས་ལ་སྐབས་བསྟུན་དངུལ་འབོར་གྲངས་བཅད་ཀྱི་དཔལ་འབྱོར་དབང་ཚད་དུས་ནས་དུས་སུ་སྤྲོད་རྒྱུ་དང་གཏོང་ལེན་འགན་འཛིན་དུ་བསྐོ་གཞག་བྱ་རྒྱུ་བཅས་བཀའ་ཤག་གིས་འཛིན་སྐྱོང་བཀོད་ཁྱབ་བརྒྱུད་བྱ་རྒྱུ། བཀའ་ཤག་མེད་སྐབས། དོན་ཚན་བརྒྱད་པ་ཀ་ ༥ ནང་གསལ་ལྟར་སྤྱི་འཐུས་ཚོགས་གཙོས་དང༌། བཀའ་སྤྱི་གཉིས་ཀ་མེད་སྐབས། དོན་ཚན་བརྒྱད་པ་ཀ་ ༤ ནང་གསལ་ལྟར་རང་དབང་ལྡན་པའི་སྡེ་ཚན་ཁག་གི་ངོ་ཡོད་འགན་འཛིན་ཚོགས་གཙོ་རྣམ་པས་བཀའ་དྲུང་ཡིག་ཚང་བརྒྱུད་བཀའ་འཁྲོལ་བཀོད་ཁྱབ་ཁུངས་གཏོང་བྱ་རྒྱུ།

 དོན་ཚན་བཅུ་གཉིས་པ། དངུལ་ཁང་རྩིས་སྒོ། ༢ བཀའ་ཤག་གི་བཀའ་འཁྲོལ་དང་འབྲེལ་དཔལ་འབྱོར་བཀའ་བློན་དང་། བཀའ་བློན་གཞན་སུ་རུང་གཅིག་བཅས་བཀའ་བློན་གཉིས་ཀྱི་མིང་རྟགས་མ་བཀོད་པར་གོང་གསལ་དངུལ་འབོར་ནས་འདོན་གཏོང་མི་ཆོག བཀའ་ཤག་མེད་སྐབས། དོན་ཚན་བརྒྱད་པ་ཀ་ ༥ ནང་གསལ་ལྟར་སྤྱི་འཐུས་ཚོགས་གཙོ་དང༌། བཀའ་སྤྱི་གཉིས་ཀ་མེད་སྐབས། དོན་ཚན་བརྒྱད་པ་ཀ་ ༤ ནང་གསལ་ལྟར་རང་དབང་ལྡན་པའི་སྡེ་ཚན་ཁག་གི་ངོ་ཡོད་འགན་འཛིན་ཚོགས་གཙོ་རྣམ་པར་ཆོག་མཆན་མིང་རྟགས་ཞུས་ཏེ་འདོན་གཏོང་བྱེད་དགོས།  ཞེས་གསལ་འདུག

གསར་འགོད་པ། བྱམས་པ་ཚེ་རིང་། བསྟན་འཛིན་ཕུར་བུ། རྩོམ་སྒྲིག་བྱེད་མཁན། སྐལ་བཟང་སྦྱིན་པ།