ཕྱི་ལོ་ ༡༩༥༩ ལོར་༧གོང་ས་རྒྱལ་བ་རིན་པོ་ཆེ་མཆོག་ནས་ཐོག་མར་ཞབས་ཀྱིས་བཅགས་པའི་ལོ་རྒྱུས་རང་བཞིན་ལྡན་པའི་འཕགས་བོད་མཐའ་མཚམས་ཀྱི་སྐས་འཛེགས་མཎི་སོགས་སུ་ཉིན་གྲངས་ ༦ རིང་རྗེས་དྲན་གོམས་བགྲོད་གནང་བཞིན་འདུག
ཕྱི་ཟླ་ ༣ ཚེས་ ༣༡ ཉིན་རྒྱ་གར་བྱང་ཤར་མོན་རྟ་དབང་གི་འཕགས་བོད་མཐའ་མཚམས་ཀྱི་སྐས་འཛེགས་མཎི་ནས་མགོ་བཙུགས་ཏེ་༧གོང་ས་མཆོག་བཙན་བྱོལ་དུ་ཕེབས་པའི་ས་གནས་ཁག་ཏུ་རྗེས་དྲན་གོམ་བགྲོད་གནང་བཞིན་པ། འབྲེལ་ཡོད་ཀྱི་པར།
ཟླ་འདིའི་ཕྱི་ཚེས་ ༣༡ ཉིན་རྒྱ་གར་བྱང་ཤར་མོན་རྟ་དབང་གི་འཕགས་བོད་མཐའ་མཚམས་ཀྱི་སྐས་འཛེགས་མཎི་རུ་རྟ་དབང་རྫོང་དཔོན་ལས་ཁུངས་དང་། ཨ་རུ་ཎ་ཅལ་ཆོས་རིག་ལས་ཁུངས། རླུང་ལ་རྫོང་གི་སྤྱི་འཐུས་བཅས་ཀྱི་གོ་སྒྲིག་འོག ༧གོང་ས་༧རྒྱལ་བ་རིན་པོ་ཆེ་མཆོག་གི་ལོ་རྒྱུས་ཀྱི་ཞབས་རྗེས་ཞེས་པའི་བརྗོད་གཞིའི་ཐོག ཕྱི་ལོ་༡༩༥༩ ཟླ་ ༣ ཚེས་ ༣༡ ཉིན་༧གོང་ས་༧རྒྱལ་བ་རིན་པོ་ཆེ་མཆོག་གིས་སྐས་འཛེགས་མཎིར་ཐོག་མར་ཞབས་ཀྱིས་བཅགས་པའི་ལོ་རྒྱུས་རྗེས་དྲན་གྱི་མཛད་སྒོ་ཞིག་འཚོགས་ཡོད་པ་དང་སྦྲགས། ཉིན་གྲངས་དྲུག་རིང་ལོ་རྒྱུས་རང་བཞིན་ལྡན་པའི་ས་གནས་ཁག་ཏུ་རྗེས་དྲན་གོམ་བགྲོད་གནང་བཞིན་ཡོད་འདུག་ལ། དབུ་འབྱེད་ཀྱི་མཛད་སྒོའི་ཐོག་ཨ་རུ་ཎ་ཅལ་མངའ་སྡེའི་ཆོས་རིག་ལས་ཁུངས་ཀྱི་དབུ་འཛིན་འཇམ་དཔལ་དབང་འདུས་ལགས་དང་། རླུང་ལའི་སྤྱི་འཐུས་ཚེ་རིང་ལྷ་མོ་ལགས། འབུམ་སྡེ་ལའི་ས་གནས་མགོ་འཛིན་བསྟན་འཛིན་དར་རྒྱས་ལགས་བཅས་ཀྱི་གཙོས། ཁུལ་དེའི་ཡུལ་མི་དང་བོད་མི་ ༢༠༠ ལྷག་ཅིག་འཛོམས་ཡོད་འདུག
གནས་ཚུལ་དེའི་ཐད་རྟ་དབང་བློ་གསར་མིག་འབྱེད་སློབ་གྲྭའི་བོད་ཡིག་དགེ་རྒན་བསྟན་དར་ལགས་ཀྱིས་འདི་གའི་གསར་འགོད་པར། ཕྱི་ལོ་༡༩༥༩ ལོའི་ཟླ་ ༣ ཚེས་ ༣༡ ཉིན་གྱི་ཉིན་གུང་ཆུ་ཚོད་གཉིས་པ་ཡས་མས་ཤིག་ལ། ༧གོང་ས་རྒྱལ་བ་རིན་པོ་ཆེ་མཆོག་འཕགས་བོད་མཐའ་མཚམས་ཀྱི་ཉེ་ཁུལ་སྐས་འཛེགས་མཎིར་ཐོག་མར་ཕེབས་ཡོད་སྟབས། ད་ལན་༧མགོན་པོ་གང་ཉིད་ཀྱི་ལོ་རྒྱུས་རང་བཞིན་ལྡན་པའི་དུས་ཚོད་རྗེས་དྲན་སླད་མཛད་སྒོ་དང་། ཉིན་གྲངས་དྲུག་རིང་༧གོང་ས་མཆོག་ནས་ཞབས་ཀྱིས་བཅགས་ཏེ་ཞག་བཞུགས་མཛད་སའི་ས་གནས་ཁག་ཏུ་རིམ་གྱིས་གོམ་བགྲོད་ཀྱི་ལས་འགུལ་ཞིག་སྤེལ་གྱིན་ཡོད། ཐོག་མར་སྐས་འཛེགས་མཎི་ནས་མགོ་བཙུགས་ཏེ་ཆུ་དྭངས་མ་དང་། གོར་ཟབ་མཆོད་རྟེན་ལ་སོགས་ལ་༧གོང་ས་མཆོག་ཞག་རེར་བཞུགས་ཞག་མཛད་པ་བཞིན། མི་མང་གིས་མཚན་རེར་ངལ་གསོས་ནས་རིམ་པས། ཤག་ཏི་དང་། རླུང་ལ། མཐོང་ལེགས་བཅས་སུའང་མཚན་རེར་ངལ་གསོས་ནས་རྟ་དབང་དུ་འགྲོ་རྒྱུ་དང་། ཟླ་འདིའི་ཕྱི་ཚེས་ ༥ ཉིན་མོན་རྟ་དབང་རྒྱལ་བའི་ཕོ་བྲང་དུ་མཇུག་སྡོམ་གྱི་མཛད་སྒོ་འཚོག་རྒྱུ་ཡིན་འདུག ཅེས་བརྗོད་བྱུང་།
ཡང་ཁོང་གིས། ད་ལན་ལས་འགུལ་འདི་འདྲ་ཞིག་སྤེལ་དགོས་དོན་གཙོ་བོ་ནི་༧གོང་ས་རྒྱལ་བ་རིན་པོ་ཆེ་མཆོག་ནས་གནས་དེར་ཞབས་ཀྱིས་བཅགས་པའི་ལོ་རྒྱུས་ཀྱི་ཉིན་མོ་རྗེས་སུ་དྲན་སླད། ཕྱོགས་ཡོངས་ནས་བོད་དོན་དང་། ལོ་རྒྱུས་རང་བཞིན་ལྡན་པའི་ས་གནས་དེ་མོན་རྟ་དབང་ལ་མཚོན་ན་དཔེ་མི་སྲིད་པའི་བྱིན་རླབས་ཅན་གྱི་གནས་མཆོག་ཅིག་ཏུ་ངོས་འཛིན་བྱེད་ཆེད་ཡིན། ཞེས་དང་། ༧གོང་ས་རྒྱལ་བ་རིན་པོ་ཆེ་མཆོག་གི་རྗེས་དྲན་དང་ལོ་རྒྱུས་རང་བཞིན་ལྡན་པའི་དུས་ཚིགས་དག་ཏུ་གོམ་་བགྲོད་ཀྱི་ལས་འགུལ་ཁྲོད་མཉམ་ཞུགས་གནང་མཁན་མི་གྲངས་ཉེར་ལྔ་ལྷག་ཡོད་སྐོར་སོགས་བརྗོད་བྱུང་།
ཕྱི་ཟླ་ ༣ ཚེས་ ༣༡ ཉིན་རྒྱ་གར་བྱང་ཤར་མོན་རྟ་དབང་གི་འཕགས་བོད་མཐའ་མཚམས་ཀྱི་སྐས་འཛེགས་མཎི་ནས་མགོ་བཙུགས་ཏེ་༧གོང་ས་མཆོག་བཙན་བྱོལ་དུ་ཕེབས་པའི་ས་གནས་ཁག་ཏུ་རྗེས་དྲན་གོམ་བགྲོད་གནང་བཞིན་པ། འབྲེལ་ཡོད་ཀྱི་པར།
ཕྱི་ལོ་ ༡༩༥༩ ལོར་༧གོང་ས་རྒྱལ་བ་རིན་པོ་ཆེ་མཆོག་དབུས་བོད་མི་རྣམས་བོད་ནས་རྒྱ་གར་བཙན་བྱོལ་དུ་བཙན་བྱོལ་དུ་ཕེབས་སྐབས། ཧིན་བོད་གཉིས་ཀྱི་ས་མཚམས་སྐས་འཛེགས་མ་ཎིར་ཞབས་སོར་འཁོད་དེ། དང་ཐོག་ (Lhasa Dwar) ཞེས་པའི་རྒྱལ་སྒོའི་ཉེ་འཁྲིས་སུ་སྐུ་ངལ་གསོ་གནང་མཛད་སྐབས། ༧གོང་ས་མཆོག་གིས་བསྣམས་པའི་ཕྱག་མཁར་དེ་ས་གནས་དེར་འདེབས་འཛུགས་གནང་སྟེ། ད་ཆ་དེ་ལ་ཡོངས་གྲགས་སུ་བྱིན་གྱིས་རླབས་པའི་ལྗོན་ཤིང་ (holy tree) ཞེས་འབོད་ཀྱིན་ཡོད་ཅིང་། བཞུགས་ཞག་དང་པོ་ཆུ་དྭངས་མོ་དང་། གོར་ཟམ་མཆོད་རྟེན་དུ་བཞུགས་ཞག་གཉིས་པ་མཛད། དེ་ནས་ཤག་ཏི་དང་། རླུང་ལ། མཐོང་ལེགས། རྟ་དབང་དགོན་པ། ལྗང་། སེང་གེ་རྫོང་། སྡེ་རང་། ར་ཧུང་། འབུམ་སྡེ་ལ་བཅས་སུ་ཞག་པོ་རེ་རེ་བཞུགས་ཡོད་འདུག
གསར་འགོད་པ། དཔལ་ལྡན། རྩོམ་སྒྲིག་པ། པདྨ་མཚོ།