༧གོང་ས་མཆོག་གིས་དགེ་འདུན་པ་ཚོ་ལུས་ལ་ཆོས་གོས་གྱོན་པའི་སྟོན་པ་བཅོམ་ལྡན་འདས་ཀྱི་རྗེས་འབྲང་བ་ཞིག་ཡིན་དུས། སེམས་ཁམས་རིག་པའི་སྐོར་ལ་དོ་སྣང་བྱས་ཏེ་སེམས་ཞི་ཞིང་དུལ་བ་ཡོད་པའི་བཅོམ་ལྡན་འདས་ཀྱི་རྗེས་འབྲང་བ་ཕྱི་ནང་མཚུངས་པ་ཞིག་བྱ་རྒྱུ་གལ་ཆེན་ཡིན་པའི་བཀའ་སློབ་བསྩལ།
དེ་རིང་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ། ༧གོང་ས་རྒྱལ་བ་རིན་པོ་ཆེ་མཆོག་ལ་རྡོ་རྗེ་གླིང་འབྲུག་གསང་སྔགས་ཆོས་གླིང་དང་བལ་ཡུལ་འབྲུག་ཨ་མི་ཏ་བྷ་བཙུན་དགོན་གདན་ས་གཉིས་ནས་ཚེ་དཔག་མེད་ཞི་ཁྲོའི་ཆོ་གའི་སྒོ་ནས་བརྟན་བཞུགས་བསྟར་འབུལ་ཞུས་སོང་བ་དང་། སྐབས་དེར་༧མགོན་པ་གང་ཉིད་མཆོག་གིས། དེ་རིང་འདིར་འབྲུག་པ་བཀའ་བརྒྱུད་པས་བརྟན་བཞུགས་གནང་གི་ཡོད། རྒྱུ་མཚན་དམིགས་བསལ་མེད་ནའང་སེམས་ནང་དགའ་པོ་ཞེ་དྲགས་བྱུང་། ཁྱེད་རང་ཚོས་ལྷག་བསམ་རྩེ་གཅིག་གི་ཐོག་ནས་སྨོན་ལམ་རྒྱག་གི་ཡོད། འདས་པའི་ལོ་རྒྱུས་དེ་དག་ཟུར་དུ་བཞག་སྟེ། ད་ལྟའི་གནས་སྐབས་ཁྱེད་རང་ཚོས་ང་ལ་ཡིད་ཆེས་བྱེད་ཀྱིན་ཡོད་པ་དང་། ངོས་ཀྱི་ངོས་ནས་ཆ་བཞག་ན། ཁྱེད་རང་ཚོ་འབྲུག་པ་བཀའ་བརྒྱུད་པའི་ཆོས་བརྒྱུད་གནང་མཁན་ཚང་མ་བསྟན་པའི་ཞབས་འདེགས་སྒྲུབ་མཁན་གལ་ཆེན་དོན་ཆེན་ཞིག་ཆགས་བསྡད་ཡོད་པས་སྐྱིད་སྣང་ཤུགས་ཆེན་པོ་བྱུང་།
བསྟན་པ་རྒྱས་བར་ཤོག་ཟེར་དུས་ཕྱི་ལོགས་ཀྱི་འཛུགས་སྐྲུན་ཡག་པོ་ཡོད་དགོས་པའི་སྐད་ཆ་གང་ཡང་མ་རེད། སོ་སོ་རང་གི་བསླབ་པ་གསུམ་གྱི་ཉམས་ལེན་གདིང་ཁེལ་བ་ཞིག་བྱུང་བ་ཡིན་ན་དངོས་གནས་ཀྱི་བསྟན་པ་རྒྱས་པར་གོ ཕྱི་ལོགས་ཀྱི་ཁྲ་ཁྲ་ཟང་ཟིང་ཡོད་པ་ཙམ་གྱིས་བསྟན་པ་རྒྱས་བར་བརྩི་རྒྱུ་གང་ཡང་མེད། རང་གི་རྒྱུད་ལ་ལུང་རྟོགས་ཀྱི་ཡོན་ཏན་གདེང་ཚོད་ཁེལ་བ་ཞིག་བྱུང་ན་དངོས་གནས་དྲང་གནས་བསྟན་པ་རྒྱས་པ་ཟེར་གྱི་ཡོད།
ངོས་ལ་ཆ་བཞག་ན། ཆུང་ཆུང་གི་སྒང་ནས་ཡོངས་འཛིན་རྡོ་རྗེ་འཆང་རྣམ་པ་ཚོའི་བཀའ་དྲིན་ལ་བརྟེན་ནས། ཚད་མའི་གཞུང་སྦྱངས་ཏེ་གང་འཚམ་ཤེས་ཀྱི་ཡོད། ཞོགས་པ་ཡར་ལངས་པ་དང་ཉིན་ལྟར་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བར་བསམ་བློ་གཏོང་གི་ཡོད། དེས་སེམས་ནང་ལྷོད་ཤིག་ཤིག་གི་སྐྱིད་སྣང་ཡག་པོ་ཞེ་དྲགས་ཡོང་གི་འདུག དེར་བརྟེན། ང་ཚོ་ཚང་མས་གཙོ་བོ་ཐོས་བསམ་གྱི་སློབ་གཉེར་བྱས་ཏེ། དེའི་བརྗོད་དོན་སེམས་ནང་དུ་ཟིན་བསྡད་ཡོད་དུས་བློ་བདེ་ལྷོད་ཤིག་ཤིག་ཡོང་གི་འདུག ངོས་ནས་ཀྱང་ཉམས་ལེན་དེ་ལྟར་བྱས་ཏེ་མི་ཚེ་བསྐྱལ་གྱི་ཡོད།
ཁྱེད་རང་ཚོ་ཆོས་གྲོགས་རྣམ་པ་ཚོ་ཡིན་ནའང་སངས་རྒྱས་པའི་ཆོས་ཀྱི་བསླབ་པ་གསུམ་གྱི་ཉམས་ལེན་དང་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བར་བསམ་བློ་གང་འཚམ་གཏོང་རྒྱུ་བྱུང་ན། ཞོགས་པ་གཉིད་ལས་སད་པ་དང་སྟོང་ཉིད་ཀྱི་ལྟ་བ་དང་བྱང་ཆུབ་ཀྱི་སེམས་ལ་བསམ་བློ་བཏང་ཡོང་དུས། སེམས་དེ་ལྷོད་ཤིག་ཤིག་ཡོང་གི་འདུག
ང་ཚོ་ཚང་མའི་བར་ཆད་སེལ་བར་ཕྱི་ལོགས་ཀྱི་ཞབས་བརྟན་བསྒྲུབ་ཟེར་བའི་སྐད་ཆ་དེ་མ་རེད། སོ་སོའི་སེམས་རྒྱུད་དུ་བསླབ་པ་གསུམ་གྱི་ཉམས་ལེན་ཡག་པོ་ཞིག་ཡོང་ཐབས་སུ་གཟབ་ནན་གྱིས་བསམ་བློ་ཐོངས་དང་། རང་བཞིན་གྱིས་སེམས་ནང་ཞི་བདེ་དང་ལྷོད་ཤིག་ཤིག དཀའ་ངལ་གང་འདྲ་འཕྲད་ཀྱང་གདོང་ལེན་བྱེད་མི་ཐུབ་པའི་སེམས་ཞུམ་བསྡད་པ་ཁྱོན་ནས་མེད་པར་སེམས་ནང་སྐྱིད་སྣང་ཡོང་གི་འདུག གཙོ་བོ་སྟོན་པ་བཅོམ་ལྡན་འདས་དང་ཡང་སྒོས་རྒྱན་དྲུག་མཆོག་གཉིས་ཀྱི་བསྟན་པ་དེ་དག་ཞེ་དྲགས་བཀའ་དྲིན་ཆེན་པོ་ཡིན་པའི་བསམ་བློ་འཁོར་ཏེ། སེམས་ནང་ལ་སྤྲོ་བ་དང་སྤོབས་པ་བསླེབས་ཡོང་གི་འདུག
ང་ཚོ་ཚང་མ་བཅོམ་ལྡན་འདས་ཀྱི་རྗེས་འབྲང་བ་ཡིན། རྒྱ་གར་གྱི་དཔལ་ནལེནྜའི་མཁས་དབང་ཚོའི་གསུང་གི་འཕྲིན་ལས་བསམ་གྱི་མི་ཁྱབ་པ་ཡོད་པ་དེར་ང་ཚོའི་སེམས་ནས་སྒོ་གང་ནས་བལྟས་ན་བསམ་བློ་གཏོང་རྒྱུ་ཡོད། བསམ་བློ་གཏོང་རྒྱུ་གཅིག་མ་གཏོགས་མེད་པ་མིན་པ་དང་ལྐུགས་པ་ཨུ་ཚུགས་བྱས་ནས་བྱ་རྒྱུ་ཞིག་མ་རེད། དེ་རྒྱ་ཆེན་པོ་ཞེ་དྲགས་རེད།
དབུ་མ་འཇུག་པ་དང་ཚད་མ་རྣམ་འགྲེལ། དེ་ནས་མཛོད་དང་འདུལ་བ་ལ་དེ་ཙམ་གྱིས་བསམ་བློ་རྒྱ་ཆེན་པོ་གཏོང་རྒྱུ་མེད། ད་ལྟ་སློབ་དཔོན་དབྱིག་གཉེན་བཞུགས་ཡོད་ཚེ། བཀའ་འདྲི་ཞུ་རྒྱུ་ཡོད་དེ་སློབ་དཔོན་དབྱིག་གཉེན་གྱིས་ག་རེ་གསུང་མིན་མི་ཤེས། གང་ལྟར་དབུ་མ་འཇུག་པ་དང་ཚད་མ་རྣམ་འགྲེལ་སོགས་ལ་བསམ་བློ་གཏོང་རྒྱུ་ཞེ་དྲགས་འདུག་ལ། ཡག་པོ་ཞེ་དྲགས་རེད་འདུག ངོས་ཆུང་ཆུང་གི་སྐབས་དབུ་མ་འཇུག་པ་བློར་བཟུང་བ་ཡིན། ཚད་མ་རྣམ་འགྲེལ་གང་འཚམ་བློར་བཟུང་ཡོད། དེང་སང་བསམ་བློ་གཏོང་སྐབས། བློར་བཟུང་བ་དེ་དག་གིས་སེམས་ཀྱི་རྩེ་རྣོ་པོ་བཟོས་ཏེ་མི་ལ་འགྲེལ་བཤད་རྒྱག་སྐབས་ཕན་ཐོགས་ཞེ་དྲགས་འདུག
དེ་རིང་ཁ་སང་ཡ་མཚན་པ་ཞིག་ལ། ཚན་རིག་གི་ངོ་བོ་ཡར་རྒྱས་ཕྱིན་པ་དང་ལྷག་པར་དུ་སེམས་ཁམས་རིག་པའི་སྐོར་ལ་དོ་སྣང་གསར་པ་ཞིག་བྱས་ཡོང་དུས། ང་ཚོའི་གཞུང་དུ་གསུངས་ཡོད་པའི་སེམས་ཁམས་རིག་པ་དང་དེང་སང་ཚན་རིག་པས་ཤོད་ཀྱིན་པའི་སེམས་ཁམས་རིག་པ་གཉིས་སྒོ་ཀུན་ནས་འབྲེལ་བ་ཡོད་པ་དང་། སེམས་ཁམས་རིག་པའི་མི་ཚོ་ཆོས་ལ་དད་པ་མེད་ཀྱང་། ང་ཚོའི་སེམས་ཁམས་རིག་པའི་གཞུང་དུ་གསུངས་པའི་བསམ་བློའི་འགྲོ་སྟངས་ཀྱི་ཐོག་ལ་དམིགས་བསལ་གྱིས་དོ་སྣང་བྱས་ཏེ་དགའ་པོ་ཞེ་དྲགས་བྱེད་ཀྱིན་འདུག ཅེས་གསུངས།
ང་རང་ཚོ་ལུས་ལ་ཆོས་གོས་གྱོན་པའི་སྟོན་པ་བཅོམ་ལྡན་འདས་ཀྱི་རྗེས་འབྲང་བ་ཞིག་ཡིན་དུས། སེམས་ཁམས་རིག་པའི་སྐོར་ལ་དོ་སྣང་བྱས་ཏེ་ཕྱི་ནང་མཚུངས་པ་དང་སེམས་ཞི་ཞིང་དུལ་བ་ཡོད་པ། བཅོམ་ལྡན་འདས་ཞལ་བཞུགས་དུས་འཁོར་ཚང་མ་གཞན་དང་མི་འདྲ་བར་ཞི་ཞིང་དུལ་བ་ཡོད། དེར་བརྟེན། ང་རང་ཚོས་ལུས་ལ་ཆོས་གོས་གྱོན། ངག་ནས་སྡེ་སྣོད་གསུམ་བཤད་ཡོང་དུས། བཅོམ་ལྡན་འདས་ཀྱི་རྗེས་འབྲང་བ་ཕྱི་ནང་གཉིས་མཚུངས་ཀྱི་ཁྱད་ཆོས་ལྡན་པ་བྱེད་ཐུབ་ཚེ། སོ་སོ་ཡིན་ན་ཁ་ཡོད་ལག་ཡོད་ཀྱི་ཁེ་ཕན་ཡོད། བསྟན་པ་སྤྱི་ལ་ཆ་བཞག་ན། འདི་ཚོ་སྟོན་པ་བཅོམ་ལྡན་འདས་ཀྱི་རྗེས་འབྲང་དགེ་སློང་རེད། འདྲ་གི་མ་རེད་ཟེར་བའི་མཐོང་ཚུལ་ཞིག་སྤྱི་ཚོགས་ནང་ཡོང་བསྡད་པ་རེད། དེ་བས་ཚང་མས་ཧུར་ཐག་གནང་རོགས། ང་རང་ལ་ཆ་བཞག་ན་བཅོམ་ལྡན་འདས་ཀྱི་རྗེས་འབྲང་དགེ་སློང་ཞིག་ཡིན། ཞོགས་པ་ཡར་ལངས་པ་དང་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་སྒོམ་ནས་འགྲོ་བཞིན་ཡོད། དེ་འདྲ་བའི་བསམ་བློ་གཏོང་སྐབས་སེམས་ལྷོད་ཤིག་ཤིག་ཡོང་གི་འདུག
ཚང་མས་ལུས་ལ་ཆོས་གོས་ངུར་སྨུག་གྱོན། ངག་ནས་སྡེ་སྣོད་གསུམ་གྱི་དོན་དག་བཤད་ཡོང་དུས། བཅོམ་ལྡན་འདས་ཀྱི་རྗེས་འབྲང་རྣལ་མ་ཞིག དེང་སང་འཛམ་གླིང་འདིའི་སྒང་དུ་ཆོས་ལ་དོ་སྣང་བྱེད་མཁན་ཉུང་ཉུང་རེད་ཟེར་དགོས་ཀྱང་། ནང་པའི་ཆོས་ཀྱི་བསམ་བློའི་འགྲོ་སྟངས་སོགས་ཀྱི་ཐད་སྐྱེ་བ་སྔ་ཕྱིའི་སྐད་ཆ་མེད་པར་འཕྲལ་དུ་སེམས་བག་ཕེབས་པོ་དང་ལྷོད་ལྷོད་ཡོང་གི་ཡོད་པར་མང་པོ་ཞིག་གིས་ཧ་ཅང་དགའ་པོ་བྱེད་ཀྱིན་འདུག ངོས་ཀྱི་ངོ་ཤེས་པ་སེམས་ཁམས་རིག་པའི་ཚན་རིག་པ་མང་པོ་ཞིག་ངོས་ཀྱི་སར་ཡོང་ནས་སེམས་ཀྱི་ཞི་བདེའི་འགྲོ་སྟངས་ཐོག་སྐད་ཆ་འདྲི་མཁན་མང་པོ་འདུག དེར་བརྟེན། ང་རང་ཚོ་ཚང་མས་སྔོན་ལ་སོ་སོས་ལག་ལེན་ཡག་པོ་བྱས། དེ་ནས་སོ་སོར་ཉམས་མྱོང་ཡོད་པའི་ཐོག་ནས་འགྲེལ་བཤད་རྒྱག་ཐུབ་པ་ཞིག་བྱུང་ན་བསྟན་པ་ལ་ཕན་གྱི་རེད།
འབྲུག་པ་བཀའ་བརྒྱུད་སྤྱི་ནས་བརྟན་བཞུགས་གནང་བར་ཐུགས་རྗེ་ཆེ་ཞུ་རྒྱུ་ཡིན། ཚང་མར་དད་པ་དང་དམ་ཚིག་གཡོ་བ་མེད་པ་རེད། ང་ཚོ་ཚང་མས་སྨོན་ལམ་ཚོགས་མེད་བསགས་པའི་ཐོག་ནས་སྨོན་ལམ་རྒྱག་གི་ཡོད་དུས། ང་ཚོས་བརྒྱབ་པའི་སྨོན་ལམ་གྱི་འབྲས་བུ་ཞིག་ཏན་ཏན་མཐོང་ཆོས་སུ་ཡོང་གི་རེད། ངོས་ནས་ཀྱང་ལྷག་བསམ་རྣམ་དག་གི་ཐོག་ནས་སྨོན་ལམ་རྒྱག་གི་ཡོད། ཐུགས་རྗེ་ཆེ། ཞེས་གསུངས།
གསར་འགོད་པ། སྐལ་བཟང་སྦྱིན་པ།
༼གོང་ས་མཆོག་གིས་བཀའ་སློབ་གང་མིན་ཚད་གནང་འདུག. གསར་འགོད་པ་ལགས. མཇུག་མཐར་་་་་”ང་ཚོ་ཚང་མས་སྨོན་ལམ་ཚོགས་མེད་བསགས་པའི་ཐོག་ནས་སྨོན་ལམ་རྒྱག་གི་ཡོད་དུས།” འདི་ཡིག་ནོར་དུ་སོང་མིན་འདུག་གམ།. དེ་མིན་ངས་མི་གོ་འདུག. གཟིགས་རོགས།།