༧གོང་ས་ཏཱ་ལའི་བླ་མ་བོད་དང་རྒྱ་གར་གནའ་བོའི་རིག་གཞུང་ལྟེ་གནས་ཁང་གི་རྒྱ་གར་རྒྱལ་ཡོངས་ཀྱི་བགྲོ་གླེང་ཚོགས་འདུ་ཐེངས་དང་པོའི་ཐོག་ཁྲི་ཟུར་ཟམ་གདོང་རིན་པོ་ཆེ་མཆོག་གིས་རྒྱ་གར་གྱི་གནའ་བོའི་རིག་གཞུང་དེ་འཛམ་གླིང་སྤྱི་ཡོངས་ཀྱི་ཕན་བདེ་དང་། འཆམ་མཐུན། བརྟན་བརླིང་སོགས་ལ་ཕན་ཐོགས་ངེས་ཅན་ཡོད་པས་རིག་གཞུང་འདི་ལ་སྲུང་སྐྱོབ་དང་འཆད་ཉན་བྱ་རྒྱུ་ཧ་ཅང་གལ་ཆེན་ཡིན་སྐོར་གསུངས།
གནས་མཆོག་རྡོ་རྗེ་གདན་གྱི་ (Buddha Heritage and Resort) གསོལ་མགྲོན་ཁང་དུ། ༧གོང་ས་ཏཱ་ལའི་བླ་མ་བོད་དང་རྒྱ་གར་གནའ་བོའི་རིག་གཞུང་ལྟེ་གནས་ཁང་གི་གོ་སྒྲིག་འོག་རྒྱ་གར་རྒྱལ་ཡོངས་བགྲོ་གླེང་ཐེངས་དང་པའི་སྐུ་མགྲོན་རྣམ་པ། ༢༠༢༥།༠༤།༣ དུས་བབ་ཀྱི་པར།
དེ་རིང་དང་སང་ཉིན་ཉིན་གྲངས་གཉིས་རིང་གནས་མཆོག་རྡོ་རྗེ་གདན་གྱི་ (Buddha Heritage and Resort) གསོལ་མགྲོན་ཁང་དུ། ༧གོང་ས་ཏཱ་ལའི་བླ་མ་བོད་དང་རྒྱ་གར་གནའ་བོའི་རིག་གཞུང་ལྟེ་གནས་ཁང་གི་གོ་སྒྲིག་འོག དངོས་པོའི་གནས་ལུགས་དང་ཚད་མ། དེ་བཞིན་སེམས་ཁམས་རིག་པ་དང་དེར་འཇུག་སྟངས་བཅས་ཀྱི་སྐོར་ལ་རྒྱ་གར་རྒྱལ་ཡོངས་བགྲོ་གླེང་ཚོགས་འདུ་ཞིག་དབུ་འཛུགས་གནང་སོང་། ཐེངས་འདིའི་བགྲོ་གླེང་ཚོགས་འདུ་དབུ་འབྱེད་ཀྱི་མཛད་སྒོའི་སྟེང་། སྐུ་མགྲོན་གཙོ་བོ་བྷི་ཧར་མངའ་སྡེའི་ཁྲིམས་དཔོན་འབུམ་རམས་པ་ཐིཡང་གྷ་ར་ཇན་ (Thiyagarajan) མཆོག་དང་། ༧སྐྱབས་རྗེ་ཁྲི་ཟུར་ཟམ་གདོང་རིན་པོ་ཆེ་མཆོག བཀའ་ཟུར་བསྟན་པ་ཚེ་རིང་མཆོག སྐུའི་གསུང་སྒྱུར་བ་དགེ་བཤེས་ཐུབ་བསྟན་སྦྱིན་པ་ལགས་དང་དགེ་བཤེས་ལྷག་རྡོར་ལགས་སོགས་ཆོས་བརྒྱུད་རིས་མེད་ཀྱི་དགེ་བཤེས་ཁག་ཅིག་དང་། རྒྱ་གར་གྱི་མཁས་དབང་མང་པོ་ཞིག དེ་བཞིན་༧གོང་ས་ཏཱ་ལའི་བླ་མ་བོད་དང་རྒྱ་གར་གནའ་བོའི་རིག་གཞུང་ལྟེ་གནས་ཁང་གི་འགན་འཛིན་མཁན་ཟུར་བཀྲ་ཤིས་ཚེ་རིང་མཆོག་གིས་དབུས་ལྟེ་གནས་ལས་བྱེད་སོགས་མཉམ་ཞུགས་གནང་འདུག
མཛད་སྒོའི་ཐོག་བཀའ་ཟུར་བསྟན་པ་ཚེ་རིང་མཆོག་གིས་༧གོང་ས་རྒྱལ་བ་རིན་པོ་ཆེ་མཆོག་ནས་ཆེད་དུ་བསྩལ་བའི་མཛད་སྒོའི་གསུང་འཕྲིན་སྒྲོག་སྦྱངས་ཞུས་པའི་ནང་། ལྟེ་གནས་ཁང་གི་ངོས་ནས་རྒྱ་གར་རྒྱལ་ཡོངས་བགྲོ་གླེང་ཚོགས་འདུ་ཐེངས་དང་པོ་གོ་སྒྲིག་གནང་ཐུབ་པ་བྱུང་བར་ཐུགས་དགྱེས་ཚོར་ཆེན་པོ་བྱུང་ཡོད་སྐོར་དང་། ༸གོང་ས་ཏཱ་ལའི་བླ་མའི་བོད་དང་རྒྱ་གར་གནའ་བོའི་རིག་གཞུང་ལྟེ་གནས་ཁང་འདི་ནི་རྒྱ་གར་གྱི་གནའ་བོའི་རིག་གཞུང་ལ་དོ་སྣང་བྱ་རྒྱུ་ཙམ་མིན་པར། རིག་གཞུང་དེ་དག་དེང་རབས་ཀྱི་ཚན་རྩལ་དང་མཉམ་འབྲེལ་ཇི་ལྟར་བྱེད་ཐུབ་མིན་ཞིབ་འཇུག་བྱ་རྒྱུ་དེ་ཡིན་པ་དང་། འཛམ་གླིང་འདི་བཞིན་ཉེན་ཁ་ཆུང་བ་དང་། བདེ་སྐྱིད་ལྡན་པ། མཐུན་སྒྲིལ་ཆེ་བ་ཡོང་སླད་ཞབས་འདེགས་བསྒྲུབ་ཐུབ་པའི་ནུས་པ་ཆེན་པོ་མཐོང་ཐུབ་ཀྱི་ཡོད། ཅེས་གསུངས་འདུག་ལ། འབྲེལ་ལམ་ཟབ་པའི་དེང་གི་འཛམ་གླིང་ནང་དུ་འཕྲུལ་ཆས་ཀྱིས་ང་ཚོའི་ལུས་སེམས་གཉིས་ཀའི་བར་ཐག་ཉེ་རུ་བཏང་ཡོད་པ་དེས་འབྱུང་འགྱུར་ལྟེ་གནས་ཁང་གིས་ལས་དོན་ཐད་གསར་གཏོད་རང་བཞིན་གྱི་ཐབས་ལམ་འཚོལ་བར་གོ་སྐབས་བསྐྲུན་ཡོད་སྟབས། བགྲོ་གླེང་ཚོགས་འདུ་འདི་བཞིན་ལམ་ལྷོངས་ཡོང་བའི་ཐུགས་སྨོན་མཛད་འདུག
འབུམ་རམས་པ་ཐིཡང་གྷ་ར་ཇན་ (Thiyagarajan) མཆོག་གིས། དེ་རིང་གི་བགྲོ་གླེང་ཚོགས་འདུ་འདི་དབུ་འབྱེད་ཀྱི་མཛད་སྒོར་མཉམ་ཞུགས་ཐུབ་པ་བྱུང་བར་དགའ་པོ་བྱུང་། ལྟེ་གནས་ཁང་འདི་བརྒྱུད་ནས་བོད་དང་རྒྱ་གར་གྱི་གནའ་བོའི་རིག་གཞུང་མི་ཉམས་རྒྱུན་འཛིན་དང་ཁྱབ་གདལ་གཏོང་བ། ༧གོང་ས་མཆོག་གི་བཀའ་སློབ་ལམ་སྟོན་ལྟར། བྱམས་སྙིང་རྗེ་དང་། མཐུན་སྒྲིལ། བརྩེ་བ་སོགས་གོང་འཕེལ་དུ་གཏོང་གི་ཡོད་པ་རེད། དེ་རིང་གི་ཚོགས་འདུ་འདིའི་སྟེང་རྒྱ་གར་དང་བོད་པའི་མཁས་པ་མང་པོ་ཞིག་མཉམ་ཞུགས་ཀྱིས་གནའ་བོའི་རིག་གཞུང་ཐད་གླེང་སློང་གནང་གི་ཡོད་པར་ཧ་ཅང་གི་དགའ་བོ་བྱུང་། ཞེས་སོགས་གསུངས་སོང་།
གནས་མཆོག་རྡོ་རྗེ་གདན་གྱི་ (Buddha Heritage and Resort) གསོལ་མགྲོན་ཁང་དུ། ༧གོང་ས་ཏཱ་ལའི་བླ་མ་བོད་དང་རྒྱ་གར་གནའ་བོའི་རིག་གཞུང་ལྟེ་གནས་ཁང་གི་གོ་སྒྲིག་འོག་རྒྱ་གར་རྒྱལ་ཡོངས་བགྲོ་གླེང་ཐེངས་དང་པའི་ཚོགས་བཅར་བ། ༢༠༢༥།༠༤།༣ དུས་བབ་ཀྱི་པར།
སྐུ་མགྲོན་གཙོ་བོ་ ༧སྐྱབས་རྗེ་ཁྲི་ཟུར་ཟམ་གདོང་རིན་པོ་ཆེ་མཆོག་གིས། ལོ་མང་པོའི་གོང་ནས་༧གོང་ས་རྒྱལ་བ་རིན་པོ་ཆེ་མཆོག་ནས་སྐུ་ལས་ཚད་མེད་བསྐྱོན་པ་དང་། ༧མགོན་པོ་གང་གི་ཕུགས་དམིགས་དང་བཞེད་དགོངས་ལྟར། ད་ལན་གཙོ་བོ་རྒྱ་གར་གཞུང་དང་བྷི་ཧར་མངའ་སྡེ་གཉིས་ཀྱི་མཐུན་བསྒྱུར་རོགས་འདེགས་འོག་ནས། ༧གོང་ས་ཏཱ་ལའི་བླ་མ་བོད་དང་རྒྱ་གར་གནའ་བོའི་རིག་གཞུང་ལྟེ་གནས་ཁང་འདི་ཉིད་དངོས་སུ་མགོ་བཙུགས་ཐུབ་པ་བྱུང་ཡོད། ༧གོང་ས་རྒྱལ་བ་རིན་པོ་ཆེ་མཆོག་གི་ཕུགས་དམིགས་དང་བཞེད་དགོངས་ལྷུན་གྱིས་འགྲུབ་སླད། བྷི་ཧར་མངའ་སྡེ་དང་ས་གནས་གཞུང་གིས་ལས་གཞི་འདི་གཉེར་བར་ས་ཁྱོན་ཆེན་པོ་ཞིག་ཕུལ་ཡོད་ཀྱང་། ཕྱོགས་ཡོངས་ནས་བསམ་ཚུལ་འདྲ་མིན་ཡོད་པའི་ཁྲོད། ཁག་ཅིག་གིས་གནའ་བོའི་རིག་གཞུང་དེ་དུས་འགྱུར་གྱི་དབང་གིས་འཆད་ཉན་བྱ་རྒྱུར་དཀའ་ཚེགས་ཡོད་སྐོར་སོགས་ཀྱི་དགོངས་ཚུལ་ཇི་རིགས་བྱུང་ཡོད་ཀྱང་། ང་ཚོས་གནད་དོན་དེའི་རིགས་ལ་གདོང་ལེན་བྱས་ནས་ཤར་སྐྱོད་བྱས་པ་རེད། ལྟེ་གནས་ཁང་འདིར་དུས་རབས་ཉི་ཤུ་བར་གྱི་བོད་དང་རྒྱ་གར་གི་གནའ་བོའི་ཤེས་རིག་གི་སྐོར་ལ་སློབ་སྦྱོང་སྤྲད་རྒྱུ་དང་། སློབ་ཡོན་དང་ཡིག་ཚད་སོགས་ཀྱི་ལམ་ནས་ཞུགས་མི་དགོས་པར་རིན་མེད་ཀྱིས་སློབ་མ་སྐྱེད་སྲིང་བྱ་རྒྱུ་ཡིན། ཞེས་དང་། འཛམ་གླིང་ཁྱོན་ཡོངས་སུ་ཁོར་ཡུག་དང་། ཆབ་སྲིད། དཔལ་འབྱོར་སོགས་ཀྱི་ཐད་ནས་དཀའ་ཁག་ཧ་ཅང་ཆེ་བའི་གཉན་འཕྲང་ཅན་གྱི་དུས་སྐབས་འདིར། འབྱུང་འགྱུར་གྱི་མི་རབས་རྣམས་ལ་འཛམ་གླིང་སྤྱི་ཡོངས་ཀྱི་དཀའ་རྙོག་སེལ་སླད་ཟློག་མེད་ཀྱི་འགན་འཁྲི་གསར་པ་ཞིག་ཡོད་པའི་མུར། རྒྱ་གར་གྱི་གནའ་བོའི་རིག་གཞུང་དེ་འཛམ་གླིང་སྤྱི་ཡོངས་ཀྱི་ཕན་བདེ་དང་། འཆམ་མཐུན། བརྟན་བརླིང་སོགས་ལ་ཕན་ཐོགས་ངེས་ཅན་ཞིག་ཡོད་པས། རྒྱ་གར་གྱི་གནའ་བོའི་རིག་གཞུང་སྲུང་སྐྱོབ་དང་འཆད་ཉན་བྱ་རྒྱུ་ཧ་ཅང་གལ་ཆེན་ཡིན་སྐོར་སོགས་གསུངས་སོང་།
དེ་ནས་བཀའ་ཟུར་བསྟན་པ་ཚེ་རིང་མཆོག་གིས། རྡོ་རྗེ་གདན་གྱི་༧གོང་ས་ཏཱ་ལའི་བླ་མ་བོད་དང་རྒྱ་གར་གནའ་བོའི་རིག་གཞུང་ལྟེ་གནས་ཁང་ནི་འཛམ་གླིང་ནང་འགྲོ་བ་མི་ལ་བྱམས་བརྩེ་དང་། བདེ་སྐྱིད་ཁྱབ་གདལ་འགྲོ་བའི་ཆེད་དུ་འཛུགས་སྐྲུན་གནང་བ་ཞིག་རེད། ད་ལྟའི་ཆར་ལྟེ་གནས་ཁང་འཛུགས་སྐྲུན་གནང་སྟེ་ལོ་ངོ་གཅིག་དང་ཕྱེད་ཀ་ཕྱིན་ཡོད་པ་དང་། ད་དུང་ལོ་ངོ་མང་པོ་འགོར་སྲིད་པ་རེད། ལས་ཀ་གཞི་རྒྱ་ཆེན་པོ་ཡིན་ཙང་དུས་ཚོད་མང་པོ་འགོར་གྱི་འདུག ༧མགོན་པོ་གང་ཉིད་མཆོག་གི་དགོངས་གཞི་གཞིར་བཟུང་། འཛམ་གླིང་ནང་གནའ་བོའི་རིག་གཞུང་དར་ཁྱབ་ཏུ་འགྲོ་བར་རྒྱ་གར་གྱི་མཁས་པ་བསྡུ་རུབ་དང་། རྒྱ་གར་གྱི་གནའ་རབས་རིག་གཞུང་གཙོ་བོ་དེ་དག་སེམས་ཁམས་དང་འབྲེལ་བ་ཡོད་པ་དང་། འཛམ་གླིང་དུ་བདེ་སྐྱིད་སྤེལ་བར་བོད་པའི་ནང་ཆོས་དང་འབྲེལ་བ་ཡོད་པ་རེད། མཁས་དབང་རྣམས་གཞི་རྩའི་ལྟ་གྲུབ་ཐོག་མཁས་པ་ཡིན་པར་བརྟེན། འཛམ་གླིང་ནང་དེང་དུས་ཀྱི་དགོས་མཁོ་དང་མཐུན་པའི་ཐོག་ནས་དར་ཁྱབ་གཏོང་བ་དང་། བྱམས་བརྩེ་སྤེལ་རྒྱུ། སློབ་སྦྱོང་སྤྲོད་པར་དགེ་རྒན་འོས་སྦྱོང་སྤྲད་དགོས་རེད་བསམ་གྱི་འདུག ད་ལོའི་ཕྱི་ཟླ་དྲུག་པའི་ནང་༧གོང་ས་ཏཱ་ལའི་བླ་མའི་སློབ་གཉེར་ཁང་དུ་དགེ་རྒན་འོས་སྦྱོང་གནང་རྒྱུ་ཡིན། ཞེས་སོགས་གསུངས་སོང་།
ཡང་མཛད་སྒོའི་ཐོག་རྒྱ་གར་གྱི་མཁས་དབང་སློབ་དཔོན་ཇོ་ཤི་ (Shubhada Joshi) ལགས་ཀྱིས། དེ་སྔ་དྲ ལམ་དང་དངོས་སུ་ཐུག་ནས་ཚོགས་འདུ་མང་པོ་འཚོགས་ཏེ། གནའ་བོའི་རིག་གཞུང་དང་འབྲེལ་ནས་གླེང་སློང་མང་པོ་བྱུང་། བོད་ཀྱི་ནང་ཆོས་གཅིག་པུ་མིན་པར་གནའ་བོའི་རིག་གཞུང་དང་། དེང་དུས་གཉིས་མཉམ་འབྲེལ་གྱིས་བྱམས་བརྩེའི་ཐོག་སློབ་སྦྱོང་སྤྲོད་ཀྱི་ཡོད་པ་རེད། ལས་གཞི་འདིའི་ཐོག་རྒྱ་གར་གཞུང་གིས་རྒྱབ་སྐྱོར་ཆེན་པོ་གནང་བ་བཀའ་དྲིན་ཆེན་པོ་ཡིན་སྐོར་གསུངས་སོང་།
༧གོང་ས་ཏཱ་ལའི་བླ་མ་བོད་དང་རྒྱ་གར་གནའ་བོའི་རིག་གཞུང་ལྟེ་གནས་ཁང་གི་རྩིག་རྨང་འཇོག་གནང་མཛད། ༢༠༢༣།༡།༣ དུས་བབ་ཀྱི་པར།
༧གོང་ས་ཏཱ་ལའི་བླ་མ་བོད་དང་རྒྱ་གར་གནའ་བོའི་རིག་གཞུང་ལྟེ་གནས་ཁང་འདི་ནི་༧གོང་ས་རྒྱལ་བ་རིན་པོ་ཆེ་མཆོག་གི་བཀའ་དགོངས་བཞིན་གསར་འཛུགས་གནང་བ་ཞིག་ཡིན་འདུག་ལ། ཕྱི་ལོ་ ༢༠༢༣ ཟླ་ ༡ ཚེས་ ༣ ཉིན་༧གོང་ས་རྒྱལ་བ་རིན་པོ་ཆེ་མཆོག་ནས་ལྟེ་གནས་ཁང་གསར་སྐྲུན་གྱི་རྨང་རྡོ་འཇོག་གནང་མཛད་པ་དང་། ལྟེ་གནས་ཁང་ལ་དང་ཐོག་དཔལ་ནཱ་ལནྜེའི་ལྟེ་གནས་ཞེས་མཚན་བཏགས་ཡོད་ཀྱང་། ཕྱིས་སུ་༸གོང་ས་མཆོག་ནས་ནང་པ་ཙམ་མ་ཡིན་པར་རྒྱ་གར་གྱི་གནའ་བོའི་རིག་གཞུང་ཆ་ཚང་མཚོན་ཆེད་ཏཱ་ལའི་བླ་མ་བོད་དང་རྒྱ་གར་གནའ་བོའི་རིག་གཞུང་ལྟེ་གནས་ཁང་ཞེས་མཚན་བསྒྱུར་གནང་ཡོད་འདུག ལྟེ་གནས་ཁང་འདི་ནི་རིག་གཞུང་ཞིབ་འཇུག་ཁང་ཞིག་ཡིན་ཞིང་། གཙོ་བོ་བོད་དང་རྒྱ་གར་གྱི་གནའ་བོའི་རིག་གཞུང་དང་ལྟ་གྲུབ་རྣམས་ཀྱིས་དེང་དུས་དང་མཐུན་པའི་ཐོག་ནས་འགྲོ་བ་མིའི་རིགས་ཀྱི་དགོས་མཁོ་སྒྲུབ་ཐབས་སྐོར་ལ་ཞིབ་འཇུག་དང་བསླབ་པ་སློབ་གཉེར་གནང་བར་དམིགས་ཡོད་པ་རེད།
ལྟེ་གནས་ཁང་གི་རྨང་རྡོ་འཇོག་པའི་མཛད་སྒོའི་ཐོག་༧གོང་ས་རྒྱལ་བ་རིན་པོ་ཆེ་མཆོག་ནས། དེ་རིང་གནས་མཆོག་ཁྱད་པར་ཅན་རྡོ་རྗེ་གདན་གྱི་གནས་འདིར་ཆོས་ལུགས་དད་པ་ཡོད་མེད་ལ་མ་ལྟོས་པར། ང་ཚོས་སངས་རྒྱས་ལ་དགའ་མོས་བྱ་རྒྱུ་དང་། གཙོ་བོ་སངས་རྒྱས་ཀྱིས་གསུངས་པའི་བྱམས་བརྩེ་ཟེར་བ་དེ་དངོས་གནས་དྲང་གནས་ཀྱིས་འཛམ་བུ་གླིང་ལ་ཕན་ཐོགས་ཡོད་པ་དང་གལ་ཆེན་པོར་རྩིས་ཡོད་པ་རེད། Bodhgaya ཟེར་བའི་གནས་འདིར་སངས་རྒྱས་བཅོམ་ལྡན་འདས་ཀྱིས་བྱམས་བརྩེ་རྩ་བར་གྱུར་བའི་སངས་རྒྱས་ཀྱི་ཆོས་གསར་དུ་མཛད་དེ་ཡར་རྒྱས་ཕྱིན་པ་ཞིག་ཡིན་དུས་ཚང་མས་འདིར་དམིགས་བསལ་གྱིས་ཐུགས་སྣང་གནང་བར་ཐུགས་རྗེ་ཆེ་ཞུ་རྒྱུ་ཡིན། ཞེས་དང་། ང་ཚོས་ཉིན་ཞག་དུས་གཅིག་གི་མི་ཚེའི་ཁྲོད་སེམས་པ་བཟང་པོ་དང་བྱང་ཆུབ་སེམས་ཀྱི་ཐོག་ནས་གཞན་ཕན་གཙོ་བོ་བྱས་ནས་མི་ཚེ་སྐྱེལ་རྒྱུ་དང་། གཞན་ཕན་སྒྲུབ་དུས་དངོས་ཡོད་གནས་ཚུལ་ལ་རན་པ་ཞིག་དང་གཞན་ལ་ཁ་ཡོད་ལག་ཡོད་ཀྱིས་ཕན་ཐོགས་ཡོང་རྒྱུ་ཞིག་ཡག་པོ་རྩད་གཅོད་བྱས་ཏེ། བྱང་ཆུབ་ཀྱི་སེམས་ཁ་ཡོད་ལག་ཡོད་ཀྱི་ཐོག་ནས་གཞན་ཕན་བསྒྲུབ་རྒྱུ་ནི་ང་ཚོ་ཚང་མའི་ལས་འགན་རེད། ཅེས་གསུངས་ཡོད་པ་རེད།
གསར་འགོད་པ་བསྟན་འཛིན་ཕུར་བུས་གནས་མཆོག་རྡོ་རྗེ་གདན་ནས་སྤེལ། རྩོམ་སྒྲིག་བྱེད་མཁན། པདྨ་མཚོ།