༧གོང་ས་མཆོག་གིས། ཁྱེད་རང་ཚོས་༧རྒྱལ་བ་རིན་པོ་ཆེ་ལབ་ནས་སེམས་ཐག་ཉེ་བོ་ཞེ་དྲགས་ཡོད། ངོས་ཀྱི་ངོས་ནས་ཆ་བཞག་ན་རྒྱ་གར་ནུབ་རྒྱུད་ཀྱི་སྤི་ཏིའི་ཡུལ་མི་རྣམས་ལ་སེམས་ཐག་ཉེ་བོ་ཞེ་དྲགས་ཡོང་གི་འདུག ཅེས་གསུངས།
དེ་རིང་བཞུགས་སྒར་ཐེག་ཆེན་གཙུག་ལག་ཁང་གི་ཆོས་རྭའི་ནང་དུ་༧གོང་ས་རྒྱལ་བ་རིན་པོ་ཆེ་མཆོག་ལ་རྟ་པོ་དགོན་པ་གཙོ་བྱས་པའི་སྤི་ཏིའི་མི་མང་ ༡༣༠༠ ཡིས་བརྟན་བཞུགས་བསྟར་འབུལ་ཞུས། སྐབས་དེར་༧མགོན་པོ་གང་ཉིད་མཆོག་གིས་སྐྱབས་འགྲོ་དང་གཟུངས་སྔགས་འགའི་བཟླས་ལུང་གི་ཆོས་འབྲེལ་བསྩལ།
༧གོང་ས་རྒྱལ་བ་རིན་པོ་ཆེ་མཆོག་གིས། ཆོས་གྲོགས་རྣམ་པ་ཚོར་ཞུ་རྒྱུར་ངོས་འདིར་རྒྱ་གར་དུ་སླེབས་པ་རེད། རྒྱ་གར་ནུབ་རྒྱུད་ས་ཁུལ་གྱི་མི་མང་རྣམས་ཆོས་དད་ཞེ་དྲགས་ཆེན་པོ་རེད་འདུག ༧རྒྱལ་བ་རིན་པོ་ལབ་དུས་སེམས་ཐག་ཉེ་བོ་ཞེ་དྲགས་བྱས་ནས་ལོ་ངོ་མང་པོ་ཕྱིན་པ་རེད། དུས་ཡུན་དེ་དག་གི་རིང་ཚང་མས་ངོས་ཀྱི་མིང་ནས་བོས་ཏེ་དངོས་གནས་དྲང་གནས་ལུས་ངག་ཡིད་གསུམ་གྱི་སྒོ་ནས་སྐྱབས་སུ་མཆིས་བསམ་པའི་བསམ་བློ་འཁོར་བསྡད་ཡོད་པ་རེད། སྤྱིར་རྒྱ་གར་དང་ཡང་སྒོས་ནུབ་རྒྱུད་ཀྱི་ས་ཁུལ་དེ་དག་ཏུ་ངོས་ཐེངས་མང་པོར་བསླེབས་པ་རེད། ཚང་མར་དད་པ་དང་གུས་པ། ཞེན་ཁོག་སོགས་གཡོ་བ་མེད་པ་རེད་འདུག ཁྱེད་རང་ཚོས་༧རྒྱལ་བ་རིན་པོ་ཆེ་ལབ་ནས་སེམས་ཐག་ཉེ་བོ་ཞེ་དྲགས་ཡོད། ངོས་ཀྱི་ངོས་ནས་ཆ་བཞག་ན་རྒྱ་གར་ནུབ་རྒྱུད་ཀྱི་སྤི་ཏིའི་ཡུལ་མི་རྣམས་ལ་སེམས་ཐག་ཉེ་བོ་ཞེ་དྲགས་ཡོང་གི་འདུག
ངོས་ལ་ཆ་བཞག་ན། ཆུང་དུས་ནས་དཔེ་ཆར་བལྟས་པ་རེད། ཆོས་གྲོགས་ཚོ་དང་ཐུག་པའི་སྐབས་སུ་འགྲེལ་བཤད་རྒྱག་རྒྱུ་གླེགས་མི་ཐིག་པ་ཡོད། ངོས་ཀྱང་རྒྱ་གར་ནུབ་རྒྱུད་དུ་བསྡད་དེ། ཡུལ་མི་མི་མང་ལ་དད་ཞེན་ཤུགས་ཆེན་ཡོད་པའི་ཐོག་ཏུ་ཆོས་ཀྱི་གནས་ཚུལ་དེ་དག་འགྲེལ་བཤད་བརྒྱབ་ཡོང་དུས། དངོས་གནས་དྲང་གནས་སེམས་ཀྱི་གཏིང་ནས་ལུས་གཡོ་འགུལ་ཐེབས་ནས་ཡག་པོ་ཞེ་དྲགས་འདུག ད་ལྟ་བར་དུ་ཁྱེད་རང་ཚོས་སངས་རྒྱས་པའི་ཆོས་ལ་ཧུར་ཐག་འབད་ཐག་བྱས་པ་རེད། གལ་ཆེ་བ་ཞིག་ལ་སངས་རྒྱས་པའི་ཆོས་དེ་འདོན་པ་བཏོན་པ་དང་སྨོན་ལམ་བརྒྱབ་པ་གཅིག་པུ་མ་ཡིན་པར་ག་འདྲ་ཞིག་ལ་སངས་རྒྱས་པའི་ཆོས་ཟེར་གྱི་ཡོད་མེད་ཐད་སློབ་སྦྱོང་བྱ་རྒྱུ་གལ་ཆེན་པོ་རེད།
ང་རང་ཚོས་ཆོས་ཀྱི་རྣམ་གཞག་ཏོག་ཙམ་ཤེས་ནས་དད་པ་བསླེབས་ཡོང་དུས། དད་པ་དེ་ཤེས་རབ་ཀྱི་རྗེས་སུ་མཐུན་པའི་དད་པ་ཞིག་ཡིན་སྟབས་ཞེ་དྲགས་སྤུས་དག་པོ་དང་བརྟན་པོ་རེད་འདུག བརྟན་བཞུགས་ཟེར་ནས་འདོན་པ་བདུན་ཕྲག་བདུན་ཕྲག་བྱས་ནས་བཏོན་པ་དང་། སྙིང་ཁོངས་རུས་པའི་གཏིང་ནས་དང་དགའ་སྤྲོ་ཆེན་པོའི་ངང་སེམས་ཐག་ཉེ་བོ་བྱས་ནས་བསྡད་པ་དེ་བརྟན་བཞུགས་ངོ་མ་ཆགས་ཡོད།
དེ་རིང་འདིར་ཁྱེད་རང་ཚོ་ཆེད་མངགས་འཛོམས་ནས་བརྟན་བཞུགས་ཕུལ་གྱི་ཡོད། ངོས་སྒེར་ལ་ཆ་བཞག་ན། ཁྱེད་རང་ཚོས་དགའ་ཞེན་ཤུགས་དྲག་དང་ལྡན་པའི་ཐོག་ནས་ངོས་ཚེ་རིང་པོ་ཡོང་བར་སྨོན་ལམ་བརྒྱབ་པར་དགའ་པོ་བྱུང་ལ་ཐུགས་རྗེ་ཆེ་ཞུ་རྒྱུ་ཡིན། སྔོན་ལ་སྐྱབས་འགྲོ་སེམས་བསྐྱེད་ཅིག་འདོན་རྒྱུ་དང་དེ་ནས་གཟུངས་སྔགས་ཕྲེང་སྐོར་གཅིག་འདོན་རྒྱུ་ཡིན།
ཆོས་ཀྱི་སྙིང་བོ་དེ་བྱང་ཆུབ་ཀྱི་སེམས་རེད། ངོས་ཀྱི་ངོས་ནས་ཞོགས་པ་ཡར་ལངས་པ་དང་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་སྒོམ་གྱི་ཡོད། ངོས་ནས་ལྷ་ཡི་རྣལ་འབྱོར་མང་པོར་བསྟེན་གྱི་ཡོད་དེ། གཙོ་བོ་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་སྒོམ་གྱི་ཡོད། ངོས་ནས་དེ་ལྟར་བྱེད་ཀྱིན་ཡོད་ལ་ཁྱེད་ཚོའི་ངོས་ནས་ག་ཚོད་ཐུབ་ཐུབ་ཀྱིས་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བར་བསམ་བློ་གཏོང་ཤོག་ཨ། ཞེས་གསུངས།
གསར་འགོད་པ། སྐལ་བཟང་སྦྱིན་པ།
