རྒྱ་ནག་དང་ཝེ་ཐི་ནམ་རྒྱལ་ཁབ་གཉིས་ཀྱིས་མཉམ་ལས་ཚོང་དོན་ཤུགས་ཇེ་ཆེར་བཏང་ནས་ཨ་རིས་འཛམ་གླིང་གི་ཚོང་དོན་ལ་གཏོར་བརླག་བཏང་བར་ངོ་རྒོལ་བྱ་རྒྱུ་ཡིན་ལུགས་བསྒྲགས།
རྒྱ་ནག་གི་མགོ་ཁྲིད་ཞི་ཅིན་ཕིན་གྱིས་ལྷོ་ཤར་ཨེ་ཤ་ཡའི་གཞུང་འབྲེལ་ཕྱོགས་སྐྱོད་དང་བསྟུན། ཁ་སང་ཕྱི་ཚེས་ ༡༤ ཉིན་ཝེ་ཐི་ནམ་རྒྱལ་ཁབ་ཏུ་འབྱོར་ཏེ་ཡུལ་དེའི་སྲིད་བློན་ཕམ་མིན་(Pham Minh Chinh) དང་། སྤྱི་ཁྱབ་དྲུང་ཆེ་ཊོ་ལེམ་(To Lam) གཙོས་གནད་ཡོད་མི་སྣ་ཁག་ཅིག་ལ་ཐུག་འཕྲད་བྱས་ཏེ། རྒྱལ་ཁབ་གཉིས་ཀྱི་མཉམ་ལས་ཀྱི་ཚོང་དོན་ཐད་གྲོས་བསྡུར་དང་ཚོང་དོན་མཉམ་ལས་གྲངས་བཅུ་གཉིས་ལ་མོས་མཐུན་མིང་རྟགས་བཀོད་འདུག་ལ། དེ་རིང་ཕྱི་ཚེས་ ༡༤ ནས་ ༡༨ བར་མ་ལི་ཤི་ཡ་དང་ཁོམ་བྷོ་ཊི་ཡའི་ནང་འགྲོ་ཡི་ཡོད་འདུག
ཞི་ཡིས་ཝེ་ཐི་ནམ་གཞུང་གིས། ཨ་རིས་སྒོ་ཁྲལ་སྤར་བར་རྒྱ་ནག་དང་མཉམ་འབྲེལ་གྱིས་ཁ་གཏད་གཅག་དགོས་ལུགས་བརྗོད་པ་དང་སྦྲགས། རྒྱ་ནག་དང་ཝི་ཐི་ནམ་གཉིས་ཀྱིས་འཐབ་ཇུས་ཀྱི་དམིགས་འབེན་ཇེ་དྲག་ཏུ་བཏང་སྟེ། ཕྱོགས་གཅིག་གིས་གཉའ་གནོན་བྱེད་པར་མཉམ་རུབ་ཀྱིས་ངོ་རྒོལ་བྱ་དགོས། གྲུ་ཆུང་ཞིག་ལ་གྲུ་གཡོར་གཅིག་ལས་མེད་ན་རྦ་རླབས་དྲག་པོར་ཁ་གཏད་གཅོག་མི་ཐུབ་ཅིང་། མཉམ་ལས་བྱས་ཚེ་ད་གཟོད་བརྟན་བརླིང་ངང་ཐག་རིང་པོར་གཏོང་ཐུབ། ཅེས་བཤད་འདུག་ལ། ཝེ་ཐི་ནམ་གྱི་སྤྱི་ཁྱབ་དྲུང་ཆེ་ཊོ་ལེམ་ཟེར་བས། འཛམ་གླིང་གི་ཚོང་དོན་དང་། དངོས་ཟོག་ཉོ་བཙོང་གི་བརྟན་བརླིང་ལ་གཏོར་བརླག་གཏོང་མཁན་ཚོར་མཉམ་རུས་ཀྱིས་ངོ་རྒོལ་བྱ་དགོས་ལུགས་སོགས་བཤད་འདུག
གནད་དོན་དེའི་ཐད་ཨ་རིའི་སྲིད་འཛིན་ཊོམ་ཕུ་མཆོག་གིས། ངས་རྒྱ་ནག་ལ་སྐྱོན་བརྗོད་མ་བྱས། ཝེ་ཐི་ནམ་ལའང་སྐྱོན་བརྗོད་བྱེད་ཀྱི་མེད། ཚོགས་འདུ་ཧ་ཅང་ཡག་པོ་ཞིག་རེད། དེ་ནི་ཨ་རིར་ཇི་ལྟར་གནོད་འཚེ་གཏང་རྒྱུར་ཐབས་ཤེས་བྱས་པའི་ཚོགས་འདུ་ཞིག་རེད། ཡུ་རོབ་མཐུན་ཚོགས་འཛུགས་དོན་ཡང་དེའི་ཆེད་དུ་ཡིན་པ་བརྗེད་མི་ཉན། ཞེས་གསུངས་འདུག
ད་ལན་རྒྱ་ནག་དང་ཝེ་ཐི་ནམ་གྱི་མཐོ་རིམ་དཔོན་རིགས་ཐུག་འཕྲད་སྐབས། རྒྱ་ནག་གིས་མུ་མཐུད་དུ་ཝེ་རྒྱ་གཉིས་ཀྱི་ཅ་དངོས་ཕྱིར་ཚོང་དང་ནང་འདྲེན་གྱི་མཉམ་ལས་དང་། ཝེ་ཐི་ནམ་དུ་མེ་འཁོར་ལྕགས་ལམ་གསར་རྒྱག་གི་ལས་གཞི་ཚུད་པའི་དོན་ཚན་བཅུ་གཉིས་ལ་མཉམ་ལས་བྱ་རྒྱུའི་མིང་རྟགས་བཀོད་འདུག་ལ། ཕྱོགས་གཉིས་ཀྱི་མགོ་ཁྲིད་ཀྱིས་ཚོང་དོན་འཕེལ་རྒྱས་ལ་སྔར་ལྷག་ནུས་པ་འདོན་ཐབས་དང་། རྒྱལ་ཁབ་ཀྱི་མཐའ་སྲུང་གི་མཉམ་ལས། ཚོང་དོན་བརྒྱུད་ནས་ཝེ་རྒྱ་མི་མང་གི་འཆམ་མཐུན་གོང་འཕེལ། ཨེ་ཤ་ཡའི་མཚོ་གླིང་ཁུལ་མཉམ་ལས་ནུས་ཤུགས་སྐྱེད་ཐབས་ཟེར་བ་སོགས་ཀྱི་ཐད་ལའང་མཉམ་ལས་བྱ་རྒྱུ་ཡིན་ལུགས་བསྒྲགས།
ཨེ་ཤ་ཡའི་ལྷོ་ཤར་གྱི་རྒྱལ་ཁབ་ཁ་ཤས་ཀྱིས་ཨ་རིས་རྒྱ་ནག་ལ་སྒོ་ཁྲལ་སྤར་བའི་དབང་གིས་རྒྱ་ནག་གི་དངོས་ཟོག་འབོར་ཆེན་འདྲེན་འོང་བྱེད་པར་དོགས་ཟོན་བྱེད་བཞིན་ཡོད་སྟབས། རྒྱ་ནག་གིས་ཝེ་ཐི་ནམ་ལ་རྒྱ་ནག་གི་རིན་བབ་སླ་བའི་ཅ་དངོས་རྣམས་ཕྱིར་ཚོང་བྱེད་མུས་ཡིན་ལ། ཝེ་ཐི་ནམ་རྒྱལ་ཁབ་ནི་ལྷོ་ཤར་ཨེ་ཤ་ཡའི་ཚོང་དོན་འཕེལ་རྒྱས་འགྲོ་མུས་ཡིན་པའི་རྒྱལ་ཁབ་ཅིག་ཡིན་ཞིང་། ཉེ་བའི་ལོ་འགའི་རིང་རྒྱ་ནག་གི་མ་འཇོག་འཕེལ་རྒྱས་སུ་སོང་བ་དང་བསྟུན། བཟོ་སྐྲུན་པ་ཚོས་ངལ་རྩོལ་གྱི་འགྲོ་གྲོན་དམའ་བ་དང་ཨ་རིའི་ཁྲལ་འཇལ་ལ་གཡོལ་ཐབས་བྱེད་ཆེད་རྒྱ་ནག་དང་འབྲེལ་འདྲིས་བྱེད་མུས་ཡིན་པའི་ཁར། ཕྱི་ལོ་ ༢༠༡༧ ནས་ ༢༠༢༤ བར་རྒྱ་ནག་དང་ཝེ་ཐི་ནམ་གཉིས་ཀྱི་ཚོང་འབྲེལ་ལས་ལ་འཕེལ་རྒྱས་ཤུགས་ཆེན་ཕྱིན་ནས། ཨེ་ཤ་ཡའི་ཤར་ལྷོའི་ཚོང་ཤག་ཆེ་ཤོས་སུ་གྱུར་ཡོད།
གནད་དོན་དབྱེ་ཞིབ་པ་ཁག་ཅིག་གིས། ད་ལན་ཨ་རིས་རྒྱ་ནག་གི་དངོས་ཟོག་ལ་སྒོ་ཁྲལ་ཤུགས་ཆེན་སྤར་ནས། འཛམ་གླིང་གི་སྟོབས་ཆེན་རྒྱལ་ཁབ་གཉིས་ཀྱིས་ཚོང་དོན་དམག་འཁྲུག་གསར་པ་ཞིག་སློང་གིན་ཡོད་པའི་དུས་སྐབས་འདིར། རྒྱ་ནག་གི་མགོ་ཁྲིད་ཞི་ཅིན་ཕིན་གྱིས་སླར་ཡང་འཛམ་གླིང་གི་མི་འབོར་མང་བའི་ཨེ་ཤ་ཡའི་ལྷོ་རྒྱུད་ཀྱི་རྒྱལ་ཁབ་ཁག་ཏུ་བསྐྱོད་ནས། ཚོང་དོན་དང་མཉམ་འབྲེལ་གྱི་ལས་དོན་ཐད་གྲོས་མཐུན་སོགས་འཇོག་གིན་ཡོད་པ་ནི། པེ་ཅིན་སྲིད་གཞུང་གིས་ཨ་རིས་རྒྱལ་ཁབ་གཞན་དག་ཏུ་སྒོ་ཁྲལ་སྤར་བའི་ཁེ་ཕན་དང་བསྟུན། རྒྱ་ནག་གི་ཚོང་དོན་དང་དཔལ་འབྱོར་འཕེལ་རྒྱས་གཏོང་ཐབས་ལ་དམིགས་འབེན་གསར་པ་ཞིག་འཛིན་གྱིན་ཡོད་པའི་ཚོད་དཔག་བྱེད་ཀྱིན་འདུག་ལ། ཉེ་བའི་བདུན་ཕྲག་འགའི་རིང་པེ་ཅིང་སྲིད་གཞུང་གིས་ཨ་རིས་སྒོ་ཁྲལ་སྤར་བའི་ཁེ་ཕན་དང་བསྟུན། ཨ་རི་དང་ཚོང་དོན་གཉེར་མུས་ཡིན་པའི་རྒྱལ་ཁབ་གཙོས། དམིགས་གསལ་ཡུ་རོབ་དང་ཨེ་ཤ་ཡ་ཤར་ལྷོའི་ཁུལ་གྱི་རྒྱལ་ཁབ་ཁག་དང་གྲོས་མོལ་བྱས་ཏེ་ཚོང་འབྲེལ་མཉམ་ལས་རྒྱ་སྐྱེད་གཏོང་ཐབས་བྱེད་མུས་ཡིན་པ་རེད།
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།
