རྒྱལ་སྤྱིའི་འགྲོ་བ་མིའི་ཐོབ་ཐང་གི་ཞབས་ཕྱི་ཚོགས་པའི་སྙན་ཐོའི་ནང་རྒྱ་ནག་གཞུང་གིས་རྒྱལ་ཚོགས་སུ་དབང་ཤུགས་སྐྱེད་ནས་འགྲོ་བ་མིའི་ཐོབ་ཐང་ཐད་ཞུ་གཏུག་བྱེད་མཁན་མང་པོ་བཀག་སྡོམ་བྱེད་ཀྱིན་ཡོད་པ་ཐེར་འདོན་བྱས་འདུག
ཁ་སང་ཕྱི་ཚེས་ ༢༨ ཉིན་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཞབས་ཕྱི་ཚོགས་པས( International Service for Human Right) རྒྱ་ནག་གཞུང་གིས་རྒྱལ་ཚོགས་ཀྱི་སྤྱི་ཚོགས་འབྲེལ་ལམ་བཀག་སྡོམ་བྱེད་པར་འབད་བརྩོན་བྱེད་མུས་ཡིན་པ་(CHINA’S EFFORTS TO BLOCK CIVIL SOCIETY ACCESS TO THE UNITED NATIONS) དང་འབྲེལ་བའི་ཤོག་ངོས་ ༦༢ ཅན་གྱི་སྙན་ཐོ་ཞིག་བཏོན་པའི་ནང་། རྒྱ་ནག་གཞུང་གིས་བོད་དང་། ཡུ་གུར་བ། ཧོང་ཀོང་བ་སོགས་ཀྱི་ལས་འགུལ་བས་རྒྱལ་ཚོགས་སུ་ཞུ་གཏུག་བྱས་པའི་ལས་དོན་ ༤༡ ལ་འགོག་རྐྱེན་བཟོས་དང་བཟོ་མུས་ཡིན་སྐོར་སོགས་གསལ་འདུག
སྙན་ཐོ་དེའི་ནང་། འགྲོ་བ་མིའི་ཐོབ་ཐང་སྲུང་སྐྱོབ་པ་དང་སྤྱི་ཚོགས་འདུམ་སྒྲིག་གི་ལས་དོན་གཉེར་མཁན་གྱི་ཚོགས་པ་མང་པོ་ཞིག་གིས། འགྲོ་བ་མིའི་ཐོབ་ཐང་གི་གནས་བབ་གོང་མཐོར་དང་། དམངས་གཙོའི་འགན་ཁུར་གྱི་འདུ་ཤེས་གོང་མཐོར་གཏོང་སླད་རྒྱལ་སྤྱིའི་སྤྱི་ཚོགས་སུ་ཞབས་ཕྱི་མི་དམན་པ་ཞིག་སྒྲུབ་ཀྱི་ཡོད་ཅིང་། ཚོགས་ཁག་དེ་དག་གི་རོགས་འདེགས་དང་ཞབས་ཞུ་ལ་བརྟེན་ནས་རྒྱལ་སྤྱིའི་སྤྱི་ཚོགས་སུ་མནར་གཅོད་མྱོང་མུས་ཡིན་པའི་མི་མང་རྣམས་ལ་འགེབ་སྲུང་དང་། བཙན་གནོན་འོག་ཡོད་པ་རྣམས་ལ་སྔར་མེད་ཀྱི་རང་དབང་གི་སྨྲ་ལྕེ་གསར་པ་ཞིག་སྤྲད་དེ། འཛམ་གླིང་ཁྱོན་ཡོངས་ལ་ཤུགས་རྐྱེན་མི་དམན་པ་ཞིག་སྤྲད་ཡོད། ཅེས་དང་། ཕྱི་ལོ་ ༢༠༢༠ ནས་ ༢༠༢༤ སྟེ་འདས་པའི་མི་ལོ་ལྔ་ལྷག་གི་རིང་། མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ཚན་པའི་ལས་དོན་ཁག་ལ་ཆ་ཤས་ལེན་སྐབས། རྒྱ་ནག་གཞུང་གིས་ཚོགས་ཞུགས་རྒྱལ་ཁབ་ཀྱི་དབང་ཆ་བེད་སྤྱད་དེ། རྒྱལ་སྤྱིའི་འགྲོ་བ་མིའི་ཐོབ་ཐང་གི་གནས་བབ་སྲུང་སྐྱོབ་བྱེད་མཁན་གྱི་གཞུང་འབྲེལ་མིན་པའི་ཚོགས་པ་ཁག་ལ་དྲི་བ་མི་འདྲ་བ་ ༧༤༧ དྲིས་པའི་ཁྲོད་ནས་ལོ་རེར་ཚོགས་པ་དེ་དག་ལ་དྲི་བ་མི་འདྲ་བ་ ༡༤༩ རེ་དྲིས་ཏེ། འགྲོ་བ་མིའི་ཐོབ་ཐང་སྲུང་སྐྱོབ་བྱེད་མཁན་གྱི་གཞུང་སྒེར་མང་པོར་གནོན་ཤུགས་སྤྲད་ཡོད། ཅེས་གསལ་འདུག
སྙན་ཐོའི་ནང་གསལ་བ་ལྟར་ན། འདས་པའི་ལོ་ཤས་རིང་རྒྱ་ནག་གཞུང་གིས་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ཚན་པར་བཀག་སྡོམ་བྱས་པའི་ཞུ་གཏུག་དེ་དག་གི་ཁྲོད། རྒྱལ་སྤྱིའི་བུད་མེད་ཀྱི་ཐོབ་ཐང་དང་ཕོ་མོ་འདྲ་མཉམ་གྱི་ཚོགས་པ་(women’s rights and gender equality ) དང་། རྒྱལ་སྤྱིའི་བུད་མེད་ཀྱི་ཐོབ་ཐང་གི་ཐེབས་རྩ་(Global Fund for Women’s Rights )། དེ་བཞིན་མ་ལ་ལའི་ཐེབས་རྩ་སོགས་ཀྱི་བུད་མེད་ཀྱི་ཐོབ་ཐང་དང་འབྲེལ་བའི་གནད་དོན་དང་། གཞུང་ཁོངས་མིན་པའི་ཚོགས་སྡེ་ ༡༥ ཡིས་དྲིས་པའི་འགྲོ་བ་མིའི་ཐོབ་ཐང་གི་གནས་བབ་དང་། ཆོས་དད་རང་མོས་ཀྱི་གནད་དོན། མི་རིགས་རྩ་མེད་བཟོ་ཐབས་བྱེད་མུས་ཡིན་པའི་སྲིད་ཇུས་དང་འབྲེལ་བའི་གནད་དོན་སོགས་ཚུད་ཡོད། ཅེས་དང་། རྒྱ་ནག་གིས་འགྲོ་བ་མིའི་ཐོབ་ཐང་གི་གནས་བབ་བརྩོན་ལེན་བྱེད་མཁན་གྱི་གཞུང་ཁོངས་མིན་པའི་ཚོགས་པའི་དྲ་ཚིགས་སུ་ཐའེ་ཝན་དང་ཧོང་ཀོང་། མཱ་ཁའོ་བཅས་ལ་རྒྱ་ནག་གི་ཐའེ་ཝན་ཞིང་ཆེན་དང་རྒྱ་ནག་གི་ཧོང་ཀོང་དམིགས་བསལ་སྲིད་འཛིན་ས་ཁུལ། དེ་བཞིན་རྒྱ་ནག་གི་མཱ་ཁའོ་དམིགས་བསལ་སྲིད་འཛིན་ས་ཁུལ་ཞེས་བྲིས་ཡོད་མེད་སོགས་ལ་ཞིབ་བཤེར་བྱས་ཡོད་འདུག
ཡང་སྙན་ཐོའི་ནང་། ཞི་ཅིན་ཕིང་གིས་རྒྱ་ནག་གི་དབང་ཆ་བཟུང་རྗེས། རྒྱལ་ནང་གི་སྤྱི་ཚོགས་ཁྲོད་དྲག་གནོན་ཤུགས་ཆེན་བྱས་ཏེ། མི་མང་གི་མངོན་འདོད་སྣང་མེད་དུ་བཞག་ནས་དབང་ཆ་སྒེར་སྤྱོད་ཀྱི་སྟངས་འཛིན་ཤུགས་ཇེ་ཆེར་བཏང་ཡོད་སྟབས། འཛམ་གླིང་མཉམ་འབྲེལ་རྒྱལ་ཚོགས་དང་ལྷག་པར་དུ་སུད་སི་ཇི་ནི་ཝ་རུ་རྟེན་གཞི་བྱས་པའི་འགྲོ་བ་མིའི་ཐོབ་ཐང་ལྟ་ཞིབ་ཚོགས་པ་ནི། རྒྱ་ནག་གི་འགྲོ་བ་མིའི་ཐོབ་ཐང་འཐབ་རྩོད་པ་ཚོས་ཞུ་གཏུག་དང་དེབ་འགོད། དཔང་པོ་བྱེད་པའི་ལམ་ཁ་མཐའ་མར་གྱུར་ཡོད་ཀྱང་། རྒྱ་ནག་གཞུང་གིས་གཞུང་སྒེར་ཁག་གི་དྲ་ལམ་སོགས་ནས་བོད་དང་། ཤར་ཊུར་ཀི་སི་ཐན། ཧོང་ཀོང་སོགས་ཀྱི་མིང་ཐོག་ནས་འགྲོ་བ་མིའི་ཐོབ་ཐང་གི་གནད་དོན་དང་འབྲེལ་བའི་སྐོར་ལ་འདྲི་རྩད་བྱེད་སྐབས། འཆར་ངོས་སུ་ཁྱེད་རང་གིས་འབྲི་ནོར་ཐེབས་སོང་ཞེས་གསལ་བ་ལས། ཞུ་གཏུག་དང་སྙན་ཞུའི་རིགས་འབུལ་ཐུབ་ཀྱི་མེད་པའི་ཁར། བོད་དང་། ཡུ་གུར། ཧོང་ཀོང་བ་སོགས་ཀྱི་ལས་འགུལ་བ་རྣམས་ལ་གནོན་ཤུགས་དང་རྒྱལ་མཚམས་ལས་བརྒལ་ནས་དྲག་གནོན་བྱེད་ཀྱི་ཡོད། ཅེས་གསལ་འདུག
རྒྱ་ནག་ནི་མཉམ་འབྲེལ་རྒྱལ་ཚོགས་ཀྱི་ཚོགས་ཞུགས་རྒྱལ་ཁབ་སྟོབས་ཤུགས་ཆེ་ཤོས་གྲས་ཀྱི་གཅིག་དང་། ཨ་རི་དང་ཨུ་རུ་སུའི་མཉམ་དུ་བདེ་འཇགས་ལྷན་ཚོགས་(Security Council) ཀྱི་གཏན་འཇགས་འཐུས་མི་ལྔའི་གྲས་ཀྱི་གཅིག་ཡིན་འདུག འདི་ལོར་རྒྱ་ནག་གིས་མཉམ་འབྲེལ་རྒྱལ་ཚོགས་ཀྱི་རྒྱུན་ལྡན་འགྲོ་གྲོན་གྱི་ལྔ་ཆ་གཅིག་འདོན་སྤྲོད་བྱ་རྒྱུ་ཡིན་སྟབས། དེ་ནི་ཨ་རི་ཕུད་པའི་རྒྱལ་ཚོགས་སུ་མ་དངུལ་མང་ཤོས་གཏོང་མཁན་དེ་ཆགས་ཡོད་ཀྱང་། འདི་ལོའི་ཕྱི་ཟླ་ ༢ ཚེས་ ༥ ཉིན་སྲིད་འཛིན་ཊོམ་ཕུ་མཆོག་གིས་ཨ་རི་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ལྷན་ཚོགས་ནས་ཕྱིར་འཐེན་དང་རྒྱལ་ཚོགས་ལ་སྤྲོད་བཞིན་པའི་རོགས་དངུལ་མཚམས་འཇོག་གནང་ཡོད་སྟབས། ད་ལྟ་རྒྱ་ནག་ནི་རྒྱལ་ཚོགས་ཀྱི་གཏན་འཇགས་ཚོགས་མིའི་ཁོངས་ཀྱི་རྒྱལ་ཁབ་སྟོབས་ཤུགས་ཆེ་ཤོས་དེར་གྱུར་ཡོད།
སྤྱིར་ལོ་ལྟར་ཇི་ནི་ཝ་རུ་འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་སུ་རྒྱ་ནག་གི་འགྲོ་བ་མིའི་ཐོབ་ཐང་གི་གནས་བབ་ཐད་དུས་བཀག་བསྐྱར་ཞིབ་ཀྱི་ལྷན་ཚོགས་འཚོག་གི་ཡོད་ཅིང་། འདས་ལོའི་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་བསྐྱར་ཞིབ་ཀྱི་ལྷན་ཚོགས་ཐེངས་བཞི་པ་དང་བསྟུན། རྒྱལ་ཚོགས་ཀྱིས་བོད་ནང་གི་འགྲོ་བ་མིའི་ཐོབ་ཐང་གི་གནས་བབ་གསལ་སྟོན་གྱི་ཟུར་ཚོགས་ཤིག་ཀྱང་སྐོང་འཚོག་གནང་ཡོད་ཅིང་། ལྷན་ཚོགས་དེར་སྐབས་དེའི་ཨ་རིའི་བོད་དོན་དམིགས་བསལ་འབྲེལ་མཐུད་པ་ལྕམ་སྐུ་ཨུ་ཛ་ར་ཛེ་ཡ་ (Uzra Zeya) མཆོག་དང་། སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས། བོད་དོན་ལས་འགུལ་བསྟི་གནས་ཁང་གི་ངེས་སྟོན་པ་བཀྲས་མཐོང་བསྟན་འཛིན་ལྷ་སྒྲོན་ལགས། རྒྱལ་སྤྱིའི་བོད་དོན་ལས་འགུལ་ཁང་གི་ཉམས་ཞིབ་འགན་འཛིན་བུ་ཆུང་ཚེ་རིང་ལགས་བཅས་ཀྱིས་མཉམ་ཞུགས་གནང་སྟེ། བོད་ནང་གི་འགྲོ་བ་མིའི་ཐོབ་ཐང་གི་གནས་བབ་ཛ་དྲག་ཅན་དུ་གྱུར་ཡོད་པའི་གནས་སྟངས་འགྲེལ་བརྗོད་གནང་ཡོད་པ་རེད།
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།
