ཟླ་གཉིས་རིང་ཕྱི་དྲིལ་བོད་ཀྱི་འགྲེམས་སྟོན་ཁང་གིས་བོད་ཀྱི་ཆབ་སྲིད་དང་ཆོས་རིག་སོགས་ཀྱི་ཐོག་ཞབས་འདེགས་ཞུས་པའི་བུད་མེད་གྲངས་ ༡༥ གཙོ་འདོན་བྱས་པའི་འགྲེམས་སྟོན་ཞིག་བྱེད་བཞིན་འདུག
དེ་རིང་ཕྱི་ཚེས་ ༣༠ ཉིན་གྱི་སྔ་དྲོའི་ཆུ་ཚོད་ ༡༠།༠༠ ཐོག་གངས་སྐྱིད་བོད་ཀྱི་འགྲེམས་སྟོན་ཁང་དུ། ཕྱི་དྲིལ་བོད་ཀྱི་འགྲེམས་སྟོན་ཁང་དབུ་བརྙེས་ནས་ལོ་ངོ་ ༢༥ འཁོར་བའི་དུས་དྲན་དང་བསྟུན། བོད་ཀྱི་བུད་མེད་ཅེས་པའི་བརྗོད་གཞིའི་ཐོག་དུས་ཐུང་འགྲེམས་སྟོན་དབུ་འབྱེད་ཀྱི་མཛད་སྒོ་ཞིག་འཚོགས་སོང་། མཛད་སྒོའི་ཐོག་སྐུ་མགྲོན་གཙོ་བོ་བཀའ་ཟུར་རིན་ཆེན་མཁའ་འགྲོ་མཆོག་དང་། བོད་མིའི་སྒྲིག་འཛུགས་ཀྱི་ཕྱི་དྲིལ་དྲུང་ཆེ་ཀརྨ་ཆོས་དབྱིངས་ལགས། བོད་ཀྱི་འགྲེམས་སྟོན་ཁང་གི་འགན་འཛིན་བསྟན་འཛིན་སྟོབས་ལྡན་ལགས། བོད་ཀྱི་བུད་མེད་ལྷན་ཚོགས་ཀྱི་ཚོགས་གཙོ་ཚེ་རིང་སྒྲོལ་མ་ལགས། དེ་བཞིན་གཞུང་ཁོངས་མིན་པའི་ཚོགས་པ་ཁག་གི་སྐུ་ཚབ་བཅས་མཉམ་ཞུགས་གནང་འདུག
ཐེངས་འདིའི་དུས་ཐུང་སྟོན་འགྲེམས་སྟོན་སྐོར་ལ་བོད་ཀྱི་འགྲེམས་སྟོན་ཁང་གི་འགན་འཛིན་བསྟན་འཛིན་སྟོབས་ལྡན་ལགས་ཀྱིས་འདི་གའི་གསར་འགོད་པར། དེ་རིང་བོད་ཀྱི་འགྲེམས་སྟོན་ཁང་དབུ་བརྙེས་ནས་ལོ་ངོ་ ༢༥ འཁོར་བའི་དུས་དྲན་དང་བསྟུན་ནས། བོད་ཀྱི་བུད་མེད་སྐོར་གྱི་དུས་ཐུང་འགྲེམས་སྟོན་དམིགས་བསལ་གྱིས་གལ་ཆེན་པོ་ཆགས་ཡོད། བོད་ཀྱི་དཔའ་མོ་དང་། རྒྱལ་ཞེན་བུད་མེད། དེ་བཞིན་ཨ་མ་སོགས་བུད་མེད་མང་པོའི་སྐུ་ལས་བསྐྱོན་པ་ལ་བརྟེན་ནས་བཙན་བྱོལ་གཞུང་གཞན་དང་མ་འདྲ་བར་ཚགས་ཚུད་ཡོང་ཡོད། ཡིན་ནའང་ཁོང་རྣམ་པའི་བྱས་རྗེས་སྤྱི་ཚོགས་དྲ་ལམ་དང་དྲིལ་བསྒྲགས་སོགས་སུ་དེ་ཙམ་མཐོང་ཐུབ་ཀྱི་མེད་པ་རེད། ད་ལན་གྱི་འགྲེམས་སྟོན་འདི་བརྒྱུད་ནས་ཁོང་རྣམས་ཀྱིས་ལུས་སྲོག་བློས་བཏང་བའི་རྒྱུ་མཚན་ཡིད་ལ་བཅངས་ནས་འགྲོ་ཐུབ་པ་ཞིག་བྱ་རྒྱུ་ཡིན་པ་མ་ཟད། འདི་ཡང་འགྲེམས་སྟོན་ཙམ་མིན་པར་བོད་མི་རིགས་ཀྱི་འཐབ་རྩོད་ཁྲོད་ཁོང་རྣམ་པའི་བྱས་རྗེས་ནང་བོད་ཀྱི་གཞོན་སྐྱེས་རྣམས་འཁྲིད་ཐུབ་པའི་སེམས་ཤུགས་སྤར་རྒྱུ་དེ་ཡིན། ཐེངས་འདིའི་འགྲེམས་སྟོན་ནང་ཕྱི་ལོ་ ༡༩༥༡ ནས་ད་ལྟའི་བར་རྒྱ་ནག་གཞུང་གིས་བོད་དུ་བཙན་འཛུལ་བྱས་སྐབས་ངོ་རྒོལ་བྱས་ཏེ་འདས་གྲོངས་ཕྱིན་པའི་དཔའ་མོ་ ༥ གཙོས། བོད་ཀྱི་ཤེས་ཡོན། ཆོས་ལུགས། རིག་གཞུང་སོགས་སུ་ཞབས་འདེགས་ཞུས་པའི་བུད་མེད་གྲངས་ ༡༥ གཙོ་འདོན་བྱས་ཏེ་འགྲེམས་སྟོན་བྱེད་བཞིན་ཡོད། ཅེས་འགྲེལ་བརྗོད་གནང་བྱུང་།
དུས་ཐུང་འགྲེམས་སྟོན་འདིའི་གལ་གནད་སྐོར་ལ་བོད་ཀྱི་བུད་མེད་ལྷན་ཚོགས་ཀྱི་ཚོགས་གཙོ་ཚེ་རིང་སྒྲོལ་མ་ལགས་ཀྱིས་འདི་གའི་གསར་འགོད་པར། འདི་ལོ་བོད་ཀྱི་འགྲེམས་སྟོན་ཁང་དབུ་བརྙེས་ནས་ལོ་ངོ་ ༢༥འཁོར་བའི་དུས་དྲན་དང་བསྟུན་ནས་བརྗོད་གཞི་མང་པོའི་ཐོག་འགྲེམས་སྟོན་བྱ་འཆར་འདུག ཐོག་མར་བོད་ཀྱི་བུད་མེད་ཀྱི་བརྗོད་གཞི་འདི་གལ་ཆེན་པོར་བརྩིས་ནས་འགྲེམས་སྟོན་བྱས་པར་དགའ་ཚོར་ཆེན་པོས་ཐུགས་རྗེ་ཆེ་ཞུ་རྒྱུ་ཡིན། ཨ་མ་ནི་ཁྱིམ་ཚང་ཞིག་མཚོན་ན་གལ་ཆེན་པོ་ཞིག་ཡིན་པ་མ་ཟད། འདས་པའི་བོད་ཀྱི་ཆབ་སྲིད་ལ་མཚོན་ན། ཕྱི་ལོ་ ༡༩༥༩ ཟླ་ ༣ པ་ནས་བཟུང་རྒྱ་ནག་གཞུང་གིས་བོད་ལ་བཙན་འཛུལ་བྱས་པ་རེད། བོད་ཀྱི་བུད་མེད་རྣམས་ཀྱིས་ཀྱང་དཔའ་མ་ཞུམ་པར་བོད་མི་རིགས་དང་། ཆོས་རིག ཆབ་སྲིད། ཁོར་ཡུག་སོགས་སྲུང་སྐྱོབ་བྱས་ཏེ་སྐུ་ལས་ཧ་ལས་བ་བསྐྱོན་ཡོད། དེ་དག་ལ་རྗེས་དྲན་བྱ་རྒྱུ་ནི་ང་ཚོ་ཚང་མར་འགན་འཁྲི་ཡོད་ལ། བོད་ཀྱི་བདེན་མཐའ་མ་གསལ་བར་མུ་མཐུད་གནས་དགོས་པ་ཧ་ཅང་གལ་ཆེན་པོ་རེད། ཅེས་འགྲེལ་བརྗོད་གནང་བྱུང་།
སྐུ་མགྲོན་གཙོ་བོ་བཀའ་ཟུར་རིན་ཆེན་མཁའ་འགྲོ་མཆོག་གིས། དེ་རིང་བོད་ཀྱི་བུད་མེད་ཀྱི་བརྗོད་གཞིའི་འགྲེམས་སྟོན་ཐོག་བཅར་ཐུབ་པར་དགའ་བོ་བྱུང་། རང་ཉིད་ཀྱི་མི་ཚེའི་གནས་སྟངས་དང་བུད་མེད་ཅིག་ཡིན་པའི་ཆ་ནས། མིའི་སྤྱི་ཚོགས་ནང་དུ་བུད་མེད་ལ་ཡིད་ཆེས་དང་བློ་སྟོབས་ཡོད་པ་དང་། དཀའ་ལས་རྒྱག་ཐུབ་མཁན་གྱི་ཐོག་ནས་གལ་ཆེན་པོ་ཞིག་ཆགས་ཡོད་བསམ་གྱི་འདུག འགྲེམས་སྟོན་ལས་བོད་ཀྱི་བུད་མེད་བགྲེས་པ་རྣམས་ཀྱིས་དུས་ལ་བབས་པའི་ཐོག་ནས་བློ་སྟོབས་ཇི་ཙམ་གནང་བ་མཇལ་དུས་རང་ཉིད་ཀྱིས་ཡིད་ཆེས་བྱས་པ་ནོར་མི་འདུག བུད་མེད་ཅིག་ཡིན་པའི་ཆ་ནས་བོད་ཀྱི་མི་རིགས་དང་། རྩ་དོན། ཆོས་རིག་སོགས་ཀྱི་ཆེད་དུ་མི་ཚེ་བློས་བཏང་འདུག་པའི་ཚོར་བ་བྱུང་། ཞེས་དང་། ང་ཚོའི་མི་ཚེ་ནི་ཆབ་སྲིད་དང་མཉམ་དུ་སྐྱེས་པ་ཞིག་ཡིན་པས་ལོགས་ཀ་ཕྱེ་རྒྱུ་མི་འདུག རྩ་དོན་ཞེས་པའི་ཐོག་༧གོང་ས་མཆོག་གིས་ནམ་རྒྱུན་ཆོས་དང་རིག་གཞུང་གསུང་གི་ཡོད་པ་བཞིན། བོད་མི་ཞིག་ཡིན་པའི་ཆ་ནས་ཆོས་དང་རིག་གཞུང་ལ་ཐུགས་སྣང་དགོས་པ་མ་ཟད་དང་། བུད་མེད་རྣམས་ཀྱིས་ཆོས་དང་རིག་གཞུང་ལ་ཐུགས་སྣང་གནང་ཚེ་ཁྱད་པར་ཆེན་པོ་བཟོ་ཐུབ་པའི་ཡིད་ཆེས་ཡོད། ཅེས་གསུངས་སོང་།
བོད་ཀྱི་འགྲེམས་སྟོན་ཁང་ནི་ཕྱི་ལོ་ ༡༩༩༨ ལོར་བཙན་བྱོལ་བོད་གཞུང་ཕྱི་དྲིལ་ལས་ཁུངས་ཀྱིས་མེག་གྷན་ཐེག་ཆེན་ཆོས་གླིང་གཙུག་ལག་ཁང་གི་སྒོ་ཆེན་འགྲམ་དུ་ཐོག་མར་གསར་འཛུགས་གནང་ཞིང་། ཕྱི་ལོ་ ༢༠༠༠ ལོའི་ ཟླ་ ༤ ཚེས་ ༣༠ ཉིན་༧གོང་ས་རྒྱལ་བ་རིན་པོ་ཆེ་མཆོག་ནས་འགྲེམས་སྟོན་ཁང་དངོས་སུ་དབུ་འབྱེད་མཛད། ཕྱི་ལོ་ ༢༠༡༧ ལོར་བོད་མིའི་སྒྲིག་འཛུགས་ཀྱི་ལྟེ་གནས་གངས་ཅན་སྐྱིད་གཤོངས་སུ་འགྲེམས་སྟོན་ཁང་གསར་རྒྱག་ལས་མགོ་ཚུགས་ཏེ། ཕྱི་ལོ་ ༢༠༢༡ ཟླ་ ༡༢ ནང་འགྲེམས་སྟོན་ཁང་གི་འཛུགས་སྐྲུན་ཡོངས་སུ་ལེགས་གྲུབ་བྱུང་། ཕྱི་ལོ་ ༢༠༢༢ ཟླ་ ༢ ཚེས་ ༩ ཉིན་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་དབུ་འབྱེད་གནང་། ད་ལྟའི་ཆར་བོད་ཀྱི་འགྲེམས་སྟོན་ཁང་ནང་ང་ཚོའི་ལེགས་བྱང་དང་། བོད་ཀྱི་ལོ་རྒྱུས། ༧རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་གི་མཛད་འཕྲིན། བཙན་འཛུལ། འགོག་རྒོལ། བྲོས་བྱོལ། བཙན་བྱོལ། དེང་སྐབས་ཀྱི་བོད། ཁོར་ཡུག བོད་མི་ཞིག་ཡིན་པའི་ཆ་ནས། ང་བོད་པ་ཡིན། འདི་ངའི་ལོ་རྒྱུས་ཡིན་ཞེས་པ་སོགས་ཀྱི་བརྗོད་གཞིའི་ཐོག་རྒྱུན་ལྡན་འགྲེམས་སྟོན་གནང་བཞིན་འདུག དེ་བཞིན་ལོ་ལྟར་བོད་ཀྱི་འགྲེམས་སྟོན་ཁང་གི་ངོས་ནས་དུས་ཐུང་འགྲེམས་སྟོན་དང་སྐོར་བསྐྱོད་འགྲེམས་སྟོན་གནང་སྟེ་རྒྱལ་སྤྱིའི་ཐོག་བོད་དོན་གོ་རྟོགས་སྤེལ་བཞིན་ཡོད་པ་རེད།
གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། པདྨ་མཚོ།
