བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་བོད་ཕྱི་ནང་གཉིས་ཀྱི་བོད་མི་ཡོངས་ཀྱི་ཚབ་ཞུས་ཏེ་ཁེ་ན་ཌའི་གུ་ཡངས་སྲིད་དོན་ཚོགས་པའི་མགོ་ཁྲིད་ཀྱི་མར་ཁི་ཁར་ནི་མཆོག་ཁེ་ན་ཌའི་སྲིད་བློན་དུ་སླར་ཡང་འདེམས་ཐོན་བྱུང་བར་འཚམས་འདྲི་གནང་འདུག
སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་སྐུ་ཞབས་མར་ཁི་ཁར་ནི་མཆོག བོད་མི་སྤྱི་འཐུས་ལྷན་ཚོགས་ཀྱི་པར།
ཕྱི་ཟླ་ ༤ ཚེས་ ༢༩ ཉིན་ཁེ་ན་ཌའི་གུ་ཡངས་སྲིད་དོན་ཚོགས་པའི་མགོ་ཁྲིད་ཀྱི་མར་ཁི་ཁར་ནི་ (Mark Carney) མཆོག་ལ་འདི་ལོའི་ཁེ་ན་ཌའི་སྲིད་བློན་གྱི་འོས་བསྡུ་ལས་རྣམ་པར་རྒྱལ་ཡོད་པ་ལྟར། ཁ་སང་ཕྱི་ཚེས་ ༡ ཉིན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་འཚམས་འདྲིའི་འཕྲིན་ཡིག་ཅིག་ཕུལ་ཏེ། ཁེ་ན་ཌ་སྲིད་གཞུང་གིས་གཉིས་ཕན་དབུ་མའི་ལམ་གྱི་ཐོག་ནས་བོད་རྒྱའི་དཀའ་རྙོག་སེལ་ཐབས་ལ་མུ་མཐུད་རྒྱབ་སྐྱོར་གནང་རྒྱུའི་རེ་བ་ཡོད་སྐོར་སོགས་གསུངས་འདུག
ཚོགས་གཙོ་མཆོག་གི་འཕྲིན་ཡིག་ནང་། སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་དང་། བོད་ཕྱི་ནང་གཉིས་སུ་ཡོད་པའི་བོད་མི་ཡོངས་ཀྱི་ཚབ་བྱས་ཏེ། ང་ཚོས་ཁྱེད་རང་འོས་བསྡུ་ལས་རྒྱལ་ནས་ཁེ་ན་ཌའི་སྲིད་བློན་དུ་འདེམས་ཐོན་བྱུང་བར་སྙིང་དབུས་ནས་འཚམས་འདྲི་ཞུ་ཡི་ཡོད། ཁྱེད་རང་འོས་བསྡུ་ལས་རྣམ་པར་རྒྱལ་བ་འདིས། ཁེ་ན་ཌའི་མི་མང་གིས་ཁྱེད་ཀྱི་མགོ་ཁྲིད་བཟང་པོ་ལ་གཡོ་མེད་ཀྱི་ཡིད་ཆེས་དང་གདེང་འཇོག་ཡོད་པ་མཚོན་ཐུབ་ཅེས་དང་། ང་ཚོས་ཁེ་ན་ཌའི་གཞུང་མང་གཉིས་ཀྱིས་བོད་དོན་ཐད་ལ་གཡོ་མེད་ཀྱི་རྒྱབ་སྐྱོར་གནང་བར་ཐུགས་རྗེ་ཆེ་ཞུ་ཡི་ཡོད་ལ། ང་ཚོས་༧གོང་ས་རྒྱལ་བ་རིན་པོ་ཆེ་མཆོག་ཁེ་ན་ཌར་ཕེབས་སྐབས་སྣེ་ལེན་ཟབ་རྒྱས་ཞུས་པ་དང་། ཁེ་ན་ཌར་དུས་ཡུན་རིང་པོར་གནས་སྡོད་བྱེད་མཁན་གྱི་བོད་མི་རྣམས་ལ་གཅེས་སྐྱོང་དང་རྒྱབ་སྐྱོར་གནང་བར་ཐུགས་རྗེ་ཆེ་ཞུ། ཞེས་གསལ་འདུག
ཡང་འཕྲིན་ཡིག་ནང་། ང་ཚོས་ཁྱེད་ཀྱི་གཞུང་གིས་༧གོང་ས་རྒྱལ་བ་རིན་པོ་ཆེ་མཆོག་དང་དབུས་བོད་མིའི་སྒྲིག་འཛུགས་ཀྱིས་ཤར་སྐྱོད་གནང་མུས་ཡིན་པའི་གཉིས་ཕན་དབུ་མའི་ལམ་གྱི་ཐོག་ནས་བོད་རྒྱའི་དཀའ་རྙོག་སེལ་ཐབས་ལ་མུ་མཐུད་རྒྱབ་སྐྱོར་གནང་རྒྱུའི་རེ་བ་ཡོད། ཅེས་གསལ་འདུག
སྐུ་ཞབས་མར་ཁི་ཁར་ནི་མཆོག་ཕྱི་ལོ་ ༢༠༢༥ ལོའི་ཕྱི་ཟླ་ ༡ པོའི་ནང་སྲིད་བློན་དུ་འདེམས་ཐོན་བྱུང་སྟེ། ད་ལྟའི་ཆར་སྲིད་བློན་གྱི་ཕྱག་ལས་གནང་མུས་ཡིན་པ་རེད་ཅིང་། འདི་ལོའི་ཁེ་ན་ཊའི་སྲིད་བློན་གྱི་འོས་བསྡུའི་ཁྲོད། ལྗང་ཁུ་སྲིད་དོན་ཚོགས་པར་ (Green Party) ཞབས་བཀྱག་ ༡ དང་། (NDP) སྲིད་དོན་ཚོགས་པར་ཞབས་བཀྱག་ ༧། (Bloc Québécois) སྲིད་དོན་ཚོགས་པར་ཞབས་བཀྱག་ ༢༣། རྙིང་ཞེན་སྲིད་དོན་ཚོགས་པར་ཞབས་བཀྱག་ ༡༤༤། གུ་ཡངས་སྲིད་དོན་ཚོགས་པར་ཞབས་བཀྱག་ ༡༦༩ ཐོབ་སྟེ། སྲིད་དོན་ཚོགས་པ་དེའི་སྲིད་བློན་འོས་མི་མག་ཁར་ནེ་མཆོག་བསྐྱར་དུ་སྲིད་བློན་དུ་འདེམས་ཐོན་བྱུང་ཡོད་འདུག
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།
