༧གོང་ས་མཆོག་ལ་བལ་ཡུལ་ཤངས་དགའ་ལྡན་ཆོས་འཁོར་གླིང་དང་། ཆ་ཕྲེང་མི་མང་ཚོགས་ཁག་ཅིག དེ་བཞིན་ཕག་རི་མི་མང་བཅས་ནས་ཚེ་དཔག་མེད་དྭངས་མ་བཅུད་འདྲེན་གྱི་སྒོ་ནས་བརྟན་བཞུགས་བསྟར་འབུལ་ཞུས་སོང་།
དེ་རིང་སྔ་དྲོ་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་༧གོང་ས་རྒྱལ་བ་རིན་པོ་ཆེ་མཆོག་ལ་བལ་ཡུལ་ཤངས་དགའ་ལྡན་ཆོས་འཁོར་གླིང་དང་། ཆ་ཕྲེང་མི་མང་ཚོགས་ཁག་ཅིག ཕག་རི་མི་མང་བཅས་ནས་ཚེ་དཔག་མེད་དྭངས་མ་བཅུད་འདྲེན་གྱི་སྒོ་ནས་བརྟན་བཞུགས་བསྟར་འབུལ་ཞུས་སོང་། སྐབས་དེར་༧མགོན་པོ་གང་ཉིད་མཆོག་གིས། དེ་རིང་འདིར་བལ་ཡུལ་ཤང་དགའ་ལྡན་ཆོས་འཁོར་གླིང་དང་། ཕག་རི་བ་གཞིས་བྱེས་མི་མང་། ཆ་ཕྲེང་མི་མང་ཚོགས་ཁག་ཅིག་བཅས་ནས་བརྟན་བཞུགས་ཕུལ་གྱི་ཡོད་རེད། ཚང་མའི་སེམས་ཤུགས་རྩེ་གཅིག་ཡིན་པ་གསལ་བོ་ཞེ་དྲགས་རེད། ཚང་མར་ཐུགས་རྗེ་ཆེ་ཞུ་རྒྱུ་ཡིན། ངོས་རང་ལ་ཆ་བཞག་ན་སྐུ་འབུམ་དུ་སྐྱེས། དེ་ནས་ཡར་ལྷ་སར་བསླེབས་པ་དང་༧རྒྱལ་དབང་གི་མཚན་འཁྱེར་བའི་ཐོག་ནས་བསྟན་པ་དང་འགྲོ་བའི་དོན་རྒྱ་ཆེ་ཐག་ཆོད་བྱས་ཡོད།
རྒྱ་མིས་དོགས་ཟོན་བྱེད་དགོས་པ་ཆགས་ནས་བསྡད་པ་རེད། དེ་ནས་མཐའ་མའི་འབྲས་བུར་བཙན་བྱོལ་བ་ཆགས་ནས་རྒྱ་གར་དུ་བསླེབས་བསྡད་ཡོད། རྒྱ་གར་དུ་བསླེབས་རྗེས་རྒྱ་གར་ཤར་ནུབ་དང་དབུས་ཀྱི་ས་ཁུལ་ཁག་ནས་དད་འདུས་ཀྱི་སྐྱེ་བོ་ཁྲི་ཕྲག་འབུམ་ཕྲག་གིས་དངོས་གནས་དྲང་གནས་རྩེ་གཅིག་ཏུ་དད་པ་དང་དགའ་ཞེན་བྱས་ནས་ངོས་ལ་ཐུག་གི་ཡོང་གི་ཡོད། རྒྱ་གར་གྱི་ཆོས་པ་ཚོ་ཆོས་ལ་དད་པ་མཐའ་གཅིག་ཏུ་ཡོད་ཀྱང་མེད་ཀྱང་། གང་ལྟར་ཏཱ་ལའི་བླ་མ་ཆབ་སྲིད་ཀྱི་མགོ་ཁྲིད་གལ་ཆེན་པོ་ཞིག་ཏུ་བརྩིས་ཏེ་དགའ་པོ་ཞེ་དྲགས་བྱེད་ཀྱི་འདུག ངོས་རྒྱ་གར་གྱི་ས་ཁུལ་འདྲ་མིན་དུ་སླེབས་སྐབས། རྒྱ་གར་གྱི་ཡུལ་མི་ཚོས་དགའ་མོས་ཆེན་པོ་གནང་གི་འདུག དེར་བརྟེན། ངོས་ཀྱི་ཚེ་ཅི་ཙམ་རིང་བ་དེ་ཚོད་ཀྱིས་ཕན་ཐོགས་ཅུང་ཙམ་ཡོང་གི་རེད་བསམ་པའི་སེམས་ནང་སྤོབས་པ་དང་གདེང་ཚོད་སྐྱེས་ཀྱི་འདུག ད་ལྟ་བར་དུ་རྒྱ་གར་ནང་མི་མང་ཕན་ཚུན་ལ་འབྲེལ་བ་བྱས་ཏེ་འབྲེལ་བ་ཡག་ཐག་ཆོད་ཡོད་ལ། ཚང་མས་དགའ་པོ་ཞེ་དྲགས་བྱེད་ཀྱིན་འདུག
ད་རྒྱ་ནག་ནང་ཆ་བཞག་ན། ནང་ཆོས་ཤུགས་ཆེ་རུ་འགྲོ་བཞིན་ཡོད། རིམ་པས་རྒྱ་ནག་ནང་ནང་ཆོས་ཏོག་ཙམ་དར་སྤེལ་ཐུབ་པའི་གནས་ཚུལ་ཞིག་ཕལ་ཆེར་མི་ཡོང་ངམ་བསམ་པ་ཞིག་འདུག དེ་འདྲའི་ཕྱོགས་ནས་རྒྱ་ནག་ནང་ལོགས་སུ་ཡིན་ནའང་། ནང་ཆོས་འཆད་སྤེལ་བྱས་ནས་ཕན་ཐོགས་ཏོག་ཙམ་བྱེད་ཐུབ་པ་ཞིག་དང་། གང་ལྟར་ལྷ་མོའི་ལྷ་མཚོའི་ནང་ནས་ཨ་ཀ་མ་ཞེས་གསུངས་པ་ནང་བཞིན་ངོས་ལ་མི་ལུས་འདི་འདྲ་ཞིག་ཐོབ་པ་རེད། སངས་རྒྱས་བཅོམ་ལྡན་འདས་བཀའ་དྲིན་ཅན་གྱི་བསྟན་པའི་ཞབས་འདེགས་སུ་ངོས་ནས་ལོ་བཅུ་ཕྲག་ཁ་ཤས་རིང་ལ་ཏན་ཏན་བསྟན་པའི་ཞབས་འདེགས་བསྒྲུབ་རྒྱུ་དང་སྟོན་པ་བཀའ་དྲིན་ཅན་གྱི་བཀའ་དྲིན་གསབ་ཐུབ་པ་ཞིག་བྱེད་ཐུབ་པའི་ཚོད་ཐིག་གི་འདུག
དེ་ནས་ད་ལྟའི་བར་དུ་ཧུར་ཐག་བྱས་པ་ཡིན་ལ། ཟི་ལིང་ནས་ཡོང་བའི་ཕྲུ་གུ་ཅིག་ལྷ་སར་རྒྱལ་དབང་གི་མཚན་འཁྱེར་ཏེ་བཞུགས་ཁྲི་སྒང་དུ་སྡོད་པ་མ་གཏོགས་གང་ཡང་ཤེས་ཀྱི་མེད་མོད། དེ་ནས་རིམ་བཞིན་ངོས་ནས་སྐད་ཆ་བཤད་རྒྱུ་གོམས་ནས་ཡོང་དུས། ལྷ་སར་བསྟན་པ་དང་འགྲོ་བའི་དོན་དུ་ཞབས་འདེགས་གང་འཚམ་བསྒྲུབས་པ་ཡིན། གཙོ་ཆེ་ཤོས་སེར་འབྲས་དགའ་གསུམ་དུ་སོ་སོས་གྲྭ་སྐོར་བྱས་པ་དང་ལྷ་ལྡན་སྨོན་ལམ་ཆེན་མོར་དམ་བཅའ་བཞག་པ་སོགས་དངོས་གནས་དྲང་གནས་འགྱོད་པ་མེད་པ་ཞིག་བྱས་པ་ཡིན། དེ་དུས་ངོས་ལ་མཚན་ཉིད་བསླབ་མཁན་གཙོ་བོ་སོག་པོའི་དགེ་རྒན་དངོས་གྲུབ་ཚོགས་གཉིས་རེད། དངོས་གྲུབ་ཚོགས་གཉིས་དཔེ་བཀའ་དྲིན་ཆེན་པོ་ཡིན། ཞེས་གསུངས།
གསར་འགོད་པ། སྐལ་བཟང་སྦྱིན་པ།
