༧གོང་ས་རྒྱལ་བ་རིན་པོ་ཆེ་མཆོག་ནས་དཀའ་ཚེགས་ཆེ་བའི་དུས་སྐབས་འདིར་ཁྱེད་ཀྱིས་ནུས་པ་དང་ལྡན་པའི་དབུ་ཁྲིད་་གནང་ཐུབ་པའི་ཡིད་ཆེས་ཡོད་ཅེས་ཐུགས་སྨོན་དང་བཅས་གསུངས་འདུག
དེ་རིང་༧གོང་ས་རྒྱལ་བ་རིན་པོ་ཆེ་མཆོག་ནས་འཇར་མན་གྱི་སྲིད་བློན་ཧྥི་རི་ཌི་རི་ཆི་ (Friedrich Merz)མཆོག་སྲིད་བློན་དུ་འདེམས་ཐོན་བྱུང་བར་འཚམས་འདྲི་མཛད་པའི་ནང་། ངོས་རང་ཆུང་བྱིས་པའི་དུས་ནས་འཇར་མན་གྱི་མི་མང་ལ་སེམས་ཐག་ཉེ་པོ་ཚོར་མྱོང་ཡོད། འདས་པའི་ལོ་ཤས་རིང་ངོས་རང་ཁྱེད་ཚོའི་རྒྱལ་ཁབ་ལ་ཐེངས་མང་ཕྱིན་པའི་གོ་སྐབས་བྱུང་། འཇར་མན་མི་མང་གིས་བོད་མིའི་རང་དབང་དང་། ཆེ་མཐོང་ཐོབ་ཆེད་འཚེ་མེད་ཞི་བའི་འཐབ་རྩོད་ལ་རྒྱབ་སྐྱོར་གནང་བ་དང་། ངོས་ནས་བྱམས་སྙིང་རྗེ་གོང་འཕེལ་དང་། འགྲོ་བ་མི་གཅིག་གྱུར་གྱི་འདུ་ཤེས། དེ་བཞིན་ཆོས་ལུགས་མཐུན་སྒྲིལ་གྱི་འགན་ཁུར་ལ་ཡུལ་དེའི་མང་ཚོགས་ནས་དོ་སྣང་གནང་བར་རྗེས་སུ་ཡི་རངས་ཞུ་རྒྱུ་ཡིན།
དེང་སང་འཛམ་གླིང་ཡོངས་ལ་དཀའ་ངལ་མང་པོ་འཕྲད་བཞིན་ཡོད། ངོས་ནས་ཁྱེད་ཚོས་དཀའ་ཁག་ཆེ་བའི་དུས་སྐབས་འདིར་ཁྱེད་ཀྱིས་ནུས་པ་དང་ལྡན་པའི་དབུ་ཁྲིད་གནང་ཐུབ་པའི་ཡིད་ཆེས་ཡོད། ངོས་རང་གིས་ཡུ་རོབ་མཐུན་ཚོགས་ཀྱི་ཁྱབ་ཁོངས་རྒྱལ་ཁབ་ཁག་གི་བདེ་དོན་དང་ཁེ་ཕན་ཐོག་མཉམ་རུབ་ཀྱི་ལས་དོན་གནང་བར་ཡིད་སྨོན་ཞུ་བཞིན་ཡོད། མཉམ་ལས་ཀྱི་སེམས་ཤུགས་འདིས་གཞན་ལ་སེམས་འགུལ་ཐེབས་ཐུབ་པའི་ཡིད་ཆེས་ཡོད་ལ། འཛམ་གླིང་ནང་ཞི་བདེ་དང་། དཔལ་འབྱོར་འཕེལ་རྒྱས་ལ་ཕན་ཐོགས་ཡོང་བའི་རེ་བ་ཡོད། ཅེས་དང་། འཇར་མན་གྱི་སྲིད་བློན་གྱིས་མི་མང་གི་རེ་བ་དང་སྨོན་འདུན་བཞིན་སྙིང་རྗེ་དང་ཞི་བདེ་ལྡན་པའི་འཛམ་གླིང་ཞིག་བསྐྲུན་རྒྱུར་ཞབས་འདེགས་བསྒྲུབ་ཐུབ་པའི་སྨོན་འདུན་ཞུ་ཡི་ཡོད། ཅེས་གསུངས་འདུག
ཧྥི་རི་ཌི་རི་ཆི་མཆོག་ནི་ཕྱི་ལོ་ ༡༩༥༥ ཟླ་ ༡༡ ཚེས་ ༡༡ ཉིན་འཇར་མན་ནུབ་ཁུལ་གྱི་བྷི་རི་ལོན་ (Brilon) གྲོང་གསེབ་ཏུ་སྐྱེས་ཤིང་། ཆུང་དུས་འཇར་མན་གྱི་བྷི་རི་ལོན་སློབ་གྲྭར་སློབ་སྦྱོང་གནང་། དེའི་རྗེས་ཕྱི་ལོ་ ༡༩༧༥ ལོར་འཇར་མན་གྱི་དམག་ཁུངས་སུ་ཞུགས། ཕྱི་ལོ་ ༡༩༧༦ ལོར་འཇར་མན་གྱི་བྷོན་མཐོ་རིམ་སློབ་གཉེར་ཁང་ (University of Bonn) དུ་ཁྲིམས་ལུགས་རིག་པའི་ཐོག་སློབ་སྦྱོང་གནང་། ཕྱི་ལོ་ ༡༩༨༥ ལོར་ཁྲིམས་ལུགས་རིག་པའི་སློབ་མཐར་ཕྱིན་རྗེས། ཕྱི་ལོ་ ༡༩༨༦ ནས་ ༡༩༨༩ བར་ལོ་ངོ་གསུམ་རིང་ཁྲིམས་དཔོན་གྱི་ཕྱག་ལས་གནང་། ཕྱི་ལོ་ ༡༩༨༩ ནས་ ༡༩༩༤ བར་ཡུ་རོབ་གྲོས་ཚོགས་སུ་ཕྱག་ལས་གནང་བ་མ་ཟད། ཕྱི་ལོ་ ༡༩༩༤ ནས་ ༢༠༠༩ བར་འཇར་མན་གྱི་དཔལ་འབྱོར་ལྷན་ཁང་གི་ཚོགས་མིར་འདེམས་ཐོན་གྱིས་ཕྱག་ལས་གནང་ཡོད་པ་རེད། དེ་ནས་ཕྱི་ལོ་ ༢༠༠༩ ནས་སློབ་སྟོན་པའི་ཕྱག་ལས་གནང་ཡོད་འདུག ཕྱི་ལོ་ ༢༠༢༢ ནས་ཡེ་ཤུའི་དམངས་གཙོ་སྲིད་དོན་ཚོགས་པའི་ཚོགས་གཙོའི་ཕྱག་ལས་གནང་། འདི་ལོའི་ཕྱི་ཟླ་ ༥ ཚེས་ ༦ ཉིན་འཇར་མན་གྱི་སྲིད་བློན་དུ་འདེམས་ཐོན་བྱུང་།
གསར་འགོད་པ། བསྟན་འཛིན་ཕུར་བུ།
རྩོམ་སྒྲིག་བྱེད་མཁན། པདྨ་མཚོ།
