བཀའ་ཟུར་༧སྐྱབས་རྗེ་ཀིརྟི་རིན་པོ་ཆེ་མཆོག་གི་མཛད་རྣམ་ཤར་སྟག་མོའི་བུ་ཞེས་པའི་འཕྲུལ་དེབ་འགྲེམས་སྤེལ་གྱི་མཛད་སྒོ་འཚོགས།

བཀའ་ཟུར་༧སྐྱབས་རྗེ་ཀིརྟི་རིན་པོ་ཆེ་མཆོག་གི་མཛད་རྣམ་ཤར་སྟག་མོའི་བུ་ཞེས་པའི་འཕྲུལ་དེབ་འགྲེམས་སྤེལ་གྱི་མཛད་སྒོ་འཚོགས་པ་དང་བསྟུན་མཛད་རྣམ་གྱི་སྐོར་ལ་བགྲོ་གླེང་ཞིག་ཀྱང་བྱས་སོང་།

དེ་རིང་ཉིན་རྒྱབ་ཆུ་ཚོད་ ༢ སྟེང་བོད་ཀྱི་དཔེ་མཛོད་ཁང་གི་ཚོགས་ཁང་དུ་ཀིརྟིའི་དགེ་རྩ་ཚོགས་པ་དང་ཀིརྟིའི་བྱེས་པ་གྲྭ་ཚང་ཐུན་མོང་གི་གོ་སྒྲིག་འོག བཀའ་ཟུར་༧སྐྱབས་རྗེ་ཀིརྟི་རིན་པོ་ཆེའི་སྲིད་དོན་མཛད་རྣམ་ཤར་སྟག་མོའི་བུ་ཞེས་པའི་འཕྲུལ་དེབ་འགྲེམས་སྤེལ་དང་ཕྱག་དེབ་དེའི་སྐོར་ལ་བགྲོ་གླེང་ཞིག་ཀྱང་འཚོགས་སོང་། མཛད་སྒོའི་སྐུ་མགྲོན་གཙོ་བོར་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་། བགྲོ་གླེང་དུ་བཀའ་ཟུར་ཐུབ་བསྟན་ལུང་རིགས་མཆོག་དང་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཟླ་བ་ཚེ་རིང་ལགས། བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས། རྩོམ་པ་པོ་དང་ཉམས་ཞིབ་པ་ཤེས་རབ་དར་རྒྱས་ལགས་བཅས་འདུག་ལ། གཞན་ཡང་བོད་མི་མང་སྤྱི་འཐུས་ཁག་ཅིག་དང་ཤེས་ཡོན་པ། ཉམས་ཞིབ་པ། སློབ་མ་སོགས་འཛོམས་འདུག་ལ། མཛད་སྒོའི་སྟེང་བགྲོ་གླེང་ནང་ཆ་ཤས་བཞེས་མཁན་རྣམས་ལ་སྐུ་མགྲོན་གཙོ་བོ་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་བརྒྱུད་ནས་ཕྱག་རྟགས་རེ་ཡང་གནང་སོང་།

ཀིརྟི་གྲྭ་ཚང་གི་སློབ་སྤྱི་སོ་རུ་དར་རྒྱས་ལགས་ཀྱིས་ཤར་སྟག་མོའི་བུ་ཞེས་པའི་འཕྲུལ་འགྲེམས་སྤེལ་དང་འབྲེལ་ནས་བགྲོ་གླེང་གི་དགོས་དམིགས་སྐོར་ངོ་སྤྲོད་གནང་སྐབས། སྤྱིར་༧སྐྱབས་རྗེ་བཀའ་ཟུར་ཀིརྟི་རིན་པོ་ཆེ་མཆོག་གི་མཛད་རྣམ་ཤར་སྟག་མོའི་བུ་ཞེས་པ་དེ་ཕྱི་ལོ་ ༢༠༢༣ ཟླ་ ༩ ཚེས་ ༢ ཉིན་དབུ་འབྱེད་གནང་གྲུབ་ཟིན་ནའང་། ཐག་རིང་དུ་ཡོད་པའི་དོ་སྣང་ཅན་མང་པོ་ཞིག་གིས་ཕྱག་དེབ་དེ་འཕྲུལ་དེབ་ཐོག་ཡོད་ཚེ་ཧ་ཅང་ལེགས་པོ་ཡོད་པའི་དགོངས་ཚུལ་དང་རེ་སྐུལ་ཞུས་པ་བཞིན་དང་དམིགས་བསལ་དེང་གི་ཆར་གསུང་འབུམ་དགའཕྲུལ་དེབ་ཐོག་ཡོད་ཚེ་ཀློག་བདེ་བ་དང་འཁྱེར་བདེ་བ་སོགས་ཀྱི་རྒྱུ་མཚན་སྣ་ཚོགས་ལ་བརྟེན་ནས་འཕྲུལ་དེབ་འགྲེམས་སྤེལ་གྱི་མཛད་སྒོ་དང་བགྲོ་གླེང་གོ་སྒྲིག་གནང་ཡོད་སྐོར་བརྗོད་སོང་།

མཛད་རྣམ་ཤར་སྟག་མོའི་བུ་ཞེས་པའི་རྩོམ་སྒྲིག་པ་དང་ཀིརྟིའི་དྲུང་ཡིག་འབྲིང་བ་འཇིགས་མེད་ལགས་དཔེ་དེབ་ངོ་སྤྲོད་གནང་སྐབས། དཔེ་དེབ་གསུམ་ལྡན་པའི་ཤར་སྟག་མོའི་བུ་ཞེས་པ་ནི་ཀིརྟི་རིན་པོ་ཆེ་དགུང་གྲངས་ ༨༠ ཕེབས་པའི་འཁྲུངས་སྐར་དང་བསྟུན། ཕྱི་ལོ་ ༢༠༢༢ ལོར་རྩོམ་སྒྲིག་བྱས་པ་དང་ཕྱི་ལོ་ ༢༠༢༣ ལོར་དབུ་འབྱེད་བྱས། མཛད་རྣམ་གྱི་མཚན་བྱང་འདོགས་དོན་ནི། སྔོན་མ་གནས་ཆུང་ཆོས་རྒྱལ་ཆེན་པོས་བཀའ་ལུང་ཕེབས་པ་ལྟར། སྟག་ཚང་ལྷ་མོའི་ཤར་ཕྱོགས་ཐེ་བོའི་ཡུལ་ན་སྟག་མོ་སྒང་ཞེས་གྲོང་ཚོ་ཞིག་ཡོད་པ་དེར་ད་ལྟའི་ཀིརྟི་རིན་པོ་ཆེ་སྐུ་ཕྲེང་བཅུ་གཅིག་པ་སྐུ་འཁྲུངས་ཤིང་སྤུལ་སྐུར་ངོས་འཛིན་ཞུས་རྗེས། ཁ་ཤས་ཀྱིས་ཀིརྟི་རིན་པོ་ཆེའི་མཚན་ལ་ཤར་སྟག་མོ་བུ་ཞེས་མཚན་འབོད་གནང་མྱོང་བ་སོགས་ལ་བརྟེན་ནས་བྱུང་བ་ཞིག་ཡིན་སྐོར་དང་། དཔེ་དེབ་ཀྱི་བརྗོད་བྱ་གཙོ་བོ་ནི་ཀིརྟི་རིན་པོ་ཆེ་མཆོག་དགུང་གྲངས་ ༨༠ ཕེབས་སྐབས་བར་དུ་བོད་མི་རིགས་བསྟན་སྲིད་ཀྱི་ཆེད་དུ་སྲིད་དོན་གྱི་ཕྱག་ལས་གང་གནང་ཡོད་པའི་སྐོར་ཡིན་པ་སོགས་བརྗོད་སོང་།

བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས། ༧སྐྱབས་རྗེ་བཀའ་ཟུར་ཀིརྟི་རིན་པོ་ཆེ་མཆོག་གིས་བོད་བསྟན་སྲིད་དང་བོད་མི་སྤྱི་ཡོངས་ཀྱི་གནས་སྟངས། བོད་མིའི་སྒྲིག་འཛུགས་སོགས་བཙན་བྱོལ་བོད་མིའི་སྤྱི་ཚོགས་གནས་སྟངས་ཐོག་དུས་རྟག་ཏུ་སེམས་འཁུར་གནང་མཁན་གྱི་མི་སྣ་གལ་ཆེན་པོ་ཞིག་ཆགས་ཡོད། དེ་བཞིན། ༧སྐྱབས་རྗེ་བཀའ་ཟུར་ཀིརྟི་རིན་པོ་ཆེ་མཆོག་གི་འདས་པའི་ལོ་རྒྱུས་དང་པེན་བོད་ཀྱི་རྩོམ་པ་པོའི་མཐུན་ཚོགས་ངོས་ནས་རིན་པོ་ཆེ་མཆོག་ལ་གཟེངས་རྟགས་ཕུལ་བའི་མཛད་སྒོར་ང་ཚོ་བཅར་རྒྱུ་བྱུང་། སྐྱབས་རྗེ་བཀའ་ཟུར་ཀིརྟི་རིན་པོ་ཆེར་མཚོན་ན། བོད་ས་མ་ཤོར་བའི་སྐབས་བོད་མདོ་དབུས་ཁམས་གསུམ་གྱི་གནས་སྟངས་ལ་རྒྱུས་མངའ་ཆེན་པོ་ཡོད་པའི་མི་སྣ་ཞིག་ཆགས་ཡོད།  ཅེས་དང་སྐྱབས་རྗེ་བཀའ་ཟུར་ཀིརྟི་རིན་པོ་ཆེ་ཕྱི་ལོ་ ༡༩༤༢ ལོར་སྐུ་འཁྲུངས་པ་དང་ཞེ་དགུའི་ནང་བོད་ཀྱི་ཤར་ཕྱོགས་སུ་རྒྱ་ནག་དམར་ཤོག་གིས་བཙན་འཛུལ་བྱས་ཏེ་བོད་ལ་དབང་བསྒྱུར་དང་དྲག་གནོན་བྱེད་མགོ་བཙུགས་ཡོད། ཅེས་དང་། མཛད་རྣམ་དེ་བརྒྱུད་ནས་བོད་མ་ཤོར་གོང་གི་གནས་ཚུལ་ལ་ཞིབ་འཇུག་བྱེད་པར་ཕན་ཐོགས་ཆེ་བ་དང་༧སྐྱབས་རྗེ་བཀའ་ཟུར་ཀིརྟི་རིན་པོ་ཆེ་ལྟ་བུར་མིག་དཔེ་བལྟས་ཏེ་བོད་མི་རིགས་བསྟན་སྲིད་ཀྱི་དོན་དུ་ཞབས་འདེགས་ཞུ་རྒྱུ་གལ་ཆེན་ཡིན་སྐོར་དང་། ད་ལྟ་བོད་ཅེས་པའི་མིང་ཡང་གནས་དང་མི་གནས་ཀྱི་འཇིགས་སྣང་ཡོང་བཞིན་པའི་སྐབས་འདིར་བོད་མི་ཚང་མས་སེམས་ཤུགས་བསྐྱེད་དེ་འབད་བརྩོན་བྱས་པ་ཡིན་ན་གྲུབ་འབྲས་ཏན་ཏན་ཡོང་གི་ཡོད་སྐོར་སོགས་གསུངས་སོང་།

མཛད་རྣམ་གྱི་འཕྲུལ་དེབ་འགྲེམས་སྤེལ་མཛད་སྒོ་གྲུབ་རྗེས་བགྲོ་གླེང་འཚོགས་སོང་། བགྲོ་གླེང་ནང་བཀའ་ཟུར་ཐུབ་བསྟན་ལུང་རིགས་མཆོག་གིས། ཤར་སྟག་མོའི་བུ་དང་གཞུང་ས་དགའ་ལྡན་ཕོ་བྲང་པ་ཆེན་པོ་ཞེས་པའི་བརྗོད་གཞིའི་ཐོག་གསུང་བཤད་གནང་བ་དང་། རྩོམ་པ་པོ་ཤེས་རབ་དར་རྒྱས་ལགས་ཀྱིས། ཤར་སྟག་མོའི་བུ་དང་གཞིས་བྱེས་བོད་མི་མང་ཚོགས་ཞེས་པའི་བརྗོད་གཞིའི་ཐོག་གསུང་བཤད། བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཟླ་བ་ཚེ་རིང་ལགས་ཀྱིས། ཤར་སྟག་མོའི་བུ་དང་རྒྱ་ནག་གཞུང་ཞེས་པའི་བརྗོད་གཞིའི་ཐོག་གསུང་བཤད། དེ་བཞིན། བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས་ཀྱིས། ཤར་སྟག་མོའི་བུ་དང་རྒྱལ་སྤྱིའི་སྤྱི་ཚོགས་ཞེས་པའི་བརྗོད་གཞིའི་ཐོག་གསུང་བཤད་གནང་གྲུབ་མཚམས། ཀིརྟིའི་བྱེས་པ་གྲྭ་ཚང་གི་སློབ་སྤྱི་སོ་རུ་དར་རྒྱས་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་སོང་།

གསར་འགོད་པ། སྐལ་བཟང་སྦྱིན་པ།