བོད་ཀྱི་དཔེ་མཛོད་ཁང་གི་གོ་སྒྲིག་འོག་འབུམ་རམས་པ་ཀུན་བཟང་སྒྲོལ་མ་ལགས་ཀྱིས་བརྩམས་པའི་བཙན་བྱོལ་གྱི་སྐྱེས་མ་དང་རྩོམ་རིག་ཅེས་པའི་དཔེ་དེབ་དབུ་འབྱེད་ཀྱི་མཛད་སྒོ་ཞིག་འཚོགས་སོང་།
དེ་རིང་སྔ་དྲོར་བོད་ཀྱི་དཔེ་མཛོད་ཁང་གི་ཚོགས་ཁང་དུ། དཔེ་མཛོད་ཁང་གི་གོ་སྒྲིག་འོག་འབུམ་རམས་པ་རྔ་བ་ཀུན་བཟང་སྒྲོལ་མ་ལགས་ཀྱིས་བརྩམས་པའི་དཔྱད་རྩོམ་བཙན་བྱོལ་གྱི་སྐྱེས་མ་དང་རྩོམ་རིག་ཅེས་པའི་དབྱིན་ཡིག་དེབ་གསར་བ་ཞིག་དབུ་འབྱེད་ཀྱི་མཛད་སྒོ་འཚོགས་སོང་། མཛད་སྒོའི་ཐོག་སྐུ་མགྲོན་གཙོ་བོ་བོད་ཀྱི་དཔེ་མཛོད་ཁང་གི་རིག་གནས་སློབ་དཔོན་ནཱ་ག་སངས་རྒྱས་བསྟན་དར་ལགས་དང་། གཞན་ཡང་གཏམ་བཤད་གནང་མཁན་མི་སྣ་བཅུ་འདུག
སྐབས་དེར་བཙན་བྱོལ་གྱི་སྐྱེས་མ་དང་རྩོམ་རིག་ཅེས་པའི་དཔེ་དེབ་ཀྱི་སྐོར་ལ་རྩོམ་པ་པོ་ཀུན་བཟང་སྒྲོལ་མ་ལགས་ཀྱིས། བཙན་བྱོལ་སྐྱེས་མ་དང་རྩོམ་རིག་ཅེས་པའི་དཔེ་དེབ་འདི་ནི་དབྱིན་ཡིག་ནང་བྲིས་པའི་དཔྱད་རྩོམ་དེབ་ཅིག་ཡིན། དཔྱད་རྩོམ་དེབ་འདི་ཕྱི་ལོ་ ༢༠༢༢ ལོ་ནས་བྲི་མགོ་བཙུགས་ཏེ་ད་ལོར་གཞི་ནས་ཚར་བ་ཞིག་ཆགས་ཡོད། དཔྱད་རྩོམ་འདི་འབྲི་དགོས་པའི་རྒྱུ་མཚན་ནི། ང་རང་བོད་ནས་བཙན་བྱོལ་དུ་བསླེབས་ནས་ལོ་ངོ་ཉི་ཤུ་འགྲོ་བཞིན་ཡོད་པ་དང་། ང་དང་འདྲ་བའི་བུད་མེད་བཙན་བྱོལ་དུ་སྐྱེས་པ་དང་བོད་ནས་འབྱོར་བ་སྟོང་ཕྲག་མང་པོར་༧སྐྱབས་མགོན་རིན་པོ་ཆེའི་བཀའ་དྲིན་གྱི་འོག་ནས་རྒྱལ་སྤྱིའི་ནང་འགྲོ་ཆོག་པའི་སྡིངས་ཆ་མང་པོ་བསྐྲུན་ཡོད། དེར་བརྟེན། འདི་ལོ་༧སྐྱབས་མགོན་རིན་པོ་ཆེ་མཆོག་དགུང་གྲངས་དགུ་བཅུར་ཕེབས་ཀྱི་ཡོད་པ་དང་སྟབས་བསྟུན་ནས། ངས་ང་ཚོ་སྐྱེས་མ་ཚང་མའི་ཚབ་ཞུས་ཏེ། ༧གོང་ས་མཆོག་དང་བོད་མིའི་སྒྲིག་འཛུགས་ནས་སྐྱེས་མ་ཚང་མར་གོ་སྐབས་བསྐྲུན་པར་ཐུགས་རྗེ་བཀའ་དྲིན་ཞུ་སླད་དུ་བྲིས་པ་ཞིག་ཡིན། ཞེས་བརྗོད་སོང་།
ཡང་དཔེ་དེབ་ཀྱི་ནང་དོན་སྐོར་ལ་ཁོང་མོས། ནང་དོན་གྱི་ཆ་ནས་ཞུས་ན་དེབ་འདིའི་ནང་གཙོ་བོ་བཙན་བྱོལ་དུ་ཡོད་པའི་བུད་མེད་ཀྱི་གནས་སྟངས་དང་བསམ་བློ། དཀའ་ངལ། ཤེས་ཡོན་པའི་སྡེ་ཁག་སོགས་ཀྱི་སྐོར་ལ་ཞིབ་འཇུག་བྱེད་མཁན་ཉུང་ཉུང་ཡིན་སྟབས། དེབ་འདིའི་ནང་ང་ཚོས་ཤེས་དགོས་པའི་བུད་མེད་རྩོམ་པ་པོ་སྟེ། དབྱིན་ཡིག་བརྩམས་སྒྲུང་བྲིས་ཏེ་རྒྱལ་སྤྱིའི་ནང་འགྲོ་བཞིན་པའི་བུད་མེད་རྩོམ་པ་པོའི་སྐོར་ཡིན། དེབ་རྗེས་མའི་ནང་དུ་བོད་ཡིག་ནང་རྩོམ་འབྲི་མཁན་བུད་མེད་རྣམས་ཀྱི་སྐོར་བྲིས་ཡོད། དཔྱད་རྩོམ་འདིའི་ལེའུ་མཐའ་མའི་ནང་བཙན་བྱོལ་དུ་ཡོད་པའི་བུད་མེད་ཀྱི་ཤེས་ཡོན་གནས་ཚད་དང་བརྩམས་སྒྲུང་ཡར་རྒྱས་གཏོང་བར་ཐབས་ཤེས་ག་རེ་ཡོད་མེད་སྐོར་ཡིན། དེབ་འདིའི་ནང་དཔེ་མཚོན་གསུམ་བཀོད་ཡོད། གཅིག་ཚེ་རིང་དབང་མོ་ལྡོམ་པ་ཚང་ཡིན། མོ་རང་གི་བརྩམས་ཆོས་ལ་ཆ་བཞག་ན། མོ་རང་རྒྱ་གར་དུ་སྐྱེས་པ་དང་རང་ལོ་ཉེར་གསུམ་གྱི་སྟེང་ནས་དྲིན་ཆེན་ཨ་མ་དང་ཁ་བྲལ་རྗེས། ལུང་པ་མེད་པའི་སྐྱེས་མེད་ཅིག་གི་ཚོར་བ་དང་བརྩམས་ཆོས་འདོན་སྟངས་སྐོར་རེད། དཔེ་མཚོན་གཉིས་པ་དེ་ཚེ་རིང་དབྱངས་འཛོམས་བླ་མའི་སྐོར་ལ་བྲིས་ཡོད། དེང་རབས་རྩོམ་རིག་གི་ནང་ནས་མི་སྣ་བཞེངས་བསྐྲུན་བྱེད་པའི་བརྩམས་སྒྲུང་ཁྲོད། མོ་ནི་བཙན་བྱོལ་དུ་སྐྱེས་འཚར་བྱུང་བའི་སྐྱེས་མའི་ནང་ནས་ཚབ་མཚོན་རང་བཞིན་གྱི་མི་སྣ་ཞིག་ཏུ་བཞག་ན་འགྲིག་གི་བསམ་གྱི་ཡོད། ལྷག་པར་དུ་མོ་རང་གི་བརྩམས་སྒྲུང་བཀླགས་པ་ཡིན་ན། བརྩམས་སྒྲུང་ནང་གི་མི་སྣ་བཞེངས་བསྐྲུན་དང་མི་སྣའི་ངོ་སྤྲོད་བྱེད་པའི་རྣམ་པ་དེ་བོད་ནང་གི་བརྩམས་སྒྲུང་ཁག་དང་བསྡུར་བ་ཡིན་ན་ཐུན་མོང་མ་ཡིན་པའི་ལྟ་ས་ཞིག་འདུག་བསམ་གྱི་ཡོད། དཔེ་མཚོན་གསུམ་པ་དེ་བསྟན་འཛིན་བདེ་སྐྱིད་ལགས་ཡིན། ང་ཚོར་བཙན་བྱོལ་དང་བོད་ནང་། ཕྱི་རྒྱལ་སོགས་སུ་རྩོམ་པ་པོ་མང་པོ་ཡོད་ཀྱང་། མོས་ང་ཚོར་དེབ་གཅིག་གི་སྟེང་དུ་ནུས་པ་མཉམ་སྤུངས་བྱས་ནས་འགྲོ་ཐུབ་པའི་ལམ་ཁ་ཡག་པོ་བསྟན་ཡོད། མོའི་བརྩམས་སྒྲུང་གི་ནང་དུ་རྒྱ་གར་དང་། བོད་ནང་དང་ཕྱི་རྒྱལ་སོགས་སུ་ཡོད་པའི་རྩོམ་པ་པོ་མང་པོའི་བརྩམས་སྒྲུང་ཕྱོགས་སྒྲིག་བྱས་ནས་འཁོད་ཡོད། དེས་ག་རེ་མཚོན་གྱི་ཡོད་ཟེར་ན། ང་ཚོ་ལུང་པ་མེད་པའི་མི་རིགས་ཤིག་ཡིན་ནའང་། ང་ཚོ་དཔེ་དེབ་ཀྱི་ཐོག་ནས་མཉམ་མཐུན་བྱེད་དགོས་པའི་དཔེ་མཚོན་ཡག་པོ་བསྟན་ཡོད། ཅེས་བརྗོད་སོང་།
བོད་ཀྱི་དཔེ་མཛོད་ཁང་གི་རིག་གཞུང་ཉམས་ཞིབ་དང་པར་སྐྲུན་སྡེ་ཚན་གྱི་འགན་འཛིན་ནཱ་ག་སངས་རྒྱས་བསྟན་དར་ལགས་ཀྱིས། དུས་རབས་ཉི་ཤུ་བའི་ནང་དཔེ་མཛོད་ཁང་ནས་བོད་ཀྱི་བུད་མེད་ཀྱིས་བོད་ཡིག་ཐོག་པར་སྐྲུན་བྱས་པའི་དེབ་ཕལ་ཆེར་གཅིག་ཀྱང་བྱུང་མི་འདུག དུས་རབས་ཉི་ཤུ་རྩ་གཅིག་པའི་ནང་གཞི་ནས་མགོ་བཙུགས་འདུག སྤྱིར་བཏང་བོད་ཀྱི་བུད་མེད་ཀྱི་བརྩམས་ཆོས་ཧ་ཅང་ཉུང་ཉུང་རེད། ཕྱི་ལོ་ ༢༠༢༠ ལོར་དབྱིན་ཡིག་ཐོག་བརྩམས་པའི་བོད་དང་ངའི་ལོ་རྒྱུས་ཞེས་པ་དེ་བོད་ཡིག་ནང་བསྒྱུར་བ་ཞིག་རེད། དེབ་དེ་བོད་ཡིག་ནང་བསྒྱུར་མཁན་བུད་མེད་ཡིན་པས་བུད་མེད་ཀྱི་བརྩམས་ཆོས་ཁོངས་སུ་འཇོག་གི་ཡོད། དེ་བཞིན་ལོ་དེའི་ནང་རྒྱལ་སྤྱིའི་བོད་དོན་ལས་འགུལ་ཁང་གི་འགྲོ་གྲོན་བཏང་ནས་བོད་ཀྱི་དཔེ་མཛོད་ཁང་གིས་བཙུན་མ་བཅོ་ལྔ་ལྷག་གི་ལོ་རྒྱུས་པར་སྐྲུན་བྱས་ཡོད། དེ་ནི་བོད་ཀྱི་བུད་མེད་རྩོམ་པ་པོས་བཙོན་ཁང་ནང་གི་དཀའ་ངལ་བྲིས་པའི་ལོ་རྒྱུས་བརྩམས་ཆོས་རེད། ཕྱི་ལོ་ ༢༠༢༢ ལོར་ཀུན་བཟང་སྒྲོལ་མ་ལགས་ཀྱིས་བསམ་གཞིགས་དང་ལྟ་ཚུལ་ཞེས་པའི་བོད་ཡིག་ཐོག་བརྩམས་ཆོས་པར་སྐྲུན་བྱས། ཕྱི་ལོ་ ༢༠༢༤ ལོར་དགེ་བཤེས་མ་ཕུན་ཚོགས་ཚུལ་འཛིན་ལགས་ཀྱིས་མཐོ་སྒང་ཇོ་མོའི་དཔྱད་གླེང་ཞེས་པ་དང་། ཤར་གླིང་ཟླ་སྒྲོན་ལགས་ཀྱི་བརྩམས་ཆོས་བོད་ནང་གི་ལོ་ཉི་ཤུ་ཞེས་པ་བོད་བསྒྱུར་བྱས་ཡོད། ཅེས་བརྗོད་སོང་།
ཡང་ཁོང་གིས། ཉེ་ཆར་ནུབ་སྒང་བྱམས་པ་བསྟན་དར་གྱིས་ཚེ་རིང་གཡང་འཛོམས་ཀྱི་སྒྲུང་རིང་བོད་བསྒྱུར་བྱས་ཡོད། དེ་ཡང་བུད་མེད་ཀྱི་བརྩམས་ཆོས་ཀྱི་ཁོངས་སུ་བཞག་ཆོག་པ་ཞིག་རེད། གཞན་ཡང་ཕྱི་ལོ་ ༡༩༩༣ ནས་ ༡༩༩༥ ཙམ་ལ་ཨ་མྱེས་རྨ་ཆེན་རིག་གཞུང་གཅེས་སྐྱོང་ཁང་གིས་ཡུམ་མཚོ་ཞེས་པའི་དུས་དེབ་ཅིག་བཏོན་ཡོད། དུས་དེབ་གྲངས་གསུམ་གྱི་ནང་དུ་རྩོམ་མང་པོ་ཡོད་ཀྱང་བུད་མེད་ཀྱིས་བྲིས་པའི་རྩོམ་གསུམ་མ་གཏོགས་མི་འདུག་ལ། དེའི་ཁྲོད་ཀྱི་བུད་མེད་གཉིས་ནི་བོད་ནང་ནས་བྲིས་པ་རེད་འདུག བོད་ཀྱི་དཔེ་མཛོད་ཁང་ནས་ད་ལྟ་བར་དུ་ངག་རྒྱུན་ལོ་རྒྱུས་དེབ་གྲངས་ ༥༦ བཏོན་ཡོད་ཀྱང་། བུད་མེད་ཀྱི་ངག་རྒྱུན་ལོ་རྒྱུས་བཤད་མཁན་གྲངས་ ༢ ལས་བྱུང་མི་འདུག བོད་མིའི་སྒྲིག་འཛུགས་ཀྱི་སྲི་ཞུ་བ་དང་ཚོགས་པ་ཁག་གི་ལས་འགུལ་སོགས་ཀྱི་ནང་དུ་བུད་མེད་མཉམ་ཞུགས་བྱས་པའི་གྲངས་མང་པོ་ཡོད། ཡིན་ནའང་བོད་ཀྱི་སྐད་ཡིག་ནང་བྲིས་པའི་བརྩམས་ཆོས་ཀྱི་ཐོག་ནས་བུད་མེད་ལ་དཀའ་ངལ་འཕྲད་ཀྱི་འདུག ཅེས་བརྗོད་སོང་།
གསར་འགོད་པ། བྱམས་པ་ཚེ་རིང་། སྐལ་བཟང་སྦྱིན་པ།
