དྷ་ས་ཉེ་འཁོར་གྱི་བོད་སློབ་ནང་ཁུལ་དབར་ངག་རྩལ་འགྲན་བསྡུར་ཞིག་འཚོགས།

བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་བོད་ཀྱི་སྐད་ཡིག་དང་རིག་གཞུང་མི་ཉམས་རྒྱུན་འཛིན་དང་བོད་ཀྱི་བདེན་པའི་འཐབ་རྩོད་བྱེད་པར་བོད་ཀྱི་རིག་གཞུང་དང་དེང་སང་གི་ཤེས་ཡོན་ཐོག་ལ་སློབ་གཉེར་བྱེད་དགོས་གལ་ཆེན་པོ་རེད་ཅེས་གསུངས།

དེ་རིང་ཉིན་རྒྱབ་ཆུ་ཚོད་ ༣ པའི་སྟེང་དྷ་སྟེང་བོད་ཕྲུག་ཁྱིམ་སྡེའི་ཚོགས་ཁང་ (Hermann Gmeiner Hall) དུ་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་དང་དྷ་སྟེང་བོད་ཁྱིམ་སློབ་གྲྭ་གཉིས་ཀྱི་གོ་སྒྲིག་འོག ༧ཀུན་གཟིགས་པཎ་ཆེན་རིན་པོ་ཆེ་མཆོག་གར་སོང་ཆ་མེད་དུ་གྱུར་ཏེ་ལོ་ངོ་ ༣༠ ཧྲིལ་པོ་འཁོར་བའི་དུས་དྲན་སྲུང་གཙིའི་ཆེད་དྷ་ས་ཉེ་འཁོར་གྱི་བོད་སློབ་ནང་ཁུལ་དབར་ངག་རྩལ་འགྲན་བསྡུར་ཞིག་འཚོགས་ཤིང་། ༧ཀུན་གཟིགས་པཎ་ཆེན་རིན་པོ་ཆེ་མཆོག་གི་མཛད་རྣམ་རྗེས་དྲན་གྱི་དབྱིན་ཡིག་ཐོག་ཡོད་པའི་ཕྱག་དེབ་ (Tibet’s Stolen Child) ཅེས་པ་དབུ་འབྱེད་གནང་སོང་།

སྐབས་དེར་སྐུ་མགྲོན་གཙོ་བོ་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་། དམིགས་བསལ་སྐུ་མགྲོན་གདན་ས་བཀྲ་ཤིས་ལྷུན་པོའི་སྐུ་ཚབ་དགེ་བཤེས་ལྷ་རམས་པ་བསྟན་འཛིན་རྡོ་རྗེ་མཆོག ཤེས་རིག་ལས་ཁུངས་ཀྱི་དྲུང་ཆེ་འཇིགས་མེད་རྣམ་རྒྱལ་ལགས། ཕྱི་དྲིལ་ལས་ཁུངས་ཀྱི་དྲུང་ཆེ་ཀརྨ་ཆོས་དབྱིངས་ལགས། དྷ་སྟེང་བོད་ཁྱིམ་སློབ་གྲྭའི་འགན་འཛིན། སློབ་གྲྭ་ཁག་གི་དགེ་རྒན་དང་། སློབ་ཕྲུག་སོགས་ལྷན་འཛོམས་གནང་སོང་།

ཐོག་མར་ཕྱི་དྲིལ་དྲུང་ཆེ་ཀརྨ་ཆོས་དབྱིངས་ལགས་ཀྱིས་དབུ་འབྱེད་གསུང་བཤད་དང་ལས་རིམ་ངོ་སྤྲོད་གནང་གྲུབ་མཚམས། དམིགས་བསལ་སྐུ་མགྲོན་གདན་ས་བཀྲ་ཤིས་ལྷུན་པོའི་སྐུ་ཚབ་དགེ་བཤེས་ལྷ་རམས་པ་བསྟན་འཛིན་རྡོ་རྗེ་མཆོག་གིས། ༧ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་བསྟན་འཛིན་དགེ་འདུན་ཡེ་ཤེས་འཕྲིན་ལས་ཕུན་ཚོགས་དཔལ་བཟང་པོ་མཆོག་གི་ལོ་རྒྱུས་དང་ཡང་སྲིད་ངོས་འཛིན་གནང་ཕྱོགས་སྐོར་དང་། ཕྱི་ལོ་ ༡༩༩༥ ཟླ་ ༥ ཚེས་ ༡༧ ཉིན་རྒྱ་ནག་གཞུང་གིས་༧པཎ་ཆེན་རིན་པོ་ཆེ་མཆོག་དང་ཁོང་གི་ནང་མི་སྐུ་འཁོར། དེ་བཞིན་བཀྲ་ཤིས་ལྷུན་པོའི་མཁན་པོ་བྱ་བྲལ་རིན་པོ་ཆེ་མཆོག་སོགས་འཛིན་བཟུང་བྱས་ཏེ་གར་སོང་ཆ་མེད་དུ་གྱུར་ནས་མི་ལོ་ ༣༠ ཧྲིལ་པོ་འཁོར་ཡོད་ལ། ༧པཎ་ཆེན་རིན་པོ་ཆེ་མཆོག་གར་སོང་ཆ་མེད་དུ་གྱུར་བ་དེས་བོད་བརྒྱུད་ནང་བསྟན་ཐོག་བློ་འཚབ་སྐྱེ་རྒྱུ་དང། བོད་མི་རྣམས་བློ་ཕམ་སྐྱེ་དགོས་པའི་གནས་སྟངས་ཤིག་ཆགས་ཀྱི་ཡོད་སྐོར། ད་ལྟའི་ཆར་༧པཎ་ཆེན་རིན་པོ་ཆེ་མཆོག་སྐུ་འཚོ་བཞུགས་ཡིན་མིན་དང་བདེ་འཇགས་ཡིན་མིན་གྱི་གནས་ཚུལ་སོགས་ཤེས་རྟོགས་གང་ཡང་ཐུབ་ཀྱི་མེད་པ་རེད། མ་འོངས་བོད་ཀྱི་སོན་རྩ་རྣམས་ཀྱིས་རང་གི་མི་རིགས་ལ་རྒྱ་དང་ཞེན་ཁོག་ཡོད་པའི་ཐོག་ནས་བོད་ཀྱི་སྐད་ཡིག་དང་རིག་གཞུང་སོགས་འཛིན་སྐྱོང་སྤེལ་གསུམ་ཡོང་བར་ངེས་པར་དུ་ཤུགས་སྣོན་རྒྱག་དགོས་པའི་འབོད་སྐུལ་ཞུ་ཡི་ཡིན། གཞན་ཡང་། ད་བར་དབུས་བོད་མིའི་སྒྲིག་འཛུགས་དང་གཞུང་འབྲེལ་དང་གཞུང་འབྲེལ་མིན་པའི་ཚོགས་པ་ཁག་གིས་༧པཎ་ཆེན་རིན་པོ་ཆེ་མཆོག་གི་གནད་དོན་དང་འབྲེལ་ནས་རྒྱ་ནག་གཞུང་ལ་སྐྱོན་བརྗོད་དང་། ཕྱིའི་རྒྱལ་ཁབ་ཁག་གི་རྒྱབ་སྐྱོར་ཡོང་བའི་ཆེད་དུ་ལས་འགུལ་རབ་དང་རིམ་པ་སྤེལ་བར་ཐུགས་རྗེ་ཆེ་ཞུ་ཡི་ཡིན་སྐོར་སོགས་གསུངས་སོང་།

ཤེས་རིག་དྲུང་ཆེ་འཇིགས་མེད་རྣམ་རྒྱལ་ལགས་ཀྱིས། བཙན་བྱོལ་བོད་མིའི་སྒྲིག་འཛུགས་ཀྱི་ངོས་ནས་བོད་ཀྱི་ཆབ་སྲིད་དང་། བོད་མིའི་བདེ་དོན་དང་འབྲེལ་ནས་ལས་འགུལ་གང་འདྲ་ཞིག་སྤེལ་རུང་། ལྟ་གྲུབ་དང་སྲིད་ཇུས། ལངས་ཕྱོགས་གཅིག་ལ་གཞི་བཞག་ནས་ལས་འགུལ་སྤེལ་གྱི་ཡོད་པ་རེད། ད་བར་བཙན་བྱོལ་གཞུང་མང་གཉིས་ཀྱིས་རྒྱ་ནག་གི་བཙན་འོག་ནས་༧པཎ་ཆེན་རིན་པོ་ཆེ་མཆོག་ཀློད་གྲོལ་གཏོང་ཐབས་སུ་རྒྱལ་སྤྱིའི་སྟེང་གོ་རྟོགས་སྤེལ་བ་དང་། བོད་དོན་ཞུ་གཏུག་གི་ལས་འགུལ་སྤེལ་ཡོད་སྐོར་དང་། བོད་དོན་ལས་འགུལ་སྤེལ་བའི་སྐབས་བོད་མི་དང་སློབ་ཕྲུག་རྣམས་ཀྱིས་མཉམ་ཞུགས་དང་རྒྱབ་སྐྱོར་གནང་དགོས་གལ་ཆེ་སྐོར། བོད་ཀྱི་སྐད་ཡིག་དང་། ཆོས། རིག་གཞུང་སོགས་སྲུང་སྐྱོབ་ཀྱི་ཆེད་དུ་འབད་བརྩོན་གནང་དགོས་གལ་ཆེན་པོ་ཡིན་པ་མ་ཟད། ངག་རྩལ་གྱི་ལས་རིམ་དེ་འདྲ་ཡང་ནས་ཡང་དུ་གོ་སྒྲིག་གནང་དགོས་གལ་ཆེ་སྐོར་དང་། སློབ་ཕྲུག་རྣམས་ཀྱིས་༧གོང་ས་རྒྱལ་བ་རིན་པོ་ཆེ་མཆོག་གིས་མཛད་པའི་སྨྲ་བརྗོད་བྲལ་བ་རྣམས་ཀྱི་འབོད་སྒྲ་ (Voice for the Voiceless)། མི་ལོ་བདུན་ཅུ་ལྷག་རིང་ངོས་ཀྱི་ཡུལ་དང་མི་དམངས་ཀྱི་ཆེད་རྒྱ་ནག་དང་འཐབ་རྩོད་ཅེས་པའི་ཕྱག་དེབ་ངེས་པར་དུ་ལྗགས་ཀློག་གནང་དགོས་སྐོར་སོགས་འགྲེལ་བརྗོད་གནང་སོང་།

སྐུ་མགྲོན་གཙོ་བོ་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས། ༧ཀུན་གཟིགས་པཎ་ཆེན་རིན་པོ་ཆེ་མཆོག་མཆོག་གི་ལོ་རྒྱུས་དང་ཡང་སྲིད་ངོས་འཛིན་གནང་ཕྱོགས་སྐོར་དང་། ཕྱི་ལོ་ ༡༩༩༥ ཟླ་ ༥ ཚེས་ ༡༧ ཉིན་རྒྱ་ནག་གཞུང་གིས་༧པཎ་ཆེན་རིན་པོ་ཆེ་མཆོག་དང་ཁོང་གི་ནང་མི་སྐུ་འཁོར། དེ་བཞིན་བཀྲ་ཤིས་ལྷུན་པོའི་མཁན་པོ་བྱ་བྲལ་རིན་པོ་ཆེ་མཆོག་སོགས་འཛིན་བཟུང་བྱས་ཏེ་གར་སོང་ཆ་མེད་དུ་གྱུར་ཡོད་ལ། ད་ལྟའི་ཆར་༧པཎ་ཆེན་རིན་པོ་ཆེ་མཆོག་ས་གནས་གང་དུ་ཡོད་མེད་ཤེས་རྟོགས་ཐུབ་ཀྱི་མེད་པ་རེད། བོད་མི་རྣམས་ཀྱིས་༧པཎ་ཆེན་རིན་པོ་ཆེ་མཆོག་གི་གནད་དོན་དང་འབྲེལ་ནས་གོ་རྟོགས་སྤེལ་དགོས་པ་དང་། རྒྱལ་སྤྱིའི་སྤྱི་ཚོགས་ནང་ཞུ་གཏུག་བྱེད་དགོས་གལ་ཆེ་ལ། ཞུ་གཏུག་གི་ལས་འགུལ་ཤུགས་ཆེ་རུ་གཏོང་དགོས་གལ་ཆེ་སྐོར་དང་། རྒྱ་ནག་ནང་དུ་ཤུགས་རྐྱེན་ཐེབས་ཐུབ་རྒྱུའི་ཐབས་ལམ་ག་རེ་ཡོད་མེད་ཐོག་ལ་བསམ་བློ་གཏོང་དགོས་པ་དང་། དེ་འབྲེལ་གོ་བསྡུར་གནང་ཚེ་ཕན་ཐོགས་ཡོང་གི་ཡོད་སྐོར། བོད་ཀྱི་སྐད་ཡིག་དང་རིག་གཞུང་མི་ཉམས་རྒྱུན་འཛིན་ཡོང་བ་དང་། བོད་ཀྱི་བདེན་པའི་འཐབ་རྩོད་བྱེད་པར་སློབ་སྦྱོང་ངེས་པར་དུ་དགོས་ཀྱི་ཡོད་པར་བརྟེན། སློབ་ཕྲུག་རྣམས་ཀྱིས་བོད་ཀྱི་རིག་གཞུང་དང་དེང་སང་གི་ཤེས་ཡོན་ཐོག་ལ་སློབ་གཉེར་བྱེད་དགོས་གལ་ཆེན་པོ་རེད། སློབ་གཉེར་བྱས་པ་ཡིན་ན་༧པཎ་ཆེན་རིན་པོ་ཆེ་མཆོག་ཀློད་གྲོལ་ཡོང་ཐབས་དང་། བོད་དོན་བདེན་མཐའ་གསལ་བར་ཕྱག་ལས་རྒྱ་ཆེན་པོ་གནང་ཐུབ་ཀྱི་ཡོད་སྐོར་སོགས་གསུངས་སོང་།

གསར་འགོད་པ། བསྟན་འཛིན་ཕུར་བུ།

རྩོམ་སྒྲིག་བྱེད་མཁན། པདྨ་མཚོ།