ཨ་རིའི་ཕྱི་སྲིད་བློན་ཆེན་མཆོག་ནས་རྒྱ་ནག་གཞུང་གིས་༧པཎ་ཆེན་སྐུ་ཕྲེང་བཅུ་གཅིག་པ་མཆོག་གང་མགྱོགས་ཀློད་གྲོལ་གཏོང་དགོས་པ་མ་ཟད་། བོད་ཀྱི་ཆོས་ལུགས་དད་མོས་ཐོག་བཙན་གནོན་བྱེད་མཚམས་འཇོག་དགོས་ཞེས་གསུངས་འདུག
ཁ་སང་༧ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་བསྟན་འཛིན་དགེ་འདུན་ཡེ་ཤེས་འཕྲིན་ལས་ཕུན་ཚོགས་དཔལ་བཟང་པོ་མཆོག་གར་སོང་ཆ་མེད་དུ་གྱུར་ནས་ལོ་ངོ་ ༣༠ འཁོར་བའི་ཉིན་མོ་དང་བསྟུན། ཨ་རིའི་ཕྱི་སྲིད་བློན་ཆེན་མཱར་ཁོ་རོ་བྷའོ་(Marco Rubio) མཆོག་གི་མཚན་ཐོག་ནས་ཕྱི་སྲིད་ལས་ཁུངས་ཀྱི་དྲ་ལམ་ཐོག་ཏུ་གསར་འགོད་བསྒྲགས་གཏམ་ཞིག་གནང་ཡོད་པའི་ནང་། འདི་ལོ་༧ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་བསྟན་འཛིན་དགེ་འདུན་ཡེ་ཤེས་འཕྲིན་ལས་ཕུན་ཚོགས་དཔལ་བཟང་པོ་མཆོག་གར་སོང་ཆ་མེད་དུ་གྱུར་ནས་ལོ་ངོ་ ༣༠ འཁོར་བའི་དུས་དྲན་ཆགས་ཡོད། ༧གོང་ས་རྒྱལ་བ་རིན་པོ་ཆེ་མཆོག་ནས་བུ་ཆུང་འདི་ཉིད་བོད་ཀྱི་གལ་གནད་ཆེ་བའི་ཆོས་ལུགས་ཀྱི་དབུ་ཁྲིད་ཅིག་ཏུ་ངོས་འཛིན་མཛད་པའི་ཉིན་འགའི་རྗེས་སུ། རྒྱ་ནག་གཞུང་གིས་ཁོང་དང་ཁོང་གི་ནང་མི་བཙན་ཁྲིད་བྱས་ཏེ་ད་ལྟ་བར་མཐོང་རྒྱུ་མེད་པར་གྱུར་ཡོད། རྒྱ་གཞུང་གིས་༧པཎ་ཆེན་དགེ་འདུན་ཡེ་ཤེས་འཕྲིན་ལས་ཕུན་ཚོགས་དཔལ་བཟང་པོ་གང་མགྱོགས་ཀློད་གྲོལ་གཏོང་དགོས་པ་མ་ཟད། བོད་མི་རྣམས་ཀྱི་ཆོས་ལུགས་དད་མོས་ཐོག་བཙན་གནོན་བྱེད་མཚམས་འཇོག་དགོས། ཞེས་གསུངས་འདུག
དེ་བཞིན་ཟླ་འདིའི་ཕྱི་ཚེས་ ༡༧ ཉིན་ཡུ་རོབ་མཐུན་ཚོགས་ཀྱི་མགྲིན་ཚབ་པ་སྐུ་ཞབས་ཨ་ནོར་ཨེལ་ཨ་ནོ་ནི་ (Anouar El Anouni) མཆོག་གིས་སྒེར་གྱི་ཨེག་སི་དྲ་ལམ་ཐོག རྒྱ་ནག་གཞུང་གིས་༧པཎ་ཆེན་སྐུ་ཕྲེང་བཅུ་གཅིག་པ་བསྟན་འཛིན་དགེ་འདུན་ཡེ་ཤེས་འཕྲིན་ལས་ཕུན་ཚོགས་དཔལ་བཟང་པོ་མཆོག་བཙན་བཟུང་བྱས་ཏེ་ལོ་ངོ་ ༣༠ འགོར་ཡོད་ཀྱང་། ད་ལྟ་བར་དུ་ཁོང་གར་ཡོད་ཀྱི་གནས་སྟངས་གསལ་ཁ་གང་ཡང་བྱུང་མེད། ང་ཚོས་ཁོང་གི་སྐུ་གཟུགས་བདེ་ཐང་ལ་སེམས་འཚབ་བྱེད་བཞིན་ཡོད། སྲིད་གཞུང་གི་ཐེ་གཏོགས་མེད་པར་མི་སྒེར་དང་ཚོགས་སྡེ་ཁག་གིས་རང་དབང་ཐོག་རང་ཉིད་ཀྱི་ཆོས་ལུགས་ཀྱི་དབུ་ཁྲིད་འོས་འདེམས་བྱེད་ཆོག་པ་ཞིག་ཡིན། ཞེས་གསུངས་འདུག
ཨི་ཊ་ལིའི་གྲོས་ཚོགས་འཐུས་མི་དང་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་ཨན་ཌི་རེ་ཌི་ཕ་རི་མའོ་(Andrea De Priamo) ལགས་ཀྱིས། རྒྱ་ནག་གཞུང་གིས་ཆབ་སྲིད་ཀྱི་དམིགས་ཡུལ་གཙོ་བོར་བཟུང་ནས་༧པཎ་ཆེན་རིན་པོ་ཆེ་མཆོག་གི་ཡང་སྲིད་ཀྱི་ཚབ་ཏུ་མི་གཞན་ཞིག་བསྐོ་བཞག་བྱས་ཡོད་ཀྱང་། བོད་ཀྱི་ཆོས་ཕྱོགས་ནས་ཡང་དག་པའི་ངོས་འཛིན་མེད་པས་བོད་མི་རྣམས་ཀྱིས་ངོས་ལེན་བྱས་མེད། མ་འོངས་པར་བོད་ཀྱི་ཆོས་ལུགས་ཀྱི་དབུ་ཁྲིད་རྣམས་རྒྱ་ནག་གཞུང་གི་ཆབ་སྲིད་ཀྱི་ཐོག་ནས་དབང་སྒྱུར་བྱ་རྒྱུའི་དམིགས་ཡུལ་གསལ་བོ་ཡིན་པས། རྒྱལ་སྤྱིའི་སྤྱི་ཚོགས་དང་འགྲོ་བ་མིའི་ཐོབ་ཐང་གི་ཚོགས་པ་ཁག་གིས་དྲང་བདེན་ཐོག་རྒྱབ་སྐྱོར་བྱེད་དགོས་སྐོར་གསུངས་འདུག
གཞན་ཡང་། འཇར་མན་ཆོས་ལུགས་ལྷན་ཚོགས་ཀྱི་སྐུ་ཞབས་ཧྥ་རན་ཁི་སི་ཆེ་བ་བྷི་(Frank Schwabe) ལགས་ཀྱིས། རྒྱ་ནག་གཞུང་གིས་༧པཎ་ཆེན་སྐུ་ཕྲེང་བཅུ་གཅིག་པ་མཆོག་མྱུར་དུ་ཀློད་གྲོལ་གཏོང་དགོས། རྒྱལ་སྤྱིའི་འགྲོ་བ་མིའི་ཐོབ་ཐང་གི་ཚད་གཞི་དང་མཐུན་པའི་སྒོ་ནས་བོད་ཀྱི་ནང་པར་རང་དབང་ཐོག་ནས་ཆོས་ལུགས་ཉམས་ལེན་བྱ་འཇུག་དགོས། ༧གོང་ས་རྒྱལ་བ་རིན་པོ་ཆེ་མཆོག་གི་ཡང་སྲིད་བོད་ཀྱི་སྲོལ་རྒྱུན་ལུགས་སྲོལ་ལྟར་ངོས་འཛིན་བྱ་རྒྱུ་ལས་རྒྱ་ནག་དམར་ཤོག་ཚོགས་པས་ཐེ་གཏོགས་བྱ་མི་ཆོག ཅེས་གསུངས་འདུག
ཕྱི་ལོ་ ༡༩༨༩ ཟླ་ ༡ ཚེས་ ༢༨ ཉིན་༧པཎ་ཆེན་སྐུ་ཕྲེང་བཅུ་པ་བློ་བཟང་ཆོས་ཀྱི་རྒྱལ་མཚན་མཆོག་གཙང་གི་གདན་ས་བཀྲ་ཤིས་ལྷུན་པོ་རུ་གློ་བུར་དུ་སྐུ་གཤེགས་རྗེས། སྐུ་གོང་མ་རྣམས་ཀྱི་མཛད་སྲོལ་ལྟར་༧གོང་ས་རྒྱལ་བ་རིན་པོ་ཆེ་མཆོག་ནས་ཡང་སྲིད་རྩད་འཚོལ་དབུ་འཛུགས་མཛད། ཕྱི་ལོ་ ༡༩༩༡ ལོར་ཡང་སྲིད་བོད་ནང་ཕེབས་ཡོད་པ་མཁྱེན་རྟོགས་བྱུང་སྟེ། རྒྱ་ནག་གཞུང་ལ་ཡིག་འབྲེལ་བརྒྱུད་ནས་ཡང་སྲིད་རྩད་འཚོལ་ཐད་སྐུལ་མ་གནང་ཡོད་ཀྱང་ལན་མ་བྱུང་བར་བརྟེན། མཐར་ཕྱི་ལོ་ ༡༩༩༥ ལོའི་ཟླ་ ༥ ཚེས་ ༡༤ ཉིན་༧གོང་ས་མཆོག་ནས་བོད་ནག་ཆུ་ལྷ་རི་རྫོང་དུ་ཡབ་དཀོན་མཆོག་ཕུན་ཚོགས་ལགས་དང་། ཡུམ་བདེ་ཆེན་ཆོས་སྒྲོན་ལགས་གཉིས་ཀྱི་སྲས་སུ་འཁྲུངས་ཤིང་། སྐབས་དེར་དགུང་ལོ་ ༦ ལ་སོན་པའི་ཁྱེའུ་དགེ་འདུན་ཆོས་ཀྱི་ཉི་མ་ལགས་༧པཎ་ཆེན་སྐུ་ཕྲེང་ ༡༠ པའི་ཡང་སྲིད་འཁྲུལ་བྲལ་དུ་ངོས་འཛིན་མཛད་དེ། མཚན་དུ་བསྟན་འཛིན་དགེ་འདུན་ཡེ་ཤེས་འཕྲིན་ལས་ཕུན་ཚོགས་དཔལ་བཟང་པོ་ཞེས་གསོལ་ཡོད་པ་རེད། འོན་ཀྱང་། ངོས་འཛིན་མཛད་དེ་ཉིན་གྲངས་ ༣ ལས་མ་འགོར་བར་ཕྱི་ལོ་ ༡༩༩༥ ཟླ་ ༥ ཚེས་ ༡༧ ཉིན་རྒྱ་ནག་གཞུང་གིས་ཡང་སྲིད་མཆོག་གི་དབུས་ཡབ་ཡུམ་སྐུ་འཁོར་དང་བཅས་བཙན་ཁྲིད་བྱས་ཏེ་ལོ་ངོ་ ༣༠ འགྲོ་བཞིན་ཡོད་པ་དང་། ད་ལྟའང་ཁོང་གི་གནས་སྟངས་གང་ཡང་ཤེས་རྟོགས་ཐུབ་ཀྱི་མེད་པར་བརྟེན། བོད་མི་གཙོ་བོར་གྱུར་བའི་རྒྱལ་སྤྱིའི་ཐོག་ནས་རྒྱ་ནག་གཞུང་ལ་ཡང་ཡང་འདྲི་རྩད་བྱེད་བཞིན་པའི་གནད་དོན་ཞིག་ཆགས་ཡོད་ལ། བསྟན་འཛིན་དགེ་འདུན་ཡེ་ཤེས་འཕྲིན་ལས་མཆོག་ནི་འཛམ་གླིང་ཐོག་གི་དགུང་ལོ་ཆུང་ཤོས་དང་གར་ཡོད་ཆ་མེད་དུ་བཏང་ཡུན་རིང་ཤོས་ཀྱི་བཙོན་པ་ཞིག་ཏུ་ངོས་འཛིན་བྱེད་བཞིན་ཡོད་པ་རེད།
གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། པདྨ་མཚོ།
