གློག་བརྙན་འཁྲབ་ཁྲིད་པ་ལྔས་ཕྱོགས་སྒྲིག་བྱས་པའི་གློག་བརྙན་ས་མཐའི་ལས་དབང་ཞེས་པ་སི་ཌི་ནི་གློག་བརྙན་དུས་སྟོན་ཐོག་གཟིགས་འབུལ་ཞུ་རྒྱུ་ཡིན་འདུག
ཕྱི་ཟླ་ ༦ ཚེས་ ༤ ནས་ ༡༥ བར་ཉིན་གྲངས་བཅུ་གཉིས་རིང་ཨོ་གླིང་སི་ཌི་ནི་(sydeney) གྲོང་ཁྱེར་དུ། སྐབས་ ༧༢ པའི་སི་ཌི་ནི་གློག་བརྙན་དུས་སྟོན་འཚོགས་གཏན་ཁེལ་ཡོད་ཅིང་། ཐེངས་འདིའི་གློག་བརྙན་དུས་སྟོན་ཐོག་འཛམ་གླིང་གི་རྒྱལ་ཁབ་ཁག་ ༧༠ ནས་གློག་བརྙན་མི་འདྲ་བ་ ༢༠༡ མཉམ་ཞུགས་བྱས་པའི་ཁྲོད། གསར་དུ་ཕབ་བསྐྲུན་བྱས་པའི་གློག་བརྙན་ ༡༧ དང་། རྒྱལ་སྤྱིའི་སྡིངས་ཆའི་སྟེང་ཐོག་མར་བསྟན་རྒྱུ་ཡིན་པའི་གློག་བརྙན་ ༦ ། དེ་བཞིན་ཨོ་གློང་གི་གློག་བརྙན་ ༡༣༧ བཅས་གློག་བརྙན་སྟོན་ཡུལ་ས་ཚིགས་གྲངས་ ༡༥ ནས་མང་ཚོགས་ལ་གཟིགས་འབུལ་ཞུ་རྒྱུ་ཡིན་པ་དང་། ཐེངས་འདིའི་གློག་བརྙན་དུས་སྟོན་ཐོག་བོད་ཀྱི་གློག་བརྙན་ས་མཐའི་ལས་དབང་ཞེས་པ་འདེམས་ཐོན་བྱུང་ཡོད་འདུག
བོད་ཀྱི་གློག་བརྙན་ས་མཐའི་ལས་དབང་ནི་གློག་བརྙན་འཁྲབ་ཁྲིད་པ་བསྟན་འཛིན་བསོད་ནམས་ལགས་དང་། རི་ཏུ་སཱ་རིན་ལགས། བསོད་ནམས་ཚེ་བརྟན་ལགས། ཨ་རིར་གནས་སྡོད་བསྟན་འཛིན་ཚེ་བརྟན་ལགས་དང་། ཝི་ཏི་ནམ་དུ་གནས་སྡོད་རྒྱལ་ཐང་ཚེ་རིང་བཀྲ་ཤིས་ལགས་བཅས་ཀྱིས་མཉམ་འབྲེལ་ཐོག་ཕྱོགས་སྒྲིག་བྱས་པའི་གློག་བརྙན་ཞིག་ཡིན་ཞིང་། དེ་ཡང་བོད་སྐད་ཐོག་ཕྱོགས་སྒྲིག་བྱས་པའི་གློག་བརྙན་ཐེངས་དང་པོ་དེ་ཡིན་འདུག་ལ། གློག་བརྙན་འདིའི་ནང་རྒྱ་གར་དང་། ཨ་རི། ཝི་ཏི་ནམ་བཅས་སུ་གནས་པའི་བོད་མིའི་གཏམ་རྒྱུད་བཤད་ཀྱི་ཡོད་པ་མ་ཟད། གློག་བརྙན་ཁྲོད་ཀྱི་གཏམ་རྒྱུད་རེ་རེས་རྒྱལ་ཁབ་མེད་པའི་གནས་བབ་དང་གནས་སྤོ་བྱེད་དགོས་པའི་གནད་དོན་འཚོལ་ཞིབ་ཞིབ་ཚགས་བྱས་ཏེ། འཛམ་གླིང་ནང་སྐྱབས་བཅོལ་བའི་གནས་སྟངས་འོག་ཡུལ་མེད་ཁ་འཐོར་དུ་གནས་པའི་བོད་མིའི་གནས་སྟངས་མཚོན་པར་བྱས་ཡོད་འདུག
གློག་བརྙན་ནང་གི་གཏམ་རྒྱུད་གཅིག་ནི་ཝི་ཏི་ནམ་དུ་གནས་པའི་བོད་པའི་ཨ་ཕ་ཞིག་གིས་རང་ཉིད་ཀྱི་བུ་མོར་མེ་ཀོང་གཙང་པོའི་མགོ་ཁུངས་ནི་ཁོང་གི་ཕ་ཡུལ་ནས་མགོ་ཚུགས་ཏེ་རྒྱ་མཚོའི་ནང་འབབ་ཀྱི་ཡོད་པའི་ཚུལ་བཤད་ཀྱི་ཡོད་པ་དང་། གཏམ་རྒྱུད་གཉིས་པར་བུ་མོ་གཅེན་གཅུང་གཉིས་ཀྱི་ཨ་མ་གྲོངས་ཏེ་ཕུང་བོ་བཞུགས་འབུལ་ཆེད་མཇལ་འཛོམས་བྱུང་སྐབས། ལོ་མང་རིང་ཁ་བྲལ་ཞིང་རྙོག་འཛིང་ཆེ་བའི་དཀའ་ངལ་གྱི་བརྒྱུད་རིམ་ཞིབ་འབྲི་བྱས་འདུག གཏམ་རྒྱུད་གསུམ་པའི་ནང་ལྷ་བྲིས་པ་བསོད་ནམས་ཀྱི་ཁྱིམ་ཚང་ལ་རྐྱེན་ངན་གོད་ཆག་བྱུང་ནས་ཅུང་ཙམ་ལས་འགོར་མེད་པའི་སྐབས་དེར། ཡུན་རིང་ཁ་བྲལ་བའི་རང་གི་སློབ་གྲོགས་འཇིགས་བྲལ་འཚམས་འདྲིའི་ཆེད་འབྱོར་ཞིང་། འཇིགས་བྲལ་གྱིས་བསོད་ནམས་དང་ཁོའི་བཟའ་ཟླ་གཉིས་ལ་མི་ཚེའི་ནང་འཕྲད་པའི་དཀའ་ངལ་ལ་གདོང་ལེན་བྱེད་དགོས་སྐོར་སེམས་གསོ་བྱས་པ་གསལ་བར་བསྟན་ཡོད། མཇུག་མཐའི་གཏམ་རྒྱུད་ནང་བསྟན་འཛིན་ཕྱིར་དྷ་སར་འདས་གྲོངས་གྱུར་བའི་རང་གི་པ་ལགས་ཀྱི་ཁྱིམ་དུ་ལོག་སྐབས། རང་ཉིད་ཀྱི་འདས་ཟིན་པའི་མི་ཚེར་ཕྱིར་དྲན་དང་ལྷན་དུ། རང་ཉིད་ཀྱི་རིག་གཞུང་དང་ངོ་བོ་སོགས་ལ་གཞི་ནས་གདོང་གཏད་དགོས་པའི་སྐོར་གསལ་སྟོན་བྱས་འདུག
འདས་ལོའི་ཕྱི་ཟླ་ ༡༠ ཚེས་ ༢ ནས་ཉིན་གྲངས་བཅུའི་རིང་ལྷོ་ཀོ་རི་ཡའི་བྷུ་སཱན་ (Busan) གྲོང་ཁྱེར་དུ། སྐབས་ ༢༩ པའི་བྷུ་སཱན་རྒྱལ་སྤྱིའི་གློག་བརྙན་དུས་སྟོན་འཚོགས་ཡོད་ཅིང། གློག་བརྙན་དུས་སྟོན་དེའི་ཐོག་འཛམ་གླིང་གི་རྒྱལ་ཁབ་ཁག་ ༦༣ ནས་གློག་བརྙན་མི་འདྲ་བ་ ༢༧༩ མཉམ་ཞུགས་བྱས་པའི་ཁྲོད། འདེམས་སྒྲུག་བྱུང་བའི་གློག་བརྙན་ ༢༢༤ ཡོད་པ་རྣམས་གློག་བརྙན་ས་ཚིགས་གྲངས་ ༥༥ ནས་མང་ཚོགས་ལ་གཟིགས་འབུལ་ཞུས་ཡོད་འདུག བྷུ་སཱན་གློག་བརྙན་དུས་སྟོན་དེའི་ཐོག་བོད་ཀྱི་གློག་བརྙན་ས་མཐའི་ལས་དབང་ཞེས་པའང་འདེམས་ཐོན་བྱུང་ཡོད་པ་མ་ཟད། གློག་བརྙན་དུས་སྟོན་གྱི་མཛད་སྒོའི་ཐོག་བོད་ཀྱི་གློག་བརྙན་དེའི་འཁྲབ་ཁྲིད་པ་བསྟན་འཛིན་ཚེ་བརྟན་ལགས་དང་། བསོད་ནམས་ཚེ་བརྟན་ལགས། རྒྱལ་ཐང་ཚེ་རིང་བཀྲ་ཤིས་ལགས། བསྟན་འཛིན་བསོད་ནམས་ལགས། རི་ཏུ་སཱ་རིན་ལགས། གློག་བརྙན་བཟོ་སྐྲུན་པ་དོན་ལྡན་(Yodon Thondon)ལགས། འཁྲབ་སྟོན་པ་བསྟན་འཛིན་རྒྱལ་མཚན་ལགས་བཅས་ཡུལ་དངོས་སུ་མཉམ་ཞུགས་གནང་ཡོད་འདུག
གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
![FILE - Venezuelan opposition leader Maria Corina Machado gestures at a protest ahead of the Friday inauguration of President Nicolas Maduro for his third term, in Caracas, Venezuela January 9, 2025. [File photo: Reuters/Maxwell Briceno]](https://tibettimes.net/wp-content/uploads/2025/10/Maria-Corina-Machado--360x180.jpg)
![Hungary's Laszlo Krasznahorkai poses for photographers in London [File: Matt Dunham/AP]](https://tibettimes.net/wp-content/uploads/2025/10/Screenshot-2025-10-10-at-2.23.17-PM-360x180.png)
