ཉིན་གྲངས་གསུམ་རིང་སིངྒ་པུར་དུ་ཨེ་ཤ་ཡའི་བདེ་འཇགས་ལྷན་ཚོགས་འཚོགས།

ཨེ་ཤ་ཡའི་རྒྱལ་ཁབ་ཁག་གིས་རྒྱལ་སྲུང་ཡར་རྒྱས་བཏང་སྟེ་ཨ་རི་དང་མཉམ་འབྲེལ་གྱིས་དམག་འཁྲུག་འགོག་ཐབས་བྱེད་དགོས་པའི་འབོད་སྐུལ་ཞུས།

The US defense secretary warned that China poses a real threat to Taiwan

ཕྱི་ཟླ་ ༥ ཚེས་ ༣༠ ནས་ཕྱི་ཟླ་ ༦ ཚེས་ ༡ བར་ཉིན་གྲངས་གསུམ་རིང་སིངྒ་པུར་དུ་ཨེ་ཤ་ཡའི་བདེ་འཇགས་ལྷན་ཚོགས་འཚོགས་ཡོད་ཅིང་། སྐབས་དེར་ཨ་རིའི་རྒྱལ་སྲུང་དྲུང་ཆེ་པི་ཊི་ (Pete Hegseth) ལགས་ཀྱིས། རྒྱ་ནག་གིས་ཨེ་ཤ་ཡའི་ས་ཁོངས་མང་པོར་དབང་སྒྱུར་དང་། ཚོད་འཛིན་བྱེད་ཀྱི་ཡོད་པ་མ་ཟད། རྒྱ་ནག་གིས་ལྷོ་རྒྱ་ནག་རྒྱ་མཚོའི་མངའ་ཁོངས་བདག་དབང་རྩོད་རྙོག་གིས་ཁྱིམ་མཚེས་རྒྱལ་ཁབ་དང་གདོང་ཐུག་མང་པོ་བྱུང་ཡོད་པ་རེད། ཅེས་གསུངས།

ཨ་རིའི་རྒྱལ་སྲུང་དྲུང་ཆེ་པི་ཊི་ལགས་ཀྱིས། རྒྱ་ནག་གིས་དམག་ཤུགས་རྒྱ་སྐྱེད་བཏང་སྟེ་ཨེ་ཤ་ཡའི་ནང་དབང་ཤུགས་རྒྱ་སྐྱེད་གཏོང་ཐབས་བྱེད་བཞིན་ཡོད་ལ། རྒྱ་ནག་གིས་ཐའེ་ཝན་ནང་བཙན་འཛུལ་བྱེད་ཉེན་ཡོད་པའི་ཉེན་བརྡ་བཏང་བ་མ་ཟད། གལ་ཏེ་རྒྱ་ནག་དམར་ཤོག་ཚོགས་པས་ཐའེ་ཝན་ནང་བཙན་འཛུལ་བྱས་ཚེ། རྒྱ་གར་ཞི་བདེ་རྒྱ་མཚོའི་ཁུལ་དང་། འཛམ་གླིང་ཡོངས་ལ་ཤུགས་རྐྱེན་ཚབས་ཆེན་ཐེབས་ཉེན་ཡོད་པར་བརྟེན། ཨེ་ཤ་ཡའི་རྒྱལ་ཁབ་ཁག་གིས་རྒྱལ་སྲུང་གི་འགྲོ་གྲོན་ཇེ་མཐོར་གཏོང་དགོས་པ་དང་། རྒྱལ་ཁབ་ཀྱི་བདེ་འཇགས་ཡར་རྒྱས་གཏོང་བ་སོགས་ཨ་རི་དང་མཉམ་འབྲེལ་གྱིས་དམག་འཁྲུག་འགོག་ཐབས་བྱེད་དགོས་པའི་འབོད་སྐུལ་ཞུ་ཡི་ཡོད། ཅེས་དང་། ཨ་རིའི་གཞུང་གི་ངོས་ནས་རྒྱ་ནག་དང་དམག་འཁྲུག་བྱེད་འདོད་མེད། འོན་ཀྱང་། རྒྱ་ནག་གིས་ཨ་རི་དང་ཨ་རིའི་མཐུན་ཕྱོགས་རྒྱལ་ཁབ་ཁག་ལ་དབང་སྒྱུར་བྱེད་མི་ཐུབ་པ་བྱེད་དགོས་སྐོར་སོགས་འགྲེལ་བརྗོད་གནང་འདུག

རྒྱ་ནག་གཞུང་གིས། ཨ་རིས་མེ་དང་རྩེད་མོ་རྩེ་མི་ཉན་པའི་ཉེན་བརྡ་བཏང་བ་དང་། ཐའེ་ཝན་ནི་རྒྱ་ནག་གི་ཁ་བྲལ་ཐབས་མེད་པའི་ཆ་ཤས་ཤིག་ཡིན་པ་དང་། རྒྱལ་ཁབ་གཅིག་ལ་ལམ་ལུགས་གཉིས་ཀྱི་སྲིད་ཇུས་འོག་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་ཁོངས་སུ་ཕྱིར་ལོག་དགོས་པ་དང་། ཐའེ་ཝན་གྱི་རང་བཙན་འགོག་ཐབས་སུ་ཐབས་ལམ་གཞན་མེད་ཚེ། དྲག་དམག་གིས་བཙན་འཛུལ་བྱ་རྒྱུ་ཡིན་པའི་འཇིགས་སྐུལ་བྱེད་ཀྱི་ཡོད། ཅེས་དང་། ཐའེ་ཝན་ནི་རྒྱ་ནག་གི་ནང་སྲིད་ཀྱི་གནད་དོན་ཞིག་ཡིན་པས། ཕྱིའི་རྒྱལ་ཁབ་ཁག་གིས་ཐེ་ཇུས་བྱེད་མི་ཉན་པའི་ཉེན་བརྡ་བཏང་འདུག

དེ་འབྲེལ་ཁ་སང་ཕྱི་ཚེས་ ༡ ཉིན་སིངྒ་པུར་དུ་ཡོད་པའི་རྒྱ་ནག་གཞུང་ཚབ་ཁང་གིས། ཨ་རིའི་རྒྱལ་སྲུང་དྲུང་ཆེ་པི་ཊི་ལགས་ཀྱིས་ཡང་ནས་ཡང་དུ་རྒྱ་ནག་ལ་ནག་ཉེས་གཡོགས་པ་དང་། རྒོལ་རྡུང་། འཇིགས་སྐུལ། སྐྱོན་བརྗོད་སོགས་བྱེད་ཀྱི་འདུག དོན་དངོས་སུ་ཨ་རི་ནི་ས་ཁུལ་གྱི་ཞི་བདེ་དང་བརྟན་ལྷིང་ལ་གནོད་པའི་ལས་དོན་བྱེད་མཁན་ཞིག་རེད། དེ་ཡང་ཨ་རིས་ལྷོ་རྒྱ་ནག་རྒྱ་མཚོའི་ནང་གོ་མཚོན་འགྲེམས་འཇོག་བྱས་པ་དང་། ཨ་རིའི་གཞུང་ཚབ་ཁང་གིས་རྒྱ་ནག་ནང་དམག་དོན་མྱུལ་ཞིབ་བྱེད་ཀྱི་ཡོད་པ་རེད། ཅེས་བཤད་འདུག

ད་ལན་གྱི་ཨེ་ཤ་ཡའི་བདེ་འཇགས་ལྷན་ཚོགས་འཚོགས་པའི་ནང་རྒྱ་ནག་གི་བདེ་སྲུང་བློན་ཆེན་མཉམ་ཞུགས་བྱས་མེད་པ་དང་། ཕྱི་ལོ་ ༢༠༡༩ ནས་བཟུང་རྒྱ་ནག་གིས་བགྲོ་གླེང་དེའི་ནང་བདེ་སྲུང་བློན་ཆེན་ཆེད་གཏོང་བྱས་མེད་པ་ཐེངས་དང་པོ་ཆགས་ཀྱི་ཡོད་འདུག

སིངྒ་པུར་དུ་ཨེ་ཤ་ཡའི་བདེ་འཇགས་ལྷན་ཚོགས་འཚོག་གི་ཡོད་པ་དང་། རྒྱལ་ཁབ་ཁག་གི་བདེ་འཇགས་དང་འབྲེལ་ལམ་ཡར་རྒྱས་ཆེད་ཕྱི་ལོ་ ༢༠༠༢ ནས་བཟུང་ལོ་ལྟར་ལྷན་ཚོགས་དེ་བསྡུ་ཡི་ཡོད་ཅིང་། ཚོགས་ཐོག་ཏུ་ཚོགས་ཞུགས་རྒྱལ་ཁབ་ཁག་གི་བདེ་འཇགས་བློན་ཆེན་རྣམས་མཉམ་ཞུགས་གནང་དགོས་ཀྱི་ཡོད་འདུག བགྲོ་གླེང་དེའི་དམིགས་ཡུལ་གཙོ་བོ་ནི་རྒྱལ་ཁབ་དེའི་ནང་གི་རྒྱལ་སྲུང་དང་བདེ་འཇགས་ཡར་རྒྱས་གཏོང་ཕྱོགས་ཐད་གླེང་སློང་བྱེད་ཀྱི་ཡོད་པ་དང་། ཨེ་ཤ་ཡའི་མངའ་ཁུལ་བརྟན་བརླིང་སྲུང་སྐྱོབ་ཀྱི་ཚོགས་འདུ་ཞིག་རེད། ཚོགས་ཞུགས་རྒྱལ་ཁབ་ཁག་ནི་ཨོ་གླིང་དང་། ཁེམ་བྷོ་ཌི་ཡ་ (Cambodia)། ཁེ་ན་ཌ། རྒྱ་ནག ཨ་རི། ཧྥ་རན་སི། རྒྱ་གར། ཉི་ཧོང་། ལྷོ་ཀོ་རི་ཡ། མ་ལེ་ཤི་ཡ། འཇར་མན། ཨུ་རུ་སུ། པཱ་ཀི་སི་ཐན། སིངྒ་ལ། ཐའེ་ལན་ཌི། ཝི་ཐི་ནམ། ཡུག་ཁུ་རེན། ཧྥི་ལི་པིན་སི། སོག་པོ། ཆི་ལི། སུ་ཝེ་ཌན། འབར་མ། དབྱིན་ཡུལ། ལའོ་སི་སོགས་རྒྱལ་ཁབ་ ༢༩ ཡོད་པ་རེད།

གསར་འགོད་པ། བསྟན་འཛིན་ཕུར་བུ།