ཞི་ཅིན་ཕིན་གྱི་བློ་མཐུན་ཞིག་རྐྱེན་འདས་སུ་གྱུར་འདུག་ཟེར།

རྒྱ་ནག་བཅིངས་གྲོལ་དམག་མི་ཟེར་བའི་དམག་སྤྱི་གཞོན་པ་ཟུར་བ་དང་རྒྱ་ནག་དམར་ཤོག་ཚོགས་པའི་ཆེས་མཐོའི་དམག་དོན་མི་སྣ་ཞུའུ་ཆི་ཉཱིང་ནད་གཞི་ཡི་དབང་གིས་རྐྱེན་འདས་སུ་གྱུར།

Xu Qiliang, vice chairman of the Central Military Commission, attends the second plenary session of the National People’s Congress (NPC) at the Great Hall of the People in Beijing, China May 25, 2020. REUTERS/Thomas Peter

དེ་རིང་རྒྱལ་སྤྱིའི་གསར་འགྱུར་བརྒྱུད་ལམ་ཁག་གིས་གནས་ཚུལ་སྤེལ་བ་ལྟར་ན། ཁ་སང་རྒྱ་ནག་གི་དབུས་དམག་དོན་ལྷན་ཁང་གི་མགོ་ཁྲིད་གཞོན་པ་ཟུར་བ་དང་རྒྱ་ནག་དམར་ཤོག་ཚོགས་པའི་ཆེས་མཐོའི་གནད་ཡོད་མི་སྣ་ཞུའུ་ཆི་ཉཱིང་ (Xu Qiliang) ཟེར་བ་དེ་ནད་གཞི་ཡི་རྐྱེན་གྱིས་རང་ལོ་ ༧༥ ཐོག་རྒྱ་ནག་གི་རྒྱལ་ས་པེ་ཅིན་དུ་འདས་གྲོངས་སུ་གྱུར་བའི་གནས་ཚུལ་ཐོན་འདུག་ཅིང་། ཁོ་ནི་ཞི་ཅིན་ཕིན་གྱི་བློ་མཐུན་གྲོགས་པོ་ཉེ་བོ་ཞིག་ཀྱང་ཡིན་པ་རེད།

རྒྱ་ནག་དམར་ཤོག་གཞུང་གི་མགྲིན་ཚབ་ལྟ་བུར་གྱུར་བའི་རྒྱ་ནག་ཤིན་ཧྭ་གསར་ཁང་དང་། རྒྱ་ནག་བདེ་སྲུང་ལས་ཁུངས་ཀྱིས། ཁོ་ནི་རྒྱ་ནག་དམར་ཤོག་ཚོགས་པར་ཡིད་ཆེས་བྱེད་མཁན་གྱི་དམར་དམག་ཅིག་དང་། རྒྱ་ནག་དམར་ཤོག་ཚོགས་པའི་ཡང་དག་པའི་དམར་དམག་གི་མགོ་ཁྲིད་ཚད་ལྡན་ཞིག་ཡིན་ལུགས་སོགས་བསྒྲགས་འདུག

ཞུའུ་ཆི་ཉཱིང་ཟེར་བ་ནི་ཕྱི་ལོ་ ༡༩༥༠ ཕྱི་ཟླ་ ༣ ཚེས་ ༢༩ ཉིན་རྒྱ་ནག་ཤར་རྒྱུད་ཀྱི་ཧྲན་དུང་ཁུལ་དུ་སྐྱེས་ཤིང་། ཕྱི་ལོ་ ༡༩༨༣ ཙམ་ནས་རྒྱ་ནག་བཅིངས་གྲོལ་དམག་མི་ཟེར་བའི་ཁོངས་སུ་ཞུགས་ཏེ། ཕྱི་ལོ་ ༡༩༨༥ ལོར་ཧྲན་དུང་ཁུལ་གྱི་མཁའ་དམག་ཚན་པའི་མགོ་ཁྲིད་དུ་བསྐོས། ཕྱི་ལོ་ ༡༩༩༡ ལོར་རྒྱ་ནག་བཅིངས་གྲོལ་དམག་མིའི་མཁའ་དམག་ཚན་པ་ཞིག་གི་དམག་སྤྱིར་བསྐོས། ཕྱི་ལོ་ ༡༩༩༣ ལོར་རྒྱ་ནག་གི་བདེ་སྲུང་སློབ་ཆེན་( National Defense University) གྱི་མཁའ་དམག་གི་ལས་བྱེད་དང་མགོ་ཁྲིད་གཞོན་པར་བསྐོས། ཕྱི་ལོ་ ༡༩༩༩ ལོར་རྒྱ་ནག་ཧྲན་ཡང་དམག་དོན་རུ་སྒར་(Shenyang Military Region) གྱི་དམག་སྤྱི་གཞོན་པ་དང་མཁའ་དམག་དམག་སྤྱི་གཞོན་པར་བསྐོས།

རྒྱ་ནག་གི་མགོ་ཁྲིད་ཞི་ཅིན་ཕིན་གྱིས་གོ་གནས་བཟུང་རྗེས། ཁོ་པ་ཕྱི་ལོ་ ༢༠༡༧ ལོར་རྒྱ་ནག་དམར་ཤོག་ཚོགས་ཆེན་སྐབས་བཅུ་དགུ་པའི་དམར་ཤོག་དབུས་ཆབ་སྲིད་ལྷན་ཁང་གི་མཐོ་རིམ་རྒྱུན་ལས་ ༧ དང་རྒྱུན་ལས་ ༡༧། དབུས་རྒྱུན་ལས་ལྷན་ཚོགས་ཀྱི་རྒྱུན་ལས་ཚོགས་མི་ ༢༠༤ ། བརྗེ་ཚབ་ཚོགས་མི་ ༡༧༢ བཅས་གཏན་འབེབས་བྱས་ཡོད་པའི་ཁྲོད་དུའང་བདམས་ནས། ཕྱི་ལོ་ ༢༠༡༢ ནས་ ༢༠༢༢ བར་དུས་སྐབས་གཉིས་རིང་རྒྱ་ནག་དམར་ཤོག་ཚོགས་པའི་དམག་དོན་གྱི་དམག་སྤྱི་ཆེན་པོའི་ལས་གནས་གཉེར་མྱོང་།

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།