ལྷོ་ཀོ་རི་ཡས་སྲིད་འཛིན་གསར་པ་བདམས།

ལྷོ་ཀོ་རི་ཡའི་སྲིད་འཛིན་གྱི་འོས་བསྡུའི་ཁྲོད་དམངས་གཙོ་ཚོགས་པའི་ཚོགས་གཙོ་སྐུ་ཞབས་ལི་རྗེ་མུ་ཡུང་ལགས་སུ་འོས་གྲངས་བརྒྱ་ཆ་ ༤༩།༤༢ ཐོབ་སྟེ་ལྷོ་ཀོ་རི་ཡའི་སྐབས་ ༢༡ པའི་སྲིད་འཛིན་དུ་འདེམས་ཐོན་བྱུང་འདུག

དེ་རིང་རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། ཁ་སང་ཕྱི་ཚེས་ ༣ ཉིན་ལྷོ་ཀོ་རི་ཡའི་སྲིད་འཛིན་གྱི་འོས་བསྡུའི་ཁྲོད། བཅོས་སྒྱུར་གསར་བའི་སྲིད་དོན་ཚོགས་པའི་ (New Reform Party) འཐུས་མི་སྐུ་ཞབས་ལི་ཇུན་སོག་ (Lee Jun-seok) ལགས་སུ་འོས་གྲངས་ ༢,༩༡༧,༥༢༣ ཐོབ་སྟེ་བརྒྱ་ཆ་ ༨།༣༤ དང་། སྤྱི་ཚོགས་རིང་ལུགས་ཀྱི་ལྟ་བ་འཛིན་མཁན་མི་མང་ཚོགས་པའི་སྐུ་ཞབས་མི་ཀིམ་མུན་སུ་ (Kim Moon-soo) ལགས་སུ་འོས་གྲངས་ ༡༤,༣༩༥,༦༣༩ དང་འོས་བསྡུའི་བརྒྱ་ཆ་ ༤༡།༡༥།  དམངས་གཙོ་ཚོགས་པའི་ཚོགས་གཙོ་སྐུ་ཞབས་ལི་རྗེ་མུ་ཡུང་ (Lee Jae-myung) ལགས་སུ་འོས་གྲངས་ ༡༧,༢༨༧,༥༡༣ ཐོབ་ཅིང་། དེས་འོས་བསྡུའི་བརྒྱ་ཆ་ ༤༩།༤༢ ཟིན་ཏེ། སྐུ་ཞབས་ལི་རྗེ་མུ་ཡུང་ལགས་ལྷོ་ཀོ་རི་ཡའི་སྲིད་འཛིན་དུ་འདེམས་ཐོན་བྱུང་འདུག

དེ་རིང་སྔ་དྲོའི་ཆུ་ཚོད་ ༡༡ སྟེང་སྲིད་འཛིན་གྱི་དམ་འབུལ་མཛད་སྒོའི་སྐབས་སྐུ་ཞབས་ལི་རྗེ་མུ་ཡུང་ལགས་ཀྱིས། ལྷོ་ཀོ་རི་ཡའི་དམངས་གཙོའི་ལམ་ལུགས་སླར་གསོ་བྱ་རྒྱུ་གཙོ་བོར་དམིགས་པ་དང་། རྒྱལ་ཁབ་ཀྱི་ཚོང་ལས་ཡར་རྒྱས་གཏོང་རྒྱུ་དང་། ཨ་རི་དང་བདེ་འཇགས་ཀྱི་འབྲེལ་ལམ་སྲ་བརྟན་དུ་བཏང་བའི་ཐོག བྱང་ཀོ་རི་ཡ་དང་ལྷན་དུ་གྲོས་མོལ་བསྐྱར་གསོ་བྱ་རྒྱུ་ཡིན་སྐོར་དང་། རྒྱལ་ཁབ་ཀྱི་དཔལ་འབྱོར་དང་། ཕྱིའི་རྒྱལ་ཁབ་ཁག་ལ་འབྲེལ་ལམ་ཡར་རྒྱས་གཏོང་རྒྱུ། དེ་བཞིན་མི་མང་གི་རེ་བ་དང་མངོན་འདོད་ལྟར་ལས་དོན་བསྒྲུབ་རྒྱུ་ཡིན་སྐོར་སོགས་བརྗོད་འདུག

དེའི་ཐད་ཨ་རིའི་ཕོ་བྲང་དཀར་པོས་གསར་འགོད་གསལ་བསྒྲགས་ཤིག་སྤེལ་བའི་ནང་། ལྷོ་ཀོ་རི་ཡའི་སྲིད་འཛིན་གསར་པ་འོས་འདེམས་བྱུང་བ་དེ་རང་དབང་དང་དྲང་བདེན་གྱི་འོས་བསྡུ་ཞིག་ཡིན་པ་དང་། ཨ་རིས་མུ་མཐུད་དུ་འཛམ་གླིང་གི་དམངས་གཙོའི་རྒྱལ་ཁབ་ཁག་གི་ནང་རྒྱ་ནག་གིས་ཐེ་ཇུས་དང་ཤུགས་རྐྱེན་སྤྲོད་པར་སེམས་འཚབ་དང་ངོ་རྒོལ་བྱེད་ཀྱིན་ཡོད། ཅེས་གསལ་འདུག དེ་བཞིན་ཨ་རིའི་ཕྱི་སྲིད་བློན་ཆེན་མར་ཁོ་རོ་བྷིའོ་མཆོག་གིས་ལྷོ་ཀོ་རི་ཡའི་སྲིད་འཛིན་གསར་པར་འཚམས་འདྲི་གནང་བ་དང་། ཨ་རི་དང་ལྷོ་ཀོ་རི་ཡའི་བར་གྱི་འབྲེལ་ལམ་དང་། དཔལ་འབྱོར་ཡར་རྒྱས་གཏོང་རྒྱུའི་དམ་བཅའ་བརྟན་པོ་ཡོད། ཅེས་གསུངས་འདུག་ལ། རྒྱ་གར་གྱི་སྲིད་བློན་མོ་དྷི་མཆོག་གིས། དམངས་གཙོ་ཚོགས་པའི་ཚོགས་གཙོ་ལི་ལྷོ་ཀོ་རི་ཡའི་སྲིད་འཛིན་གསར་པར་འདེམས་ཐོན་བྱུང་བར་འཚམས་འདྲི་གནང་བ་དང་། ལྷོ་ཀོ་རི་ཡ་དང་ལྷན་དུ་འབྲེལ་ལམ་རྒྱ་སྐྱེད་དང་སྲ་བརྟན་དུ་གཏོང་རྒྱུ་ཡིན། ཞེས་གསུངས་འདུག

ད་ལན་སྲིད་འཛིན་གྱི་འོས་བསྡུ་གནང་དོན་ནི། འདས་ལོའི་ཕྱི་ཟླ་ ༡༢ ཚེས་ ༣ ཉིན་གྱི་མཚན་གུང་དུ་ཡུལ་དེའི་བརྙན་འཕྲིན་བརྒྱུད་ལྷོ་ཀོ་རི་ཡའི་སྲིད་འཛིན་ཟུར་བ་ཡུན་སུག་ཡོལ་ལགས་ཀྱིས་དྲག་པོའི་ཁྲིམས་ཤིག་ཡོངས་བསྒྲགས་བྱས་རྗེས། ཕྱོགས་འགལ་སྲིད་དོན་ཚོགས་པས་ཡུན་སུག་ཡོལ་གྱིས་དབང་ཆ་ལོག་སྤྱོད་དང་རྒྱལ་ཁྲིམས་དང་འགལ་བའི་བྱ་སྤྱོད་སྤེལ་བའི་ཉེས་འཛུགས་འོག ཟླ་དེའི་ཕྱི་ཚེས་ ༡༤ ཉིན་ཡུན་སུག་ཡོལ་སྲིད་འཛིན་གྱི་ལས་གནས་ནས་གནས་དབྱུང་བཏང་བ་མ་ཟད། འདི་ལོའི་ཕྱི་ཟླ་ ༡ ཚེས་ ༡༥ ཉིན་འཛིན་བཟུང་བྱས་པ་སོགས། ལྷོ་ཀོ་རི་ཡའི་ནང་ཆབ་སྲིད་འཕོ་འགྱུར་ཤུགས་ཆེན་བྱུང་བ་ལ་བརྟེན་ནས་ཐེངས་འདིར་བསྐྱར་དུ་སྲིད་འཛིན་གྱི་འོས་བསྡུ་བྱས་པའི་བརྒྱུད་རིམ་དེ་བྱུང་ཡོད།

ལི་རྗེ་མུ་ཡུང་ལགས་ནི་ཕྱི་ལོ་ ༡༩༦༤ ཟླ་ ༡༢ ཚེས་ ༢༢ ཉིན་ལྷོ་ཀོ་རི་ཡའི་གྲོང་ཁྱེར་ཨན་ཌོང་ (Andong) དུ་སྐྱེས་ཤིང་། ཆུང་དུས་ནས་དབུལ་ཕོངས་ཀྱི་ཁྱིམ་ཚང་ཞིག་ཏུ་སྐྱེས་ཏེ། བཟོ་གྲྭའི་ནང་ལས་ཀ་བྱས། སྐབས་དེར་ཁོང་གི་ལག་པར་རྨས་སྐྱོན་ཕོག་ནས་དབང་པོ་སྐྱོན་ཅན་དུ་གྱུར། ལི་ཡིས་ཁྲུང་ཨང་མཐོ་རིམ་སློབ་གཉེར་ཁང་ (Chung-Ang University) དུ་འབྲིང་རིམ་དང་མཐོ་རིམ་སློབ་གྲྭའི་སློབ་སྦྱོང་བྱས། ཕྱི་ལོ་ ༡༩༨༦ ལོར་ཁྲིམས་ལུགས་རིག་པའི་ཐོག་ཉེ་བའི་གཙུག་ལག་རབ་འབྱམས་པའི་སློབ་མཐར་སོན། དེ་རྗེས་འགྲོ་བ་མིའི་ཐོབ་དང་ངལ་རྩོལ་ཁྲིམས་རྩོད་པའི་ཕྱག་ལས་གནང་། ཕྱི་ལོ་ ༢༠༠༥ ནས་བཟུང་ཆབ་སྲིད་ནང་མཉམ་ཞུགས་གནང་མགོ་འཛུགས་ཏེ། ཕྱི་ལོ་ ༢༠༡༠ དང་ ༢༠༡༤ ལོར་ལྷོ་ཀོ་རི་ཡའི་སོང་ནམ་གྲོང་སྡེའི་སྤྱི་ཁྱབ་ཏུ་འདེམས་ཐོན་བྱུང་། ཕྱི་ལོ་ ༢༠༡༧ དང་ ༢༠༢༢ ལོར་སྲིད་འཛིན་གྱི་འོས་མིར་ལངས་ཀྱང་འོས་བསྡུའི་རྒྱལ་ཁ་ཐོབ་མི་འདུག ཕྱི་ལོ་ ༢༠༡༨ ལོར་གྷོང་གྷི་ཞིང་ཆེན་གྱི་སྤྱི་ཁྱབ་ཀྱི་ལས་གནས་ཁུར། ཕྱི་ལོ་ ༢༠༢༥ ལོར་ལྷོ་ཀོ་རི་ཡའི་སྲིད་འཛིན་གྱི་འོས་བསྡུའི་ནང་ཞུགས་ཏེ། ལི་ལ་འོས་གྲངས་བརྒྱ་ཆ་ ༤༩།༤༢ ཐོབ་སྟེ་སྲིད་འཛིན་དུ་འདེམས་ཐོན་བྱུང་འདུག

གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། སྐལ་བཟང་སྦྱིན་པ།