རྒྱ་རིགས་གཉིས་ཀྱིས་ཨ་རིའི་ནང་དུག་རྫས་ཅན་གྱི་ཤ་མོང་ནག་ཚོང་བརྒྱབ་པའི་གནད་དོན་བྱུང་བར་བརྟེན། རྒྱ་ནག་གིས་ཨ་རིའི་ཞིང་ལས་འདེབས་འཛུགས་ལ་བཙན་འཛུལ་བྱས་ཏེ་ཏོག་དབྱིབས་གཉན་རིམས་ལས་ཀྱང་ཚབས་ཆེ་བའི་དཀའ་ངལ་བསྐྲུན་ཐབས་བྱེད་ཀྱི་ཡོད་སྐོར་བརྗོད་འདུག
ཉེ་ལམ་རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་གནས་ཚུལ་ཐོན་པའི་ནང་། རྒྱ་ནག་གི་ཁྱོ་ཤུག་གཉིས་ཀྱིས་ཨ་རིའི་ནང་དུག་རྫས་ལྡན་པའི་ཤ་མོང་ནག་ཚོང་བརྒྱབ་པའི་གནད་དོན་བྱུང་བར་བརྟེན། ཨ་རིའི་རྒྱ་ནག་གི་ཆེད་མཁས་པས་ཨ་རིའི་ནང་ཏོག་དབྱིབས་གཉན་རིམས་ལས་ཀྱང་ཉེན་ཚབས་ཆེ་བའི་དཀའ་ངལ་འཕྲད་རྒྱུ་ཡིན་པའི་ཉེན་བརྡ་བཏང་འདུག
ཨ་རིའི་རྒྱ་ནག་ཆེད་མཁས་པ་གྷོར་ཌོན་ཁྲང་ (Gordon G Chang) གྱིས། རྒྱ་ནག་གི་ཚན་རིག་པ་གཉིས་ཀྱིས་ཨ་རིའི་ནང་དུག་རྫས་ཅན་གྱི་ཤ་མོང་ནག་ཚོང་བརྒྱབ་པའི་གནད་དོན་བྱུང་བར་བརྟེན། ཨ་རིའི་ངོས་ནས་ཡིད་གཟབ་བྱེད་དགོས་པ་དང་། གལ་ཏེ་ཨ་རིས་རྒྱ་ནག་དང་འབྲེལ་ལམ་མཚམས་འཇོག་མ་བྱས་ཚེ། ཏོག་དབྱིབས་གཉན་རིམས་ལས་ཀྱང་ཉེན་ཚབས་ཆེ་བའི་གནས་སྟངས་ཡོང་ཉེན་ཡོད་པའི་ཉེན་བརྡ་བཏང་འདུག
ད་དུང་ཁྲང་གིས། རྒྱ་ནག་གི་མགོ་ཁྲིད་ཞི་ཅིན་ཕིན་གྱིས་དུས་རྟག་ཏུ་དམག་འཁྲུག་རྒྱག་རྒྱུ་དང་འབྲེལ་ནས་སྐད་ཆ་ཤོད་ཀྱི་ཡོད་ལ། ཁོས་རྒྱ་ནག་ནང་གི་མི་མང་རྣམས་ལ་དམག་སྦྱོང་སྤྲད་དེ་དམག་འཁྲུག་ལ་འགྲོ་རྒྱུའི་སྐུལ་འདེད་གཏོང་གི་ཡོད་པར་བརྟེན། ཨ་རི་ནི་སྟོབས་ཆེན་རྒྱལ་ཁབ་ཅིག་ཡིན་ཡང། རྒྱལ་ཁབ་རང་ཉིད་ཀྱིས་དྲག་པོའི་ལམ་དང་། དགོས་མཁོ་ལ་གཞིགས་ནས་ཐག་གཅོད་ངེས་ཅན་ཞིག་གི་ཐོག་ནས་འགོག་རྒོལ་བྱེད་ཀྱི་མེད་པར་བརྟེན། རང་ཉིད་ཀྱི་རྒྱལ་ཁབ་ཤོར་སྲིད་པའི་ཉེན་ཁ་ཡོད་སྐོར་དང་། ཕྱི་ལོ་ ༢༠༢༠ ལོར་རྒྱ་ནག་གིས་ཨ་རིའི་མངའ་སྡེ་ ༥༠ ནང་མགོ་སྐོར་བསླུ་བྲིད་འོག་འབྲུ་རིགས་མང་པོ་འོར་འདྲེན་བྱས་ཡོད་པ་དེས་ཨ་རིའི་ནང་ཞིང་ལས་འདེབས་འཛུགས་བརྒྱུད་བཙན་འཛུལ་བྱེད་ཐབས་ལ་བརྩོན་པ་ཞིག་རེད་བསམ་གྱི་ཡོད་སྐོར་སོགས་བརྗོད་འདུག
དེ་ཡང་རང་ལོ་ ༣༣ ཡིན་པའི་རྒྱ་རིགས་ཡུན་ཆིང་ཅེན་ (Yunqing Jian) དང་ཁོའི་དགའ་རོགས་རང་ལོ་ ༣༤ ཡིན་པའི་ཙུན་ཡོང་ལིའུ་གཉིས་ཀྱིས་ཨ་རིའི་ནང་དུག་རྫས་ཅན་གྱི་ཤ་མོང་ (Fusarium graminearum) ཞེས་པ་ལྐོག་ཏུ་དབོར་འདྲེན་བྱས་ཏེ་ནག་ཚོང་རྒྱག་གི་ཡོད་ཅིང་། དུག་རྫས་དེས་གྲོ་དང་ནས། འབྲས། མ་རྨོས་ལོ་ཏོག་སོགས་ཀྱི་ལོ་མའི་ཐོག་ཏུ་ཆགས་པའི་ལྕགས་བཙའ་ལྟ་བུའི་བཙའ་ཐན་ཕོག་སྟེ་མི་དང་སེམས་ཅན་གྱི་འཕྲོད་བསྟེན་ལ་ཤུགས་རྐྱེན་ངན་པ་སྤྲོད་ཀྱི་ཡོད་པ་གསལ་འདུག
དེ་འབྲེལ་ཨ་རིའི་ཁྲིམས་འཛིན་ལྷན་ཁང་གིས། ཤ་མོང་ཚུད་པའི་ཞིང་ལས་ལ་འཇིགས་སྐུལ་གྱི་མཚོན་ཆ་བེད་སྤྱོད་བྱས་པ་བརྒྱུད། ལོ་རེར་ཨ་སྒོར་ཐེར་འབུམ་མང་པོའི་གྱོང་གུན་ཐེབས་ཡོད་སྐོར་དང་། ཤ་མོང་དུག་རྫས་ཅན་གྱིས་སྐྱུག་མེར་སློང་བ་དང་། མཆིན་པ་ཉམས་ཆག་ཏུ་གཏོང་བ། མི་དང་སེམས་ཅན་གྱི་སྐྱེ་འཕེལ་ལ་གནོད་སྐྱོན་ཐེབས་ཀྱི་ཡོད་སྐོར་བརྗོད་འདུག
རྒྱ་ནག་གི་ཆེད་མཁས་པ་གྷོར་ཌོན་ཁྲང་ནི་རྒྱ་ནག་དམག་འཁྲུག་ལ་འགྲོ་རྒྱུ་རེད་ (China is Going to War) ཅེས་པའི་རྩོམ་པ་པོ་ཡིན་པ་རེད། ཁོས་འདས་པའི་ལོ་ངོ་བཅུ་ཕྲག་གཉིས་རིང་རྒྱ་ནག་དང་ཧོང་ཀོང་ནང་དུ་ལས་དོན་གཉེར་མྱོང་བ་དང་། ཉེ་ལམ་རྒྱ་ནག་ཧྲང་ཧེ་རུ་ཨ་རིའི་ཁྲིམས་ཁང་པོལ་ཝེ་སི་ (Paul Weiss) ཡི་ཁྲིམས་རྩོད་པ་དང་། དེ་སྔ་ཧོང་ཀོང་དུ་རྒྱལ་སྤྱིའི་ཁྲིམས་ཁང་བྷེ་ཀར་དང་མེག་ཀེན་ཛི་ (Baker & McKenzie) ཡི་མཉམ་ལས་འགན་འཁུར་བླངས་ཡོད་འདུག
གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
