དེ་རིང་༧གོང་ས་རྒྱལ་བ་རིན་པོ་ཆེ་མཆོག་ནས་ཛན་དྷན་ཤཱ་ཏར་གོམ་བྷོ་ཇ་ཝི་ (Zandanshatar Gombojav) མཆོག་སོག་པོའི་སྲིད་བློན་ཐེངས་ ༣༤ པར་འདེམས་ཐོན་བྱུང་བརའཚམས་འདྲི་མཛད།
ཁ་སང་ཕྱི་ཚེས་ ༡༢ ཉིན་སོག་པོའི་སྲིད་བློན་ཛན་དྷན་ཤ་ཏར་མཆོག་འདེམས་ཐོན་བྱུང་བ་ལྟར། དེ་རིང་༧གོང་ས་རྒྱལ་བ་རིན་པོ་ཆེ་མཆོག་ནས་འཚམས་འདྲིའི་གསུང་འཕྲིན་སྩལ་བའི་ནང་། ངོས་རང་ཕྱི་ལོ་ ༡༩༧༩ ལོར་སོག་པོའི་རྒྱལ་ཁབ་ཏུ་ཐོག་མར་བསྐྱོད་པའི་གོ་སྐབས་བྱུང་བ་དང་། སོག་པོའི་མི་རབས་རྒན་གཞོན་ཚང་མས་འགྲོ་བ་མིའི་རིན་ཐང་། སྲོལ་རྒྱུན་གྱི་ནང་པའི་ཆོས་ལུགས་དང་དེང་དུས་ཀྱི་ཤེས་ཡོན་ཟུང་འབྲེལ་གོང་སྤེལ་གཏོང་བར་དགའ་མོས་དང་སྤྲོ་སེམས་འཕེལ་བཞིན་པ་དེས་ངོས་ལ་སེམས་འགུལ་ཆེན་པོ་ཐེབས་བྱུང་།
ལོ་རྒྱུས་ཀྱི་ཐོག་ནས་སོག་པོ་དང་བོད་མིའི་བར་ལ་མཚེ་མ་ལྟ་བུ་གཅེན་གཅུང་གི་འབྲེལ་བ་ཡོད་ཅིང་། ༧རྒྱལ་དབང་སྐུ་ཕྲེང་གསུམ་པ་བསོད་ནམས་རྒྱ་མཚོ་མཆོག་གི་སྐབས་ནས་བཟུང་བོད་སོག་གཉིས་ཀྱི་དབར་ལ་དམིགས་བསལ་གྱི་དམ་ཟབ་ཐོག་ནས་གནས་ཡོད།
དེ་སྔོན་ངོས་སོག་པོར་བསྐྱོད་པའི་སྐབས་སུ་ཞུས་མྱོང་བ་བཞིན། སོག་པོའི་ནང་ཆོས་ལུགས་གཞན་ཡོད་ཀྱང་། ནང་ཆོས་ལ་བརྟེན་ནས་སོག་པོའི་རིག་གཞུང་དང་ངོ་བོ། མི་མང་གི་བསམ་བློ་བཅས་གྲུབ་ཡོད།
སངས་རྒྱས་བཅོམ་ལྡན་འདས་ཀྱི་ཆོས་ཀྱི་སྙིང་བོ་ཡིས་སྙིང་རྗེ་དང་འཚེ་བ་མེད་པ་སོགས་འགྲོ་བ་མིའི་གཞི་རྩའི་རིན་ཐང་གལ་གནད་དུ་རྩི་ཡི་ཡོད་ལ། སངས་རྒྱས་ཀྱི་གསུང་དེ་དག་གིས་མི་སྒེར་གྱི་ཆོས་ལུགས་ལ་ལྟོས་མེད་ཀྱིས་མི་ཚང་མར་ཕན་ཐོགས་པའི་ནུས་སྟོབས་ཡོད། ངོས་ནས་ཁྱེད་དང་ཁྱེད་ཀྱི་གཞུང་གིས་རིན་ཐང་དེ་དག་རྒྱུན་འཛིན་དང་མཐོར་འདེགས་བྱེད་པའི་ཡིད་ཆེས་ཡོད།
ངོས་ནས་ཉེ་བའི་ལོ་འགའི་རིང་སོག་པོར་ཕྱོགས་ཡོངས་ནས་ཡིད་སྨོན་སྐྱེ་དགོས་པའི་འཕེལ་རྒྱས་བྱུང་བར་ཡི་རངས་ཞུ་བཞིན་ཡོད། འཕེལ་རྒྱས་དེ་དག་གི་ཁྲོད་ནས་སོག་པོའི་དབུལ་ཕོངས་དང་དགོས་མཁོ་ཆེ་བའི་མི་མང་གི་འཚོ་བ་དངོས་སུ་ཡར་རྒྱས་གཏོང་གི་ཡོད་ཚེ། གྲུབ་འབྲས་དེ་དག་གི་རིན་ཐང་དེ་བས་ཀྱང་དོན་དང་ལྡན་པ་ཆགས་ཀྱི་ཡོད། ཅེས་གསུངས།
མཇུག་ཏུ་༧མགོན་པོ་གང་ཉིད་མཆོག་གིས། སོག་པོའི་སྲིད་བློན་གསར་པའི་མདུན་སྔར་ལྷག་པའི་སོག་པོའི་མི་མང་གི་རེ་བ་དང་མངོན་འདུན་མཐའ་དག་ལེགས་འགྲུབ་ཡོང་བའི་ཐུགས་རེ་གནང་འདུག
ཛན་དྷན་ཤཱ་ཏར་གོམ་བྷོ་ཇ་ཝི་མཆོག་ནི་ཕྱི་ལོ་ ༡༩༧༠ ཟླ་ ༣ ཚེས་ ༡༨ ཉིན་སྐྱེས་ཤིང་། ༡༩༩༢ ལོར་བྷའེ་ཀལ་མངའ་སྡེའི་མཐོ་རིམ་སློབ་གཉེར་ཁང་ (Baikal State University) དུ་དཔལ་འབྱོར་རིག་པའི་ཐོག་གཙུག་ལག་རབ་འབྱམས་པ་དང་ཆེད་སྦྱོང་སློབ་མཐར་སོན། ཕྱི་ལོ་ ༡༩༩༢ ནས་ ༡༩༩༥ བར་ཚོང་དོན་རིག་པའི་མཐོ་སློབ་ཅིག་ཏུ་སློབ་དཔོན་གྱི་ཕྱག་ལས་གནང་། དེ་རྗེས་སོག་པོའི་ཞིང་ལས་དངུལ་ཁང་ (Agricultural Bank) དུ་དཔལ་འབྱོར་བསྐྱར་སྒྲིག་འགན་འཛིན་དང་། ཕྱི་དངུལ་ལས་ཁུངས་ཀྱི་འགན་འཛིན། བུ་ལོན་དང་དངུལ་རྩའི་སྲིད་ཇུས་ལས་ཁུངས་ཀྱི་འགན་འཛིན་སོགས་དངུལ་ཁང་དུ་ཕྱག་ལས་གནང་མྱོང་ཡོད་པ་རེད། ཕྱི་ལོ་ ༢༠༠༣ ནས་ལོ་ངོ་གཅིག་གི་རིང་ཟས་རིགས་དང་ཞིང་ལས་བློན་ཆེན་དང་། ཕྱི་ལོ་ ༢༠༠༩ ནས་ ༢༠༡༢ བར་ཕྱི་སྲིད་ལས་ཁུངས་ཀྱི་དཔལ་འབྱོར་ཚན་པའི་ནང་ཕྱག་ལས་གནང་། ཕྱི་ལོ་ ༢༠༡༢ བཟུང་སོག་པོའི་མི་མང་དམངསགཙོ་སྲིད་དོན་ཚོགས་པའི་ཚོགས་མི་དང་། ཕྱི་ལོ་ ༢༠༡༧ ནས་ ༢༠༡༩ བར་སོག་པོའི་སྲིད་གཞུང་གི་དྲུང་ཆེ་གཙོ་བོ། ༢༠༡༩ ནས་ ༢༠༢༤ བར་སོག་པོའི་གྲོས་ཚོགས་ཀྱི་ཚོགས་གཙོ་གནང་། ཟླ་འདིའི་ཕྱི་ཚེས་ ༡༢ ཉིན་ཁོང་ཉིད་སོག་པོའི་སྲིད་བློན་ཐེངས་ ༣༤ པར་འདེམས་ཐོན་བྱུང་ཡོད་འདུག
གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
