༧གོང་ས་རྒྱལ་བ་རིན་པོ་ཆེ་མཆོག་ནས་རྒྱ་གར་གྱི་སྲིད་འཛིན་ལྕམ་སྐུ་ཤྲི་མ་ཏི་མཆོག་དགུང་གྲངས་ ༦༧ ལ་ཕེབས་པའི་འཁྲུངས་སྐར་ལ་འཚམས་འདྲི་མཛད།
དེ་རིང་ནི་རྒྱ་གར་གྱི་སྲིད་འཛིན་ལྕམ་སྐུ་ཤྲི་མ་ཏི་(Shrimati Droupadi Murmu) མཆོག་དགུང་གྲངས་ ༦༧ ལ་ཕེབས་པའི་འཁྲུངས་སྐར་ཡིན་པ་ལྟར། བཞུགས་སྒར་༧རྒྱལ་བའི་ཕོ་བྲང་ནས་༧གོང་ས་རྒྱལ་བ་རིན་པོ་ཆེ་མཆོག་ནས་ལྕམ་སྐུ་མཆོག་གི་འཁྲུངས་སྐར་ལ་འཚམས་འདྲི་མཛད་དེ། རྒྱ་གར་གཞུང་མང་གཉིས་ཀྱིས་ལོ་ངོ་ ༦༦ ལྷག་གི་རིང་བོད་མི་རྣམས་ལ་གཟིགས་སྐྱོང་གང་ལེགས་གནང་བར་ཐུགས་རྗེ་ཆེ་ཞུས་ཡོད་འདུག
༧གོང་ས་རྒྱལ་བ་རིན་པོ་ཆེ་མཆོག་གི་གསུང་འཕྲིན་ནང་། ཁྱེད་ཀྱིས་མཁྱེན་གསལ་བཞིན་ཕྱི་ལོ་ ༡༩༥༩ ལོའི་ཟླ་གསུམ་པའི་ནང་བོད་མི་རྣམས་ཀྱིས་རྒྱ་ནག་དམར་ཤོག་ཚོགས་པའི་དབང་འཛིན་པར་ངོ་རྒོལ་བྱས་ཏེ་བཙན་བྱོལ་དུ་ཡོང་དགོས་བྱུང་བས། ངོས་ཀྱི་མི་ཚེ་མང་ཆེ་བ་རྒྱ་གར་ནང་བསྐྱལ་བ་ཡིན། དེར་བརྟེན། ངོས་རང་དམིགས་བསལ་རྒྱལ་ཁབ་འདིར་བློ་སེམས་ཉེ་བོ་ཡོད། རྒྱ་གར་ནི་འཛམ་གླིང་ནང་མི་འབོར་མང་ཤོས་དང་དམངས་གཙོའི་རྒྱལ་ཁབ་ཆེ་ཤོས་ཤིག་ཡིན་པ་མ་ཟད། གནའ་བོའི་ཤེས་རིག་གི་ཁུངས་ཕུན་སུམ་ཚོགས་པ་ཡོད། ངོས་ནས་གནའ་དེང་གི་ཤེས་ཡོན་དང་ཟུང་འབྲེལ་ཐོག་ནས་འཛམ་གླིང་ནང་ཞི་བདེ་དང་བདེ་སྐྱིད་སྐྲུན་པར་ཕན་ཐོགས་ཆེན་པོ་ཡོད་པའི་ཡིད་ཆེས་ཡོད།
ངོས་རང་ལ་མཚོན་ན་རྒྱ་གར་གྱི་གཏིང་ཟབ་པའི་གནའ་བོའི་རིག་གཞུང་ལས་སེམས་དང་སེམས་བྱུང་གི་ཐོག་དམིགས་བསལ་གྱིས་གོ་རྟོགས་སྤེལ་བར་འབད་བརྩོན་བྱེད་བཞིན་ཡོད། དེས་ང་ཚོའི་སེམས་སུ་ཞི་བདེ་དང་སེམས་བཟང་པོ་གོང་མཐོར་འགྲོ་བར་རྨང་གཞི་བསྐྲུན་ཐུབ་པའི་ཡིད་ཆེས་ཡོད་པ་མ་ཟད། ང་ཚོ་ཞེ་སྡང་དང་འཇིགས་སྣང་གི་ཚོར་བ་ལས་བྲལ་ཏེ་འཛམ་གླིང་ནང་ཞི་བདེ་དང་བྱམས་བརྩེ་བསྐྲུན་པའི་ཕན་ནུས་ཡོད། ཅེས་གསུངས་འདུག
གསུང་འཕྲིན་གྱི་མཇུག་ཏུ། རྒྱ་གར་གཞུང་མང་གཉིས་ཀྱིས་ལོ་ངོ་ ༦༦ ལྷག་གི་རིང་བོད་མི་རྣམས་ལ་གཟིགས་སྐྱོང་གང་ལེགས་གནང་བར་ཐུགས་རྗེ་ཆེ་ཞུ། དེ་བཞིན་ང་ཚོས་རྒྱ་གར་གྱི་ནང་པའི་རིག་གཞུང་ཁྲོད་ཀྱི་འཚེ་བ་མེད་པ་དང་བྱམས་བརྩེའི་རིན་ཐང་ལ་སྲུང་སྐྱོབ་དང་གོང་སྤེལ་གཏོང་བར་རྒྱབ་སྐྱོར་གནང་བར་ཐུགས་རྗེ་ཆེ་ཞུ་རྒྱུ་ཡིན། ཞེས་གསུངས་འདུག
རྒྱ་གར་གྱི་སྲིད་འཛིན་ལྕམ་སྐུ་ཤྲི་མ་ཏི་མཆོག་ནི་ཕྱི་ལོ་ ༡༩༥༨ ཟླ་ ༦ ཚེས་ ༢༠ ཉིན་རྒྱ་གར་ཨོ་ཌི་ཤ་མངའ་སྡེ་རུ་འཁྲུངས། རཱ་མ་ཌེ་ཝི་བུད་མེད་ཀྱི་མཐོ་རིམ་སློབ་གྲྭ་ (Rama Devi Women’s College) ནས་སྒྱུ་རྩལ་ཐོག་བསླབ་པ་མཐར་སོན་རྗེས། དགེ་རྒན་དང་སློབ་དཔོན་ཆེན་མོའི་ལས་རོགས་ཀྱི་ཕྱག་ལས་གནང་། ཕྱི་ལོ་ ༡༩༩༧ ལོར་བྷི་ཇེ་པི་ (BJP) ཆབ་སྲིད་ཚོགས་པའི་ནང་ཞུགས་ཏེ། རཱ་རང་གྷི་པུར་(Rairangpur Nagar Panchayat) ཚོགས་པའི་ཚོགས་མིར་འདེམས་ཐོན་བྱུང་། ཕྱི་ལོ་ ༢༠༠༠ ལོར་ཚོགས་པ་དེའི་ཚོགས་གཙོ་དང་། བྷི་ཇེ་པི་ཆབ་སྲིད་ཚོགས་པའི་ཚོགས་གཙོ་གཞོན་པའི་ཕྱག་ལས་གནང་། ཕྱི་ལོ་ ༢༠༡༥ ལོར་རྒྱ་གར་ཤར་ཕྱོགས་ཇར་ཁན་ཌི་ (Jharkhand) མངའ་སྡེའི་སྤྱི་ཁྱབ་བློན་ཆེན་གྱི་ཕྱག་ལས་གནང་། ཕྱི་ལོ་ ༢༠༢༢ ལོའི་བྷི་ཇེ་བྷི་ཆབ་སྲིད་ཚོགས་པའི་སྲིད་འཛིན་གྱི་འོས་མིར་བདམས་ཏེ། ཕྱི་ལོ ༢༠༢༢ཕྱི་ཟླ་ ༧ ཕྱི་ཚེས་ ༢༡ ཉིན་སྲིད་འཛིན་གྱི་རྒྱལ་ཁ་ཐོབ་ཡོད་ཅིང་། ཁོང་མོ་ནི་གདོད་མའི་མི་རིགས་ཀྱི་རིགས་རྒྱུད་ཅིག་དང་། གདོད་མའི་མི་རིགས་ཀྱི་ཆབ་སྲིད་མི་སྣ་ཐོག་མ་དང་རྒྱ་གར་གྱི་བུད་མེད་སྲིད་འཛིན་གཉིས་པ་དེ་ཡིན་འདུག
གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
