ད་ལྟའི་ཆར་སྲིད་སྐྱོང་སྤེན་པ་ཚེ་རིང་མཆོག་དབྱིན་ཡུལ་དང་ཡུ་རོབ་རྒྱལ་ཁབ་ཁག་ཏུ་གཞུང་འབྲེལ་ཕྱོགས་ཕེབས་གནང་བཞིན་ཡོད་པ་ལྟར། སྲིད་སྐྱོང་མཆོག་གིས་དབྱིན་ཡུལ་དང་འཇར་མན་གྱི་གནད་ཡོད་མི་སྣར་མཇལ་འཕྲད་ཀྱིས་རྒྱལ་ཁབ་དེ་དག་གི་ནང་དུ་བོད་དོན་དང་འབྲེལ་བའི་ཁྲིམས་ཡིག་གཏན་འབེབས་བྱེད་པའི་སྐུལ་མ་གནང་འདུག
ཟླ་འདིའི་ཕྱི་ཚེས་ ༢༠ ནས་ ༢༧ བར་ཉིན་གྲངས་བདུན་རིང་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་རྒྱ་གར་གྱི་རྒྱལ་ས་ལྡི་ལི་བརྒྱུད་དབྱིན་ཡུལ། འཇར་མན་རྒྱལ་ཁབ་གཉིས་ནང་གཞུང་འབྲེལ་ཕྱོགས་ཕེབས་གནང་སྟེ། ད་ལྟ་འཇར་མན་ནང་དུ་འཚམས་གཟིགས་གནང་བཞིན་ཡོད་པ་ལྟར། ཁ་སང་ཕྱི་ཚེས་ ༢༤ ཉིན་སྲིད་སྐྱོང་སྤེན་པ་ཚེ་རིང་མཆོག་གིས་འཇར་མན་གྲོས་ཚོགས་འཐུས་མི་སྐུ་ཞབས་མེ་ཁེལ་བྷི་རན་ཌི་ (Michael Brand) ལགས་དང་མཇལ་འཕྲད་གནང་འདུག སྐབས་དེར་སྲིད་སྐྱོང་མཆོག་གིས་སྐུ་ཞབས་མེ་ཁེལ་བྷི་རན་ཌི་མཆོག་འཇར་མན་སྲིད་གཞུང་གསར་པའི་ནང་ཤེས་ཡོན་དང་། ཁྱིམ་ཚང་གནད་དོན། མི་སེར་རྒན་པ། བུད་མེད། གཞོན་སྐྱེས་བཅས་ཐོག་གྲོས་ཚོགས་ཀྱི་དྲུང་ཆེར་བསྐོ་བཞག་བྱུང་བར་འཚམས་འདྲི་གནང་ཡོད་འདུག དེ་བཞིན་སྲིད་སྐྱོང་མཆོག་དང་ཁོང་གཉིས་ཀྱིས་འཇར་མན་གྲོས་ཚོགས་དང་ཡུ་རོབ་ནང་བོད་དོན་ཐོག་དོ་སྣང་ཤུགས་ཆེ་རུ་གཏོང་ཐབས་སྐོར་ལ་བགྲོ་གླེང་གནང་ཡོད་འདུག སྐུ་ཞབས་མེ་ཁེལ་བྷི་རན་ཌི་ལགས་བོད་དོན་ལ་རྒྱབ་སྐྱོར་ཤུགས་ཆེན་གནང་མཁན་གྱི་མི་སྣ་ཞིག་ཡིན་འདུག
ཟླ་འདིའི་ཕྱི་ཚེས་ ༢༣ ཉིན་སྲིད་སྐྱོང་མཆོག་དབྱིན་ཡུལ་དུ་གཞུང་འབྲེལ་འཚམས་གཟིགས་སྐབས། ཕྱི་ཚེས་ ༢༢ ཉིན་གྱི་ཞོགས་པ་དབྱིན་ཡུལ་གྱི་བྷི་བྷི་སི་རླུང་འཕྲིན་ཁང་གི་འབྲུག་ཐར་ལགས་ཀྱི་པོ་བསྒྲགས་ (podcast) བཅར་འདྲི་ལེ་ཚན་ལ་ལན་འདེབས་གནང་འདུག དེ་རྗེས་སྲིད་སྐྱོང་མཆོག་དང་ས་གནས་དོན་གཅོད་ཚེ་རིང་དབྱངས་སྐྱིད་བཅས་དབྱིན་ཡུལ་གྱི་བོད་ཀྱི་སྐད་ཡིག་དང་རིག་གཞུང་སློབ་གྲྭའི་ལོ་འཁོར་དུས་ཆེན་ལ་ཆེད་ཕེབས་གནང་བ་དང་། གསུང་བཤད་ཡང་གནང་ཡོད་འདུག སྐབས་དེར་དབྱིན་ཡུལ་དུ་ཡོད་པའི་བོད་རིགས་ཚོགས་པའི་ཚོགས་གཙོ་ཕུན་ཚོགས་ནོར་བུ་ལགས་ཀྱིས་ས་གནས་ཀྱི་ལས་བསྡོམས་སྙིང་བསྡུས་ངོ་སྤྲོད་དང་བཀའ་ཤག་སྐབས་བཅུ་དྲུག་པར་འཚམས་འདྲི་ཞུས་འདུག དེ་རྗེས་སྲིད་སྐྱོང་མཆོག་གིས་བོད་ཀྱི་སྐད་ཡིག་གལ་ཆེན་ཡིན་པ་དང་། ཕ་མས་ཁྱིམ་དུ་བོད་སྐད་རྒྱག་དགོས། རྒྱུན་ལྡན་ནས་བོད་ཡིག་སློབ་ཁྲིད་གནང་དགོས་པ་གལ་ཆེན་ཡིན་ཚུལ་དང་། བོད་ཀྱི་གནས་སྟངས་སོགས་འགྲེལ་བརྗོད་གནང་འདུག་པ་མ་ཟད། བོད་ཀྱི་གཞོན་སྐྱེས་རྣམས་ཀྱིས་བོད་ཀྱི་སྐད་ཡིག་ཐོག་དོ་སྣང་བྱེད་དགོས་པ་ལས་ལྷོད་གཡེང་ཤོར་ན་འཐུས་ཤོར་ཆེན་པོ་དང་ཉེན་ཁའི་གནས་སྟངས་རེད་ཅེས་ནན་སྐུལ་བྱས་འདུག་ལ། དེ་རྗེས་བོད་མིའི་སྒྲིག་འཛུགས་ཀྱི་སྲིད་བྱུས་དབུ་མའི་ལམ་སྐོར་ངོ་སྤྲོད་དང་རིན་ཐང་ངོས་འཛིན་བྱེད་དགོས་པ་ནན་སྐུལ་བྱས་ཡོད་འདུག
ཟླ་འདིའི་ཚེས་ ༢༡ ཉིན་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དབྱིན་ཡུལ་གྱི་རྒྱལ་ས་ལོན་ཌོན་དུ་ཕེབས་འབྱོར་གནང་ཡོད་ཅིང་། སྐབས་དེར་གནམ་ཐང་དུ་དབྱིན་ཡུལ་སྐུ་ཚབ་དོན་གཅོད་ཚེ་རིང་དབྱངས་སྐྱིད་ལགས་ཀྱིས་གཙོས་སྐུ་ཚབ་དོན་ཁང་གི་དྲུང་ཆེ་བསྟན་འཛིན་ཀུན་དགའ་ལགས་དང་། ས་གནས་བོད་མི་རྣམས་ཀྱིས་ཕེབས་བསུའི་སྣེ་ལེན་གཟབ་རྒྱས་ཞུས་ཡོད་འདུག་ལ། དེ་རྗེས་དཔལ་ལྡན་སྲིད་སྐྱོང་མཆོག་ནས་དབྱིན་ཡུལ་དུ་རྟེན་གཞི་བྱས་པའི་དཔལ་འབྱོར་རིག་པའི་སློབ་གཉེར་ཁང་དུ་བོད་རིགས་ཚོགས་པ་དང་། དང་བླངས་བོད་དོན་ཞུ་གཏུག་གི་གོ་སྒྲིག་འོག ས་གནས་བོད་རིགས་གཞོན་སྐྱེས་རྣམས་ལ་ཟུར་དུ་ཐུག་འཕྲད་ཀྱིས་གསུང་བཤད་གནང་ཡོད་འདུག སྲིད་སྐྱོང་མཆོག་གིས་བཙན་བྱོལ་ནང་ཐོག་མར་འབྱོར་མཁན་གྱི་མི་རབས་རྒན་པ་ཚོར་མཐུན་རྐྱེན་འཛོམས་པོ་དང་ཤེས་ཡོན་སོགས་དེ་ཙམ་མེད་ཀྱང་༸གོང་ས་རྒྱལ་བ་རིན་པོ་ཆེ་མཆོག་ལ་དད་གུས་མོས་གསུམ་གྱིས་ཐོག་ནས་རྒྱ་གར་ནང་བཙན་བྱོལ་དུ་ཡོང་བ་ཞིག་རེད། ཁོང་རྣམ་པའི་བཀའ་དྲིན་ལ་བརྟེན་ནས་ད་ལྟའི་མི་རབས་དེ་འཚོ་གནས་བྱེད་བཞིན་པ་དང་། ད་ལྟའི་ཆར་མི་རབས་རྒན་པ་རྣམས་རིམ་པས་རྫོགས་འགྲོ་བཞིན་ཡོད་པས། མི་རབས་གཞོན་པ་ཚོས་བོད་དོན་ཐོག་འགན་ཁུར་གྱིས་ཕྱག་ལས་གནང་དགོས་པ་དང་། མ་འོངས་བོད་དོན་ཐོག་མི་རབས་གསར་བ་ཚོས་འགན་ཁུར་བཞེས་དགོས་སྐོར་འགྲེལ་བརྗོད་གནང་།
དེ་རྗེས་དཔལ་ལྡན་སྲིད་སྐྱོང་མཆོག་གིས་བོད་རིགས་གཞོན་སྐྱེས་རྣམས་ལ་གློག་སྟོན་བརྙན་རིས་བརྒྱུད་ནས། འཛམ་གླིང་གི་བྱང་སྣེ་དང་ལྷོ་སྣེ་བརྩིས་པའི་སྣེ་གསུམ་པ་དེ་བོད་ཁམས་ཀྱི་ཡུལ་ཆགས་ཀྱི་ཡོད་པས། བོད་ཀྱིས་འཛམ་གླིང་གི་གནམ་གཤིས་འགྱུར་ལྡོག་ལ་ཤུགས་རྐྱེན་སྤྲོད་ཀྱི་ཡོད་པའི་སྐོར། དེ་བཞིན་བོད་ནི་ཨེ་ཤེ་ཡ་རྒྱལ་ཁབ་མང་པོ་ཞིག་གི་ཆུ་བོའི་སྒོ་ཁུངས་ཡིན་པ་དང་། རྒྱ་ནག་གིས་བོད་ཀྱི་ཁོར་ཡུག་ལ་གནོད་པའི་བོད་ནང་ཆུ་མཛོད་ ༣༠༠ ལྷག་ཙམ་ཞིག་གསར་རྒྱག་གཙོས་ལས་གཞི་མང་པོ་སྤེལ་ནས་རང་བྱུང་ལ་གཏོར་བཤིག་གཏོང་བཞིན་པའི་སྐོར་ཡང་འགྲེལ་བརྗོད་གནང་སོང་། དེ་བཞིན་དུ་བོད་དེ་རྒྱ་ནག་གི་ཆ་ཤས་རེད་ཟེར་བ་དེ་ལོ་རྒྱུས་ཐོག་ནས་བདེན་པ་མིན་པའི་ར་སྤྲོད་དང་། བོད་ཀྱི་བཙན་པོའི་དུས་ནས་བཟུང་ད་ལྟའི་བར་གྱི་བོད་མིའི་སྒྲིག་འཛུགས་ཀྱི་བྱུང་རབས་དང་། ༧གོང་ས་རྒྱལ་བ་རིན་པོ་ཆེ་མཆོག་གིས་བཙན་བྱོལ་ནང་དུ་བོད་མི་ཚོར་མང་གཙོའི་ཀ་བ་གསུམ་གྱི་ཡན་ལག་ཡོངས་སུ་ཚང་བའི་ཐོག་ནས་བོད་མིའི་སྒྲིག་འཛུགས་གསར་འཛུགས་དང་། མང་གཙོ་ལག་བསྟར། དེ་བཞིན་མང་གཙོ་ཚད་ལྡན་ཞིག་གི་ཐོག་ལ་གོམས་པ་མདུན་སྐྱོད་གནང་བའི་བརྒྱུད་རིམ་སོགས་ངོ་སྤྲོད་དང་། ༸གོང་ས་རྒྱལ་བ་རིན་པོ་ཆེ་མཆོག་གིས་ད་ལྟའི་དངོས་ཡོད་ཀྱི་གནས་སྟངས་གཞིར་བཞག་པའི་ཐོག་བོད་རྒྱའི་དཀའ་རྙོག་སེལ་ཐབས་སུ་གཉིས་སྨན་དབུ་མའི་ལམ་གྱི་སྲིད་བྱུས་གསར་གཏོད་དང་། དེའི་ཐོག་ནས་རྒྱལ་སྤྱིའི་ནང་གདེངས་འཇོག་ཐོབ་པའི་ཐོག་ཉེ་ལམ་ཕྱི་ལོ་ ༢༠༢༤ ལོར་ཨ་རིའི་སྲིད་གཞུང་ནས་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་ཡིག་གཏན་འབེབས་གནང་ཡོད་པའི་སྐོར་སོགས་གསུང་བཤད་གནང་འདུག
གཞན་ཡང་སྲིད་སྐྱོང་མཆོག་གིས། བོད་རིགས་གཞོན་སྐྱེས་ཚོར་བོད་ཀྱི་ལོ་རྒྱུས་བྱུང་རབས་སྐོར་ལ་ཤེས་རྟོགས་དགོས་གལ་ཆེ་ཞིང་། རྒྱལ་སྤྱིའི་ཁྲིམས་དོན་རིག་པའི་མཁས་པ་སྐུ་ཞབས་མཧི་ཀལ་ཝན་ཝལ་ཝན་པ་རག་ལགས་ཀྱིས་བརྩམས་པའི་བོད་ཀྱི་གནད་བསྡུས་ཉི་ཤུ་ཉི་ཤུ་ (Tibet Brief 20/20) ཞེས་པ་དང་། སློབ་དཔོན་ལའོ་ཡིས་བརྩམས་པའི་དཔེ་དེབ་བོད་ནི་གནའ་སྔ་མོ་ནས་རྒྱ་ནག་གི་ཆ་ཤས་མིན་ཞེས་པ་ངོ་སྤྲོད་གནང་སྟེ། དེ་དག་གིས་རྒྱལ་སྤྱིའི་སྤྱི་ཚོགས་ལ་བོད་ཀྱི་གནད་དོན་རྒྱུ་མཚན་ལྡན་པའི་ཐོག་ནས་འགྲེལ་བཤད་རྒྱག་གིན་ཡོད་པ། དེ་བཞིན་ཉེ་ཆར་༧གོང་ས་རྒྱལ་རིན་པོ་ཆེ་མཆོག་གིས་མཛད་པའི་ཕྱག་དེབ་བོད་དང་བོད་མིའི་མགྲིན་ཚབ་ཅེས་པ་བཅས་བཀླག་དགོས་པའི་སྐུལ་མ་གནང་ཡོད།
བློ་བཟང་སྒྲོལ་མས་བོད་མིའི་སྒྲིག་འཛུགས་ཀྱི་དྲ་རྒྱ་ལས་བསྡུ་སྒྲིག་བྱས།
