༧སྐུའི་གོ་སྟོན་དང་འབྲེལ་བོད་ནང་དུ་དམ་དྲག་ཤུགས་ཆེན་བྱེད་བཞིན་འདུག

བོད་ནང་གི་བོད་མི་ཚོས་རྣམ་པ་འདྲ་མིན་གྱི་ཐོག་ནས་༧སྐུའི་གོ་སྟོན་སྲུང་གཙི་ཞུ་བཞིན་ཡོད་ཀྱང་། རྒྱ་ནག་གཞུང་གིས་དངོས་ཤུགས་བརྒྱུད་གསུམ་གྱི་ཐོག་ནས་དམིགས་བསལ་བོད་ཀྱི་དགོན་སྡེ་ཁག་ཏུ་དམ་དྲག་ཤུགས་ཆེན་བྱེད་བཞིན་འདུག

The BBC visited the Kirti monastery in Aba as the Dalai Lama turned 90

༧གོང་ས་རྒྱལ་བ་རིན་པོ་ཆེ་མཆོག་གི་སྐུའི་འཁྲུངས་སྐར་བསླེབ་ལ་ཉེ་སྐབས། ཉེ་ལམ་རྒྱལ་སྤྱིའི་གསར་ཁང་བྷི་བྷི་སིའི་གསར་འགོད་པ་དངོས་སུ་བོད་མདོ་སྨད་རྔ་བ་ཀིརྟི་དགོན་དུ་ཕྱིན་ནས་གནས་ཚུལ་རྒྱུས་ལོན་བྱས་པ་བརྒྱུད། ༧སྐུའི་གོ་སྟོན་དང་བསྟུན་རྒྱ་ནག་གཞུང་གིས་བོད་ནང་གི་དགོན་སྡེ་ཁག་ཏུ་སྔར་ལྷག་གིས་དམ་དྲག་ཤུགས་ཆེན་བྱེད་བཞིན་པ་གསལ་སྟོན་བྱས་འདུག

དེ་འབྲེལ་བྷི་བྷི་སི་གསར་ཁང་གིས་བརྙན་ཐུང་ཞིག་སྤེལ་བའི་ནང་། གསར་འགོད་པ་ཞོགས་པར་ནམ་མ་ལངས་གོང་ནས་རྒྱ་ནག་གིས་བཙན་བཟུང་བྱས་པའི་བོད་ནང་གི་རྔ་བ་ཀིརྟི་དགོན་དུ་ཕྱིན། སྐབས་དེར་དགོན་པ་དེའི་གྲྭ་པ་རྣམས་སྔ་དྲོར་ཞལ་འདོན་ཆེད་དུ་འདུ་འཛོམས་བྱེད་མགོ་འཛུགས་བཞིན་འདུག དེ་ཡང་རྒྱ་ནག་གཞུང་གིས་བོད་ནང་གི་དགོན་སྡེ་ཁག་ཏུ་སྔར་ལྷག་གིས་དམ་དྲག་དང་སོ་ལྟ་ཤུགས་ཆེན་བྱེད་བཞིན་ཡོད་པ་མ་ཟད། དགོན་པ་དེའི་ནང་དུ་༧གོང་ས་རྒྱལ་བ་རིན་པོ་ཆེ་མཆོག་གི་སྐུ་པར་གཅིག་ཀྱང་མེད་པ་དང་། རྒྱ་གཞུང་གིས་༧གོང་ས་མཆོག་གི་སྐུ་པར་ཉར་འཇོག་བྱེད་པ་ནི་ཁྲིམས་འགལ་ཞིག་ལ་ངོས་འཛིན་གྱི་ཡོད་འདུག་ལ། དགོན་སྡེ་ཁག་གི་གྲྭ་པ་སོགས་ལ་སྐད་ཆ་བཤད་པར་ཉེན་ཁ་ཧ་ཅང་ཆེ་ནའང་། གྲྭ་པ་ཁག་ཅིག་གིས་བཅར་འདྲི་དང་ལེན་གནང་སོང་། ཞེས་གསལ་འདུག

བརྙན་ཐུང་དེའི་གྲྭ་པ་ཁག་ཅིག་གིས་ལན་འདེབས་བྱས་པའི་ནང་། ད་ལྟའི་ཆར་བོད་ནང་གི་གནས་སྟངས་ཡག་པོ་མི་འདུག ཅེས་དང་། ཡང་གྲྭ་པ་གཞན་ཞིག་གིས་ཞེད་སྣང་དང་འཛེམ་ཟོན་མེད་པའི་ཐོག་ནས་རྒྱ་ནག་དམར་གཞུང་གིས་བོད་ཀྱི་མཁའ་རླུང་ནང་དུག་བླུགས་ཡོད། ང་ཚོ་བོད་མི་རྣམས་ཀྱི་གཞི་རྩའི་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་གཏོང་བཞིན་ཡོད་པ་དང་། རྒྱ་གཞུང་གིས་ང་ཚོར་མུ་མཐུད་དུ་དྲག་གནོན་དང་ཁྲིམས་ཆད་གཏོང་གི་འདུག བོད་ནང་དུ་གཞུང་གིས་མང་ཚོགས་ལ་ཞབས་འདེགས་ཞུ་ཡི་མེད་ལ། འདི་ནི་དངོས་ཡོད་གནས་སྟངས་ཤིག་རེད། ཅེས་བོད་ནང་གི་གནས་སྟངས་གསལ་བཤད་བྱས་འདུག་ལ། རྒྱ་ནག་གཞུང་གིས་བོད་ནང་གི་བོད་མི་རྣམས་ལ་ཆོས་དད་རང་མོས་ཡོད་ཚུལ་རྗོད་ཀྱིན་ཡོད་ཀྱང་། དོན་དངོས་སུ་བོད་ནང་གི་གྲྭ་པ་དེ་དག་གིས་རྒྱ་ནག་དམར་གཞུང་གིས་བོད་ནང་བོད་མིའི་ངོ་བོ་དང་། ནང་པའི་ཆོས་ལུགས་སོགས་རྩ་མེད་གཏོང་ཐབས་བྱེད་ཀྱི་ཡོད་སྐོར་སོགས་གསལ་བོར་ཐེར་འདོན་བྱས་འདུག

ཡང་འདི་གའི་གསར་འགོད་པར་བོད་ནང་གི་བོད་མི་ཞིག་གིས། ད་ལྟ་བོད་ནང་དུ་༧སྐུའི་གོ་སྟོན་གྱི་མཛད་སྒོ་ཆུང་ཆུང་སྐོར་ཞིག་སྲུང་གཙི་ཞུ་ཡི་འདུག དེའི་སྐོར་དེ་རྒྱ་ནག་དམར་ཤོག་གཞུང་གིས་ཤེས་མི་ཉན་པ་གཞིར་བཞག་རེད། བཙན་བྱོལ་སྤྱི་ཚོགས་ནང་དུ་གོ་སྟོན་སྲུང་གཙིའི་མཛད་སྒོ་ཡོད་པའི་སྟེང་། བོད་ནང་དུ་ཁ་ཤས་ཤིག་བརྟན་བཞུགས་ཀྱི་ཆོ་གའི་རྣམ་པ་རེད། ཁག་ཅིག་གིས་སྨོན་ལམ་རྒྱག་པ་དང་། སྙུང་གནས་སྲུང་བ་སོགས་ཆོ་གའི་ཕྱག་ལེན་མང་པོ་ཞིག་སྒྲུབ་ཀྱི་ཡོད། འོན་ཀྱང་། རྒྱ་ཆེན་པོ་མ་རེད། སོ་སོའི་རང་སྟེང་ནས་ཚོགས་པ་ཆུང་ཆུང་དང་། དགོན་སྡེ་ཁག་དང་འཛིན་གྲྭ སྡེ་བ་སོགས་ཀྱི་ཚོགས་པ་ཆུང་ཆུང་འཛོམས་ནས་གོ་སྟོན་གྱི་མཛད་སྒོ་འཚོག་བཞིན་ཡོད་པའི་རིགས་འདུག ཅེས་བརྗོད་བྱུང་།

གཞན་ཡང་། ད་ལྟ་བོད་ནང་གི་ས་ཁུལ་མང་པོར་༧གོང་ས་མཆོག་གི་སྐུའི་གོ་སྟོན་གྱི་དུས་ཆེན་དང་བསྟུན། བོད་མི་མང་པོ་ལྷན་འཛོམས་བགྱིས་ཏེ། དགའ་སྟོན་བྱེད་པ་དང་། རིག་རྩལ་དགོང་ཚོགས་བསྡུ་བ། རྟ་རྒྱུག་འགྲར་སྡུར་བྱེད་པ། གླུ་དབྱངས་དང་སྙན་ངག་སོགས་སྒྱུ་རྩལ་གྱི་ལམ་ནས་བསྟོད་པའི་མཆོད་པ་འབུལ་བཞིན་པ་སོགས་རྒྱུན་ལྡན་མིན་པའི་འགུལ་སྐྱོད་ཅིག་བརྒྱབ་དང་རྒྱག་བཞིན་པ་རེད་འདུག

ཟླ་འདིའི་ཕྱི་ཚེས་ ༢ ཉིན་༧གོང་ས་རྒྱལ་བ་རིན་པོ་ཆེ་མཆོག་ནས་རྒྱལ་དབང་སྐུ་ཕྲེང་རྒྱུན་མཐུད་ཕེབས་ངེས་ཡིན་པའི་གསལ་བསྒྲགས་བསྐྱངས་གནང་མཛད་པ་དང་། ཡང་སྲིད་ངོས་འཛིན་གྱི་བྱེད་སྒོའི་འགན་འཁུར་གཙོ་བོ་ཏཱ་ལའི་བླ་མའི་བླ་བྲང་དགའ་ལྡན་ཕོ་བྲང་ཡིད་ཆེས་དགེ་རྩའི་དབང་ལྡན་འགན་འཛིན་རྣམས་ལ་ཡོད་པ་དང། ཁོ་ཚོས་བོད་བརྒྱུད་ནང་བསྟན་ཆོས་བརྒྱུད་ཁག་གི་དབུ་ཁྲིད་བླ་ཆེན་རྣམ་པ་དང། ༸རྒྱལ་དབང་སྐུ་ཕྲེང་ན་རིམ་དང་ལུས་དང་གྲིབ་བཞིན་འགྲོགས་པའི་དམ་ལྡན་ཆོས་སྲུང་ཁག་ལ་སྐབས་བསྟུན་ལམ་སྟོན་ཞུས་ཏེ་ཡང་སྤྲུལ་རྩད་གཅོད་ངོས་འཛིན་སྔོན་སྲོལ་བཞིན་བྱ་རྒྱུ་ལས། གཞན་སུས་ཀྱང་ཐེ་བྱུས་མི་ཆོག་པའི་གནས་བབས་ལ་འགྱུར་བ་གང་ཡང་མེད། ཅེས་གསུངས།

༧རྒྱལ་དབང་སྐུ་ཕྲེང་རྒྱུན་མཐུད་ཕེབས་ངེས་ཡིན་པའི་གསལ་བསྒྲགས་ཀྱི་ཐད་རྒྱ་ནག་གཞུང་གིས་ངོ་རྒོལ་བསྒྲགས་གཏམ་ཞིག་སྤེལ་བའི་ནང་། ༧གོང་ས་མཆོག་ནས་ཡང་སྲིད་གནད་དོན་དང་འབྲེལ་ནས་ཡོངས་ཁྱབ་གསལ་བསྒྲགས་མཛད་པར་ངོས་ལེན་མེད། ༧སྐུའི་ཡང་སྲིད་ངོས་འཛིན་གནང་ཕྱོགས་ཀྱི་བདག་དབང་ཡོངས་རྫོགས་རྒྱ་ནག་གཞུང་ཁོ་ནར་ཡོད་པ་མ་ཟད། ༧གོང་ས་མཆོག་གི་ཡང་སྲིད་ངོས་འཛིན་བྱེད་ཕྱོགས་དེ་རྒྱ་ནག་གི་ཁྲིམས་དང་མཐུན་དགོས་ལུགས་སོགས་བསྒྲགས་ཡོད།

གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། སྐལ་བཟང་སྦྱིན་པ།