རྩོམ་ཁུངས། བོད་ཀྱི་དུས་བབ།
རྩོམ་པ་པོ། ཆབ་མདོ་ངག་ཕུན།
སྔོན་གླེང།
དེ་ཡང་སྤྱོད་འཇུག་ལས། སྔོན་ཆད་མ་བྱུང་བ་ཡང་འདིར་བརྗོད་པར་མེད། །སྡེབ་སྦྱོར་མཁས་པའང་བདག་ལ་ཡོད་མིན་ཏེ། །དེ་ཕྱིར་གཞན་དོན་བསམ་པའང་བདག་ལ་མེད། །རང་གི་ཡིད་ལ་བསྒོམ་ཕྱིར་ངས་འདི་བརྩམས། །ཞེས་གསུངས་པའི་དོན་ལྟར། མགོན་པོ་མཆོག་བོད་མི་རིགས་དང་། གང་ལྟར་སངས་རྒྱས་བསྟན་པར་བཀའ་དྲིན་ཆེན་པོ་ཡིན་པ་ཤེས་པའི་ཐོག་ནས་བྲིས་པ་ཞིག་ཡིན། རང་ཉིད་ལ་དེ་འདྲ་ཞིག་འབྲི་བའི་ཤེས་ཚད་སོགས་གང་ཡང་མེད་ནའང་། ཁོང་གི་མཛད་པ་འཕྲིན་ལས་རྒྱ་མཚོའི་ནང་ནས་ཆུ་ཐིག་ཙམ་ཞིག་བརྗོད་པར་ག་ལ་ནུས། ཡིན་ནའང་བཀའ་དྲིན་རྗེས་དྲན་ཞུ་རྒྱུ་ནི་གལ་ཆེའི་གནད་དོན་ཞིག་ཡིན་པས། རང་ཉིད་ཀྱི་ཇི་ཤེས་པ་ཙམ་བྲིས་པའི་ཁུལ་ཡིན་པ་དང་། ལྷག་དོན་ལོ་འདིར་མགོན་པོ་མཆོག་ད་ལོ་དགུང་གྲངས་དགུ་བཅུར་ཕེབས་ཀྱི་ཡོད་པར་བརྟེན། མགོན་པོ་མཆོག་ལ་བཀའ་དྲིན་རྗེས་དྲན་མཚོན་ཆེད་དུ་བྲིས་པ་ཞིག་ཡིན་པས། མགོན་པོ་མཆོག་སྐུ་ཚེ་རིང་དུ་བརྟན་ཞིང་། ཐུགས་བཞེད་ལྷུན་གྱིས་འགྲུབ་པར་སྨོན་ལམ་དང་བཅས།
གངས་ལྗོངས་ལྷ་མི་ཡོངས་ཀྱི་སྟོན་པ།
དེ་རིང་གླེང་འདོད་པ་ནི་སླེབས་ལ་ཉེ་བའི་གོ་སྟོན་སྐོར་ཡིན་ཞིང་། དེ་ཡང་བོད་མི་རིགས་ལ་བཀའ་དྲིན་བླ་ན་མེད་པ་༸རྒྱལ་བ་རིན་པོ་ཆེ་མཆོག་དགུང་ལོ་དགུ་བཅུར་ཕེབས་ཀྱི་ཡོད་ཅིང་། དེ་ཡང་ཕྱི་ལོ་ ༡༩༥༠ ཟླ་ ༡༡ ཚེས་ ༡༧ ཉིན་བོད་ཀྱི་ཆོས་སྲིད་གཉིས་ཀྱི་ཐུགས་འགན་བཞེས་དགོས་བྱུང་ཡོད་པ་དང་། དུས་སྐབས་དེར་བོད་ཀྱི་ཆབ་སྲིད་ཆགས་འཇིག་གི་སོ་མཚམས་དེར་དགུང་ལོ་བཅུ་དྲུག་ལས་ཕེབས་མེད་ནའང་ཐུགས་སྟོབས་ཆེན་པོས་ཆབ་སྲིད་ཀྱི་ཐུགས་འགན་བཞེས་ཏེ་བོད་མི་རིགས་ཀྱི་བདེན་དོན་ཆེད་དུ་ཡོད་ཚད་བློས་བཏང་མཛད་ཡོད།
དེ་ཡང་འཛམ་གླིང་ཆབ་སྲིད་ཀྱི་འཕོ་འགྱུར་ཆེ་བའི་དུས་སྐབས་དེ་དང་། ལྷག་པར་བོད་ཀྱི་ཆབ་སྲིད་ཧ་ཅང་ཛ་དྲག་ཆེ་བའི་དུས་སྐབས་དེར་༸རྒྱལ་བ་རིན་པོ་ཆེའི་བོད་མི་རིགས་ཀྱི་ཆོས་སྲིད་གཉིས་ཀྱི་ཐུགས་འགན་བཞེས་དགོས་བྱུང་ཡོད། དེ་ཡང་བོད་ཀྱི་ཆབ་སྲིད་ལོ་མང་སྔོན་ནས་འཐུས་ཤོར་ཕྱིན་ཟིན་པ་ཞིག་དུས་སྐབས་ཛ་དྲག་གི་སྐབས་སུ་ལས་ཀྱི་སྣེ་མོ་བ་ཚོས་ང་མིན་ཁོ་མིན་བརྗོད་དེ་དགུང་ལོ་བཅུ་དྲུག་ལས་ཕེབས་མེད་པའི་གཞོན་ནུ་ཞིག་གི་ལག་ཏུ་རྩིས་སྤྲད་པ་རེད། དགུང་ལོ་བཅུ་དྲུག་ཟེར་དུས་བསླབ་པ་སློབ་གཉེར་གནང་བའི་དུས་ཚོད་གཅིག་ལས་ཆོས་སྲིད་ཀྱི་ཐུགས་འགན་བཞེས་པའི་དུས་ཚོད་ལ་ཕེབས་མེད། ཡིན་ནའང་ཁོང་གིས་ཐེ་ཚོམ་དང་འབྲེལ་བའི་ཐོག་ནས་བོད་ཀྱི་ཆབ་སྲིད་ཀྱི་ཐུགས་འགན་བཞེས་དགོས་བྱུང་ཡོད།
དེ་ཡང་མཛད་རྣམ་ལས། (༡) བོད་ཤར་ཕྱོགས་སུ་གནས་ཚུལ་ཛ་དྲག་ཅན་ཤིན་ཏུ་སྡུག་པོ་དེ་ལྟར་ཡོང་སྐབས་ལྷ་སར་བོད་གཞུང་ནས་ལྷ་དང་། བླ་མ་ཆེ་ཁག་ཚོར་སློབ་སྟོན་ཞུས་ཏེ། ཁོང་ཚོའི་བསླབ་བྱའི་ལམ་སྟོན་གྱིས་བཀའ་ཤག་ནས་བོད་ཀྱི་འགན་དབང་ཕྲན་ནས་འཛིན་དགོས་བརྗོད་བྱུང་། ལྷ་བླའི་ལུང་བསྐུལ་དེ་ལྟར་བྱས་ན་ཡང་། སྐབས་དེར་ང་ལོ་བཅུ་དྲུག་ལས་མ་སོན་ཞིང་། ཆོས་ཀྱི་སློབ་གཉེར་བྱ་རྒྱུ་མང་པོ་བསྡད་ཡོད་པ་མ་ཟད། འཛམ་གླིང་གི་གནས་ཚུལ་ཤེས་རྒྱ་ཆུང་ཞིང་། སྲིད་དོན་གྱི་ཉམས་མྱོང་གང་ཡང་མེད། དེར་བརྟེན་ངས་ཐོག་མར་བཀའ་ཤག་ལ་རྒྱལ་དབང་གོང་མས་ལུགས་གཉིས་ཀྱི་འགན་དགུང་ལོ་བཅོ་བརྒྱད་ཙམ་ལ་བཞེས་པར་བརྟེན་ད་ལྟ་ལོ་ན་ཆུང་བས་འགན་འཁུར་མི་ཐུབ་ཚུལ་བརྗོད་པ་ཡིན། ཞེས་གསལ་དོན་ལྟར་དུས་སྐབས་ཧ་ཅང་ཛ་དྲག་གི་གནས་སྟངས་འདི་འདྲའི་སྐབས་སུ་རང་གཞུང་གི་ལས་ཀྱི་སྣེ་མོ་བ་ཚོས་རྣམ་རིག་བསྒྲིམ་ནས་སྲིད་ཀྱི་ལས་དོན་གནང་དགོས་ནའང་། རང་གཞུང་གི་ལས་ཀྱི་སྣེ་མོ་བ་ཚོའི་ང་མིན་ཁོ་མིན་བརྗོད་ནས་ཆབ་སྲིད་ལ་གཡོལ་གང་ཐུབ་བྱས་ནས་གོང་ཞུས་ལྟར་དགུང་ལོ་བཅུ་དྲུག་ལས་ཕེབས་མེད་པའི་གཞོན་ནུ་ཞིག་གི་ལག་ཏུ་རྩིས་སྤྲད་པ་རེད།
དུས་སྐབས་ཛ་དྲག་དེ་འདྲར་ཁོང་གིས་ཐུགས་སྟོབས་ཞུམ་པ་མེད་པའི་བོད་ཀྱི་ཆོས་སྲིད་གཉིས་ཀྱི་ཐུགས་འགན་བཞེས་གནང་མཛད། ལམ་ལུགས་རྙིང་པ་མུ་མཐུད་དུ་ཕྱིན་པ་ཡིན་ན་བོད་འདི་ཉིད་ནམ་ཡང་ཡར་རྒྱས་ཀྱི་ཁ་ཕྱོགས་སུ་མི་འགྲོ་བ་དངོས་སུ་གཟིགས་ཏེ། དང་ཐོག་ཛ་དྲག་ཆེ་བའི་ལེགས་བཅོས་སྤྱི་ཚོགས་གསར་འཛུགས་ཤིག་དངོས་སུ་དབུ་བཙུགས་མཛད། དེའི་ནང་དེ་སྔོན་ལོ་མང་མི་དམངས་དཀྱུར་མས་ཁྲལ་རིགས་སྤྲད་མ་ཐུབ་ནས་མ་ལས་བུ་ཆེ་བ་ཞེས་པ་ལྟར་གྱུར་ཡོད་པས། དེ་དག་གཙང་མ་བཟོས་གནང་མཛད་ཅིང་། དེ་ཡང་རྒྱལ་བའི་མཛད་རྣམ་སྙིང་བསྡུས་ལས། (༢) “གཞུང་སྒེར་ཆོས་གསུམ་ལ་བུ་ལོན་རིམ་གསོག་གིས་འཇལ་སྤྲོད་མ་ཐུབ་པའི་མི་སེར་ཉམ་ཐག་རྣམས་ཀྱི་འབྲུ་བུན་རྩ་ཆག་དང་། ངོ་བོ་སྡེབ་སྤྲོད་མི་དགོས་པར་ལོ་དུས་རིམ་སྤྲོད་ཐུབ་པའི་རིགས་ལ་སྐྱེད་འབབ་ཆག་ཡང་། འཁོས་ཀ་མི་དམན་ཙམ་ཡོད་པ་རྣམས་ཀྱི་ངོ་སྐྱེད་ལོ་དུས་རིམ་སྤྲོད་བྱ་རྒྱུ། སྐྱེད་ལ་སྐྱེད་རྒྱག་མི་ཆོག་པ། རྫོང་གཞིས་ངོ་གཡོག་སུ་ཐད་ནས་འབམ་ཚོང་སྤུས་བསྒྱུར་དམངས་ལ་བཙན་ཤེད་ཀྱིས་ཚོང་ཟོག་ཉོ་རུ་བཅུག་པ་དང་། མི་མང་ནས་དངུལ་དངོས་བཙན་ལེན་བྱེད་པ། ཆུ་བདག་ཡིན་ཁུལ་གྱིས་ཞིང་ཆུ་བཀག་མི་ཆོག་པ”་སོགས་བཅོས་སྒྱུར་གནང་ཡོད།
སྐབས་དེ་དུས་བོད་ཀྱི་གནས་སྟངས་ཉིན་རེ་བཞིན་ཛ་དྲག་ཅན་དུ་འགྱུར་བཞིན་ཡོད་པར་སོང་། མི་བསད་ཁྲག་སྦྱོར་མི་དགོས་པ་བོད་རྒྱ་གཉིས་ཞི་འགྲིགས་ཡོང་ཐབས་སུ་ཁ་ཞེ་གཉིས་མེད་ཀྱི་ལས་དོན་གནང་ཡོད། རྒྱ་གཞུང་གིས་དེ་ལས་ལྡོག་སྟེ་བོད་མི་རིགས་ཀྱི་སེམས་ཁམས་དང་མི་མཐུན་པའི་ལས་དོན་མང་པོ་བྱས་ཡོད། རྒྱུ་མཚན་དེས་ཉིན་རེ་བཞིན་བོད་སྡོད་རྒྱ་དམར་འགོ་ཁྲིད་ཚོས་བྱེད་སྟངས་དེ་དག་བོད་མི་རྣམས་མི་དགའ་བར་འགྱུར་བཞིན་ཡོད་ལ། བོད་སྡོད་རྒྱ་དམག་ཚོས་ཀྱང་བོད་མི་རྣམས་ལ་མཐོང་ཆུང་དང་། མི་འདོད་པའི་རྣམ་འགྱུར་སྟོན་གྱི་ཡོད།
བོད་ཀྱི་ཆབ་སྲིད་ཀྱི་རྙོག་འཛིང་ཆེ་བའི་སྐབས་དེར་སློབ་གཉེར་ཡང་འཐུས་ཤོར་མེད་པ་མཛད་ཅིང་། ཕྱི་ལོ་ ༡༩༥༩ ལོར་ལྷ་ལྡན་སྨོན་ལམ་ཆེན་མོར་གཞུང་ཆེན་ཁག་ལ་གསན་སྦྱོང་ལེགས་པར་ཟིན་པའི་རྟགས་སུ་སེར་འབྲས་དགའ་གསུམ་གྱི་མཁས་དབང་བརྒྱ་ཕྲག་འཛོམས་པའི་དབུས་སུ་གཞུང་ཆེན་ཁག་གི་དཀའ་གནད་ལས་བརྩམས་ཏེ་བརྒལ་བརྟག་གི་བགྲོ་གླེང་འབུལ་སྐབས། གསུང་ལན་ཐོགས་མེད་དུ་སྩལ་ཏེ་མཁས་པ་རྣམས་ཡིད་རང་དབང་མེད་པ་འཕྲོག་པར་མཛད།
བསླབ་པ་མཐར་སོན་རྗེས་རྒྱ་མིའི་དམག་སྒར་དུ་ཟློས་གར་འཁྲབ་སྟོན་གཟིགས་འབུལ་ལ་གདན་འདྲེན་ཞུ་རྒྱུ་ཡིན་ཚུལ་ཨུ་ཚུགས་ཀྱིས་བརྗོད་དོན་ལྟར་ཆིབས་བསྒྱུར་གནང་རྒྱུའི་བཀའ་བཞེས་གནང་། དེ་དག་རྒྱ་ཆེ་མང་ཚོགས་རྣམས་ཀྱིས་གོ་བ་དང་། མ་སྐུལ་དང་བླངས་ཀྱིས་མི་མང་བརྒྱ་ཕྲག་མང་པོ་ནོར་བུ་གླིང་ཁར་འཛོམས་ནས་༸རྒྱལ་བ་རིན་པོ་ཆེ་རྒྱ་མིའི་དམག་སྒར་དུ་ཆིབས་སྒྱུར་མ་གནང་རོགས་ཞེས་ནོར་གླིང་གི་མཐའ་ཡོངས་སུ་བསྐོར་ནས་ཉིན་རེ་བཞིན་ཛ་དྲག་གི་གནས་སྟངས་སུ་འགྱུར་བཞིན་ཡོད།
སྐབས་དེར་རྒྱ་མིས་དུས་རྒྱུན་༸རྒྱལ་བ་རིན་པོ་ཆེ་ཆིབས་སྒྱུར་གནང་དུས་སྐུ་སྲུང་སོགས་ཁྲིད་གནང་མཛད་ཀྱི་ཡོད་པས་དེ་དག་ད་རེས་དགོས་མེད་བརྗོད་པས། དེ་ལས་ཀྱང་རྒྱ་དམར་གྱིས་མཐར་ཐུག་གི་དམིགས་ཡུལ་གང་ཞིག་ཡིན་པ་གསལ་པོ་རྟོགས་པར་གྱུར།
དེང་ཡང་རྒྱལ་བའི་མཛད་རྣམ་སྙིང་བསྡུས་ལས། (༣) “དོན་སྙིང་བོ་ཁོ་པས་བརྗོད་དོན། སང་ཉིན་ཏཱ་ལའི་བླ་མ་ཕེབས་སྐབས་རྣམ་ཀུན་རང་སྐྱོང་ལྗོངས་གྲ་སྒྲིག་ཨུ་ཡོན་ལྷན་ཁང་ལ་ཕེབས་པའི་ལམ་ལྟར་སྐུ་སྲུང་དམག་མི་མཉམ་ཁྲིད་མི་ཆོག །གལ་སྲིད་གཉིས་གསུམ་ཞིག་མཉམ་ཁྲིད་གནང་ནའང་མཚོན་ཆ་འཁྱེར་མི་ཆོག་པར་མ་ཟད། ཕེབས་ལམ་དུ་བོད་དམག་འགྲེམས་འཇོག་བྱེད་པ་དེ་ཡང་ཉེ་འཁྲིས་རྡོ་ཟམ་བརྒལ་ཏེ་འགྲེམས་འཇོག་མི་ཆོག་”ཅེས་བརྗོད་པས། གོང་གི་རྒྱ་དཔོན་གྱི་བརྗོད་ཚིག་དེ་ལས་གང་ཞིག་བྱ་རྩིས་ཡིན་པ་གསལ་པོ་ཤེས་ཐུབ།
གནས་སྟངས་ཛ་དྲག་དེ་འདྲའི་འོག་ནས་བོད་མི་རིགས་དང་། ཡང་སྒོས་སངས་རྒྱས་པའི་དོན་དུ་ངལ་བ་ཁྱད་བསད་ཀྱིས་ལ་ལུང་མང་པོ་བརྒལ་ནས་བཙན་བྱོལ་ལ་ཕེབས་དགོས་བྱུང་ཡོད། དང་ཐོག་མ་སུ་རིར་བཞུགས་གནང་མཛད་པ་དང་། དེ་ནས་ཧི་མ་ཅལ་མངའ་སྡེ་དྷ་རམ་ས་ལར་ཕེབས་གནང་མཛད་ནས་རིམ་གྱིས་འཆར་གཞི་གོ་རིམ་ལྡན་པ་དབུས་ལྷན་ཁག་རིམ་པའི་གསར་འཛུགས་མཛད།
བོད་མི་རིགས་རྒྱུན་གནས་ཐུབ་དགོས་ན་རང་རེའི་ན་གཞོན་རྣམས་ལ་གནའ་དེང་ཡ་མ་བྲལ་བའི་ཤེས་ཡོན་སྤྲོད་རྒྱུ་དེ་ཡང་ཁ་ཚ་དགོས་གཏུགས་ཀྱི་ལས་དོན་ཞིག་ཡིན་དུས། ཕྱི་ལོ་ ༡༩༦༠ ཟླ་ ༣ ཚེས་ ༣ ཉིན་མ་སུ་རི་བཞུགས་སྒར་དུ་བོད་པའི་སློབ་གྲྭ་ཐོག་མར་སློབ་ཕྲུག་གྲངས་ལྔ་བཅུ་ཡོད་པའི་སློབ་གྲྭ་གསར་འཛུགས་ཀྱི་དབུ་བཞུགས་མཛད་སྒོ་བསྐྱངས་ཡོད།
དེ་ནས་རྒྱ་གར་གྱི་སྲིད་བློན་ནེ་ཧ་རུ་མཆོག་གི་བཀའ་འཁྲོལ་བཟང་པོ་བརྒྱུད་རིམ་པའི་བོད་ཕྲུག་རྣམས་ལ་བོད་མི་ཁེར་གཙང་སློབ་གྲྭ་ཟུར་འཛུགས་མཛད་པར་བརྟེན་བོད་མི་རིགས་ཀྱི་མ་འོངས་པའི་སོན་རྩ་རྣམས་གནའ་དེང་ཡ་མ་བྲལ་བའི་བོད་ཕྲུག་གསོ་སྐྱོང་གནང་ཐུབ་པ་བྱུང་ཡོད།
དེ་ཡང་བཙན་བྱོལ་ནང་གི་བྱུང་བ་བརྗོད་པ་ལས། (༤) “གཞི་རྩའི་མི་རིགས་རང་ཉིད་ཀྱི་ཐུན་མོང་མ་ཡིན་པའི་ཆོས་དང་། རིག་གཞུང་། གོམས་གཤིས་བཟང་པོ་རྣམས་མི་ཉམས་རྒྱུན་འཛིན་གསོན་གནས་ཐུབ་པ་དང་། སྒོས་སུ་བོད་རང་དབང་བསྐྱར་གསོའི་སོན་རྩ་བུ་རྒྱུད་རྣམས་ལ་དེང་རབས་ཀྱི་ཤེས་ཡོན་སྤྲོད་རྒྱུར་བོད་ཕྲུག་ཁེ་གཙང་དུ་གནས་པའི་སློབ་གྲྭ་གང་མང་གསར་འཛུགས་ཡོང་བའི་ཐུགས་རེ་ཞུ་སྐུལ་མཛད་པ།” ཞེས་གསལ་དོན་ལྟར་ཞལ་བཞེས་ཐུབ་ནས་ད་ལྟ་བོད་ཕྲུག་ཁེ་གཙང་སློབ་གྲྭ་དུ་མ་ཞིག་གསར་འཛུགས་གནང་ཐུབ་པ་བྱུང་ཡོད།
དེ་བཞིན་བོད་མི་བཙན་བྱོལ་ལ་ཕེབས་མཁན་རྣམས་ལ་སྡོད་སྒར་དགོས་པ་ཡིན་དུས། ༸གོང་ས་རྒྱལ་བ་རིན་པོ་ཆེ་མཆོག་ནས་རྒྱ་གར་གྱི་སྲིད་བློན་ནེ་རུ་མཆོག་ལ་བོད་མི་ཁེ་གཙང་ཟུར་དུ་གསར་འཛུགས་ཡོང་བའི་རེ་བསྐུལ་ཞུ་དོན་ལྟར་གནང་བ་ཐོབ་སྟེ་བོད་མིའི་གཞིས་ཆགས་ཐོག་མ་ཕྱི་ལོ་ ༡༩༦༠ ཟླ་ ༡༢ ཚེས་ ༡༦ ཉིན་མེ་སོར་ལུགས་ཟུང་བསམ་གྲུབ་གླིང་ཞེས་བོད་མི་གྲངས་ ༣༠༠༠ ཡོད་པའི་གཞིས་ཆགས་གསར་འཛུགས་མཛད་ཡོད་པ་རེད། དེ་ནས་རིམ་གྱིས་རྒྱ་བལ་འབྲུག་གསུམ་ནང་སོ་ནམ་གཞིས་ཆགས་གྲངས་ ༢༦ དང་། བཟོ་གཞིས་འདྲེས་མ་གྲངས་ ༡༦ བཟོ་ལས་རྐྱང་པ་གྲངས་ ༡༡། རང་འཚོ་ས་གནས་ཁག་ ༡༡ བཅས་བོད་ཁ་ཕུད་གཞིས་ཆགས་ཟུར་བཙུགས་ཐུབ་པ་བྱུང་བ་དེ་དག་ནི་བོད་མིའི་ཆོས་དང་། རིག་གཞུང་མི་ཉམས་པར་གསོན་པོར་གནས་པར་རྨད་བྱུང་གི་ལས་དོན་རླབས་ཆེན་ཞིག་བྱུང་ཡོད་པ་ནི་བརྗོད་མ་དགོས།
ད་ལྟ་འཛམ་གླིང་འདིའི་ཐོག་ཏུ་བོད་མི་རིགས་ཞེས་གསོན་པོར་གནས་ཐུབ་པ་དེ་ནི་མགོན་པོ་མཆོག་གི་ཐུགས་བཞེད་བཀའ་དྲིན་ལས་བྱུང་བ་ཞིག་ལོས་ཡིན། དང་ཐོག་བོད་མི་རྣམས་རྒྱ་གར་ས་ཐོག་ཏུ་འབྱོར་དུས་ངོ་ཤེས་པ་ནི་གནམ་དང་ས་ལས་མེད་ཅིང་། སྐད་ཡིག་དང་གོམས་གཤིས་མི་གཅིག་པའི་མི་རིགས་གཅིག་གི་དཀྱིལ་ལ་འཚོ་བ་རོལ་དུས་དཀའ་ངལ་ཡོད་པ་ནི་བརྗོད་མ་དགོས་པ་ཞིག་རེད། དཀའ་ངལ་དེ་དག་ལ་གདོང་ལེན་གནང་སྟེ་འགྱེལ་ས་ནས་སླར་ལངས་ཐུབ་པ་བྱ་རྒྱུ་ནི་གལ་ཆེའི་གནད་དོན་ཞིག་ཡིན་པར་དགོངས་ནས་བོད་མི་ཚོས་ནུས་ཤུགས་ཡོད་ཚད་བཏོན་ནས་བོད་མི་རིགས་འཛམ་གླིང་འདིའི་ཐོག་ཏུ་གནས་ཐུབ་པ་བྱུང་ཡོད།
ཚན་པ་དང་པོ། https://tibettimes.net/2025/07/14/243916/
